Блогыма не деп ат қойсам болады?

Блог-құрылтайда мен жасаған презентациядағы айтарлық бір ғана нәрсе болды (деп ойлаймын) – ол қазақ блогонимі дейтін термин. Блогоним (blog – блог, ὄνομα onoma) – есім) – блог атауларын (блогосферадағы атауларды) зерттейтін сала. Қазақ блогонимі қазақша блог атауларына қатысты ілім. Ескерте кетейін, зерттеу нысаны урл мекен-жай емес, блогтың маңдайшасындағы атаулар болып табылады. Жалпы блогонимдер туралы Өркенегро, Айкона өз жазбаларында атапты.
Қазақ блогтарын жіктегенде, негізгі мыналар (менің топшылауым) көзге түседі. Оның алғашқысы – антропоблогонимдер, яғни адам тегі мен атын алған блогтар. Фазылбек Әбсаттарұлы, Бекболат (Тілеухан), Керімсал Кеңесбекұлы және тағы басқалар (талдауға ілікпей қалғандар өкпе артпасын).
Екінші топ – «ілікті» блогоним немесе телу блогонимі. «Пәленшенің блогы», «Түгеншенің беті» дегеннің бәрі осы топқа жатады. Қазақ блогосферасында бұл топқа мысал был-а-а-й. Бұл топ өз ішінде екі топқа бөлінеді: 1) антропо-«ілікті» блогонимдер 2) блог жүргізушінің кәсібіне, қызығушылығына, ерекшелігіне байланысты «ілікті» блогонимдер. Антропо-«ілікті» блогонимдер қатарына келесі қазақ блогтарын жатқызуға болады: Ерболдың блогы, Huanys’s blog, Кәмшат Тасболаттың блогы, Мұхтар Жанұзақұлының блогы, Асқардың түрткендері, Maqpal’s Weblog, Розатайдың блогы, Бүркіттің блогы, Әлібектің блогы, Әбдірұлы (Ерлан) т.т.
Ілікті блогонимдердің екінші тобына мысал: Қара сақалдың жеке блогы, 13′ тің шаруа Қожалығы, Аудармашының түрткендері, Әбіләкімнің ауылы, Өркеннің өрнегі.
Блогонимдердің үшінші ірі тобы: тақырыптық блогонимдер, яки белгілі бір бағытқа, салаға арналған блогтар. Мәселенки, Саяхаттарым, Ақ бантиктің дастарханы, Авто Kz, Сатирадан сарқыт, Жиналыстар анатомиясы, Математика мен мультимедиа. Төртінші топ: әдемі ұғымдар мен блог жүргізушінің талғамына сай келген сөздер мен сөз тіркестерінен құралған блогонимдер. Өрімтал, Тамшы, Дүние тануыМ, Сырлы дала, Көзқарас, Көңіл күнделігі, Қазақия деп өзін де қосып қойған дейсің, Тұспалсөз, Жиған-терген, Көңіл көкжиегі, Көңіл ашар, Жүрек сөзі, Аспан.
Жазба тәмамында қағазға түсіргенім міне (Сөз соңында айтарым мынау). Блогқа ныспы беру де — өрге жүзгір (Блогқа ат қою да өнер). Жаңа ғана көз жүгірткен блог тектеріне үңіліп, нешіншісін шертіп қарау сезіміңіз оянды? (Жоғарыда келтірілген блог аттарына қарап, қайсысын басып көргіңіз келді?) Өзіңізді нендей ныспы ұмтылдырды? (Сізді қай ат қызықтырды?)
Дарханұлы дегендей, блог рөлінде майда-шүйде атаулы жоқ (Өркен айтпақшы, блог жүргізуде ұсақ-түйек болмайды). Алайда, «баға» алам айтып, есім таңдағанда, қуысып бармаңыз (Бірақ рейтинг қуам деп, ат іздегенде қуалап кетпеңіз). Иә, жазбажазарыңның маңдайшасы да, мағынасы да, халық-қауымға тозаң түйіршігіндей оң әсері болып, ізгіліктің хабаршысы атанса дейтін лебіз емес пе көптікі (Әйтеуір, блогыңыздың аты да, заты да ел-жұртқа шаңның тозаңындай пайдасы тиіп, жақсылықтың жаршысы болса деген тілек қой біздікі).
Тәмам (Болды).