Зерделі кино және қым-қиғаш қарапайымдылық

Артхаус. Соңғы айда мен көрген фильмдердің көбі дерлік, осы жанрдағы фильмдер. К.Нолланның «Бастамасын» қайта көріп шықтым. Одан кейін Д. Кроненбергтің «Қауіпті әдісі», бұл фильм жайлы алда кеңінен айтамын.
Үшіншісі, Ирандық режисер Асгар Фархадидің «Надер мен Симиннің ажырасуы». Айта кетерлігі, осы фильм ислам мемлекеттері арасында Оскарға қол жеткізген ең алғашқы туынды.

Соңғысы, корейлік режиссер Пак Чхан Уктің «Олдбой»-ы. Атақты Квентин Тарантиноның өзі «Он жылды бір ғана рет жасалатын үздіктердің үздігі» деп баға берген бұл туынды расында да ғажап. 15 жылға созылған үйқамақ, ұзаққа жоспарланып, алдын ала ойластырыла барып жүзеге асқан кек. Түсінгенім, «Басқа бәле-тілден» деген қазақ сөзінің корейлік нұсқасы.
Сонымен, Артхаус дегеніміз не? Тікелей аударсақ, «өнер үйі» дегенді білдіреді(мұны айту ұят енді,). Голливудтық оқиға желісінен ада, қып-қызыл ақша тұратын арнайы эффектілері жоқ, ойын-сауыққа құрылмаған, тек ауыр ойға арналған фильм.
Қазақ киносы ішінен «Келін»-ді айтар едім. Көрерменге жол тартпай тұрып, басы дауға қалған, сол арқылы танымалдылығы тіптен арта түскен бұл дүние де миды бір қозғап өтеді.

«Қауіпті әдіс»-психоанализдің шаңын қағамыз деп жанталасқан ғұламалардың қақтығысын көрсететін дүние. Юнг пен Фрейдтің тайталасы. Осы екі ғалымның сұлу да ақылды емделуші Шпильпрейнмен қарым-қатынасы. Алғаш тамашалағанда барлығын да сексуальдылықпен байланыстыратын Фрейдтің тұжырымдамаларын түсіну қиынға соқты. Содан кейін Фрейдтің еңбектерін қарап, психоанализдік біліммен шала қаруланып алып, қайта көрдім… Ұзын-сонар диалогтар, теорияны тәжірибеде дәлелдеуге тырысу, ғылыми тіл. Міне мұның барлығы осы фильмге тән. Түс жору да мұнда шет қалмайды. «Отбасын құрып, перзент сүю ғылым жолында жүрген адам үшін кедергінің бірі болып табылады, ой шашырап, мақсатқа жету жолында бұлтарыстар көбейеді» дегенді атап өтетін киноны сандырақ деп қабылдауға да тура келеді. Десе де ғалымдардың бұл жөнінде өз пікірлері бар. Ғылымиланған жорамалдар айтылады. Фильм соңында берілетін деректеме жазбаны оқып, жалғыздың шаңы шықпайтынын, әуел бастан ер мен әйелді бірге жүру үшін жаратқанын ұғынасыз. Шектен тыс, соқырсенімге құрылған әсіреұлтшылдықтың жеккөрініш туғызып, қауіпке апаруы мүмкін екенін ескерте кетеді. «Артыңда мал қалғанша, тал қалсын» деген сөздің жандылығы да елес беріп өтеді.

Кино-тәрбие құралы. Айтар ойын түсіне алмасаң, ол да қиын. Артхаусқа берілер баға үлкен, бұл дегеніміз дәл қазіргі сан емес сапа алдыңғы орынға шығып тұрған дәуірде шынайылықты өзгеше ойлаумен жеткізу болмақ (қой ей, солай ма?). Интеллектуальды ұрпақ пен IQ-ін жоғарылатамын дегендердің айналып өтуіне келмейтін бір көпір іспеттес(жетеді, тоқтат,).">

пы.сы Тақырып мұның алдын «Жоғарғы кино туралы шатпақ» деп құрылған болатын. Төмендегі пікір иелерінің қайшылығына ұшырып, дәлірегі satibaldi , dark_nazgul , Marationok , тақырып өзгертілді. Қауымдастыққа салынды. Сәтсіз аударманы атап-атап көрсетіп, пікір білдергендерге көп рахмет. Жаңа тақырыппен қайта жариялап отырмын.