Ойды тек біздер өлеңмен өріп тастайық

Өлеңнің көркі шашбауын таққан сөз емес…
Астарын ойдың оқитын біздің көз емес…
Адамның жанын жаншитын «түйін» болмаса,
Әдемі сөзден «сөз сарай» салу бос елес!

Дуалы ауыз ақыны елдің емеспіз.
Сын айтса жұрттар сен сөктің бізді демеспіз.
Ал қане қазақ, сөзіңді сайлап мұнда кел!
Себебі Қазақ, өлеңнен кенде емессіз!

Ғафу ет халық, көбіңді сөзге қоспасам,
Қаласаң егер бәріңмен мен де достасам.
Жауабын беріп, ойымды қосып тұрармын…
Жұмысым бітіп, сәтін бір күтіп… бос болсам.

Өлеңін оқып тұрамын кейде Қисықтың,
Қасында оның біздікі қыңыр, қисық тым…
Демекші қисық, түзу бір жолда жүрсек те,
Сеземін өзім көптеген іске «қисықпын»…

Қателік кетер деп мүлдем біздер саспайық,
Ойды тек біздер өлеңмен өріп тастайық
Ал олай болса өлеңді жалға, жанып кет…
Көп созбай қане, айтысты достар, бастайық!
Бөлісу:

28 пікір

VKM
Жалпы @Asspan күшті жазады өлеңді.Респект!
Тағы бір айтыс тақырып,пристойно болады деп сенемін)))
TOTY
Қайткенмен, кезінде ұлттық арнада «Аламан айтыста» ақындармен жақын жүрген азамат қой…
qisyq
Атымды қосып әдемі өлең жаздыңыз.
Кетпенмен-клава айтыстың кенін қаздыңыз.
Тиянақты ойға тоқталмай кеткен ақынның,
Ақиқат сол, арты өрт те, алды мұз.

Етуден кенде емеспіз ғой… етейік.
Еткенде не ғой… әдемі жырға жетейік.
Тілі мен жағы сүйеніш болған, ағайын,
Тағы да бір айтысты бастап кетейік.

Көшейік бірден әдептілікке, сыпайға,
Онымыз болар оң баға келген ұпайға.
Ақындар бүгін айтысты бастап отыр ғой
@Asspan ақын оқып жүрген Қытайда.

Маңызды емес деңгейі кедей-байыңның,
Мәлім маған күй-сипаты жайыңның.
Керекші, маған жауабыңды жаза кет.
Әу деуге мен әрқашанда дайынмын.
Asspan
Қытайдан елге тезірек қайтқым келеді.
Демалыс орным, тау менен бөктер, бел елді…
Жетінші айда жол тартпақ елге ойым бар,
Менімен кімдер «Көлсай» қарай ереді?
qisyq
Пах, шіркін, «Көлсай» маған жағасың да.
Жатып қайту керек еді жағасында.
Ес білгелі естігенім осы көл-ді,
Нағашыларым мекен еткен сағасында.

Сол жаққа барып қайту жоспарда бар.
Бұл ойды ниетін қосқан ұғар.
«Көлсай, Көлсай» деп жүргендер қайдасыңдар,
Аспанның бастамасын қостаңдар, ал!
qisyq
Ақын таппай отырмын сөзбен үгерге.
Осылай айтсам, жыртылып елдер күлер ме???
Бәрін айта бірін, @Abilakim,
Шақырамын өзіңді мен дуэльге.
Asspan
Е, Қисеке, айтам ба енді айқайлай?
Әлде мені сен тұрсың ба байқамай?
Ақынсымақ боп тұрмыз ғой алдыңда,
Әлде мені шеттеттің бе, бұ қалай?
qisyq
Жақсы ақыннан тек жамандар жерімек.
Сөзім осы, оған, Аспан, сенім ет.
Айтыспайын дегем жоқ, өзіңді,
Керектегі қыздарға қалдырғым келіп ед…
Abilakim
Оу!
Зор шықты мына жақта @qisyq деген
Дуэлге шақырам деп тисіпті екен
Шегірткеден қорыққан егін екпес
Бір сойқанды сезеді түйсік деген
qisyq
Ызалы болад тағдыр-сыйдан қағылғандар,
Ақындар, ашуға емес, сабырға бар.
Кезек-кезек айтысайық, Әбіл, Аспан,
Мен жалғызбын, сендер көп те — жабылмаңдар 

Әбіләкім, шақырғам айтыс үшін,
Айтыстағы сөз талас, тартыс үшін.
Мені таста, сен оданда қыздарға бар,
Соларға көрсетсеңші тартыс күшін.
a63a1
Ассалау мағалейкум ардақтылар
Айтысыңдар қандырып жырға құмар
Піссіміллә деп бастап сөз айтайын
Клавамды басайын қылып тұмар!
Арқадан мен, арқалана қосылайын
Өршітейін айтыс-отқа құйып майын
Өлеңдерің төгілсін нұр суындай!
Лық толтырып Керектің жыра сайын
qisyq
Абзал ақын, келдің бе,
Өлеңнен маржан тердің бе,
Клава-тұмар деп таяқ
Ахиден жегің келді ме?
a63a1
АХи ахи айта жатар өз пікірін
Жүректе Аллам, аузымда бар шүкірім
Дінім ислам атам Қазақ біле білсе,
Қасиетін түсінген ол үкінің
Asspan
Дейсіз бе өршітемін құйып майын?
Ал онда сөздерді мен сұрыптайын,
Қайымдап көргін кәні, осы жолды,
Мойныңа жіп лақтырып, құрықтайын!
a63a1
Абзал өзін тай құлынға ұқсатпайды
Айда жанбас бір тәулік ұқсақ жайды
шідері мен тұсауды тақсаңдағы
Сірә тұлпар оңайлықпен ұстатпайды
Asspan
Кеттің ғой шаң қаптырып, бел астың да…
Бар байлық бұл ғаламда жер астында…
Айтпақшы қашып қайда құтылмақсың?
Тұлпарлар батыр қазақ — ер астында…
a63a1
Қарға шұқымас көздерін қарғаныңда
Қазақ мінсе несі айып? мін, тақымда
Өзге батыр мінбесе игі еді
Сондай менің бауырлық арманымда
Asspan
Айып емес, сені қазақ тақымдаса!..,
Сұрау салам өзіңмен ақылдаса…
Ал қане шешіміңе тәнті еткін,
Нес істер ең біреуде егер ақың қалса?!
a63a1
Ақы сұрап біреуге бармас жанмын
Қасиетін түсінем үзім нанның
Біреуге жайып есемді берсем дағы
Қайырын берсін әр атқан нұрлы таңның
Бұл фәниде ел ақысын жегендер көп
Қамсыз бастық, депутат жүр көйлегі көк
Елін қанар жауыздар жүрген кезде
Аспан бауыр сол жайлы жырыңды төк
Asspan
Сұрағыма мен жауап ала алмадым.
Байыбына бәлкім сен бара алмадың?!
Біз сөйлейміз… ақиқат Аллаға аян!
Артық сөйлеп күнәға қала алмадым…

Айтайық жасы адамның жақсылығын.
Бұл жалған іздегенге жақсы ғылым!
Адал бол, арамнан қаш, ілім ізде…
Жалғаннан алар осы жақсылығың!
Abilakim
Бүгін өзі Қарағандыда Жүрсін Ерманмен жүздесіп едік)))) Кешке кешіне барамыз мына айтысқа соны төрелікке шақыра салайын ба?
qisyq
Бұттан кетіп жүрер))
Asspan
Шын ақын көп ішінде азы ғана…
Олардың көп болғаны саны ғана…
Иесі бұл айтыстың біреу ғана…
Айтыстың егесі кім, таны бала!
a63a1
Арқаның киік өткен даласында
Қарағанды Жезқазған тең арасында
Сарысудың суын кешіп өскен бойлап
Жаңаарқаның мен бір тентек баласымын))
Abilakim
Қыз қайда, қымыз қайда, кесе қайда?
Ақын қыз табылар ма шешен ойға
Қыз бен жігіт айтысы қызықтырақ
Қалжыңменен бастайтын кесел ойға
qisyq
Шай құйғанда қыз саусағы майсады
Шамасына қарай ел сайысады.
Әбіләкім, қарайсың қалай қарай,
Шақырсақ @AKY менен @alisha -ны.
a63a1
Сөзімен жырсаптаған @alisha әпкем
Сен жазғанда жүректе туар көктем
Ана жолғы сөзім үшін кешір мені
Сірә қатты болды-ау маған өкпең
alisha
Інім-ау, реніш жоқ тамшыдайын,
Шабыңдар, шығарыңдар жыр шырайын.
Бір шаруаның қайтпай тұр басы, құрғыр,
Деген ем мен де өлеңмен қамшылайын.