Астаналық полицейлер автобус жүргізушілерінің ЖҚЕ бұзған 200 оқиғаны анықтады

«Автобус» жедел-профилактикалық шарасы барысында 2 күннің ішінде полицейлер жолаушылар автобусының жүргізушілері жіберген жол қозғалысы ережесін бұзған 224 фактіні анықтады, деп хабарлайды Астана әкімдігінің ресми сайты.
Оның 38 фактісі – қоршаған ортаны ластау (пайдаланылған газ) және шу деңгейі. Сондай-ақ жаяу жүргіншілер жолында жол бермей өтіп кеткен 2 факті мен рульде келе жатып телефонмен сөйлескен 17 оқиға анықталды.

Астана ІІД баспасөз қызметі айтқандай, «Автобус» жедел-алдын алу шарасы астана төңірегінде 9-13 қазан аралығында апаттың болуын төмендету мақсатында жүргізушілердің жолаушылар мен жүктерді тасымалдау ережесін бақылауды күшейту үшін өткізді.

ЖПШ өткізу кезеңінде жолаушылар автотранспортының жүргізушілері тарапынан ЖҚЕ қатаң бұзғандардың жолын кесу және анықтау бойынша рейдтік шаралар өткізілуде. Сондай-ақ автобустардың техникалық жағдайы, норматив пен стандарт талаптары бұзылған автобусты пайдалану және басқару фактілері анықталуда, жүргізушілердің еңбек және демалыс режимі мен жолаушыларды тасымалдаудағы бекітілген нормаларды сақтауы да тексерілді. Бұған қоса, полиция қызметкерлері қалалық автобустардың техникалық жағдайы мен жүргізушілердің жол қозғалысы ережесін сақтағанына да көңіл бөліп бақылады.

Бүгінде шараға бақылау үшін әкімшілік полиция және жергілікті полиция қызметкерлерінен, Астана бойынша көлік бақылау инспекциясы, мемлекеттік кірістер департаменті мен қоғам мүшелерінен құралған 10 топ жұмылдырылды.