Естеріңізде болса, 23 сәуір жалпықалалық сенбілікке күні болып белгіленген. Бұл шараға қаланың барлық коммуналды қызметтері қатысады. Қазіргі кезде аудандарда ағаштар мен көшеттер отырғызатын орындар әзірленіп, гүлзарларды, көшелер мен гүлбақтарды тазалау, топырақ пен құм шығару жұмыстары жүргізілуде. Сонымен қатар, қаланы санитарлық тазарту және жерлерді гүл отырғызуға дайындау жұмыстары қолға алынды. Аудандарда барлық учаскелерде жұмыс істеу кестелері жасалып, жауапты тұлғалар анықталды.



— Сенбілікке дайындық қызу жүргізіліп жатыр. 2200-ге жуық ірі ағаш, соның ішінде, қарағай, шырша, қайың отырғызылады. Бұдан басқа, үш ауданда 13 900 көшет егіледі. Атап айтқанда, терек, тал, мойыл, шегіршін, шетен және долана. Биыл бір күнде 16 мың ағаш отырғызылады, — деді «Астана — Зеленстрой» АҚ төрағасының орынбасары Бибігүл Бектемісова.

Елордада Орынбор көшесінде және «Арай» паркінде, Ақыртас, Ғабдуллин, Уәлиханов көшелерінде, Тілендиев даңғылында және т.б. жаппай ағаш отырғызылады. Көгалдандыру объектілерінде тиісті орындар дайындалып, көшеттер қойылады, инерттік материал (құнарлы жер, топырақ, қара топырақ) қажетті мөлшерде әкелінеді.

Айта кетейік, биыл қаланы жинау мен көгалдандыру жұмыстарында шағын механикаландырылған машиналар пайдаланылатын болады. Оның басты басымдықтарының бірі ықшамдылық пен салмағының жеңіл болуы, бұл кеспе тастар мен жолдың жиектерін байқап тазалауға мүмкіндік береді.


Мұнымен қоса, биыл бір жылдық гүлдер аз отырғызылады. Олардың орнына елордада көп жылдық гүлдер, соның ішінде раушангүлдер мен қызғалдақтар егіледі.

Жалпы ауданы 7 мың шаршы метрді құрайтын жерге 25 мың бірлік француз раушангүлі отырғызылмақ. 2016 жылы жалпы ауданы 162 288 шаршы метрлік жерге гүл өсіріледі.

Қала әкімдігі тұрғындарды елорданы абаттандыру мен көгалдандыруға өз үлесін қосып, алдағы сенбілікке қатысуға шақырады.

Материал Астана қаласы әкімдігінің ресми сайты astana.gov.kz деректері бойынша әзірленді.

Астана қаласының коғамдық көліктерінде мамыр айында қэлектрондық төлем жасау жүйесі қолданысқа енгізіледі деп хабарлайлы Астана қаласы әкімдігінің ресми сайты astana.gov.kz.

Елорда әкімдігі ғимаратында өткен Қоғамдық кеңес отырысында Жолаушылар көлігі басқармасының өкілдері қалалық қоғамдық көліктерде электрондық төлем жасау жүйесі (ЭТЖЖ) карталарын қолданысқа енгізу туралы баяндады. Аталған жобаны мамыр айында іске қосу көзделген.

— Біз азаматтардың жеңілдікті санаттары үшін арнайы мәліметтер базасын жасап, карталарды дербестендірдік. Олар автобустармен тегін жол жүреді. Бұл ретте валидация жасауға, яғни автобуста картаны пайдалануға міндетті. Оқушыларға да дербес карталар беріледі, оны жазғы демалыс кезінде 30-шы тамызға дейін қолдануға болады, — деді «Астана LRT» ЖШС басқарма төрағасы Талғат Ардан.

Карталарды арнайы белгіленген орындарда және жүргізушілерден сатып алуға болады. Егер жолаушының картасы болмаса, ол жолақыны жүргізушінің жанындағы терминалмен электронды карта арқылы немесе қолма-қол ақшамен төлейді. Автобус жүргізушісінің және әрбір есіктің жанына валидатор орнатылады.

ЭТЖЖ жолаушылар тасымалының сапасын арттыруға мүмкіндік береді және осы саланың айқындылығын қамтамасыз етеді.

Орынбор көшесінің Керей мен Жәнібек хандар көшесінен Хусейн Бен Талал көшесіне дейінгі бөлігінде асфальтбетон жабыны ауыстырылады. Осыған байланысты аталған жол учаскесінде 15-сәуірден бастап 2 мамырға дейін көлік қозғалысы уақытша шектелетін болады.



Жол жөндеу жұмыстары жүргізілетін кезеңде жүргізушілерден жол бағдарын алдын ала жоспарлауды сұраймыз.

Материал Астана қаласы әкімдігінің ресми сайты astana.gov.kz деректері бойынша дайындалды.

Ас ана қаласында «Жалынды жастар» фестивалін өткізу игі дәстүрге айналды. Биылғы фестивальге елордалық ЖОО-лар мен колледждердің 1000 астам студенті қатысты.

Бұл жолы фестиваль ҚР Тәуелсіздігінің 25 жылдығына орай ерекше салтанатпен өтті. Ұйымдастырушылардың айтуынша, фестиваль жастар шығармашылығын шыңдауға, олардың бойында патриоттық сезім оятуға бағытталған. Гала-концертте жеңімпаздарға марапаттарды танымал өнер және мәдениет қайраткерлері табыстады.

Л.Н. Гумилев атындағы Еуразия Ұлттық университетінің өкілдері «Үздік волонтерлық жоба», «Квест» номинацияларында, сондай-ақ, эстрадалық ән мен музыкалық аспаптарда ойнау конкурстарында топ жарды. С. Сейфуллин атындағы Қазақ агротехникалық университеттің студенттері халық және қазіргі заманғы би конкурсында, «Что? Где? Когда?» ойынында және «Үздік жанкүйерлер» номинациясында үздік атанды. «Авторлық оқу» санатында Қаржы академиясының қатысушылары жеңіске жетті. «Тұран-Астана» университетінің командасы үздік студенттік клуб атанды, ал «Астана» медицина университетінің студенттері креативті бейнеролик түсірген.


«Что? Где? Когда?» ойынында С. Сейфуллин атындағы Қазақ агротехникалық университеті құрамасының капитаны Бибарыс Әміржановтың айтуынша, ойын тартысты өтті. Қойылған сұрақтар өте қиын болды. Қатысушылардың барлығы ақылды, дарынды.

— Біз жақсы өнер көрсеттік деп ойлаймын. Көп дайындалып, «21-ші ғасыр көшбасшысы» тоқсандық ойындарын, «Что? Где? Когда?» ойындарын көрдік. Университетте зияткерлік ойындар, соның ішінде «Брейн-ринг» өткізетін клуб та бар, осылайша, жарысқа дайындалдық. Бұл өте қызықты фестиваль, оның басты мақсаты – елордамыздағы барлық студенттердің басын қосу болып табылады, — деп өз ойымен бөлісті.

«Квест» номинациясында – Л.Н. Гумилев атындағы ЕҰУ студенттері көш бастады. Осылайша Ұлттық университетте ақылымен де, өнерімен де топ жарқан жастар оқитынын дәлелдеді.
— Жыл сайын шараға қатысып, жаңа достар табамыз. Мұнда әртүрлі университеттердің өкілдері бар, жылдан жылға қарым-қатынасымыз нығая түседі. Биыл «Квест» номинациясында алғаш рет өнер көрсеттік. Өте жақсы болды. Мен Астанада үш жылдан бері тұрамын. Көптеген жаңа орындармен таныстым. Қазақ хандығынан бастап бәрін қайталадық, тіпті, Морзе әліппесін де жаттадық, көпірлермен жүріп, код жинадық, қызық болды, — дейді Л.Н. Гумилев атындағы ЕҰУ студенті Зинұр Кинисов.

Шара барысында қазақстандық эстрада жұлдыздары Маржан Арапбаева, Димаш Құдайберген, ағайынды Жүгінісовтер және т.б. қатысушылар мен көрермендерге керемет көңіл-күй сыйлады.

Материал Астана қаласы әкімдігінің ресми сайты astana.gov.kz деректері бойынша дайындалды.

Ақындық өнерді танып білуге баулыған ақын Серік Рысбекұлы туралы жасалған радиохабар. Қызықты болып жатса, тыңдап, бағасын бере жатарсыздар.

http://astanafm.kz/kz/archive/programs/aleumet/astana_radiosy_usynady/314652

Астана қаласының Оқу-клиникалық орталығының кешенді жоспарына сәйкес, қалалық Жедел медициналық жәрдем станциясындағы әріптестерінің озық тәжірибесін үйрену мақсатында елордалық Денсаулық сақтау басқармасының бастамасымен бір топ дәрігер Изральдің жетекші клиникаларына оқуға жіберілді.

Елордалық дәрігерлер жедел медициналық жәрдем жұмысы саласында Израильдің жетекші клиникаларында білім алды. Олар үйренген халықаралық тәжірибесін алдағы уақытта қалалық жедел жәрдемнің басқа қызметкерлерімен бөліспек.


Оқу барысында отандық мамандар жалпы медициналық қызмет көрсетуден басқа, донорлықты ұйымдастырып, халыққа алғашқы көмек көрсету жолдарын үйрететін Израиль ұлттық шұғыл көмек көрсету қызметінің жұмысымен танысады.

— Қызметкерлер оқуы керек, шетелге барып, тәжірибе жинайды, басқа мемлекеттерде жұмыстардың қалай жүргізілетінін біліп, халықтың жедел жәрдемге қалай қарайтынымен танысуға тиіс. Теледидардан көріп, естіген басқа, қызметімізді дамыту үшін осындай сапарлар қажет. Израильде дәрігерлердің жұмысы жолға қойылған, медиктер келгенше шұғыл көмек көрсететін волонтерлар да жақсы жұмыс істейді, — дейді Астана қаласы жедел медициналық жәрдем станциясы медицина бөлімі бас дәрігерінің орынбасары Сұлушаш Әбілқасымова.

Оның пікірінше, тәжірибе алмасу практикасын тар шеңберлі маманданған және орта медицина қызметкерлерінің, фельдшерлердің де арасында қолданып, тренингтер өткізу үшін шетелдік мамандарды елордаға шақыру керек.

Астана қаласының дәрігерлері Тель-Авив қаласындағы ауруханаларда, симуляциялық тренинг-орталықтарында, парамедиктерді оқыту орталықтарында болып, көру алаңында нақты бір жағдайда бірінші кезектегі және біркелкі іс-шараларды (емдеу, профилактикалық, эвакуациялық) қажет ететін зардап шеккендер мен науқастарды топтарға бөлу — «триаж» медициналық топтау негіздерімен танысты.

Материал Астана қаласы әкімдгінің ресми сайты astana.gov.kz деректері бойынша әзірленді.

Елордамыздың тазалығы мен сыртқы келбеті тәртіп сақшыларын да алаңдатады. Бұл ретте түрлі ұйымдардың, мекемелер мен ШОБ өкілдерінің қала аумағын абаттандыру ережелерін бұзу жағдайларын анықтауға және болдырмауға бағытталған профилактикалық іс-шаралар өткізіледі. Осыған байланысты Астана қаласының табиғат қорғау полицейлері экологиялық рейдті бастады.

Бүгін астаналық полицейлер рейд барысында аумақты абаттандыру ережелерін сақтамайтын кәсіпкерлерді анықтау жұмысын жүргізді. Күн сайын бекітілген аумақтарды аралау барысында полицейлер құрылыстардың іргелес аумақтарын санитарлық ұстау мен уақытылы жинауды ұйымдастыруды бақылайды. Тексеру барысында тәртіп сақшылары кәсіпкерлердің, көлік жуу орындарының, дүкендердің, сондай-ақ құрылыс объектілерінің иелерінің іргелес аумақтарды қалай ұстайтынын бағалады.

Астана қалалық мәслихатының 2004 жылғы 30 наурыздағы № 28/6-III «Абаттандыру, санитарлық жабдықтау, жинау жұмыстарын ұйымдастыру және Астана қаласының аумағында тазалықты қамтамасыз ету қағидалары туралы» шешіміне сәйкес кәсіпкерлер іргелес аумақты (периметрі 5 м) таза ұстауға міндетті, сондай-ақ қала тұрғындары үшін тәртіп сақтау бойынша қолайлы жағдай жасауы керек.

Биылғы жылдың бірінші тоқсанында табиғат қорғау полициясының қызметкерлері 723 тексеру жүргізіп, нәтижесінде шағын және орта бизнес объектісінің 372 өкілі әкімшілік жауапкершілікке тартылды. Жалпы, 9 млн. теңге көлемінде айыппұл салынды. ҚР Әкімшілік құқық бұзушылық туралы кодексі бойынша абаттандыру ережелерін бұзғаны үшін заңды тұлғаларға 30-100 АЕК мөлшерінде айыппұл салу қарастырылған.


«Көлік жуу орнына іргелес аумақ лас. Жиналмайтын кездері де болады. Иесінің өзі жоқ. Оған қызметкері арқылы сағат 17.00 бөлімге келсін деп шақыру қағазын қалдырып кеттік. Мекеме иесіне қатысты әкімшілік жаза қолданылады», — дейді Астана қаласының ІІД ЖПҚ аға инспекторы Ораз Ахметов.

Полицейлердің басты мақсаты жазалау емес, тәртіп бұзушылықты болдырмау. Сондықтан да кәсңпорын басшылармен және жеке азаматтармен абаттандыру ережелерін сақтау, санитарлық ұстау, нысан аумағын жинауды ұйымдастыру және тазалықты қамтамасыз ету туралы профилактикалық әңгімелесулер жүргізіледі.

Материал Астана қаласы әкімдігінің ресми сайты astana.gov.kz деректері бойынша әзірленді.

11-сәуір күні қалалық Ішкі істер департаментінің Консультативтік кеңес органының алғашқы отырысы өтті. Астана қаласы ІІД бастығы полиция генерал-майоры Амантай Әубәкіровтің айтуынша, Консультативтік кеңес органы азаматтардың құқықтары мен бостандықтарын қорғау, полиция қызметін әділ әрі ашық етуді қамтамасыз етеді.



Бұл кеңестің негізгі міндеттері халықтың ішкі істер органдарына сенімін арттыру, полицияны халыққа жақындату, үкіметтік емес ұйымдардың құқықтық мемлекетті нығайтудағы ролін одан әрі арттыру, ішкі істер органдарының қызметіне консультативтік, әдістемелік және өзге де қолдаулар көрсету, ішкі істер органдарының қызметкерлерін әлеуметтік қолдау мәселелерін шешуге ықпал ету, ішкі істер органдары қызметінің өзекті мәселелері туралы халықты жан-жақты және шынайы ақпараттандыру мүддесіне бұқаралық ақпарат құралдарының өкілдерін тарту, бірлескен іс-шаралар бағдарламалары және оларды іске асыру бойынша ұсыныстар әзірлеу, ішкі істер органдары қызметтерін жетілдіру бойынша ұсыныстар дайындау.

Консультативтік кеңес органының құрамына ҚР Парламенті Мәжілісі мен қалалық мәслихат депутаттары, ішкі істер органдарының ардагерлері, қоғам қайраткерлері, үкіметтік емес ұйымдар мен бұқаралық ақпарат құралдарының өкілдері кіреді.

Дауыс беру арқылы Астана қаласы ІІД жанындағы Консультативтік кеңес органының төрағасы болып «Ұлттық ғылыми медициналық орталығы» АҚ бас директоры Абай Байгенжин сайланды. Консультативтік кеңес жұмысының нәтижелерін алдағы уақыттарда көреміз деген үміттеміз.

Материал Астана қаласы әкімдігінің ресми сайты astana.gov.kz деректері бойынша дайындалды.

Сәуірдің 11 күні елордада Челябинск облысының Астанадағы күндерінің салтанатты ашылуы өтті. Шараға Астана қаласының әкімі Әділбек Жақсыбеков пен Челябинск облысының губернаторы Борис Дубровский қатысты.

Жалпы, Астана мен Челябинск облысының арасындағы ынтымақтастық 15 жылдан бері жалғасып келеді. Аймақтар арасындағы қарым-қатынас ресми түрде 2001 жылы қазан айында Сауда-экономикалық, ғылыми-техникалық және мәдени ынтымақтастық жөніндегі келісімге қол қойылғанда басталған болатын. Бұл жолы екіжақты кездесу барысында Астана қаасының әкімі мен Челябинск облысының губернаторы ынтымақтастықты одан әрі дамыту мәселелерін талқылап, өзара ықпалдастықтың перспективті бағыттарын айқындады.


«Достық қарым-қатынас сабақтастығы сақталып, жалғасын тауып отырғаны қуантарлық жайт. Уралдық әріптестеріміз бен достарымызды әрқашан да құшақ жая қарсы аламыз. Делегацияның осы сапары аймақтардың экономикалық және гуманитарлық қарым-қатынасын одан әрі кеңейтуге және тереңдетуге айтарлықтай серпін бермек»,- деді Ә. Жақсыбеков. Елорда басшысы Астана мен Челябинск облыстарының географиялық жақындығы осыған өз ықпалын тигізетінін атап өтті.

Астана әкімі аймақ басшысын Челябинск облысының 2020 жылы ШЫҰ мен БРИКС саммитін өткізу құқығын жеңіп алғандығымен құттықтады. Өз кезегінде, Б. Дубровский Қазақстанның астанасына қаланың халықаралық кең ауқымды іс-шараларды ұйымдастыру және өткізу бойынша тәжірибесін зерттеу үшін келгендігін жеткізді.

«Астананың халықаралық кең ауқымды іс-шараларды ұйымдастыру және өткізу бойынша тәжірибесі аса маңызды. Астанадан үйренеріміз бар – халықаралық тәжірибе перспективасында да, іс-шараларды ұйымдастыру жағынан да. Біз осы дағдыларға қызығушылық танытып отырмыз», — деді Челябинск облысының губернаторы. Б. Дубровский Қазақстанның елордасы 2017 жылы ЭКСПО көрмесін өткізуге дайын болатынына сенімін білдірді. Аймақ басшысы ресейлік тараптың Астананы, соның ішінде туристік салада қолдайтынын жеткізді.

Сондай-ақ губернатор Астананың шағын және орта кәсіпкерлікті дамыту саласындағы тәжірибесін, аймақта бизнес-климатты жақсарту бойынша жүргізіліп жатқан жұмыстарды атап өтті. Осы және басқа да салаларда қолға алынған жұмыстар туралы толығырақ тараптар іскерлік кездесулер мен «дөңгелек үстелдер» барысында талқылайтын болады. Мемлекеттік-жеке меншік әріптестік пен ШОБ қолдау саласындағы ынтымақтастық туралы ресейлік қонақтарға Кәсіпкерлер палатасының өкілдері айтып береді.

Елорда әкімдігінде тараптардың инвестициялық әлеуеті таныстырылып, инвестициялар, кәсіпкерлік және туризм салаларында ынтымақтастық орнату туралы келісімдерге қол қойылды. Сонымен қатар, бірқатар мәдени және спорттық шаралар ұйымдастырылады.

Бүгін хоккейден «Барыс» және «Трактор» балалар командаларының жолдастық кездесуі өтеді. Бейбітшілік және келісім сарайында Оңтүстік Уралға арналған көркемсурет көрмесі, Челябинск облысының шығармашылық ұжымдарының концерті өтеді.

Апталық аясында қонақтар Астананың өнеркәсіптік, мәдени және әлеуметтік нысандарымен танысады, «Астана ЭКСПО-2017» ҰК» АҚ басшылығымен кездеседі.

Материал Астана қаласы әкімдігінің ресми сайты astana.gov.kz деректері бойынша әзірленді.

Апта бойы елордалық дәрігерлер шетелдік әріптестерінен эндоскопиялық операциялар жасаудың жаңа әдісін меңгерді.

Дели қаласы Isis халықаралық госпиталінің аз инвазивті хирургия докторы Арвинд Кумар Астана қаласы Онкология диспансерінің дәрігерлеріне тік ішек, жатыр мойны, лапароскопиялық радикалды нефрэктомия, спленэктомиямен ұйқы безінің корпорокаудальді резекциясы және т.б. қатерлі ісіктері кезінде эндовидеохирургиялық ота жасаудың жаңа әдістерін тәжірибе жүзінде көрсетті.



Сонымен қатар, Арвинд Кумар қазақстандық әріптестерімен бірлесіп 10 ота жасап, қалалық онкология орталығының 12 пациентіне практикалық және консультативтік көмек көрсетті. Шетелдік маман қазақстандық әріптестерінің тәжірибесін жоғары бағалап, онкология орталығы ұжымының ризашылығын білдірді.

Тренингкеәртүрлі емханалардын келген 22 онкохирург білімін жетілдіріп, кәсіби машығын шыңдағаны жөнінде халықаралық үлгідегі сертификаттар алды.

Материал Астана қаласы әкімдігінің ресми сайты astana.gov.kz деректері бойынша әзірленді.

Астанада тұрғын үйлердің аулаларын абаттандыру бойынша кешенді бағдарлама сәтті іске асуда. Былтырдғы жылдың өзінде 50 астам аула абаттандырылып, балалар ойыны, спортпен шығылдануға арналған құрылғылар орнатылды. Биыл Астананың 30 астам ауласы абаттандырылады деп хабарлайды Астана қаласы әкімдігінің ресми сайты astana.gov.kz. Аталған бағдарлама аясында жол жабыны ауыстырылып, балалар ойын алаңдары мен спорт алаңдары, қоқыс жәшіктері орнатылады, көлік қоятын орындар жасалады.

Биыл «Сарыарқа» ауданында 19, «Есіл» ауданында 7 ауланы абаттандыру көзделген. «Алматы» ауданында көп қабатты тұрғын үй секторындағы 16 үйді қамтитын 10 аулада кешенді абаттандыру жұмыстары жүргізілмек. Атап айтқанда, 11 балалар ойын алаңы, 3 спорт және 5 гимнастика алаңы жасалады, 56 тренажер, 80 қоқыс жәшігі, 72 орындық орнатылып, 8 күрке, 8 кір жаятын орын дайындалады. Сонымен қатар, 12 801 шаршы м аумақта асфальтбетон жабыны жөнделеді, ал 4 465 шаршы м аумақта қайта төселеді.


Өткен жылдың қорытындысы бойынша Астанада абаттандыру бағдарламасы аясында 41 аула мен 12 аула аумағы абаттандырылды. Жөндеу жұмыстары аясында аулаларда қауіпсіз шағын архитектуралық пішіндер, тренажерлар орнатылып жатыр. Сондай-ақ, «Есіл» ауданында спорт және ойын алаңдары жасалды, бұзылған шағын архитектуралық пішіндер, спорттық снарядтар мен тренажерлар, сәндік қоршаулар қалпына келтіріліп, ауыстырылды, балалар алаңдарына жарақат алуға жол бермейтін қауіпсіз резеңке жабындар төселді.

Астана келбеті тек жаңа құрылыс нысандарымен ғана емес, тұрғын үйлердің тамаша аулаларымен де ажарланып келеді. Бұл бағдарлама тек Елордамыздың көркін ғана ашпайды, сонымен қатар астаналықтардың салауатты өмір салтын ұстануға да септігін тигізетіні анық.

Елордамызда Қазақстанда іске асырылатын үздік әлеуметтік жобалар конкурсы басталды. Астана қаласының Жұмыспен қамту, еңбек және әлеуметтік қорғау басқармасы конкурсқа қатысуға өтінімдер қабылдауда.

Байқауға халықты әлеуметтік қорғау жүйесі шеңберінде қызметін жүзеге асыратын қоғамдық бірлестіктер, мүгедектер ұйымы, басқа да мекемелер мен ведомстволар, жеке тұлғалар мен басқа да үкіметтік емес ұйымдар қатыса алады.


Байқауға халықтың әлеуметтік осал топтарының өмір сүру сапасын жақсарту мақсатында өмірлік қиын жағдайға тап болған тұлғаларға көмек көрсетуге бағытталған кемінде 1 жылдан астам уақыттан бері іске асырылып жатқан әлеуметтік жобалар жіберіледі.

Қалалық іріктеуден өткен әлеуметтік жобалар республикалық көрмеге қатысады. Байқауға қатысу шарттарымен Астана қаласы Жұмыспен қамту, еңбек және әлеуметтік қорғау басқармасының сайтында немесе 21-22-61, 21-62-17 телефондары арқылы танысуға болады.
Материал Астана қаласының ресми сайты astana.gov.kz деректері бойынша дайындалды.

Сәуірдің 7 күні Астана қаласының әкімдігінде мемлекеттік-жекеменшік серіктестікті (МЖС) дамыту мәселесіне арналған дөңгелек үсте өтті. Астана қаласының astana.gov.kz ресми сайтының хабарлауынша бұл кездесуде мемлекеттік жеке меншік серіктестік саласындағы жобалар таныстырылды, оларды іске асыру процедуралары талқыланды.



МЖС тетіктерін қолданудың маңыздылығына тоқталған Астана қаласы әкімінің орынбасары Андрей Лукин МЖС аясында ынтымақтастық орнатып, жобаларды жүзеге асыру қажет екенін атап өтті.

— Соңғы жылдары МЖС жобаларының тартымдылығын арттыру бойынша біршама жұмыстар жүргізілді. Жыл басынан бері Үкімет әрбір аймаққа МЖС аясында кемінде бес жобаны қолға алуды тапсырды. Елорда әкімдігі отандық және шетелдік жеке меншік сектор өкілдері үшін ашық. Қала басшылығы өз тарапынан МЖС аясында ынтымақтастық орнатып, жергілікті жобаларды сәтті жүзеге асыру үшін мүмкіндігінше жағдай жасауға ниетті. Атап айтқанда, МЖС схемалары арқылы инфрақұрылымдық, соның ішінде әлеуметтік бағыттағы жобаларға инвестициялар тарту көзделген, — деді А. Лукин.

Дөғгелек үстеге қатысқан «Астана Innovations» АҚ басқарушы директоры Темір Асанов МЖС құрылымы мен ерекшеліктері туралы баяндады. Мекеме басшысы инвесторларды ағымдағы және жоспарланған нысандарды жүзеге асыруға қатысуға шақырды.
Сонымен қатар, көлік инфрақұрылымы мен денсаулық сақтау саласында «Астана Innovations» АҚ әзірлеген 9 концессиялық жоба таныстырылды. Атап айтқанда, елордада Қабанбай батыр даңғылында (6 жерүсті қабат), Орынбор көшесі (3 қабат – 1 жерүсті, 2 жерасты құрылыс) және Достық көшесінде (6 жерүсті қабат) үш паркинг салынады. Объектілердің жалпы құны — 2 млрд. теңге, концессия мерзімі — 30 жылға жуық, құрылыс жұмыстары 14 айға жалғасады, эксплуатациялық кезең — 28 жыл. Бір орынды жалға алудың құны барлық үш паркингте күндіз сағатына 100 теңге; түнде — 600 теңге болмақ.

«Астана Innovations» АҚ МЖС дамыту басқармасының басшысы Әлия Бикееваның мәлімдеуінше жобаларды толығымен концессионерлердің қаржысы есебінен қаржыландыру көзделген. Соның ішінде 10% жеке қаржы, 90% несиелік қаржы болуы мүмкін. Концессионерлердің негізгі табысы тұрақ орындарын жалға беруден түседі. Бұдан басқа, жобада концессия объектісі құрылысы құнының 100 % деңгейінде концессионердің инвестициялық шығындарына өтемақы төлеу қарастырылған. Өтемақылар белгілі бір уақыт ішінде кезеңдерге бөлінетін болады.

2019 жылы елордада Абылай хан даңғылы мен Қобда көшесі және Тілендиев даңғылы мен Бейсекова көшесі аумағында орналасқан тәулігіне 9000 жолаушыға есептелген екі автовокзалды тапсыру жоспарланған.
— Концессионерлерді таңдау бойынша конкурс 2016 жылғы 16 наурызда жарияланды. Конкурстық өтінімдер салынған конверттер 16 мамырда ашылады. Концессия мерзімі — 30 жыл, құрылыс жұмыстарына 2 жыл уақыт кетеді, эксплуатациялық кезең — 28 жыл, — деді Ә. Бикеева.

Сонымен қатар, Өндіріс, Көктал және Железнодорожный тұрғын алаптарында үш дәрігерлік амбулатория салынып, пайдалануға берілмекші, сондай-ақ, Сейфуллин көшесіндегі №1 қалалық емхана тапсырылады. Инвестициялар көлемі әрбір нысан бөлінісінде 1 млрд. теңгеге жуық, концессия мерзімі — 20 жыл, құрылыс жүргізу мерзімі — 9 -12 ай. Елордалық Денсаулық сақтау басқармасы осы айда конкурстар жариялайды. МЖС аясында қалалық мектептер аумағында спорттық құрылыстарды салу және пайдалану, екі қосалқы электр станциясы мен жылыжайлар әзірлеу және жүзеге асыру жоспарланған. Сонымен қатар, 5 балабақша салу көзделген, соның ішінде екеуі 360 орынға, қалғаны 240 орынға есептелген. Мектепке дейінгі білім мекемелерінің басым бөлігі сол жағалауда орналасады. Инвестициялар көлемі әрбір нысан бөлінісінде 1 млрд. теңге көлемінде болады.

Қазіргі кезде «Astana» әлеуметтік кәсіпкерлік корпорациясы» ұлттық компаниясы» АҚ жалпы құны 4 млрд. 700 мың теңгені құрайтын 1200 орындық бес балабақшаның құрылысын әзірлеумен айналысуда. Сонымен қоса, бұл корпорация Астанада Патологоанатомиялық бюро салуды жоспарлап отыр. Оның мақсаты қазіргі заманғы жоғары білікті паталогоанатомиялық диагностика жүргізу болып табылады.

Кездесу барысында мемлекеттік органдардың өкілдері, әлеуетті инвесторлар және бизнесмендер ұсынылған басқа да жобалар таныстырылып, стратегиялық серіктестіктегі өзекті мәселелер талқыланды.

Биыл алғашқы экологиялық сенбілік 23 сәуірде басталмақшы. Елорданы тазарту жұмыстарына 80 астам қала тұрғыны қатысады деп күтілуде.

Жалпықалалық сенбілікке мемлекеттік ұйымдардың, шағын және орта бизнес субъектілерінің өкілдері, студенттер мен оқушылар, ПИК өкілдері, елорда тұрғындары мен қонақтары қатыспақ. Осы күні сенбіліктермен қатар, Астананың үш ауданында 1000 жуық ағаш отырғызлмақшы.

astana.gov.kz сайтының мәлімдеуінше сенбілікке 300 астам арнайы техника, әсіресе, жүк көліктері мен тиегіштер тартылмақ. Сонымен қатар, «Астана Зеленстрой» және мердігерлік ұйымдардың жұмысшылары саябақтарды, гүлзарларды жинап, ағаштардың бастарын кеседі, қоқыстарды жинап, шығарады. Экологиялық айлық барысында Астана қаласы аудандарының аумағын абаттандыру, санитарлық тазарту және көгалдандыру жұмыстары қолға алынбақ. Елордамыздың сәнін келтіріп, көркеюіне үлес қосу әрбір астаналық парызы деп ойлаймыз.

«Қолжетімді тұрғын үй — 2020» бағдарламасы аясында Астанадағы 957 отбасы баспаналы болды деп хабарлайды Астана қаласы әкімдігінің ресми сайты astana.gov.kz. Бұл отбасылар Астана қаласындағы апатты тұрғын үйлерді бұзу жобасына қатысқан болатын. Биылғы бірінші жартыжылдықта 805 отбасын көшіру жоспарланған. Қалған 157 үйде тұрып жатқан 2483 отбасын көшіру кестесі әзірленіп, 2017 жылдың соңына дейін жүзеге асырылмақ.


2013 жылы жобаны іске асырмас бұрын елорданың тұрғын үй қорына талдау жүргізіліп, апатты деп танылған тұрғын үйлер тізімі жасалды. Оған 1940-1970 жылдары салынған 228 үй енгізіліп, 2017 жылдың соңына дейін есептелген жобаның бірінші кезеңіне жатқызылды. Осы кезең ішінде апатты үйлердің меншік иелерін көшіру үшін коммуналдық тұрғын үй қорына 3 400 пәтер тапсыру жоспарланған.

– Бүгінгі күні пилоттық жоба аясында Астана қаласы бойынша 228 үй апатты жағдайда деп танылып, жоспар бойынша 2017 жылдың аяғына дейін сүріліп, тұрғындары жаңа үйлерге көшірілуі тиіс. Өткен жылдары бүгінгі күнге дейін 70 астам үй сырылды. Мыңға жуық пәтер иесі жаңа үйлерге көшірілді. Биылғы жылы бекітілген кесте бойынша 112 үй жоспарда тұр. Сол кесте бойынша жұмыс жасалуда. Бұл өте тиімді жоба. Оның қайтарымдылығы бар. Жоба аясында 3500 жуық пәтер иелері жаңа үйлерге көшіріледі. Қалғаны коммерциялық негізде сатылады, – деді Астана қ. Тұрғын үй инспекциясы басқармасының басшысы Әлихан Қуатбеков.

Абай көшесі, 79/1 мекен жайы бойынша орналасқан үйде тұратын Елена Храмова жақын арада жаңа баспанаға көшеді. Осы күндері оған жаңа пәтердің кілті табысталады. 1960 жылы салынған ескі үй бұзылып, оның орнына жаңасы салынады. Жаңа баспанасын күтіп жүрген Елена Храмова былай дейді:
– Бұл пәтерді 1988 жылы алдық. Бізге ескі үйлерді бұзу бағдарламасына қатысатынымызды және барлық құжаттарды әзірлеу керегін айтты. Өз қалтамыздағы қаржы үй алуға жетпейді. Бұрынғы үйіміз 37 шаршы метр, сондай көлемде пәтер береміз деп жатыр.

Қазіргі кезде жобаны сәтті іске асырудың нәтижесінде 247 мың шаршы метр тұрғын үйді құрайтын 31 тұрғын үй пайдалануға берілді, соның ішінен апатты үйлердің меншік иелерін көшіру үшін 1 762 пәтер коммуналдық меншік қорына тегін тапсырылды.

Роза Маханова, елорда тұрғыны:

– Біз қараша айында көшіп келдік. Пәтеріміз жылы. Таза әрленген, жақсы. Екі бөлмелі пәтерге ие болдық, жаңа пәтер бұрынғы үйден 10 шаршы метрге артық.

Астана қаласының қалыптасқан бөлігін қайта құрудың пилоттық жобасында қала әкімдігінің уәкілетті ұйымымен мемлекеттік инвестициялардың қайтарымдылығы және апатты үйлерді бұзу, қаланың «ескі» орамдарын кешенді қайта құру қағидатымен тұрғын үй құрылысын ұйымдастыру қарастырылған.

Жобаның бірінші кезеңі 2017 жылдың соңына дейін жүзеге асырылмақшы, апатты жағдайдағы және ескі үйлерді бұзудың екінші кезеңі 2018 — 2020 жылдарға жоспарланған.

‪#‎жақсықыз‬‬‬ — құрбым ғо. Кеше кездесіп қалып едік, баяғы мұң, сол мұң. Мұң емес ендігі зар болыпты. Жігіт жоқ, Жақсы жігіт жоқ. Құрбымның ата-анасы қандай алтын адамдар. Өзі сондай тәрбиелі, әдепті. Оған қоса, квартирасы бар, білімі жоғары, зп-сы 200 мыңдай. Астында машинасы жоқ демесең. Оның өзің әдейі алмай жүр. Машина алып алсам, маған точно ешкім жақындамайды дейді. Мүмкін онысы да дұрыс болар. Бір-екі жігіт бар, бір екі рет киноға шақырыпты. Бірақ сонымен тәмам. Ішпейді, шекпейді. Ернінен сүйгізсе де, ойланып сүйгізеді. Жеңілтек мінезі болған емес. Короч, планкаңды түсір деп кеттім. Бірақ қайдам, түсірмейтін сияқты ғой. «Ақылды, жақсы табысы бар, өзі сүйкімді, өзі романтик бір басында он өнері бар саған жақсыны қайдан алам? Түсір» дедім. «И что я с таким буду делать?» дейд. «Спать!» дедім))). Жыным келгені сонша. #жақсықыз — жалғыз. Қандай шара бар бұған?

09.03.2016