Ақмола облысында бүркітшілердің II халықаралық фестивалі өтіп жатыр. Ұлттық спорт түрлері қауымдастығы ұйымдастырған шараға елімізден бөлек 10 мемлекеттің кіл мықты 20 құсбегісі қатысуда. Қыран құсты қолға үйреткен спортшылар Бурабай баурайында екі күн бойы сайысқа түседі. Дүбірлі дода барысында олар бүркітті қолға шақыру, шырғаға салу және еркін ұшыру кезеңдері бойынша бәсекелеседі. Бұдан бөлек шетелден арнайы келген құсбегілер мен жергілікті қыран құс иелерінің арасында семинар-кеңес өткізілмек. Рамазан Сәттібай, Ұлттық спорт түрлерінен ҚР еңбек сіңірген жаттықтырушысы: -Бүгінгі II халықаралық бүркітшілер фестивалінің өтіп жатқандағы маңызы зор. Себебі «Экспо» көрмесінің алдындағы тағы да бір нақты дайындық деп айтсақ болады. Бұл, әрине, біздің ата-бабамыздан келе жатқан біздің қанымыздағы бар нәрсе. Біздің төл өнеріміз. Біздің ұлттық құндылықтарымыздың бірі. Бергенбай Тастанбек, жарысқа қатысушы: — Осы құсбегілікпен айналысқаныма 15 жылдай болып қалды. Бұл – әкемнен үйренген мұрам. Бүркітім 9 жаста. Осындай жарыс бола берсе, ертең өсіп келе жатқан ұрпаққа жақсы өнеге болады деп ойлаймын.

cілтеме

Астана қаласы Статистика департаментінің хабарлауынша, 2015 жылғы қаңтар-тамыз айларында бөлшек сауда айналымының жалпы көлемі барлық өткізу арналары бойынша нақты бағамен 413791,7 млн теңгені құрады және 2014 жылдың сәйкес мерзімімен салыстырғанда салыстырмалы бағада 3,7% артты.

2015 жылғы қаңтар-тамызда ресми тіркелген кәсіпорындарда бөлшек сауда айналымының көлемі 294667,6 млн теңгені құрады, бұл 2014 жылдың сәйкес мерзіміндегі деңгейден салыстырмалы бағада 7,2% артық.

Таратылған мәліметтерге сәйкес, көтерме сауда желісі арқылы 2015 жылғы қаңтар-тамызда 1790224,4 млн теңгенің тұтыну тауарлары мен өндірістік-техникалық бағыттағы өнімдері сатылды, бұл өткен жылдың сәйкес мерзіміндегі көлемнен 7,9% жоғары.

Қоғамдық тамақтану саласында 20131,2 млн теңге көлемінде қызмет көрсетілді, бұл 2014 жылдың сәйкес мерзіміндегі деңгейден 7,6% артық. Автомобильдерге, мотоциклдерге техникалық қызмет көрсету және жөндеу бойынша қызметтер көлемі 3502 млн теңгені құрады, бұл 2014 жыдың сәйкес мерзіміндегі деңгейден 2,2% жоғары.

19-20 қыркүйекте Астанада әуесқойлар арасында велоспорттан ҚР Бірінші ашық чемпионаты өтеді. Шараны «Good Energy» велосипед клубы ұйымдастырады.

19 қыркүйекте сағат 09:00-12:00 жеке жарыс, 15:00-18:00 топтық жарыс өтеді. Әуесқойлар Тельман кентінен оңтүстік айналма жолға дейін Қарағанды тасжолына дейін жарысады.

Жексенбі күні, 20 қыркүйекте «Астана Арена» стадионы алаңында Sprint Challenge сайысы өтеді. Жарыста 500 метрлік қашықтықта «Үздік спринт» атағы сарапқа салынады.

Сонымен қатар, 20 қыркүйекте 09:00-14:30 «Отбасылық спринт» және «Балдырған» атты сайыстар өтеді. Отбасылық спринтке 7 жасқа дейінгі баласы бар ерлі-зайыптылар қатыса алады. «Балдырған» сайысы 50 метр қашықтықта 3 дөңгелекті велосипедтермен өткізіледі. Қатысушылар мен жеңімпаздарға естелік сыйлықтар табыс етіледі.

Жарыс тәртібі мен тіркелу бойынша толық ақпаратты www.goodenergy.kz сайтынан немесе 8-775-102-01-01, 8-700-798-77-01, 8 (7172) 54-68-66 телефондары арқылы алуға болады.

Таңертеңнен бері «Мега» СОО алдындағы алаңда Жамбыл, Атырау және Батыс Қазақстан облыстары тауар өндірушілерінің қатысуымен ауыл шаруашылық жәрмеңкесі өтіп жатыр. Апта сайынғы ауыл шаруашылық жәрмеңкесінде тауар өндірушілер 850 тоннаға жуық өнім ұсынуда. Елорда тұрғындары мен қонақтары ет, сүт өнімдерін, көкөніс, сондай-ақ балықты нарықтық бағадан 15-20% арзан сатып ала алды.

Бақтықожа Ізмұхамбетов, Атырау облысының әкімі:

— Қалыптасқан дәстүр бойынша күзгі көкөністі, сүт өнімдерін, ет өнімдерін, балық өнімдерін Астана қаласының жәрмеңкесіне әкеліп тұрмыз. Бұл жолы біз 48 тонна балық, 10,5 тонна ет, 80 тонна көкөніс, 100 мың жұмыртқа және т.б. көптеген тағам өнімдерін алып келдік. Әсіресе, ерекше атап өтетінім, сүт және сүт өнімдерін мол алып келдік. Оның ішінде Қазақстанда алғаш рет шыға бастаған ешкі сүт өнімдерін, оның ішінде ірімшік, брынза, қаймақ, және т.б. бұрын жәрмеңкеге түспеген тағадарды алып келіп жатырмыз. Сұраныс өте күшті, халық риза, ауа-райы да жақсы болып тұр. Айта кетейін, тамақтың бағасы едәуір төмен.

Батыс Қазақстан облысының әкімі Нұрлан Ноғаев:

— Астана қаласында ұйымдастырылған ауыл шаруашылық жәрмеңкесіне Батыс Қазақстан облысынан 7 тонна балық және балық өнімдері, 17 тонна ет және ет өнімдерін, жеміс-көкөніс әкелінді. Шара дәстүрлі түрде жалғасып келе жатыр.

Сондай-ақ жәрмеңкеде Атырау және Батыс Қазақстан облысының шығармашылық ұжымдарының қатысуымен концерттік бағдарлама ұсынылды.

Кәмелеттік жастан енді асқан Астана былтыр әлемдегі 21 «ақылды қаланың» қатарына қосылса, енді 2017 жылға дейін «интеллектуалды жетілікке» енуді діттеп отыр. Экологиялық тазалық пен үнемділікті басты бағдарға алған алғашқы қадамдар қазірден-ақ жасалып жатыр. Елорданың көркін асырып, даңқын асқақтатуға тіпті қарапайым тұрғындар да үлес қоса алады. Астананың шеткі ауданында тізілген жүздеген үйдің ішінде біреуі ерекшеленіп, алыстан көзге түседі. Оның төбесінде күнмен шағылысқан су жылытқыш панель бар. Яғни, үй иелері тұтынатын ыстық су тоқпен емес, күн сәулесінен алған қуатпен ысытылады. Нәтиже бірдей болғанымен, төлемақы мөлшері әлдеқайда аз. Үлкен үйлер үшін үнемдеудің таптырмас көзі болғанымен, күннен қуат алатын құрылғылар әзірге кең қолданысқа ие болмай тұр. Себебі олар жазда ғана толыққанды жұмыс істейді. Бағасы да арзан емес. Бекболат Айтуғанов, инженер: — Құрылғыларға деген сұраныс әзірге өте төмен. Халық бірден зор нәтиже күтеді. Ал бұл – келешекке жасалатын инвестиция. Салынған қаржы 6-10 жыл ішінде өтелуі мүмкін. Қуатты күн мен желден алып, электр энергиясын үнемдеу – Қазақстанның ЕХРО көрмесі аясында бетке алған басты мақсаты. Алайда қаланы безендіруге кететін шығын әзірге азаймай тұр. Қанат Шәкіров, «Астана жарық» ЖШС инженері: — Өткен жылы біз Астананың жарығына 35 млн 500 мың киловатт энергия тұтындық. Бұл – өте үлкен көрсеткіш. Статистикаға сенсек, қалада өндірілетін барлық энегрияның 10 пайызы осы жарықтандыруға кетеді. Оның үстіне құрылғылар тозып, ауыстырып тұруды қажет етеді. Елордамыздың келбетіне көрік қосып, түнгі Астанаға жан бітіру үшін әр кеш сайын қалада 50 000 жарық шамы қосылып, күніне 67 мың киловатт электр энергиясы жұмсалады. Есептей келгенде, оның бәріне Астана қазынасынан ай сайын 2 млн, ал жылына жарты млрд теңге жұмсалады екен. Алайда «ақылды» технологиялардың арқасында бұл шығынды 30 пайызға қысқартуға болады. Қалай десеңіздер, қала көшелеріне жарық диодты шамдар құрылады. Күннің қазіргідей қараңғы уағында олар барынша жарқырап, жанып тұрады. Ал бозарып таң ата бастағанда «ақылды» шамдар өздігінен сөніп қалады екен. Бұл – «Астана Innovations» компаниясының жобасы. Әзірге пилоттық түрде Еңбекшілер көшесіне құрылған. Олардың жарамдығы қазіргі натрийлі шамдардан 10 есе артық. Нұрлан Құрмалаев, «Астана Innovations» АҚ басқарма төрағасының орынбасары: — Жарық диодты шамдар 100 мың сағатқа жарамды. Экологиялық жағынан олар таза келеді. Әзірге 43 бағанаға ғана орнаттық. Дәл осындай бүгінде Рио де Жанейро, Қытайда Донгунг және Еуропаның көптеген қаласында қолданылып келеді. Әлемнің алдыңғы қатарлы, ең ақылды қалаларына қолданылып келе жатқан жарық диодты шамдар 2017 жылға қарай Астанадағы сол жағалау мен оң жағалаудағы басты көшелерге орнатылмақ.

сілтеме

Елордадағы мемлекеттік органдардың қызметкерлері қазақ тілін қаншалықты меңгерген? Өзекті мәселенің мәнісін білу үшін Қалалық тілдерді дамыту басқармасы «Мемлекеттік тіл — мемлекеттік қызметте» байқауын өткізді. Сайысқа Астана қалалық статистика, мемлекеттік кірістер департаменті, құрылыс, кәсіпкерлік және өнеркәсіп басқармаларының қызметкерлері қатысты. 4 кезеңнен тұратын байқауда мамандардың іс жүргізудегі біліктілігі мен тәжірибесі сарапталып, мемлекеттік қызметшілер арасында қазақ тілін дамытуға қосқан үлесі жіті назарға алынды.
сілтеме

«Нұрлы жол – болашаққа бастар жол». Осы бағдарлама аясында елімізде 11 жоба бойынша ұзындығы 7 мың шақырымнан аса жол құрылысы жүзеге асуда. Бүгін осы жолдардың бір нысаны Сенат депутаттарының назарына ілікті. 178 шақырым шығатын «Астана-Теміртау» автожолын аралап көрген сенаторлар құрылыс жағдайына қанықты. Бағасын берді. Нұрбек Байбосын, тілші — «Астана-Теміртау» бағыты 2016 жылдың аяғында толық тапсырылады. Бұл ақпарды депутатттар алдында осы жолға жауапты мекеме «ҚазАвтоЖол» компаниясы басқарма төрағасының орынбасары Темірхан Меңдіғалиев жеткізді. «Орталық-Оңтүстік» деп аталатын жолды жаңғыртуға 1000-ға жуық техника мен үш мыңнан астам адам жұмылдырылған. Аталған жолдың бағыты Қарағанды, Балқаш және Қапшағай қалалары арқылы Астанадан Алматыға дейін ұзындығы 1282 шақырым бойынша жүріп өтеді. Қазіргі уақытта ұзындығы 250 шақырым болатын 9 бөлікте қайта жөндеу жұмыстары жүргізіліп жатыр, оның 150 шақырымы пайдалануға берілген. Бірнеше мердігер мекемелер жұмыс атқаруда. Ғани Өтепбайұлы, жүргізуші -Осы жерде менде тағы бір сауал туындады. Жоспарға еніп, әзірге салынбай қалған жолдар бар ма? Нұрбек Байбосын, тілші -Орынды сұрақ. Естеріңізде болса, Елбасы жолдауына енген Жезқазған мен Қызылорда арасын жалғайтын автожолдың құрылысын бастау жоспарда болатын. Дегенмен де қазір экономикалық ықшамдаудың әсерінен бұл жоба 1-2 жыл кейінге шегерілген. Ал Сенат депутаттары көзбен көрген «Астана-Теміртау» бағытының былтыр 12 шақырымын қолданысқа берген. Биыл 10 шақырымын аяқтау жоспарда бар. Жалпы «Астана-Теміртау», «Астана-Павлодар», «Алматы-Қапшағай» автожолдарына Ұлттық қордан 178 млрд теңге бөлінген. 4 жолаққа дейін кеңейтіліп салынатын жолдарға өзіміздің отандық өнімдердің 95%-ы қолданылуда. Сәрсенбай Еңсегенов, ҚР Парламенті Сенатының депутаты — Сонау Ақтаудан шығатын битум зауытының өнімі осы жерге пайдаланып жатыр. Яғни бұл жолдың сыртында бірнеше мыңдаған адамдар жұмыс істеп, еңбек ақысын алып, жанұясының тұрмыстық жағдайын жақсартуға мүмкіндік алуда.

cілтеме

Қазақстан халқы тілдерінің ХVІІ қалалық фестивалі шеңберінде «Хан шатыр» сауда ойын-сауық орталығында Астана қаласы Тілдерді дамыту басқармасының ұйымдастыруымен «Үздік жарнама» байқауы өтті.

Байқауға «РПК Союз», «Профи ДМ», «Наружка KZ», «АЙСӘТ KZ» жауапкершілігі шектеулі серіктестіктері мен «РТС Деко», «Саян студия» және «Аксиома монтаж» жарнама агенттіктері қатысты.

Жарнамашылар байқауға Қазақ хандығының 550 жылдығы, Қазақстан халқы Ассамблеясының 20 жылдығы және ҚР Конституциясының 20 жылдығы тақырыбындағы жобаларын ұсынды.

Мәтіні сауатты, бояуы қанық, қазақтың салт-дәстүрін көркем бейнелеген «Аксиома монтаж» жарнама агенттігі байқау нәтижесі бойынна бәрінен озық болды. Екінші орын «РПК Союз» ЖШС-ға бұйырса, «Профи ДМ» ЖШС үшінші орынды алды.

– Қазақ хандығының 550 жылдығына арналған кезекті байқаудың «Хан шатырда» ұйымдастырылуы – өте орынды. Үміткерлердің ешқайсысы осал емес. Барлығының жұмыстары асқан шберлікпен орындалған, тақырыпты ашып тұр. Дегенмен, «Аксиома монтаждың» еңбегін қазылар алқасы бір ауыздан үздік деп таныдық, – деді «Қазақстан РТРК» АҚ басқарма төрағасының орынбасары, қазылар алқасының төрағасы Қайнар Олжай.

Байқау жеңімпаздарына Астана қаласы Тілдерді дамыту басқармасының басшысы Тілеуғали Қысқашбаев дипломдар мен бағалы сыйлықтар тапсырып, жұмыстарына шығармашылық табыс тіледі.

Астана қаласы Жұмыспен қамту және әлеуметтік бағдарламалар басқармасының бастамасымен елордада «Көмек» әлеуметтік қолдау көрсету орталығы ашылды.

Мүмкіндігі шектеулі және әлеуметтік жағынан аз қамтылған жасөспірімдерге қолдау көрсететін жаңа орталықтың ашылуына «ЖасНұр» саңыраулар ассоциациясы», «Астана қаласындағы мүгедек балалар қоғамы» қоғамдық бірлестіктері мен «ДОС» тәуелсіз өмір» орталығы мұрындық болды.

Салтанатты ашылу рәсімінде қалалық Жұмыспен қамту және әлеуметтік бағдарламалар басқармасының бөлім бастығы Гүлнар Абдуллаева мемлекет тарапынан төленетін әлеуметтік жәрдемақылар мен басқа да қызмет түрлерімен шектелмей, мүгедек балаларды демеу мақсатында осындай орталықтардың жұмыс істеуі қажет екенін алға тартты. Ол мүмкіндігі шектеулі, қамқорлыққа зәру жасөсіпірімдердің әлеуметтік ортаға бейімделіп, жұмысқа орналасуына бұл бастаманың үлкен көмегі тиетінін айтты.

Орталықта аз қамтылған отбасылардың балаларына арналған киім-кешек және аяқкиім тарату бөлімі бар. Сондай-ақ, жұмыс істегісі келетін жастардың шаштараз, маникюр, педикюр мамандықтарына машықтанып, келешекте жұмыспен қамтылуына ықпал ететін сұлулық салоны жұмыс істейді. Алдағы уақытта орталық ішінен сазбалшықтан мүсін жасаушыларға арналған шеберхана ашу жоспарланып отыр.

Дағдарысқа қарамастан елордада жаңа компаниялар саны артып келеді. Астана қалалық Статистика департаментінің мәліметіне сүйенсек, өткен тамыз айында 476 компания тіркелген, ал жұмысын тоқтатқандар саны – 159. Жаңадан тіркелген субьектілер негізінен Алматы (52,3%) және «Сарыарқа» (30,9%) аудандарында шоғырланған. Ал Есіл ауданының үлесі 16,8 пайыз. Жаңадан тілкелген заңды тұлғалардың 448-і –жауапкершілігі шектеулі серіктестіктер (ЖШС). Ал 11-і – қоғамдық бірлестіктер мен қорлар, 8-і – тұрғынүй-құрылыс кооперативтері, 4-і – заңды тұлғалар бірлестіктері, 2-і – жеке мекемелер, 1-і – мемлекеттік мекеме, 1-і – пәтер иелерінің кооперативі және 1-і – жеке қор.

Ал жұмысын тоқтатқан мекемелердің 144-і – жауапкершілігі шектеулі серіктестіктер, 4-і –қоғамдық бірлестіктер мен қорлар, 3-і – акционерлік қоғам, 2-і – мемлекеттік мекеме, 2-і – пәтер иелерінің кооперативі, 2-і – заңды тұлғалар бірлестіктері, 1-і – өндірістік кооператив, 1-і бау-бақша, саяжайлық жер телімдері иелерінің тұтынушылық кооперативі.

Және бір қызық дерек. Тамыз айында тіркелген 476 мекеменің жетекшілерінің 302-і ер адам, 174-і әйел. Ал жабылған мекемелердің 125-ін ер, 34-ін әйел адам басқарған.