Мен темекіні тастадым!

23 жыл бойы жабысып, ет пен қанға сіңіп кеткен жаман әдет өзінің теріс жағынан сыр бере бастады. Таң сәріде тынышы кеткен қарғадай қарқылдап жөтелген күндер-ай (темекіні тартып тұрып) J Сондай бір мезетте сегіз жасар ұлым балконның есігін ашып, мені аяп, маған қараған көздерінен жаман ұялдым. Егер ауруым, көлденеңнен қосылған сырқат болса бір сәрі, бұл кеселді өзім сатып аламын ғой, күн сайын. Тастау керек, темекіні, осы соңғы темекі! Қалған қорап балконның ашық терезесінен әуелей қалықтап, көшедегі шалшық суға былш етті.

30 минут өткен соң…

Жұмысқа бара жатырмын. Машинаның ішіне жайғасқан соң үйреншікті қимылдар. Темекі жоқ. Машинаны от алдырған соң, темекіні тұтататынмын, қазір темекі жоқ. Көңіл-күй құлап қалды))).

2 сағаттан соң…

Баста еш ой жоқ. Так қана темекі, құрығыр))) Бастық бірдеңе деп жатыр, мен оны тыңдаған боп бас изеймін, ойымда темекі.

6 сағаттан соң…

Өліп кететіндей ештеңе жоқ. Шыдауға болады екен. Темекіден құтылуға көмектесетін дәрілер бар ма екен? Интернетті қопарсақ… Табекс… Сатып алдым. Көмектескендей болды. Темекінің тамағымды қылғындырған құрсауы босағандай.

1 күн өткен соң…

Таң сәрі. Күнделікті,атамнан қалған әдет, әдет бойынша, темекі… Жо-жоқ, мен темекі тартпаймын. Тартпасам да, темекі жөтелі кеткен жоқ. Ұлым көрген жоқ. Көрмесе де, естіді.

1 апта өткен соң…

Көк жөтел кетті. Бір қап ұнды пәтерім орналасқан алтыншы қабатқа тоқтамай көтердім, деміккенім жоқ.

Иістердің шырайы ашылғандай. Машинамның ішінен темекі түтінінің ескі иісі шығады. Құдайым-ау, қандай жаман десеңші! Қалай кетіруге болады?

Жаман әдеттен құлан таза айықтым десем өтірік болар еді. Болады темекі тартқым келетін кез. Бірақ, маған анығы – темекі тартудың бір де бір пайдалы жағы жоқ, жақсы әдет болса оны тастау неге өте қиын, әзәзіл дүние.

Қалай болатынын көре жатармыз. Өзім үшін шешкенім: темекіге жол жоқ, мол денсаулықтың да шегі бар. Болымсыз дүниеге оны жұмсау – ақымақтық. ИМХО деуші ме еді?))) 23 жыл ақымақ болдым, сол да жетер.