Кезект Шіркін life...

Кеше әр жексенбі сайын «Ел арнадан» берілетін «Шіркін life – 2»-ні тамашаладым. Шындығында, алғашқы ауылда өткен нұсқасы мынадан әлдеқайда қызықты, әрі тартымды болатын. Жас мөлшерлері шамалас, бір-бірін күнде сахнада көріп жүрген әншілер түсірілім барысында да өздерін жақсы ұстап еді. Бағдарламаны көріп отырып, күлкіге қарық болатынбыз. Ұл-қыз демей бар ынталарымен, күйлері келсін-келмесін, білек сыбанып кірісіп кететін. Кешкі отырыстарында соны өздері-ақ қорытындылап, бір бірлерінің кем-кетік тұстарын аса бір сабырлықпен, қалжыңмен жеткізіп отыратын.
Осы жолғысы біртүрлі. Бағдарламаны да бір түрлі «напряженкамен» көресің. Әлде әскери базаның да әсері бар ма екен…?
Шығармашылық топ пен қатысушылар арасында әлі де тығыз байланыс орнай қойған жоқ. Өткен түсірілімдерде бой бермеген Алтынбек осы бағдарламада шашын алып тыныпты. Имиджі бұзылатындай дәнеме жоқ, жап-жақсы жарасып тұр. «Бауыржанның мені жұлдыз ретінде танымауы нереально…» деп Жұлдызай да қояр емес…
Әскери өмір оңай емес, қайткенмен жұлдыздарымыз тырысып бағып жатыр. Әсіресе, қыздар жағы. Ең бастысы кеше топтағы екі мүше шоудан алыстатылды, яғни Айгүл мен Индира кетті. Айгүлде неге екені белгісіз, бойкүйездік мінез басым. Топ мүшелерінен түңілген кейіпте отырды кеше. Ал, Индираға келсек, өз басым Индира Расылханның жанкүйері емеспін. Бірақ, әнші ретінде сыйлаймын. Дегенмен де, сол әншінің «паспорт әні» қайсы еді деген сұрағыма жауап таппадым. Индира ау баста келгеннен-ақ топтағы қыздармен тіл табыса алмағанын байқағанбыз. Кеше жүргізушілер де соны ескертіп жатыр. Алайда, Маржан мен Асхаттың отырыста топ мүшелеріне жеке-жеке берген комменттері ұнаған жоқ. Дауыстарында бір зіл бар сияқты, дік-дік етіп шықты. Соған қарағанда, қатысушылардың өз топтарына жаны ашымауы, бір бірімен тіл табыспай жатуына да жүргізушілер тарапынан кеткен қателіктер де әсер етуі мүмкін ғой, мәселен: топ мүшелерін жасақтау, үйлестіру, ұйымдастыру т.б. жағы. Сонымен қатар, бағдарлама барысында ішінара жасырын камерамен топ мүшелерінің жеке-жеке пікірін тыңдайды. Қарап отырсаң, көбінің аузынан дені дұрыс сөз шықпады. Бір бірін жамандау басым. Шоу-бағдарламада осылай, сонда былайғы өмірде қайтеді екен…деген де пікір қалыптасып қалатыны жасырын емес.
Ұмытып барады екенмін, анау Әбіл деген жігіт Нұрханмен бірінші күннен-ақ ұстасып алған, сыртқы пікірлерін тыңдасаң, құдды бір ата жауындай сілтейді-ай келіп…көріп отырған көрермен ретінде өзің ұялады екенсің. Тым құрыса, жігіттік мінез танытып, соны камерада айтпай-ақ қойса етті. Айта берсең, әңгіме көп. Жай, көрермен ретінде, ішіме сыймай айтып жатқаным ғой.