Скрининг тексеруден өту кепілдендірілген тегін медициналық жәрдем көлемі шеңберінде жүргізілуде. Скрининг – бұл ауруды туындататын, сонымен қатар ауруларды ерте кезеңде анықтау, тәуекел факторларын анықтау үшін жүргізілетін медициналық профилактикалық тексеру. 

 «Скринингтен өту — емдеудің тиімділігін күшейтіп, аурулардың асқынып кетуінің алдын алуға мүмкіндік береді. Скринингтік тексеріс тізіміне қан айналымы жүйесі аурулары – жүректің ишемиялық ауруы, артериалды гипертония, қант диабеті, глаукома және онкологиялық аурулар – сүт безі обыры, жатыр мойны обыры, тоқ және тік ішек обыры енгізілген», — деп мәлімдеді қалалық қоғамдық денсаулық сақтау басқармасында. 

Астананың ересек тұрғындарының глюкоза деңгейін, қандағы холестеринді, қан қысымын, көз ішіндегі қан қысымын, онкоцитологияны анықтау үшін жағындыны тексереді, сондай-ақ оларды маммография, колькоскопия, гемокульт-тест және колоноскопиядан өткізеді. Сонымен қатар, скринингке кардиолог, эндокринолог, офтальмолог, маммолог, онколог, акушер-гинеколог, хирург, проктолог, гастроэнтеролог сияқты мамандардың тексеруінен өту енгізілген,

 Профилактикалық тексеріс барысында балаларды жасына қарамастан бойын, дене салмағын анықтайды, басының көлемін және кеуде тұсын өлшейді (3 жасқа дейін), 5 жасқа дейінгі балалардың майтабан, көзінің өткірлігі мен есту қабілетін тексереді, 7 жасқа дейін физикалық және психоәлеуметтік дамуын, қан қысымын өлшейді. Балалар мен жасөспірімдерді  хирург-ортопед, уролог, отоларинголог, невролог, стоматолог, офтальмолог және эндокринолог қарап шығады.

Қазақстанда қан айналымы жүйесі ауруларын ерте кезеңде анықтау үшін (артериалды гипертония, жүрек ишемиялық аурулар) жүргізілетін скрининг тексеріс 2008 жылы енгізілген болатын. Ал ауруларды ерте кезеңде анықтаудың ұлттық скрининг бағдарламасы 2011 жылы енгізілді. 

Қазіргі кезде көп жағдайда көбіміздің дәрігерге барғымыз келмейтіні бар екені жасырын емес. Біріміз инеден түршігеміз, біріміз ауруымызды жасырамыз, кейбіріміздің тіпті аурухананың дәлізінен де қорқатынымыз да бар. Алайда «Ауруын жасырған өледі» демекші, түбінде ақ халатты абзал жандардың алдынан бір-ақ шығамыз.

Осындай жағдай болмас үшін, бізге аурудың алдын алып, қандай жағдайда не істеу керектігін біліп, қандай аурудың қандай әсерлері мен белгілері барын білудің артықтығы жоқ. Десе де, қазір ондай кеңестерді қазақ тілінде табу қиын. Ал біздің портал сол олқылықтың орнын, аз да болса, толтыру ниетімен «Дәрігер кеңесі» айдарын ашып отыр.

Аталған айдарда еліміздегі білікті дәрігерлерден видеосұхбат түрінде кеңестер беріліп, ауру түрлері бойынша нақты мәлімет алуға болады. Оның ерекшелігі, әр видеода ауру түрлерінің бірсыпырасын айтып, қалқып өтпей, жеке жеке тоқталады. Яғни бір сұхбатта бір ауру түрі туралы әңгімелейтін болады.

Қазірге дейін "Қант диабеті", "Скрининг" секілді аурулар туралы айтылды. Алдағы уақытта тағы да басқа тақырыптарда қамтылатын болады.