Елорда «Jastar jalyny» форумы өтіп жатыр, деп хабарлайды Астана қаласы әкімдігінің ресми сайты.

Іс-шараға Астана қаласы әкімдігінің, жастар ұйымдарының көшбасшылары, сондай-ақ табысты кәсіпкерлер, спортшылар мен блогерлер қатысты. Форумда сөз сөйлеген Астана қаласы әкімінің орынбасары Ермек Аманшаев, жастық шақта уақытты дұрыс пайдалана білу маңызды екендігін атап өтті.

«Астана – бұл үлгі алатын қала. 20 жылдың ішінде Астана еліміздің дамуының, табысқа жетуінің символына айналды. Бүгінгі таңда біздің қалада жаңашылдыққа өте көп мүмкіндік жасалуда. Сіздердің жетістіктеріңіз өздеріңіздің қайрат-жігерлеріңізге, арманға жетем деген сенімге байланысты. Егер сіз жаңашылдыққа, білімге, жақсылықты үйреніп білімді жетілдіруге құштар болсаңыз сіз қашан да жоғары бағаланасыз. Қымбат уақыттарыңызды білім алуға, жаңа, жақсы дүниені үйреніп, білуге жұмсаңыздар», — деді Е. Аманшаев.

Сонымен қатар, ол Қазақстан білім беруге, бәсекеге қабілеттілікке, прагматизмге, ұлттық сәйкестілікті сақтауға, мәдени білімге, эволюциялық даму және сананың ашықтығына бағдар алғанын айтты.

Шараға елімізге танымал, жастарға үлгі болар түрлі сала өкілдері, оның ішінде, тележүргізуші Динара Сәтжан, 2Gis Астана жобасының негізін қалаушы Андрей Судаков, паралимпиадалық спортшы Серік Есматов, 100 жаңа есім жобасының жеңімпазы Нұрлан Өтешев, «Азаматтық бастамаларды қолдау» орталығының төрағасы Арслан Дәрімов, «Rocket Study» жобасының жетекшісі Алпамыс Шәрімов сияқты 20-ға жуық қонақ шақырылған.

Елордалық жастар бейресми түрде Қазақстандағы ең үздік спикерлер, белгілі экономистер, спортшылар, бизнес-тренерлермен кездесті, деп хабарлайды елорда әкімдігінің ресми сайты.

Кездесуде мотиваторлар білім берудің маңыздылығын ерекше атап өтті. «Менің осы сахнада тұрғаным – менің нәтижем. Өмірге де, аяғыма да шағымданбаймын, мен жай ғана өмір сүріп жатырмын. Белгілі бір биіктерге жетіп, тәуелсіз еліміздің тұрғындарына қолымыздан көп нәрсе келетінін көрсеткім келеді. Жеке тұлға ретінде біздің мүмкіндіктеріміз шексіз. Физикалық түрде мүмкіндігім шектеулі болғанымен, рухани мүмкіндігім шексіз. Мен аяғымнан айырылсам да өзімнің әлеуетімді ашып, жан дүниемде ауқымды кеңістіктің есігін айқара аштым», – деді «Қазақстанның 100 жаңа есімі» жобасының жеңімпазы, волейболдан паралимпиадалық құраманың капитаны Серік Есматов.

Белгілі тележүргізуші және табысты кәсіпкер Динара Сәтжан қызығушылық — мақсатқа жетудегі негізгі стратегия екенін атап өтті.

«Мен өз өмірімде және мансабымда қолданатын стандартты емес стратегиялар туралы айтып бергім келеді. Менің әрдайым сүйенетін принциптерімнің бірі – қызығушылық принципі. Адам әрқашан әр түрлі салаларда өзін-өзі дамытуы керек. Бір құдықтан су ала беруді тоқтатпасаңыз, күндердің күнінде су таусылады. Ал жаңа білім мен шексіз таным сіздің қосымша құдығыңыз іспетті», – деді Динара Сәтжан.

Білім, өзін-өзі бағалау, дамыту сияқты мәңгілік құндылықтардан басқа, қатысушылар инновацияның маңыздылығын да ұмытпады.

Танымал актер және вайнер Нұрлан Батыров ғаламтордың жастардың өміріндегі алар орны туралы сұрады. Іс-шараның қонақтары: «Ғаламтор – байланыс құралы, әлеуметтік желілер, ақша табудың заманауи тәсілі және үздіксіз ақпарат ағыны», – деп жауап берді.

«Менің баяндамамның тақырыбы – жастардың эволюциясы. Жеке тұлға ретінде қалай дамуға болады? Қорқыныштарды қалай жеңу керек? Сіздер үшін ғаламтор дегеніміз не? Мен үшін бұл ең алдымен – білім. Жастар көп уақытын ғаламторға жұмсайды, яғни өзін-өзі дамытуға көңіл бөледі, пайдалы ақпараттар оқиды», – деп атап өтті танымал актер, вайнер, шоу-бизнес өкілі және форум спикері Нұрлан Батыров.

Аймақтық Jastar Jalyny форумы түрлі салалардағы 20 спикердің басын қосты. Мотиваторлар әлеуметтік даму, бизнес, мәдениет және спорт саласы, жастар мен ақпарат ағынындағы жастар туралы ойларымен бөлісті.

Іс-шараны Астана қаласы әкімдігі мен «Қазақстан студенттерінің альянсы» студенттер ұйымы ұйымдастырды.