Ағайын, жаңа блогтұғырды қарсы алыңыздар!

Армысыздар, керекші ауыл тұрғындары! Бүгін мен сіздерге өзімнің жаңа блогтұғырымды пайдалануға ерекше қуанышпен ұсынбақпын! Көптен бері осындағы көпшіліктің wordpress тұғырындағы блогтары ашылмай қалған соң «Бұл жағдайдан қайтсек шықсақ болады?» деген ой ұйқы бермей қойғаны рас. Сол үшін де осыған дейін "Өзіңе жеке сайт қалай ашуға болады?" тақырыбында бейне-сабақтар түсіріп, назарларыңызға ұсындым. Алайда, «Бірақ қалай болғанда да қазақ блогтарының басын қосатын бір ортақ желі һәм жүйе керек болар?» деген сұрақ тынымсыз әрекеттің нәтижесінде дәл қазір сіздерге ұсынып отырған "Қазақы блогтұғыр" блогтар желісін өмірге әкелді. Бәлкім, доменнің һәм желінің аты сіздерге «тізесі шыққан көтриоттар әлемі» секілді көрінуі мүмкін. Дегенмен де ізгі ниет, пәк көңілден шыққан жұмысты шын жүректен қабыл аларсыздар деген ойдамын.

Блогтұғыр толықтай өздеріңізге жете таныс wordpress платформасында отыр. Бұл әрине, көпшілігіңіздің жазбалараңызды пікірлерімен қоса оңай экспорт жасау үшін әрі әлемдегі озық тұғыр болғандықтан қолданылды.

Дәл қазір блогтұғыр «бета» нұсқасында тұр. Сондықтан келеңсіздіктер мен ақаулар орын алса кешірім сұраймын. Бірақ олай бола қоймас деген сенімдемін. Ал сайттағы тіл мәселесі өте жақын арада шешімін табады, иншаллаһ! Барлығы да қазақ тіліне аударылады. Оған дейін ағылшын тілінде пайдалана тұруларыңызға тура келеді. Сол үшін алдын-ала кешірім сұраймын.

Сізді сайтқа кіргенде алғашқы бет қарсы алып, тіркелуге шақырады. Содан кейінгі қалыпты тіркелу процесі ағылшын (әзірше) тілінде жүреді де поштаңыз арқылы тіркелгеніңізді растайсыз. Сонсоң өз блогыңызбен сіздіңатыңыз.qazaqblogger.com атты сілтемеде жұмыс жасай бастайсыз.

Қазіргі таңда 10 шақты ерекше көйлектер қондырылды. Жақын болашақта да қосымша плагиндер мен темалар қойылатынына сендіргім келеді.

Егер де алып-қосар игі-тілектеріңіз бен ұсыныс-өтініштеріңіз болса, мархабат…

Баршаңызға рахмет!

Құрметпен, Тимур Бектұр