Астанада тегін дәретханалардың желісі кеңейтіледі

Елордада бірден алты модульді дәретхана орнатылды, деп хабарлайды қала әкімдігінің медиа-орталығы.«Бүгінгі күні Астанада алты модульді дәретхана орнатылды: «Арай», «Ғашықтар» саябақтары, теннис алаңының аумағы, орталық саябақ, «Көрме» орталығы мен «ЭКСПО-2017» көрмесінің аумағына жақын Ұлы дала даңғылы», — деп хабарлады «CLC Company» ЖШС мердігер мекеменің директоры Евгений Чирьев, медиаорталық тілшісіне.

Жаңа қоғамдық дәретханалар шағын әрі заманауи келбетте, ал ең бастысы — экологиялық стандарттарға сай. Қондырғы екі шағын кабинадан тұрады. Мүмкіндігі шектеулі жандарға арналған арнайы пандустар орнатылған, сұйық сабын мен қағаз орамалдарға арналған диспенсерлер де бар.

Қоғамдық дәретханалар келушілер үші тегін, деп сендірді Елорда әкімдігі.

«Өндіруші ел – Ресей. Мұндай үлгідегі қондырғылар Мәскеу, Санкт-Петербург сынды Ресейдің көптеген қалаларында бұрыннан қолданылады. Сыртқы келбеті мен құрылғысы қарапайым болғанымен қолайлы әрі берік, — деді мердігер мекеменің өкілі.

Аталған үлгідегі қондырғылардың ерекшелігі сонда, оларды жыл бойы қолдануға беруге болады әрі Астана қаласының климаттық жағдайына бейімделген. Дәретхана кабиналары сағат сайын тазартылады.