Құқық қорғаудың ыстық қызметкерлері

Киностан: Құқық қорғаудың ыстық қызметкерлері
Тәртіпке бас иген, түзу жолдан таймайтын, өзгеге үлгі болар полиция қызметкері мен қырсық, қыңыр, алдынан келсең тістеп, артынан барсаң теуіп, итіңді шығаратын «нағыз» коптың үзеңгілес болуы — арғы-бергі кино тарихында талқыға түсіп, тізесі шыққан тақырыптардың бірі. «Социалистік Қазақстанға» салсақ, сондайдың жарқын үлгісі ретінде Джеки Чан мен Крис Такер түскен "Сын сағатын" ("Час пик", "Rush Hour") айтсақ болады. Әйтсе де, әйелдер түскен фильмді еске түсіру қиындау. Содан болар, "Ыстық" әлдебір жаңашылдық әкелгендей болды.

FBI агенті Эшберн мен бостондық детектив Маллинске есірткі саудасымен айналысатын қылмыскерді тұтқындау керек. Керек деген жақсы ғой, әрине, алайда алдымен екі қайғы-кейіпкерге өзара қарым-қатынастарын жөндеп, татуласып алу артықтық етпейді. Ең басты қиындық та осы.

Басқа бірдеңе айтып былықтырмайын, барамын десеңіз трейлер мен осы жазбадағы азды-көпті қорытындыға қарап, шешім шығарарсыз.

Сандра Буллок/Мелисса МакКарти тандемі мен үшін жылдың жаңалығы болды айтсам артық болмас. Қақаңдап қалған, қатардағы қызметкерлеріне сүйкімі жоқ агент Эшбернді сомдаған Буллок соны қырынан танылды. Әдетте, алып-ұшар ромкомдардың түгін қалдырмайтын актриса қума комедияда да ойнай алатынын әбден көрсете алды. Оған детектив Маллинс та аз үлес қосқан жоқ.

Қырықтың қырқасына шығып, алды елуге келіп қалған бұл екеуді енді 2015 жылы фильмнің екінші бөлімінен көре аламыз. Асыға күтемін өз басым. Себебі, фильм шынымен үлкен позитив сыйлайды. Әсіресе, "Бас жазу" секілді бейстандартты қалжыңдары мен қарадай қарап тұрып күтпеген әзілдер сыйлайтын туындыларды ұнатушылар үшін әдейілеп түсірілгендей.

Сценарий жазған Кэти Дипполдты құттықтап қойса болатын шығар. Алғашқы фильмі ә дегеннен-ақ сәтті шықты.

Диалогтарын ерекшелеп кеткім келеді. Бүтін фильмнің сөлі мен нәрі болған кейіпкерлердің әңгімелері кинотеатр ішінде ғана күлдіріп қоймай, талан-таражға түсіп, талқылауға ұласып кететінін сөзсіз. Әйтеуір, өзім әлі күнге "- Мен сенімен сөйлеспеймін! — Сен менімен сөйлесіп отыр емессің бе, топас!" секілді қарапайым, бірақ ұтқыр фразаларды қайталаумен жүрмін.

Қылмыстық драма, жаңа сипаттағы комедия, экшн элементтерін араластырып беруі туындының әрін кіргізе түскен екен.

Сөзсіз, "Ыстықтың" басты базукасы — Мелисса МакКарти. Оскардан үміткер атанып үлгерген, Forbes-тың «Ең жоғары ақы алатын кино және телевизияның 20 актрисасы» тізіміне енген МакКарти балуан денелі, қақ-соқ мінезді, қылмыскерлерге аяушылықпен қарамайтын, фильмнің ең басты сөз-сөйлемдерінің негізгі бөлігін бір өзі айтатын кейіпкер бейнесін толық аша алған.

Фильмді көру керек деген пікірдемін. Қайткен күнде де, "Ыстық" мен үшін 2013 жылдың ең үздік комедиясы болып тұр.
Бөлісу:

9 пікір

asaubota
бар ерекшелігі әйел болуларында шығар? қалған диалог, тірліктері сол баяғы американ коптарындай ма?
qisyq
Американ коптарындай болғанда… «Мальчишник», «Копы в глубоком запасе», «Впритык» секілді комедиялар ұнайтын болса, көру керек.
Abilakim
көреміз))) Аталған туындылар көңілімнен шыққан. Соңғы рет қолтығым сасығанша күлген кином «21+» деген фильм
asaubota
ұнайд Мальчишник
dark_nazgul
жынды кино, шынымен)))
Medium
Қыздарға ұнаған болса демек кино нашар деген сөз. Рахмет пікіріңізге!
dark_nazgul
жақсы мен жаман деген өте "қатысты" түсініктер ғой, оны өзің де білесің))))
Marco
Өткенде жампозым екеуміз кірмей кеткенбіз. Енді бару керек болды. Рахмет!
zholantai
өткенде киностан осы фильмге билет ойнатқанда, шарты ауыр тиіп, қатыспаған едім. не де болса, жақсы сапамен, самрип емес, инетке шыққанын күтемін. тиын шығарып, кино көруге неохота. Мелисса МакКартидің өзі бір жүрген кино ғо, түрін қарасайші.