Астанада аутизмге шалдыққан балаларға арналған жаңа орталық ашылады

Астана қаласында Болат Өтемұратовтың «Асыл Мирас» Жекеменшік қайырымдылық қоры 16 қыркүйекте «Аутизм. Әлем барлығы үшін ортақ» бағдарламасы шеңберінде Астанада аутизмге шалдыққан балаларға арналған жаңа орталықты ашпақ.

Аталған көп атқарымдық орталық осындай қызметті ұсынатын елордадағы әзірше тұңғыш және жалғыз оңалту-коррекциялық мекеме болмақ. Аутистік спектрдегі бұзылыстары бар 600-ға жуық бала жыл сайын осы бағдарламаға қатыса алады. Балалар мен олардың ата-аналары үшін кәсіби мамандардың көмегі тегін көрсетіледі.
Бұл осы желіге кіретін екінші орталық болып отыр. Алғашқы орталық осы жылдың шілдесінде Алматыда өз жұмысын бастаған. 2016 жылы тура осындай орталықтар Қызылорда және Өскеменде құрылмақ.
Болат Өтемұратовтың «Асыл Мирас» Жекеменшік қайырымдылық қорының «Аутизм. Әлем барлығы үшін ортақ» бағдарламасы аутистік спектрдегі бұзылыстары бар балаларды қалыпты өмірге бейімдеп, оңалтуды және осындай балалар мен олардың отбасыларына қоғамның толыққанды мүшесіне айналуға мүмкіндік беруді көздейді.