АЛЛА ДЕГЕН АР БОЛМАС.

Уағыз деген сайтты қарап отырсам менің ағамның өлеңі бар екен. Бұны осында жариялағаным үшін ешкім сөге қоймас.

Бекіну
«Лә Иләһә илләллаһ,
Мұхаммәдур Расулуллаһ»,
Имам Ағзам — мазһабым.
Мұсылманмын асқақ үн.
Шайтанның еріп соңынан,
Бұлт шалмасын аспаным.
Бір Аллаға сыйынам,
Қолдай алар басқа кім?
Бір Алланың арқасы,
Сандығын жырдың ашқаным.
Құдайдан тілеп медетті,
Қысылғанда саспадым.
Құлшылық қылсам күн-түні,
Жалындап өтер жас шағым.
Алланы танып өтейін,
Өмірде мынау қас-қағым.

* * *

Мұсылман болып бір беті.
Кәпір болып бір беті.
Өзгеріп кетті бүгінде,
Қазағымның келбеті.
Қайда кетіп барасың,
Мұхаммедтің үмбеті.
Орындалмай жатыр ғой,
Пайғамбардың сүннеті.
Қайда кеткен халқымның,
Құранға деген құрметі.
Жұртыма менің жұқпасын,
Күпірліктің індеті.
Мойынсұну Аллаға,
Мұсылманның міндеті.
Мұсылманды түбінде,
Мойындайды жер беті.

* * *

Ақылды жан алданбас,
Ақылсыз жан қорғанбас.
Бұхар жырау айтқандай,
«Алла деген ар болмас,
Хақтың жолы тар болмас».
Құдайға мойын бұрмасақ,
Қысылтаяң күн туса,
Жаратқан Өзі жар болмас.
Бес уақыт намаз оқысаң,
Ақырет күні инша Алла,
Тозақта жаның қор болмас.
Бір Құдайдан қорық та,
Жайнамазбен бол жолдас.

Е, АЛЛА

Е, Алла!
Күнәмізді кешіре көр.
Ылайықты ырыздық, несібе бер.
Имандылық жолында күресейін,
Қуат бер мақсатыма жетіп өлер.

Е. Алла!
Бар екенің аян маған.
Өніп-өсіп жатқанда саяңда адам.
Надандардың ісіне күйіп кетем,
Сезімдері мәңгілік оянбаған.

Құдай жоқ деп асқақтап көпіреді.
Көкті тіреп тұрғандай көкірегі.
Құдіреттің мойындап күштілігін,
Өмірден өтер сәтте өкінеді.

* * *

Орындалсын Бір Алланың өкімі.
Мұсылманға ол бес парыз боп бекіді.
Иманды бол, намаз оқы, адаспа,
Түсінгенге жұмақтың бұл кепілі.

Қалықтатса таң сәріде қораз ән.
Күмбірлесін мешіттерде зор азан.
Қасиетті рамазан айында,
Ұстаған жан, қабыл болсын Оразаң!

Зекет бергін байлығыңа бойла да,
Ақшаға да, жылқы, сиыр, қойға да.
Қос дүниеде жаққың келсе Құдайға,
Иманды ойла, жиған малды ойлама.

Қажыға бар, байлық тұрса асып бір.
Онда саған жұмақ қақпа ашық тұр.
Ақ жолынан адаспағын Алланың,
Жамандықтан бойды аулақ сал, қашық қыл.

* * *

Ас ішіп астауынан адалдықтың.
Ақ жолымен жүрейін адамдықтың.
Алла! – деп атқа мініп аттанайын,
Жанына жуымайын жамандықтың.
Исламға иман айтып бетті бұрсам,
Иланам жетеріне маған құттың.

Бойымда иман болса пәле қашар,
Имансыз болсам бітті, қара басар.
Зікір менен шүкірді мен ұмытсам,
Пікірді тұтынады сана нашар.
Алладан сәл босаса пәк көңілің,
Албасты шайтан келіп араласар.

Раббымыз — бір Алла ғой бас иетін,
Рахымынан басқа түгіл тас иетін.
Түзу жолға түсіріп жіберетін,
Құранның біз ұғайық қасиетін.
О дүниелік орнымыз жұмақ болар,
Орындасақ Пайғамбар өсиетін.
Олжас Отар