Бір түнде үш блогшы соққыға жығылды

"Алматы қаласының Қостандық ауданында ақпанның 21-нен 22-не қараған түні үш блоггер соққыға жығылды. Ғаламторда көкейтесті тақырыпта мақала жазатын блоггерлерге жұдырық жұмсағандар әлі күнге дейін табылмай жатыр. Зардап шеккендердің бірі ғаламтордан рұқсатсыз мақала ұрлағандарды әшкерелеп жүрген Аңсар Аяпов алған соққыларынан уақытша блог жүргізуін тоқтатуға мәжбүр.


Мағлуматтар.Орг сайтының редакторы Аңсар Аяпов алынған соққылар нәтижесінде миы шайқалған, саусақтары жарақаттанған, құйымшағы зақымданғандықтан ұзақ отыра алмайды. Осының салдарынан ол екі аптадай ғаламторға шыға алмайды. 2012 жылғы блог құрылтайды талқылау мақсатында блоггерлер жиналып Шимирязев-Кутепова қиылысынан таяқ тастам жерде орналасқан дәмханаға барады. Демалыс орнынан шыққан блоггерлер бөлініп кетеді. Аңсар Аяпов Егор Оспановпен бірге көше қиылысына жеткен кезде бейтаныс жігіттер келіп ай-шайға қарамай, тепкінің астына алады.

Аңсар Аяпов — белсенді блогшы:

«Бірінші құйрық тұсынан қатты соққы алдым. Бұрыламын дегенше құлақ шекеден кетті. Ес-түсімді білмеймін. Есімді жисам, саусақтарым гипс. Қарақшылардың бет-әлпетін тергеу кезінде анықтап айтып бере алмадым.».

Ал, жалғыз өзі кеткен жетекші блоггер Жақсылық Хегайды белгісіздер саунаға жете бергенде ұрып кетеді. Белсенді блогер Аңсар Аяпов Егор Оспановтың ықшам компьютерінде «Сегіз Серік» газетінің және бірнеше журналисттің қарақшылық әрекетін әшкерелейтін айғақтар мен бейнематериал сақталған болатын, — дейді. Блогердің пікірінше, сол компьютерді қолға түсіру үшін біреулер қасақана шабуыл жасауы да мүмкін. Қарақшылар блогерлердің шағын компьютерлерімен қоса ұялы телефондарын да тартып алып кетіпті.

Болат Құрманғалиев — аудандық ІІД баспасөз орталығының жетекшісі

«Осы дерек бойынша ҚР қылмыстық Кодексінің 178-ші бабы бойынша қылмыстық іс қозғалып, тергеу жұмыстары жүргізілуде. Күдікті азаматтар анықталып, іздестіріліп жатыр».

Тергеу барысында анықталғаны блоггерлер қаланың екі ауданында бір мезгілде соққыға жығылған. Сондықтан, блогерлер бұл сәйкестік болуы мүмкін емес деп отыр.