Шірене тепті деген осы

Футболда неше түрлі голдар соғылып жатады. Бас айналдыратын комбинациялардан кейінгі доптар, айып соққылары, автоголдар, өкшемен, баспен, желкемен, арқамен соғылған голдар. Айта берсең көп. Соның ішінде алыстан соғылған доптардың ерекше әдемі көрінетіні рас.

Өткен аптада осындай алыстан соғылған голдар көп болыпты. Және бірінен бірі өткен әдемі сәттер. Тамашалаңыз!

Польшаның бірінші лигасы. (Жоғары лига емес) Колеяж Струже — Краковия командаларының арасындағы ойын. Есеп 0-1. Гол авторы Владимир Болжевич.


Мұхиттың арғы бетіне ауысамыз. MLS. Нью-Йорк Ред Буллс — Торонто кездесуі. Есеп 4-1, жеңімпаз Нью-Йорк командасы. Ал канадалықтар соққан жалғыз доптың авторы Джонсон.


Енді Латын Америкасы. Дәлірек айтсақ Аргентина чемпионаты. Олл Бойз-Ланус. Бұл сәтте Ланус ойыншыларының тамаша контратака ұйымдастырғанын атап өту керек. Екі жігіт бар қарсыласын статист ретінде пайдаланып, ауыздарын аңқитып кетті. Ал Айаланың соққысын олар енді түстерінде де көретін шығар.


Италия. А сериясы. Палермо-Кьево. Палермолықтардың шабуылшысы Фабрицио Минколи бұл ойында үш гол соқты. Оның ішінде үшіншісі жылдың үздік голдарының қатарынан табылатын шығар деп ойлаймын. Соққының күштілігінен бұрын дәлдігіне, орындаушының шеберлігіне қол соғу керек.


Менің ойымша ең тамаша гол Ресей біріншілігінде соғылды. Чемпионаттың оныншы турында Теректің қорғаушысы Мартин Йиранек мынадай шедевр жасады. Айтпақшы, Терек Кубаньнан 1-2 есебімен жеңіліп қалды.


Егер сіз көрген өзге де тамаша голдар болса бөлісе отырыңыз.