Айна және фэн-шуй!
Айна — кез келген үйде қолданатын мүлік. Қарапайым қажеттілігінен басқа, бүгінгі таңда үйге, кеңселерге, демалыс орындарына көрік беру мақсатында да пайдаланып жатады. Алайда, айнаның пайдасынан басқа, адамзатқа тигізер зиянды жағы бар екенін көпшілік біле бермейді. Ежелгі Қытай ғылымы «Фэн –шуй» қоршаған заттардың айналаға әсері жайлы қажетті кеңестерін ұсынады. Мәселен, кіре беріс дәліз. Фэн шуй заңдылығы бойынша айна кіре беріс есікке қарама-қарсы орналаспағаны жөн. Наным бойынша, есіктен кірген кіріс айнаға шағылысып, шығып кетеді-мыс… Сонымен қатар,үй иелерінде түрлі жағдайларда кедергілер туындап, жүйке жүйесінің тез шаршауына әкеп соғуы ықтимал.
Жатын бөлмеде айнаның мүлдем болмағаны жақсы. Болған күннің өзінде, кісі ұйықтайтын төсек көрінбегені абзал. Өйткені, мұның арты үйде немесе ерлі-зайыптылар арасында дау-жанжал шығуына және адам ағзасы ауруға шалдығуына әсер етуі мүмкін. Қазіргі заманауи жиһаздарда төсектің бас жақтаулары айнамен көркемделіп жатады.Ол да дұрыс емес. Төсек сатып алатын болсаңыз (әсіресе ерлі-зайыптыларға қатысты), міндетті түрде соған көңіл аударыңыз.
Ас үйде айнаны үстелге қарама қарсы қабырғаға ілген жөн. Дастархандағы дәміңіздің бәрі айнадан көрінсе, ырыс молаяды деген фэн-шуйда наным бар екен.
Қонақ бөлмеде айнаның болғаны құпталады. Әсіресе, сырт жақтан әсем табиғат шағылысып тұрса, тигзер пайдасы мол. Алайда, егер айнаға сырттағы қоқыс жәшігі т.б. қарама-қарсы шағылысса, жаман энергияны үйге тартуы мүмкін деген сенімге де құлақ түріңіз.
Үйіңіздің төбесін, не еденін айнадан жасалған жылтыр тақтайшалармен /плитка/ көркемдегенді де фэн-шуй қолдамайтын көрінеді. Өйткені, бөлшек айнадан адамның өз бейнесін терісінен, не бөлшектеп көру кері әсерін тигізуі әбден мүмкін. Бұндай безендіруді өз басым көбінде кафе, мейрамханалардан байқаймын.
Егер ақшаңыздың санын арттырғыңыз келсе де, тигізер көмегі бар екен. Мысалы, айнаның алдына бірнеше кесек қағаз ақшаларын шашып қойсаңыз, табыс көзі молаяды.
Жадыңызда жүрсін:
- Кіре беріс есікке айнаны қарама қарсы ілмеген жөн.
- Айнадан бейнеңіздің толық көрінгені дұрыс
- Жатын бөлмедегі төсекке қарсы айна ілмеңіз.
- Айнадан тек жағымды дүниелердің көрінгені абзал
- Үйде сынық немесе шынысы тозған айнаны пайдаланбауға тырысыңыз.
Мақала сілтемесі: http://vkototy.wordpress.com/2011/01/27/%d0%b0%d0%b9%d0%bd%d0%b0-%d0%b6%d3%99%d0%bd%d0%b5-%d1%84%d1%8d%d0%bd-%d1%88%d1%83%d0%b9/
Жәми жиырма жыл бойы қалыптасқан әдетінше, бастығының есігін аша сала, бөлменің оң жақ бұрышында отыратын бастығының алдына барып, амандық-саулық сұрасып, қолын соза берген де барып бір-ақ байқады — қарсы алдында ешкім жоқ! Ешкім түгілі ештеңе жоқ — отырғыш та, телефон да, үстел компьютермен қоса ғайып болыпты! Абдырап, созған қолын кері алып, шығуға беттегені сол-ақ еді, «мен мұндамын!» деді бастығы ту сыртынан. Сөйтсе — бастығы бөлменің сол жақ бұрышына көшіп алыпты.
— Оу, басеке, көшіп алыпсыз ғой, жаңа қонысыңыз құтты болсын! — дей берді Жәми еріксіз.
— Айтсын, Жәмеке! — деді бастығы. Алайда неге екені белгісіз, осы жауабының соңына күбірлеп ішінен тағы бірдеңе қосып айтты.
— Басеке, сол баяғы қағаздармен жүргенім ғой, қол қойып берсеңіз, а? — деді Жәми.
— Жәмеке, Сіз дегенде жань бар ма, әкеліңіз әрине — деді бастығы. «Жань дегені несі? Әлде тісін суыртқан болар» деп күдіктенді Жәми. Көңіл-күйі барында басқа да шаруасын бітіріп алмақ болып:
— Басеке, тракторды екі күнге ала тұрайыншы, сарайымды бітіріп алайын деп едім — деді.
— Ия, иянь, ала ғой — деді бастығы міз бақпастан, мұның әкелген қағаздарын ақтарып отырып. «Әнеки тағы да — «иянь» дей ме өзі? ИЯ дегені ме әлде?».
Бастық қағаздарды қарап болғанша Жәми бөлмеде тағы не өзгерді екен деп қарайлай бастады. Баяғы трактордың макетінің орнына боққарын бір кісінің мүсіні жайғасып алыпты. Аквариумның түбіндегі айқұлақтың орнында аузына темір теңге тістеген үш құрбақа тұр. Басқа ешқандай өзгеріс жоқ сияқты… Жо-жоқ, бар екен! Мәссаған, бастық… сол қолымен қол қойып жатыр, ал керек болса!
— Басеке, солақай боп кеткенсіз бе өзі? — деп қалды Жәми, таңқалысын жасыра алмай.
— Несі бар? — деді бастығы міз бақпастан.
— Жоға ештеңе емес, тек жиырма жыл бойы ана қолыңызға үйреніп қалғасын ғой, қызық екен… — дей берді Жәми ұялып.
— Ендеше қолтаңбамның нобайы да өзгерді, үйрене бер осы бастан! — деді бастығы кекетіп. Сөйтті де, қол қойылған қағаздарды біртіндеп бере бастады. Жәми қағазды алып, бірден қол қоятын орынды қарап еді, о тоба — баяғы жиырма жылдан бергі, өз құйрығын өзі тістемек болып жатқан жыланның ирелеңіне ұқсайтын қолтаңбасының орнына үшбұрыш тектес фигура салып қойыпты! Үшбұрыштың ортасында сызықтар бар екен, олар адамның нобайына ұқсайды. Құдды бір қолдарымен үшбұрыштың қабырғаларын керіп тұрғандай. Адам нобайының бұтының шамасында жарты ай тектес доғал сызық және бар екен.
— Басеке, қолтаңбаңызды өзгерткенсіз бе? — дей берді Жәми сасқаннан.
— Ия, иянь, өзгерттім. Жақсы, бара қойыңыз! — деді басеке. «Әнеки, тағы иянь дей ме, не боп кеткен өзі?»…
Таң-тамаша болып шыққан Жәми сыртта отырған хатшы қыздан «басекеңе не болған?» деп сұрады. Хатшы қыз:
— Шеф қазір — Фэнь-шуймен айналысады! — деді де қойды.
— О не пәле тағы?
— Ол — дұрыс өмір сүру, қытайлық ағым сондай! — деді. Тамсанып айтқанына қарап, Жәми хатшы қыздың да «фэнь-шуй» екенін шырамытты. «Астапыралла, Алладан медет сұрап, Ол сендерге бермеп пе еді немене?» деп іштен кейіген Жәми сыртқа шыға жөнелді…