Айдар

Оның бозбала шағы өткен ғасырдың 90-шы жылдарының орта кезіндегі қиыншылық кездерде өтті. Жұрт зейнетақысы мен еңбекақысына бірнеше айдан кейін әзер қол жеткізетін кез. Қай жерде де жұмыссыздық белең алған. Айдар мен Күлән үйленіп, болашақта өз отбасылары болғанын қалайды. Содан Айдар оқуын, Күлән екінші курсын бітіргесін жазда екеуі үйленуге бел буды. Уәделі мерзім жеткенде, екі жақтың ата-аналары бір-бірлерімен ақылдаса келе, той, құдалық, қоржын салу сияқты рәсімдердің бірін де жасамай, қолда бар қаражаттарын балаларына жұмсауға келісті. Айдардың ата-анасы малдарын сатты, тракторын сатты және біраз жыл жиған қаражатын жұмсап қаладан бір бөлмелі пәтер сатып алып берді. Қыз жағы үйдің ішіне қажетті дүниелерді қамтамасыз етті…
Күлән оқуын жалғастырды. Айдар таныстарымен ілесіп Алматының Барахолкасынан тауар тасып, алыпсатарлықпен айналысты. Мал сатып алып, оны қалаға әкеп етке өткізді. Ауылдан көшкендердің үйін сатып алып, қалаға құрылыс материалы ретінде жеткізумен айналысты. Қаланың ортасынан зәулім үй салып, арманындағы шетелдік көлікке қол жеткізген ол, ебін тауып “пәресін беріп” жүріп бір “департаментке” жауапты хатшы болып қызметке тұрып алды. Оның міндеті мемлекеттік нысандарды салумен айналысатын құрылыс компаниялары арасында тендер өткізуге атсалысу. Істің тетігін таба білген Айдар пайдаға белшесінен батты да қалды. Бұрынғыдай күннің ыстығына күйіп, суығына тоңып жан қинап ақша таппайды. Жылы жерде отырып “жылы жұмсаққа” еті үйренді. Тіпті шалғай ауылдағы мектеп ғимараттарын жергілікті жерден емес, сонау Алматының фирмалары салатын болды. Оны жұмысына туған күнімен құттықтай келген досы, қызметің жаңа, көлігің жаңа, енді әйелді “жаңаламайсың ба” деген қалжыңын ол шындыққа айналдырды. Ұл табу қолыңнан келмейді деп (бірақ онысы ажырасу үшін сылтау еді) әйелін екі қызымен тастап, “төсек жаңғыртты”. Сол алған әйелі ұл тапқанда, ресторанда дүркіретіп шілдехана жасады. Тойға жиналғандарға асаба қызықты ойын өткізіп, жеңімпаздарға қомақты қаражатты той иесі атынан ұтқызып жатты. Алайда қағаз жүзінде жалған компания құрып, жалған тендерді өткізушілермен сыбайлас болғаны Айдардың түбіне жетті. Мемлекеттің қомақты қаражатын талан-таражға салды деп айыпталған ол, барлық дүние-мүлкі тәркіленіп 11 жылға сотталып кете барды.
ПыСы: Түрме қызметкері Айдарға туыстары келіп тұрғанын жеткізді. Ол арнайы кездесу орнына келгенде, екі қызын жетектеген Күләнді көрді.