2016 жылдың 23 желтоқсаны Қарағанды облысы әкімінің орынбасары Әбішев Жандос Ақылсерікұлының қатысуымен Қарағанды облысы аумағында жастар ортасында танымалдылыққа ие болған жемісті ғылыми, шығармашылық, кәсіби және қоғамдық жұмысы үшін облыстың 14 жастан 29 жасқа дейінгі жас азаматтарына берілетін Қарағанды облысы әкімі сыйлығының лауреаттарын іріктеу жөніндегі комиссиясының шешуші отырысы өтіп, жеңімпаздар анықталды (әзірге құпия).

Жеңімпаздарды құттықтау салтанаты ағымдағы жылдың 28 желтоқсанында өтеді. Жеңімпаздар жайында толық ақпаратты салтанатты табыстаудан кейін жариялайтын боламыз.
<

2016 жылдың 12 желтоқсаны сағат 12.00-де Қарағанды қаласының «ТАИР» сауда үйінің 2-ші қабатында «САРЫАРҚА» күйін орындауымен домбырашылардың флэшмобы өтеді.

Атылмыш іс-шара ҚР Тәуелсіздігінің 25 жылдығына арналған 25 жұлдызды күндер аясында "Ұлы дала Елі — Тәуелсіздігінің 25 негізі" атты іс-шаралар жоспарын орындау мақсатында өткізіледі.

КЕЛІҢІЗДЕР! КӨРІҢІЗДЕР!

Сіздерді, 1 желтоқсан Қазақстан Республикасының Тұңғыш Президенті күнімен құттықтаймыз!
Ең алдымен, қазыналы Қарағанды – Елбасының еңбек және саяси жолының бастауы, алтын арқауы болғанын аса зор мақтанышпен айтамыз.
Қазақстанның азат ел болуы, мемлекетіміздің әлемдік қауымдастық алдында беделінің өсуі, тұрақтылық пен тыныштықтың орнауы, бұл әрине – Тұңғыш Президентіміздің ерен еңбегінің арқасы деп білеміз.
Облыстың миллиондаған жұртшылығы, әрбір жас азаматы – Елбасының барлық стратегиялық бастамаларын ілгері жылжытудағы тірегі, теңдессіз реформаларын жүзеге асырудағы білегі екенін ерекше сезінеді. Өйткені, Қарағанды – еліміздің индустриялық жүрегі болса, оның тірегі – әлбетте Нұрсұлтан Әбішұлы Назарбаев.
Елбасымыз тәуелсіздік жылдарында жастар саясатын жаңа белеске асырып, өскелең ұрпақтың жан-жақты дамуына, жалынды жастардың барлық бастамаларын қолдап, жастар саясаты басым бағытта екенін айқындап берді. Бұл – жас мемлекеттің болашағы жастардың қолында екендігінің анық белгісі.
Біз, Мәңгілік ел жастары – түтіні түзу ұшқан, ертеңгі күнге сеніммен қарайтын бақытты елде тұрамыз!
Бүгінгі күні Сарыарқа жерінде 130-ға жуық ұлт өкілдерін қамтитын 314 мыңнан аса жас азаматтар тату-тәтті өмір сүруде. Облыста өскелең ұрпақтың жан-жақты дамуына қажетті жағдай жасалған.
Сарыарқа жастары Елбасының саясаты негізінде қомақты табыстарға қол жеткізе беретініне сендіргіміз келеді. Жастарына айрықша көңіл бөлген мемлекеттің келешегі кемел, болашағы жарқын екені аян. Мәңгілік ел жастары еліміздің қарыштап дамуына бар күш-жігерін жұмсайды!
Барша Ұлы Дала Елін 1 желтоқсан Қазақстан Республикасының Тұңғыш Президенті күнімен шын жүректен құттықтаймыз!!!

Ізгі ниетпен: Қарағанды облысының жалынды жастары!

Тәуелсіздік пен мемлекеттілікті одан әрі нығайту, Қазақстан халқын рухани-мәдени топтастыру, дәйекті және озыңқы дамуды қамтамасыз ету мақсатында Қазақстан Республикасы Тәуелсіздігінің 25 жылдық мерейтойы жылында «Бірлік пен жасампаздықтың 25 жылы» тұжырымдамасы қабылданды.

Тұжырымдаманы іске асырудың басты міндеттерінің бірі – «Мәңгілік Ел» жалпыұлттық патриоттық идеясы мен оның құндылықтарын қазақстандық қоғамда, әсіресе, жастар арасында ілгерілету.

2016 жылдың 25 қарашасында сағат 15.00 Қарағанды қаласындағы Серік Сапиев атындағы бокс орталығында «МЕНІҢ ЕЛІМ – МӘҢГІЛІК ЕЛ» жастар акциясы өтеді.

Іс-шараға Қарағанды облысының әкімі, облыстық мемлекеттік органдардың басшылары, Қарағанды әскери горнизоны бөлімшелерінің, Қазақстан халқы ассамблеясының, үкіметтік емес ұйымдардың, бизнес-бірлестіктердің өкілдері, оқушы және студент жастар қатысады.

Акция туралы толық ақапартты және басқа да іс-шаралар туралы алдағы уақыттарда #ЖастарТынысы хэштегі бойынша барлық әлеуметтік желілерден біле аласыздар.

2016 жылдың 14 қарашасы күні Бұқар – Жырау даңғылы Каскад алаңында Қарағанды облысының жастар саясаты мәселелері жөніндегі басқармасы, «Қарағанды облысының жастар ресурстық орталығы» КММ және Қарағанды облысының ІІД жол полициясы басқармасымен бірлесе отырып «Жастар жолдардағы қауіпсіздік үшін» акциясын өткізді.

Акцияның мақсаты: Қараңғы уақыттарда көшеде және жолда жүргенде жаяу жүргіншілер киімдерінде жарық қайтарғыш элементтерді қолдануды насихаттау.


Акцияның міндеті:

* жол-көлік апатының зардаптарын азайту, сонымен қатар, балалардың жол-көліп апатынан алатын жарақаттарының деңгейін азайту.

* жолдағы жаяу жүргіншілердің жүру мәдениетін арттыру.

ҚАРАҒАНДЫ ОБЛЫСЫ ӘКІМІНІҢ «ҚАЙНАР» ЖАСТАР СЫЙЛЫҒЫНА ҚАТЫСУ ҮШІН ҚҰЖАТТАР ҚАБЫЛДАУ БАСТАЛДЫ

ҚАРАҒАНДЫ ОБЛЫСЫ ӘКІМІНІҢ «ҚАЙНАР» ЖАСТАР СЫЙЛЫҒЫН ТАҒАЙЫНДАУ ЖӨНІНДЕГІ ЕРЕЖЕ

Қарағанды облысы аумағында жастар ортасында танымалдылыққа ие болған жемісті ғылыми, шығармашылық, кәсіби және қоғамдық жұмысы үшін облыстың 14 жастан 29 жасқа дейінгі жас азаматтарына берілетін Қарағанды облысы әкімі сыйлығының лауреаттарын іріктеу жөніндегі комиссия (бұдан әрі – Комиссия) Қарағанды облысы әкімінің аталған сыйлығының (бұдан әрі – Сыйлық) лауреаттарын іріктеу бойынша жұмысты жүргізу үшін құрылды.
Сыйлық байқау негізінде тағайындалады.
Комиссия құрамы Қарағанды облысының әкімінің орынбасарымен бекітіледі.
Қажет жағдайда Комиссия бөлек сұрақтар бойынша кеңесшілерді, сарапшыларды тартуға құқылы.
Сыйлыққа үміткерлерді ұсынуды Қарағанды облысының жергілікті және басқа мемлекеттік органдары, шығармашылық және кәсіби одақтары, ұйымдар мен мекемелері, жастар қоғамдық бірлестіктері жүзеге асырады.
«Жастар саясатының дамуына қосқан үлесі үшін», «Жетім балалар мен ата-анасының қамқорлығынсыз қалған балалар үшін үздік жасөспірімдер үйі», «Үздік жастармен жұмыс жасау орталығы» номинацияларынан басқа, «Мемлекеттік жастар саясаты туралы» Қазақстан Республикасының Заңына сәйкес, он төрт жастан жиырма тоғыз жасқа дейінгі Қазақстан Республикасының азаматтары сыйлықтың лауреаттары болып саналады.
Комиссияның жұмысшы органы «Қарағанды облысының жастар саясаты мәселелері жөніндегі басқармасы» ММ (бұдан әрі – Жұмысшы орган) болып табылады.
Сыйлық салтанатты түрде тапсырылады, марапаттау рәсімі Қазақстан Республикасының Тәуелсіздігінің25 жылдығына орайластырылады.
Жұмысшы орган оған жүктелген міндеттерге сәйкес:
1) үміткерлердің байқау құжаттарын қабылдайды және сыйлық алуға ұсынылғандардың жұмысын алдын ала қарайды, оларды ұсыну тәртібінің сақталуын қамтамасыз етеді;
2) үміткерлерді іріктейді, байқауға қатысуға рұқсат беру туралы ұсыныстар енгізеді, байқауға жіберілген жұмыстарды авторларын, оларды ұсынған ұйымдарды көрсете отырып баспасөз беттеріне жариялайды;
3) байқауға жіберілген үміткерлердің жұмысын ашық және ауқымды талқылау жұмысын ұйымдастырады;
4) сыйлықты тағайындау туралы шешім қабылдайды;
5) сыйлық лауреаттарының дипломдарын дайындайды;
Комиссияны облыс әкімінің жетекшілік жасайтын орынбасары ретінде төраға басқарады. Комиссияның төрағасы жоқ кезде оның міндеттерін «Қарағанды облысының жастар саясаты мәселелері жөніндегі басқармасы» ММ басшысы ретінде Комиссия төрағасының орынбасары атқарады.
Комиссияның төрағасы:
1) Комиссияның жұмысын басқарады;
2) Комиссияның құзыреттілігі аясында басқа да өкілеттілікті атқарады.
Комиссияның хатшысы:
1) Комиссия отырысының күн тәртібін жасақтайды;
2) Комиссияның отырысын өткізуді қамтамасыз етеді;
3) Комиссия мүшелеріне отырыстың күн тәртібі, өтетін орны мен уақыты туралы хабарлайды;
4) Комиссия мүшелеріне берілген құжаттарды ұсынады;
5) Комиссия отырысының хаттамасын рәсімдейді.
Комиссия өзіне жүктелген міндеттерге сәйкес:
1. Сыйлыққа үміткерлердің материалдары мен құжаттарын зерттеп іріктейді.
2. Облыс әкіміне Сыйлықты тағайындау туралы ұсыныс енгізеді.
Комиссия лауреаттарды іріктеудің келесі критерийлерін басшылыққа алады:
1) «Жылдың жас көшбасшысы» — оқудағы, қоғамдық жұмыстағы, мәдениеттегі, спорттағы жетістіктер, әлеуметтік маңызы бар және кең ауқымды саяси іс-шараларға қатысу, табысты жүзеге асырылған жобалар, оларды өткізу нәтижесінде қол жеткізген әлеуметтік әсер, жұмысының бұқаралық ақпарат құралдарында (бұдан әрі – БАҚ) жариялануы, ұйымдастырушылық, көшбасшылық қасиеттер;
2) «Отан қорғаушы» — әскери қызметкерлер, құқық қорғау органдарының өкілдері, кәсіпқойлық үшін мадақтамалар мен марапаттар; ел қауіпсіздігін қорғау саласындағы мемлекеттік саясаттың жүргізілуіне белсене қатысу; нәтижесі адам өмірі мен денсаулығын сақтап қалуға әкелген жеке бас жетістіктері, қайғылы салдарды алдын алу, қылмыс жасауды болдырмау бойынша әрекет қылу және т.б.;
3) «Үздік жас мәдениет қызметкері»- мәдениет саласын дамытуға үлес қосқан, өнер, туризм, музыка, әдебиет саласының қызметкерлері (суретшілер, дизайнерлер, фотографтар, музыканттар, актерлар, қолөнер шеберлері, экскурсоводтар, әдебиетшілер, т. б.) шығармашылық конкурстарға қатысатын, (дипломдары, наградалары, шығармашылық жобалары, жұмыстары) болуы қажет;
4) «Жылдың жас жұмыскері» — өнеркәсіп саласының жұмыскері (слесарь, машинист, механизатор, дәнекерлеуші, қырнаушы, қақтаушы, кенші, металлург және т.б.), өз қызмет саласының дамуына үлес қосу, белсенді азаматтық ұстанымы, қоғамдық пайдалы қызмет;
5) «Жылдың жас ұстазы» — білім беру ұйымдарының мұғалімдері мен оқытушылары, мектептен тыс ұйымдардың педагогтары, балабақша тәрбиешілері, әдістемелік құралдар авторлары және өскелең ұрпақты тәрбиелеуге үлес қосқан азаматтар;
6) «Жастар саясатының дамуына қосқан үлесі үшін» — мемлекеттік және азаматтық қызметкерлер, мемлекеттік емес ұйымдардың өкілдері, ЖОО және арнайы орта оқу орындарының өкілдері, білім, мәдениет және спорт саласының қызметкерлері.
7) «Жылдың жас ғалымы» — ғылыми қызметкерлер, жоғары оқу орындарының ғылыми-педагогикалық жұмысшылары, өнеркәсіп пен ғылыми ұйымдардың мамандары, ғылыми дәреженің бар болуы (аспиранттар мен докторанттар), ғылыми саладағы мемлекеттік саясаттың жүргізілуіне белсенді қатысу, қоғамдық өмірдің түрлі салалары бойынша ғылыми жобаларды енгізу мен жүзеге асыру, Қазақстан ғылымына қосқан айрықша үлес, ғылым саласындағы жеке бас жетістіктері, меншікті ғылыми-зерттеу жұмысы, ғылыми конференцияларға, зерттемелерге, грант байқауларына қатысу; басылымдардың болуы: монографиялар, оқу және оқу-әдістемелік құралдар, мақалалар, тезистер, ғылыми мекемелердегі жұмыс тәжірибесі;
8) «Жылдың жас медицина қызметкері» — әдістемелік әзірлемелері, публикациялары, наградалары бар (алғыс хаттар, мақтау қағаздары) жас медицина қызметкері, әртүрлі деңгейдегі конкурстық іс-шаралардың қатысушылары мен жүлдегерлері.
9) «Ауыл шаруашылығының немесе агроөнеркәсіптік кешенінің ең үздік жас маманы»- ауылдық жерде жұмыс істейтін, ауыл шаруашылығында, мал шаруашылығында, өсімдік шаруашылығында жаңа технологиялар енгізген, ауылдың қоғамдық өміріне белсенді қатысатын және ауылдастардың беделі мен құрметіне ие жас мамандар;
10) «Үздік жас мемлекеттік қызметші»- кәсіби жетістіктері, белсенді азаматтық ұстанымы бар, инновациялық жұмыс әдістерін қолданатын мемлекеттік қызметкер,
11) «Шын жүректен» — қайырымдылық шараларымен айналысатын, сондай ақ қиын өмірлік жағдайға тап болған адамдарға көмектесіп жүрген жас азаматтар.
12) «Жетім балалар мен ата-анасының қамқорлығынсыз қалған балалар үшін үздік жасөспірімдер үйі» — балалар үйінің түлектерінтабысты әлеуметтік бейімдеп, тұлғаны жан-жақты, үйлесімді дамытып, кейіннен қоғамға біріктіріп, құқықтары мен заңды мүдделерін қамтамасыз ететін жағдай туғызатын жасөспірімдер үйі;
13) «Үздік жастармен жұмыс жасау орталығы» — жұмыс тәжірибесі табысты жастармен жұмыс жасау орталығы, жастарға көрсетілетін әрекетті қызметтер, мемлекеттік жастар саясатын жүзеге асырудағы жасампаз амалдарды жасақтау мен белсенді қатысу, жастарға атаулы және консультативтік көмек көрсету, қызметі БАҚ-та жариялау.
Сыйлық алғаннан кейін үш жылдың ішінде ұқсас номинация бойынша қайта Сыйлық тағайындауға жол берілмейді.
Сыйлық алуға ұсынылғандар мен байқау жұмыстарын Комиссия екi кезеңде қарайды. Бірінші кезеңдеКомиссия әрбір номинация бойынша сыйлық алуға 3 үміткерді іріктейді, екінші кезеңде солардың ішінен Комиссия әрбір номинация бойыншаСыйлық тағайындауға бір-бір үміткерді анықтайды.
Комиссияның шешімі ашық дауыс беру арқылы көпшіліктің дауысым қабылданады. Комиссия мүшелерінің дауыстары бөлінген жағдайда Комиссия төрағасының дауысы шешуші болып табылады.
Комиссия хатшысы Комиссияның мүшесі болып табылмайды және шешім қабылдау кезінде дауыс беру құқығына ие емес.
Комиссия шешімдері оның құрамының кемiнде 2/3 мүшесі қатысса заңды деп есептеледi.
Комиссия мүшесінің Сыйлық алуға өз үміткерлігін ұсынуға құқығы жоқ.
Байқау өтінімін рәсімдеуге қойылатын талаптар:
1) Байқауға қатысуға өтінім сайысқа қатысатын әлеуетті үміткерлердің осы Тәртібі көрсетілген талаптар мен шарттарға келісім білдіру түрі болып табылады.
2) Байқауға қатысуға ниет білдірген үміткердің Байқауға қатысуға жолдаған өтінімдері бірінші басшының қолы және мөрімен расталған хатпен бірге қабылданады (заңды тұлғалар үшін).
3) Осы Тәртіпте көрсетілген талаптарға сай емес өтінімдер байқауға қатысуға қабылданбайды және тіркелмейді.
4) Байқауға қатысу үшін қажетті құжаттар:
 түйіндеме;
 мемлекеттік органдар және/немесе мекемелердің, қазақстандық және/немесе халықаралық үкіметтік емес ұйымдардың, бизнес-құрылымдардың, өзге де ұйымдардың үміткердің атына жазылған ұсынысхаттары;
 7 фотосурет: 1 стандартты, құжаттар үшін (3х4), 3-«жұмыс үстінде», 2-«бос уақытта»; фотосуреттер басылған және электронды түрде тапсырылуы тиіс, JPEG форматта, кемінде 3000*2000 пиксельде рұқсат етілген; («Жылдың әлеуметтік жобасы» номинациясы үшін талап етілмейді);
 мемлекеттік немесе орыс тілінде «Мен (біз) неге «Қайнар» сыйлығына лайықтымын (-мыз)» тақырыбында эссе. Көлемі 1 беттен аспауы керек, MS Word мәтіндік редакторында, қаріп — Times New Roman, кегль 14, аралық 1,5.
 жетістіктерін растайтын құжаттар (мақтау қағаздарының, дипломдардың, сертификаттардың, лицензиялардың, патенттердің, бейне-фото материалдар көшірмесі CD, DVD түрлі-түсті форматында, баспа, телевизиялық және электронды БАҚ-тардағы мақалалар (мақалалардың кесінділері, газет, журналдардағы мақалалар (немесе олардың көшірмелері), электронды БАҚ-қа сілтеме).
Байқауға қатысу туралы өтінімдер 2016 жылғы 25 қараша сағат 18.00-ге дейін мына мекен-жай бойынша қабылданады: Қарағанды қаласы, Құрылысшылар даңғылы 4, 204 кабинет. Толық ақпаратты Қарағанды облысының жастар ресурстық орталығынан білуге болады: 8(7212) 40-21-33.
Қарағанды облысы әкімінің "Қайнар" жастар сыйлығы 2016 жылдың 8 желтоқсаны күні табысталатын болады.

Қарағанды облысы жастар ресурстық орталығының ұйымдастыруымен Қарағанды банк колледжінің студенттерімен «Қазақстан Республикасының Ұлттық идеологиясы — Мәңгілік Ел» атты тақырыпта кездесу өткізілді.

Кездесуге акедемик Е.А.Бөкетов атындағы Қарағанды Мемлекеттік университетінің «Тұлғатану» ғылыми-зерттеу орталығының директоры, тарих ғылымдарының кандидаты, доцент Бейсенбекова Нұрсахан Ахметқызы және Қарағанды Мемлекеттік университеті тарих факультетінің оқытушысы, доцент, тарих ғылымдарының кандидаты Кентбек Салават Қамшыбайұлы арнайы шақырылып, студенттерге «Ұлы Даланың Мәңгілік Ел тұжырымдамасы» тақырыбында дәріс оқыды.

Астана қаласының әкімі Әсет Исекешев елордалық үш ауданның активіне жаңа әкімдерді таныстырды. Бүгін олардың кандидатураларын қалалық мәслихат депутаттары бірауыздан бекіткен болатын.

«Есіл» ауданының әкімі болып Бөлекпаев Ермағанбет Қабдулұлы тағайындалды.

«Алматы» ауданының әкімі болып Сәрсембаев Әділбек Зейнуллаұлы тағайындалды.

«Сарыарқа» ауданының әкімі болып Тұрлыбек Арман Алашұлы тағайындалды.

*****

Сәрсембаев Ә. З. 1978 ж. 25 тамызында Целиноград қ. туған. Білімі жоғары, заңгерлік, экономикалық. Саяси ғылымдар кандидаты. Еңбек жолын 1996 жылы ҚР ҚМ салық инспекциясында бастаған.

2000-2006 жж. Астана қ. әкімдігінің жүйесінде түрлі қызметтер атқарған.

2006-2007 жж. ҚР Президенті Әкімшілігінің Мемлекеттік бақылау және ұйымдастыру жұмысы бөлімінің бас инспекторы.

2007-2009 жж. Петропавл қаласы әкімінің бірінші орынбасары, Солтүстік Қазақстан облысы әкімі аппаратының басшысы.

2015 жылдың мамырынан «Астана қ. табиғат ресурстарын және табиғат пайдалануды реттеу Басқармасы» ММ басшысы.

«А» корпусының кадрлық резервіне енгізілген.

Бөлекпаев Е.К.1975 жылдың 2 қырқүйегінде туған, Қарағанды облысының тумасы, білімі жоғары экономикалық, заңгерлік. Еңбек жолын 1996 жылы банк саласында бастаған.

1998-2009 жылдары ҚР орталық және жергілікті мемлекеттік органдарда жауапты қызметтер атқарған.

2009 — 2013 жылдары ҚР мемлекеттік қызмет істері Агенттігінің Қарағанды облысы бойынша, Оңтүстік Қазақстан облысы бойынша және Астана қаласы бойынша аумақтық басқармасының бастығы.

2013 жылдың шілдесінен 2015 жылдың қарашасына дейін Астана қ. «Сарыарқа» ауданының әкімі. 2015 жылдың қарашасынан Астана қ. «Алматы» ауданының әкімі.

Тұрлыбек А.А 1971 жылдың 6 мамырында туған, Қарағанды облысының тумасы, білімі жоғары экономикалық, техникалық. Еңбек жолын 1993 жылы бизнес саласында бастаған. 1999 жылдан бері Қарағанды облысы әкімдігінің жүйесінде жұмыс істеген: Энергетика және коммуналдық шаруашылық Департаментінің директоры, Сәтпаев қ. әкімі, облыс әкімінің орынбасары. 2010 жылдан ҚР Инвестициялар және даму министрлігінде жауапты қызметтер атқарған.

Дүйсенбі, 2016 жылдың 17-қазаны елорда мектептерінің мыңдаған оқушылары үшін әдеттегі және үйреншікті түрде өтсе, № 54 мектеп-лицейдің бесінші сынып оқушылары үшін бүгінгі күн ерекше күн болды. Олар үшін дене шынықтыру сабағын Данияр Елеусінов пен Юрий Мельниченко өткізді. Оқушылардың айтуынша, 45 минут уақыт байқалмай өтіп кеткен, ал ең бастысы, бұл дәріс олардың жандары мен тәндері үшін пайдалы өтті.

«Бұл мектепке қайта келгеніме қуаныштымын, мен мұнда биыл бірінші қырқүйек күні келгенмін», — деді чемпион журналистерге сұхбат беру барысында. Ол туған білім ордасына қуана келетінін атап көрсетті. Данияр осы мектептің түлегі. Және бүгін ол қонақ емес, дене шынықтыру пәнінің мұғалімі ретінде келіп отыр. Данияр 1996 жылғы Олимпиаданың алтын жүлдегері Юрий Мельниченкомен бірге балалармен алдымен денені ширату жаттығуларын, содан кейін бұлшық еттерді мығым етіп, қозғалыс үйлесімділігін дамытатын жаттығуларды жасады.

«Егер балалар осы жастарында дене шынықтырудың маңызы мен мәнін түсініп, әуестене шұғылданатын болса, денсаулықтары мықты болады. Біз үшін олардың спортшы немесе басқа салада жетістіктерге жететін қарапайым азаматтар болатыны маңызды емес, ең бастысы, табысты адам болғаны. Ал бұл үшін мықты денсаулық қажет», — деді Юрий Мельниченко.

Оқушылар отырып, секіріп жатқанда жоғарғы сынып оқушылары атақты спортшының автографын алып, онымен селфиге түсу үшін сабақтың аяқталғанын тағатсыздана күтті. Астана әкімдігінің және «Samruk-Kazyna Trust» әлеуметтік жобаларды дамыту Қорының қолдауымен ұйымдастырылған «Физкульт-Ура» жобасының арқасында үстіміздегі жылдың сәуірінен бері ондаған мың елордалық мектеп оқушылары Дмитрий Баландин, Гюзель Манюрова, Серік Сәпиев, Ольга Шишигина, Валерий Тихоненко, Ермахан Ыбрайымов және Жақсылық Үшкемпіров сияқты үлкен спорттың жұлдыздарымен кездесуге мүмкіндік алды. Болашақта ұйымдастырушылар жобаны өзге аймақтарда да өткізіп, Ақтөбе және Қарағанды қалаларының мектеп оқушыларын да қуантуды жоспарлап отыр.

Әсет Исекешев Жакенов Берік Оралұлын Астана қаласы әкімі аппаратының басшысы етіп тағайындау туралы өкімге қол қойды.

Берік Жәкенов 1978 жылы 25 тамызда Астана қ. (Целиноград қ.) туған. 2000 жылы Шәкірім атындағы Семей мемлекеттік университетін «Экономист» мамандығы бойынша бітірген. «Мемлекеттік және жергілікті басқару» мамандығы бойынша экономика ғылымдарының магистрі. Еңбек жолын 2000 жылы Ақмола облысының Көкшетау қаласында салық полициясы органдарында бастаған. Қазақстан Республикасының салық органдарында көп жыл еңбек еткен, Астана қаласы бойынша салық комитетінің ақпараттық жүйелерді енгізу және сүйемелдеу бөлімінің маманы болған. 2009 жылы Қарағанды облысы бойынша Салық департаменті бастығының орынбасары, содан кейін Астана қаласы бойынша Мемлекеттік кірістер департаментінің Сарыарқа ауданы бойынша мемлекеттік кірістер басқармасының басшысы болып істеген. Қазақстан Республикасы Президенті Әкімшілігі Басшылығы Хатшылығы меңгерушісінің орынбасары болған. 2015 жылғы тамызда Қазақстан Республикасының Президенті Әкімшілігінің мемлекеттік бақылау және ұйымдастыру-аумақтық жұмыс бөлімінің мемлекеттік инспекторы қызметіне тағайындалды.

Сонымен қатар, Астана қаласының өкімімен Карагойшин Асхат Жиенбайұлы Астана қаласының автомобиль жолдары басқармасының басшысы болып және Кенжебаев Назымбек Әміржанұлы Астана қаласының жер қатынастары және жерді пайдалануды бақылау басқармасының басшысы болып тағайындалды. Екеуінің де мемлекеттік мекемелерде жұмыс істеу тәжірибесі мол: А.Карагойшин 2010 жылдан, Н.Кенжебаев 2007 жылдан бастап басшының орынбасары болып қызмет еткен.

astana.gov.kz/kk/modules/material/11403

Қазақстан Республикасы Тәуелсіздігінің 25-жылдығын тойлау аясында Қазақстан жастарының конгресі «Жаңа дем» пилоттық жобасын жүзеге асырды. Аталған жоба қыркүйек айының 17 жұлдызында Ақтөбе облысында бастауын алды.
«Жаңа дем»бағдарламасы ауылдық елді мекендердің жандануына және оларға қолдау көрсетіп, жастарды көркейтуге шақыруға бағытталған. Жастар топтары Мартукск ауданындағы Веренка селосына аттанды. «Қазақстан жастарының конгресінің» Ақтөбе облысындағы белсенділері, «Жас Ұлан» аймақтық қоғамдық ұйымы, Қазақстан студенттерінің Альянсы өкілдері Нудьга Вера, Будко Александра, Божко Нина Максимовна, Прокопало Мила Константиновна атты ұстаздық еңбектің зейнеткерлерінің үйлеріне жөндеу жұмыстарын жүргізді.
«Жас Ұлан» облыстық Кеңесінің мүшелері Веренко аулының мектеп оқушыларына тренинг жүргізіп, өз тәжірибелерімен бөлісті.
Балалармен жеке әңгіме-дүкен құрылғанда, Ақтөбе қаласының 55-мектебінің аға тәлімгері Таирова Айшерім мектеп мұғалімдеріне білім реформалары бойынша өз үлгісінде үш тілді білудің маңыздылығы туралы мастер-класс өткізді.
Ақтөбе облысының Қазақстан студенттерінің Альянсы жетекшісі Дәурен Есалиев тұлғалық өсу туралы тренингтер мен ауыл жастары арасында team-building өткізді.
— «Жаңа дем» жобасы Қазақстанның 4 облысында өткізіледі, атап өтсек: Павлодар, Қарағанды, Ақтөбе, Батыс Қазақстан облысы. Ақтөбе облысы бойынша 4 ауылда жөндеу жұмыстары жүргізіледі, ауыл жастарына мастер-класстар, тимбилдингтер мен бизнес-тренингтер өткізіледі, — дейді Қазақстан жастарының конгресінің аудандық өкілі және «Жас Ұлан» аудандық қоғамдық ұйымының жетекшісі Диана Гафсалимова.

Қазақстан Республикасы Тәуелсіздігінің 25-жылдығын тойлау аясында Қазақстан жастарының конгресі «Жаңа дем» пилоттық жобасын жүзеге асырды. Аталған жоба 20 қыркүйекте Қарағанды облысында бастауын алды. Қарағанды облысының Осакаровск ауданының жастар ресурстық орталығы, «Жас Отан» ҰДП филиалы және «Раян» жастар қоғамдық ұйымы еріктілері құраған еңбек жасағы Қарағанды облысының 3 аулына аттанды.
«Жаңа дем» бағдарламасы ауылдық елді мекендердің жандануына және оларға қолдау көрсетіп, жастарды көркейтуге шақыруға бағытталған. Еңбек жасағы Қарағанды облысының Осакаровск ауданының Озерное аулындағы 5 үйге, Пионерское аулында 5 үйге және Осакаровка аулында Қарттар үйіне жөндеу жұмыстарын жүргізді. Жөндеу жұмыстарына аймақ тазалау, терезеледі бояу, үйлерді әктеу, үй қоршауларын бояу және үй қабырғаларын әрлеу кірді. Үй қабырғалары Қазақстан Республикасының Тәуелсіздігінің 25-жылдығының символикасы және жастар ұйымдарының логотиптерімен (Қазақстан жастарының конгресі, «Жас Ұлан», Қазақстан студенттерінің Альянсы) әрленді.
«Жаңа дем» жобасы Қазақстанның 4 облысында өткізіледі, атап өтсек: Павлодар, Қарағанды, Ақтөбе, Батыс Қазақстан облысы. Қазіргі таңда жоба Павлодар, Ақтөбе, Қарағанды облыстарында жүзеге асырылды.
Жөндеу жүргізілген үйлердің мекен-жайлары келесі бетте көретілген.

Қазақстан Республикасы Тәуелсіздігінің 25-жылдығын тойлау аясында Қазақстан жастарының конгресі «Жаңа дем» пилоттық жобасын жүзеге асырды. 2016 жылдың 21 қыркүйек күні Екібастұз қаласының жастары Екібастұз ауданындағы Ә.Марғұлан атындағы ауылында жөндеу жұмыстарын жүргізді. Жоба мақсаты – қала жастарының активімен шалғай ауылдардағы жөндеу жұмыстарын қажет ететін үйлерге жөндеу жұмыстарын жүргізу, қала жастары мен ауыл жастарының қатынасуына мүмкіндік жасау және ауыл жастарына мастер-класстар, тренингтер өткізу. Жоба ұйымдастырушысы «Қазақстан жастарының конгресі» ЗТБ. Павлодар облысындағы жоба қолдаушысы – «Нұр Отан» ХДП-ның Екібастұз қалалық филиалы.
«Жаңа дем» бағдарламасы ауылдық елді мекендердің жандануына және оларға қолдау көрсетіп, жастарды көркейтуге шақыруға бағытталған.
Қала жастарынан құралған еңбек жасақтарының мүшелері Ақтөбе, Павлодар, Қарағанды және Батыс Қазақстан облыстарының 25 ауылдық жерлерінде жөндеу жұмыстарын жүргізеді. Қазіргі таңда 9 ауыл бойынша қажет еткен әлеуметтік қорғалмаған отбасылар, еңбек ардагерлері, зейнеткерлер үйлеріне әрлеу жұмыстары атқарылды.
Жоба аясындағы жұмыс келесі түрлерде жүргізіледі:
Үйлердің косметикалық ремонты. Косметикалық жөндеу жұмыстарына үйлерді әктеу, терезелерін, дуалдарын бояу, графикалық суреттермен әрлеу кіреді. Графикалық суреттер жастар ұйымдарының логотиптері стилінде және Қазақстан Республикасының Тәуелсіздігінің 25-жылдығының символикасы салынады.
Үй территорияларын және қараусыз қалған үйлерді тазалау. Жасақ мүшелері қоқыс пен үйлер сынықтарынан тазалайды.
Ауыл тұрғындары мен жастарына мастер-класстар, тренингтер, ағылшын тілі, кәсіпкерлік негіздері, әлеуметтік жобалау, тұлғалық өсу сабақтарын өткізу. Аталған шараларды «Болашақ» бағдарламасының түлектері, жастар ұйымдарының көшбасшылары өткізеді.

Алдағы демалыста Астанада Шығыс Қазақстан және Қарағанды облыстарының ауыл шаруашылық тауар өндірушілері өз өнімдерін ұсынады. Елордалықтар өңірлердің мәдениетімен етене танысады.

8-9 қазанда ШҚО ауыл шаруашылық жәрмеңкесі «Хан шатыр» сауда ойын сауық орталығының жанындағы тұрақ алаңында өтеді. Облыстың тауар өндірушілері 300 тонна өнім әкеледі, барлығы 57 сауда орны жасалады.

Қала әкімдігінің алдында өтетін Қарағанды облысының жәрмеңкесінде 840 тонна өнім өткізіледі, 60 сауда орны жасалады. Шара барысында облыстық шығармашылық ұжымдардың қатысуымен мерекелік концерт және «Бауырсақ, қымыс фестивалі» қайырымдылық акциясы ұйымдастырылады. Сондай-ақ, «Шеберлер ауылы» сәндік-қолданбалы өнер көрмесі ашыладып, қала тұрғындары мен қонақтары зергерлік өнер, көркем тоқымашылық және қыш-құмыра шеберлігі бойынша шебер-сыныптарына қатысады.

8 қазанда сағат 12.00 — ҚР Тұңғыш Президенті кітапханасында Қарағанды облысынан «Сарыарқа кітапханасы» 100 томдығын сыйға тарту салтанаты, Әлихан Бөкейханның 15 томдық шығармалар жинағының тұсаукесер-көрмесі және Қарағанды облысы суретшілерінің «Сарыарқаның сырлы бояулары» атты көрмесі өтеді.

Сағат 18.30 Оқушылар сарайында С. Сейфуллин атындағы облыстық қазақ драма театрының У. Шекспирдің «Ромео мен Джульетта» спектаклінің қойылымы көрсетіледі.

9 қазанда сағат 11.00 Бейбітшілік және келісім сарайының фойесінде Қарағанды облысының Тәуелсіздік жылдарындағы жетістіктері көрмесі ашылады, «Нұр Әсем» сән үйінің ұлттық киімдер жинағы көрсетіледі. Ал сағат 16.00 Қарағанды облысы өнер майталмандарының гала-концерті көпшілік назарына ұсынылады.

8 қазанда сағат 9.00 «Көрме» орталығында ШҚО археологиялық артефактілер көрмесі, сағат 10.00 ҚР Ұлттық музейінде ҚР Тәуелсіздігінің 25 жылдығына арналған «Үлкен жолдың кезеңі» фотокөрмесі өз жұмысын бастайды. Сонымен қатар, сағат 10.30 «Шығыс Қазақстанның суретшілері. Уақыт портреттерінің ерекшеліктері» атты бейнелеу өнері көрмесі ашылады.

Сағат 15.00 ҚР Ұлттық академиялық кітапханасында «Тәуелсіздіктің жарқын жетістіктері: Шығыс Қазақстан» кітап көрмесі өтеді. Онда келушілер назарына тәуелсіздік жылдары экономиканың, әдебиеттің, мәдениет пен спорттың дамуына елеулі үлес қосқан танымал тұлғалар туралы кітаптар ұсынылады. Көрме аясында «Біздің Абай» электронды толық мәтінді кітапхана және «Қайым Мұхамеджанов» электронды библиографиялық көрсеткіші атты екі жобаның тұсаукесері өтеді. Бұдан басқа, сағат 15.00 Л.Н. Гумилев атындағы Еуразия ұлттық университетінде Өскемен қаласының драма театры К. Людвигтің «Жұлдызды сәт» спектаклін қояды. Сағат 18.30 «Жастар» театрында Семей қаласының Абай атындағы Шығыс Қазақстан облыстық театрының Ф.М.Достоевскийдің «Дядюшкин сон» спектаклі көрсетіледі. Ал жәрмеңкеге келушілер екі күн бойы Ә. Қашаубаев атындағы Шығыс Қазақстан облыстық филармониясының «Шұғылалы Шығыс» атты концертін тамашалайды.

astana.gov.kz/kk/modules/material/11334

Астанада Қазақстан өңірлері тауар өндірушілерінің ауыл шаруашылық өнімдерінің апта сайынғы жәрмеңкелері басталады. Алдағы демалыста (3-4 қыркүйекте) Қызылорда облысы тауар өндірушілері елорда тұрғындары мен қонақтарына өз өнімдерін ұсынады. Жәрмеңке Б. Момышұлы даңғылындағы Оқушылар сарайының тұрағында өтеді.

Жәрмеңкеге келушілерге 400 тоннаға жуық 50-ден астам өнім түрі ұсынылады. Атап айтқанда, балық, көкөністер, жемістер, сүт өнімдері, кондитерлік және шұжық өнімдері және т.б. Жәрмеңкедегі бағалар базардағыдан 15–20 % төмен болады.

Қызылорда облысынан кейін жәрмеңкелер эстафетасын Алматы облысы жалғастырады. Сауда-саттық демалыс күндері Б. Момышұлы даңғылындағы Оқушылар сарайының тұрағында (Қызылорда облысы 3-4 қыркүйек, Алматы облысы 10-11 қыркүйек, БҚО 17- 18 қыркүйек, Жамбыл облысы 24- 25 қыркүйек, Ақтөбе облысы 1-2 қазан, Қарағанды облысы 8-9 қазан, Қостанай облысы 15-16 қазан және Солтүстік Қазақстан облысы 22-23 қазан), сондай-ақ, «Хан Шатыр» СОО тұрақ аумағында (Атырау облысы 17-18 қыркүйек, Павлодар облысы 24-25 қыркүйек, Маңғыстау облысы 1-2 қазан, ШҚО 8- 9 қазан, ОҚО 15- 16 қазан, Ақмола облысы 29-30 қазан) қазан айының соңына дейін өткізіледі.

«Дене шынықтыру мен спорт мемлекеттің ерекше
қамқорлығында болуы керек. Нақ сол саламатты
өмір салты ұлт денсаулығының кілті болып саналады».

Н.А. Назарбаев

Астана қаласының әкімдігі 2016 жылғы 15 тамыздан бастап «Спорттық Астана, сау Астана!» атты бірегей акциясын өткізеді. Мақсаты– астаналықтарды спортқа баулу. Мемлекет басшысы, – «Саламатты өмір салты ұлт денсаулығының кілті» болып саналатынын атап өтті. Қазақстан Республикасы Президентінің тапсырмалары аясында маңызды міндет қойылды – 2020 жылға қарай халықтың 30% дене шынықтыру мен спортқа тарту. Осыған байланысты бір ай бойы елордалық спорт алаңдары мен саябақтарында түрлі бұқаралық спорттық жарыстар ұйымдастырылды, оған мыңдаған қала тұрғыны қатысты. Акцияның ұраны: «Емделген емес, ауырмаған адам сау болады».

Акцияның негізгі міндеті

Дені сау жас ұрпақты тәрбиелеу, балаларды, жастарды және қарияларды, яғни барлық жастағы азаматтарды спортқа тарту осы акцияның басты міндеті болып табылады. Сол себепті елордада бұқаралық спортты дамытуға жағдайлар жасалады.

«Көңілді старттар»

Акция 15 тамызда басталып, 15 қыркүйекке дейін өтеді. Осы уақыттың ішінде елордалық спорт алаңдарында қызықты спорттық жарыстар ұйымдастырылады, оған ниет білдіргендердің бәрі де қатыса алады. Мысалы, әр демалыс сайын Астананың 9 паркінде сағат 18.00-20.00 аралығында зілтемір, гір көтеруден жарыстар, стритбол, шахматтан сайыстар, арқан тарту ұлттық ойыны, сондай-ақ, отбасыға арналған «Көңілді старттар» өткзілді.

Жарыстарға 5-6 жастағы балалар, ата-аналар және ата-әжелер қатысты. Күн сайын 4500 жуық адам өнер көрсетті. Қатысушылар естелік сыйлықтармен және жүлделермен марапатталды.

«Астана – дені сау және спортпен шұғылданатын адамдар қаласы» акциясы аясында «Есіл», «Алматы» және «Сарыарқа» аудандарының өндірістік ұжымдары шағын футболдан жарыста өзара шеберлік байқасты.

Аула клубтарының арасында өткен «Көңілді старттарда» қала тұрғындары тұтастай отбасыларымен қатысты.

Велоспорт кеңінен танымал болып келеді

Елордада велоспорт кеңінен танымал екендігін ескере келе, екі бұқаралық жарыс ұйымдастырылды: «Ардагерлер мен әуесқойлар арасында велоспорттан Қазақстан кубогының II кезеңі» және маунтинбайк жарысы.

Қазақстан кубогына астаналықтардан басқа, алматылықтар, қарағандылықтар мен еліміздің өзге өңірлерінің де тұрғындары қатысты. Айта кетейік, жарыста 65 жас және одан жоғары санат та болды. Қатысушылардың қауіпсіз қозғалысын қамтамасыз ету үшін Тұран даңғылы мен Қабанбай батыр даңғылдары жартылай жабылды, жол полициясының қызметкерлері еріп жүрді.

Маунтинбайк жарысында 10-65 жастағы елорда тұрғындары қатысты. Қатысушыларға қойылған жалғыз талап — шлем мен байктың болуы.

Астаналық спортшылардың арасында байдаркамен ескек есу, стендтік ату, шахмат, тоғызқұмалақ, хоккей және футбол, кроссфит, жүрдек мәнерлеп жүргізу және т.б. спорт түрлерінен чемпионаттар өткізілді.

Акция аясында ірі спорт кешендерінде Ашық есік күндері өткізілді. Кез келген адам «Дәулет» СК Ұлттық теннис орталығында заманауи кортта тегін теннис ойнау мүмкіндігіне ие болды.

«Астана Марафон – 2016»

4 қыркүйекте өтетін «Астана Марафон — 2016» халықаралық қайырымдылық шарасы акция аясындағы ерекше оқиға болады, оған 5000 астам адам қатысады деп күтілуде.

Қайырымдылық марафонға Қазақстан Республикасы Президенті Әкімшілігінің басшысы Ә.Р. Жақсыбеков, Қазақстан Республикасының Премьер-Министрі К.Қ. Мәсімов, Қазақстан Республикасы Үкіметінің мүшелері, Қазақстан Республикасы Парламентінің Сенаты мен Мәжілісінің депутаттары қатысады. Осылайша мемлекеттік қайраткерлер ұлт саулығы, қазақстандықтардың салауатты өмір салтын ұстануы мемлекетіміздің басым міндеті болып табылатынын дәлелдемек.

Марафонға Qazaq Banki, ERG, KazTechInnovations, Astana Marriott Hotel, KPMG «Самұрық-Қазына» және BI-Group сынды компаниялар, сондай-ақ, таяу және қиыр шетелден 23 мемлекеттен атлеттер, елшіліктер мен халықаралық компаниялардың қызметкерлері қатысады.

Атап айтқанда, Ұлыбритания, Малайзия, Польша, Чехия, Италия, АҚШ, Қырғызстан, Франция, Австралия, Германия, Иран, Ресей, Ирландия, Бельгия, Эстония, Бразилия, Өзбекстан, Қытай, Оңтүстік Корея, Венесуэла, Түркия, Грекия, Жапония елдерінің өкілдері марафонда бағын сынайды.

Елордада Марафонды өткізуге байланысты сағат 7:30-14:00 аралығында орталық көшелерде қозғалыс тоқтатылады. Елорда тұрғындары мен қонақтарына уақыт үнемдеп, жолдарда дау туғызбас үшін өз бағдарларын алдын ала жоспарлаулары керек. Астана қаласының әкімдігі уақытша ыңғайсыздықтарға түсіністікпен қарауыңызды сұрайды.

Жарыстар, турнирлер, чемпионаттар

4 қыркүйекте Марафоннан басқа, Астанада 15-тен артық жалпықалалық спорттық шара өткізу жоспарланған. Оған 7000 жуық елорда тұрғыны мен қонағы қатысады деп күтілуде.

Мысалы, «Жерұйық», «Астаналық», «Астана Триатлон» саябақтарында асық ату, арқан тарту жарыстары, сонымен қатар веложарыс өткізіледі. Жарыстар 4 қыркүйекте сағат 10.00 басталады, оған ниет білдіргеннің бәрі қатыса алады.

Жақын аймақтардың және елордалық спортшылардың арасында үстел теннисінен, шахматтан, шағын футболдан, жеңіл атлетикадан, су полосынан жәнеат спортынан турнирлер ұйымдастырылады. Жеңімпаздар бағалы сыйлықтармен марапатталады.

4 қыркүйекте «Барыс» спорт кешенінде елорда тұрғындары мен қонақтарына арналған Ашық есік күні өтеді. Шара аясында кез келген адам мұз айдынына шығып, «Барыс» ХК жетекші бапкерлерінің шеберлік сыныптарына қатыса алады.

2016 жылғы 5-15 қыркүйек аралығында акция аясында 2000 артық адам қатысатын 10 шара өткізу жоспарланған.

Салауатты өмір салтын насихаттау мақсатында 10 қыркүйекте

№ 71 ОМ «Есіл» ауданының мектеп мұғалімдерінің арасында волейболдан турнир өтеді.

11 қыркүйекте «Астана Триатлон» саябағында «Отбасылық Дуатлон» өтеді. Ата-аналар мен балалар осы жарысқа бірге қатысып, салауатты өмір салтының қажеттілігін көрсетпек.

Акция аясында велоспорттан Қазақстан Республикасының Чемпионаты (4 күндік топтық жарыс), Ұлттық ұлан Бас қолбасшысының Кубогы үшін қоян-қолтық ұрыстан, таеквондодан «Корея елшілігінің кубогы» республикалық турнирі өтеді.

2016 жылғы 7-10 қыркүйек аралығында «Қазанат» ипподромы аумағында «Астана жұлдызы» спорттық жарысында бас жүлде үшін таласады. Аталған жобаның негізгі міндеті – өскелең ұрпақты ұлттық спорт түрлеріне, салт-дәстүрімізге, мәдениет пен тұрмысқа баулу. «Астана жұлдызы» көкпар, қыз қуу, бәйге, аударыспақ, теңге алу және т.б. ұлттық спорт түрлерін дамытуға бағытталған. Жобаға еліміздің үздік спортшылары қатысады.

11 қыркүйекте Қабанбай батыр ауылында ат спортына әуес жандар 51 шақырымдық аламан бәйгеде «Алтын Тұлпар» атағы сарапқа салады. Жарыс «Қазспорт» және «Қазақстан» телеарналарынан тікелей эфирде көрсетіледі.

Жалпы, «Спорттық Астана, сау Астана!» акциясы аясында түрлі сипаттағы 50 шара өткізілмек, оған 50 мыңнан астам адам қатысады.

Барлық астаналықтарды отбасыларымен бірге спортпен шұғылдануға шақырамыз. Бұл үшін барлық аудандарда және әр аулада қолайлы жағдайлар жасалатын болады. Зиянды әдеттерден бас тартып, темекі шегуді тастауға және спирттік ішімдіктер ішпеуге шақырамыз. Уақытты теледидар алдында босқа өткізгенше, бүкіл отбасыңызбен бірге бұқаралық спорттық шараларға қатысыңыздар, таза ауа жұтып, бойға қуат жинап, сергіп қайтыңыздар.

Салауатты өмір салтының сіздің жетістіктеріңіз бен отбасыңыздың ауқаттылығының артуының 90% кепілі болып табылады.