Шығармашылық бәйге: «Қазақстанның тәуелсіздігіне 25 жыл, Зуқа батыр Сәбитұлының туғанына 150 жыл». Жүлде – 1 миллион теңге!!!

2016 жылы Қазақстан Республикасы Тәуелсіздігінің 25 жылдығы, қазақ көшінің басталғанының 25 жылдығы сынды ірі оқиғалардың қатарында қазақтың Ұлт азаттық күресінде басын берген баһадүр, Алаш үшін құрбан болған қайраткерлердің бірі Зуқа батыр Сәбитұлының туғанына 150 жыл.

Осындай мерейлі мерекелермен тұспа-тұс келіп отырған Зуқа батыр Сәбитұлының 150 жылдық мерейтойы 11 мемлекетте аталып өтіліп, халықаралық дәрежеде тойлануда. Осыған орай «Зуқа батыр Сәбитұлының 150 жылдық мерейтойын ұйымдастыру алқасының» шешімімен шығармашылық бәйге ұйымдастырылып отыр.

Мақалалар бәйгесі:
Бас жүлде(біреу) 500 мың теңге
Бірінші орын (біреу)
Екінші орын(екеу)
Үшінші орын(үшеу)
Арнайы жүлде(бесеу)

Жыр мүшәйрасы:
Бас жүлде (біреу) 500 мың теңге
Бірінші орын (біреу)
Екінші орын(екеу)
Үшінші орын(үшеу)
Арнайы жүлде(бесеу)
Бәйге шарттары:

1. Шығармалар мазмұнына шектеу қойылмайды. Ең бастысы, шығарма Тәуелсіздіктің тарғалаң жолы мен қадір-қасиетін және «Зуқа батыр Сәбитұлы сынды Алаш ардақтыларының күресі мен тағдырын» арқау етуі тиіс. Шығарма мазмұны — Қазақ жұртының ертеден бүгінге дейінгі тарихи шындығы жөнінде болғаны, береке мен бірлікті, әділеттілік пен имандылықты дәріптеген, халқы жолында басын берген Алаштың ардақты ұлдарының күрескерлік рухы мен патриоттық сезімдерін жырлағаны құп.

2. Шығарма осы жылдың 10 маусымына дейін баспасөзде не сайтта жариялануы керек. Автордың суреті мен жаряланған баспасөздің суретке түсірілген нұсқасы (газет-журналдар үшін жарияланған сан нөмірі мен ай-күні толық жазылуы керек) немесе электрондық баспасөздегі сілтемесі қоса жолданғаны дұрыс. Егер жарияланбаған болса Ұйымдастыру алқасы жариялайтын болады. Нәтижесі 14-15 маусымда жаряланады.

3. Шығарма көлемі А4 форматында 5 беттен аспағаны жөн. Құнды тарихи материалдар көлеміне шектеу қойылмайды.

Шығармалар мына эл.поштаға жолдануы тиіс: zukabatyr150@gmail.com, beis.kz@gmail.com,; WeChat ID: zukabatyr; WhatsApp: 87072696099;
Байланыс телефондары: +7 702 281 76 39, +7 701 618 99 90
Мекенжайы: Астана, Тәуелсіздік к-сы, 45/1

Ұйымдастырушы: Қазақстан тарихшыларының ұлттық конгресі, Зуқа батыр Сәбитұлының 150 жылдық мерейтойын ұйымдастыру алқасы, «Ер Жәнібек» халықаралық қоғамдық қоры, «Зуқа батыр Сәбитұлы қоры» ҚҚ, Астана шипажайы(Қайрат Айдархан), «Жас-Ай» медициналық орталығы(Жасан Зекейұлы), «Өтейбойдақ» клиникасы( Ерболат Арбижан).

Әр компанияда «Корпорациялық даму стратегиясы» (Стратегия корпоративного развития) деген құжаттар топтамасы болады. Компания пайда болған соң әдетте оның аты ойлап табылады, заты, жарғысы және осы даму стратегиясы жасалады.
Әдетте даму стратегиясын жазу үшін арнайы компания жалдайды, өйткені стратегияжазғышты штатта ұстаудың қажеті жоқ, ол бірреттік қана жұмыс. Кейде ақша аз болса, штатқа алынған пиаршы, сапа менеджменті бойынша маман өздері жазып шығады.
Жалпы, шыны керек, даму стратегиясын жасауға деген көзқарас та, қатынас та немкұқрайды. Онсыз да жасалатын жұмысқа жоспар құрып қажеті қанша деп ойлайтын болуы керек. Негізі, ол құжаттың маңызы айтарлықтай дер едім өз басым. Сайтыңызға орналастыру үшін ғана емес, «осы істеп жүрген жұмысымның мәні не өзі? кімге керек? не үшін?!» деген сұрақ мазалағанда сол миссия/басымдылық/мақсат/міндеттер деген құжатқа көз тастасаңыз — сұрақтарыңыз жоқ болуы керек.
Это в идеале!
Ал біздің жағдайда миссия деген не?

МИССИЯНЫҢ МИССИЯСЫ
Егер сіз әлгі айтқандай, даму стратегиясын өзі жазып жатқан компания қызметкері болсаңыз, миссия деген тарауды жазу үшін бір ғана сұрақ қойыңыз, соның жауабы — сіздің миссия болмақ:
Сіздің компания жоқ болса, қоғам, мемлекет және тұтынушылар не жоғалтады?

Айталық, жауап: Менің компаниям жоқ болса, тұтынушылар ең алдымен жоғары сапалы жастық-көрпеден қағылады — мұндай өнімді жақын шетелде де жасамайды, біздің өзіміз ойлап тапқан технология бойынша жасаймыз. Ал мемлекет үлкен салық төлеп отырған отандық өндірушілердің бірін жоғалтады, "Қазақстанда жасалған" маркасымен шығатын өнімнің бірі нарықтан кетсе, оған да абырой болмайды.

Осыған сәйкес сіздің миссия жасалады:
Жақсы тыныққан адам ғана жақсы еңбек ете алады. Ал әр қазақстандықтың жақсы тынығуына біздің көрпе-жастығымыз сеп болады. Отандық мамандардың жасап шығарған өнімі оқушы балаға да, жұмысбасты ересекке де, зейнеткер ата-апаға да жоғары сапасымен әрі қолжетімді бағасымен ыңғайлы.
Тұжырымыңыз неғұрлым нақты, ұғынықты, түсінікті болса, бизнесіңіз де соғұрлым нақты, ұғынықты әрі түсінікті болады.

Әлемге танымал компаниялардың жариялаған миссиялары:

COCA COLA: Әлемді сергіту. Шаттыққа шабыттандыру. Әрбір әрекетімізді мәнді ету (To refresh the world… To inspire moments of optimism and happiness… To create value and make a difference).

IKEA: Әрбірдің күнделікті тұрмысын жақсы өзгерістерге толтыру (To create a better everyday life for the many people)

GILLETTE: Клиенттеріміз өздерін күнде жақсы сезінуі үшін қырыну және гигиена заттарын ұсынамыз. Ұстараны ары қарай жақсарта алмаймыз деген күні біз жұмысымызды тоқтатамыз (All designed for the unique needs of men – helping them to look, feel and be their best every day. We'll stop making razor blades when we can't keep making them better)

Миссияны атқарумен қатар, компания келешекте (шамамен он шақты жыл ішінде) нақты қандай жетістікке қол жеткізбек? Онысын «Компания мұраты (видение)» деп аталатын тарауда жазады. Көп эксперттер мұраттарды мақсаттармен біріктіріп жазу қажет дейді, меніңше сол дұрыс.
Сонымен мақсат-мұраттар жазған кезде оларыңыз SMART талаптарына жауап беруі керек:
Specific: нақтыланған — басқаша түсіну мүмкін емес, мазмұны тұрақты (мысалы, "қажетін қанағаттандыру", «көңілді ету» деген сияқты тіркестер қолданғанда абай болу);
Measurable: өлшемі бар — мүмкіндігінше есептеп, өлшеп білуге болатын жоспары бар (мысалы, алдағы бес жылда көшбасшы үштіктің қатарынан табылу, клиенттеріміздің санын миллионға жеткізу, жылдық айналым көлемін 100 млн теңгеге жеткізу, өнімімізді әлемнің 25 еліне жеткізу);
Achievable: қолдан келетін — айды аспаннан шығаратын, қияли арман емес, қажырлы еңбек арқасында қол жеткізуге болатын нәтиже (мысалы, «африкалықтардың арманын орындаймыз» емес, «африка құрлығындағы өмірді ыңғайландырамыз — 8000 км қашықтыққа су құбыры мен электр желілерін жүргіземіз»);
Results-oriented: нәтижеге ұмтылған — мақсат, мүдде, мұраттардың өзара балансын сақтап, нәтижеге межелі мерзімде қол жеткізуге мүмкіндік беретін;
Time-bound: уақытпен шектелген — мақсат-мұраттарға қол жеткізу мерзімін белгілеу керек. Соңғы нәтиже ғана емес, аралық көрсеткіштерді де (тоқсан сайын, жыл сайын, үш жыл сайын) белгілеп, компания өзінің жұмысын бағалауы керек.

!!! Яғни, мақсаттар мен мұраттарды жазған кезде "өсіру", «тереңдету», «дамыту», «күшейту» деген сияқты жалпылама сөздермен жазуға мүлдем болмайды.

ӘР ҚЫЗМЕТКЕР — КОМПАНИЯНЫҢ АЖЫРАМАС БӨЛШЕГІ
Ары қарай корпорациялық құндылықтар, стратегиялық мақсаттар және бизнес жүргізудегі үлгі боларлық әрекеттері жазылады. Бұлардың жазылуы да әр компания үшін аса маңызды. Оған компаниядағы барлық қызметкердің берік болуы — одан да маңызды. Осы құндылықтар мен мақсаттардың әрқайсының бойына әбден сіңіру үшін пиаршы жұмыс етеді.
Оның барлығы «Корпорациялық мәдениет» деген ұғымға кіреді. Әр қызметкер, лауазымы қандай болсын, бұл қағидаларды қатты ұстануы — компания жетістігінің, өнімдерінің сұранысының жоғары болуының бірден бір негізі. Миссияда айтылғандай — оқушының, ересектің, зейнеткердің көңілінен шығатын сапалы көрпе-жастық жасап, сапалы қызмет көрсету — ең басты міндет.

Мысал келтіре кетейік. Айталық, бір аймақта сіздің көрпе-жасық шығаратын компания өнімдерінің сапасыз подделкасын жасап сатыпты. Ол өнім бір айға жетпей жіптері сетінеп, бояуы оңайыпты. Сатып алған адам көңілі қалып, компанияға арыз жазады. Сонда оның қоңырауын қабылдаған хатшы қыздан бастап, осы олқылықтың орнын толтыруға атсалысатындардың барлығы компанияның құндылықтарын негізге ала отырып әрекет етсе, жанжал өте қысқа мерзімде жойылады. Теориялық түрде, тіпті бір тәулік ішінде жоюға болады. Барлық деңгейдегі қызметкер шын ынта-ықыласын көрсетсе.

Біздің елдегі тәжірибе көрсеткендей, жазылған стратегия мен корпорациялық мәдениет іс жүзінде жай ғана шатпақ күйінде қалады. Компания құндылықтарын түйсінбек түгіл, жұмысқа құлшыныстың жоқтығынан, көп адам жай айлық алып жүргендер қатарында. Жалпы, клиенттің разылығы үшін жұмыс істемейтін, білімі мен біліктілігін жоғарылатуға ұмтылмаған қызметкер жұмыс істеуге құқығы жоқ деп санаймын. Ісін белгіленген мерзімде бітіре алмайтын, клиент өтінішіне салғырттықпен қарайтын, бизнес-процестерді сынақ мерзімі ішінде ұғына алмаған адамның болашағы бұлыңғыр. Үнемі айтатыным:

Ешқандай аз айлық сенің салғырт жұмысыңды ақтамайды. Он бес мың ба, қырық мың ба — осы айлыққа істейтін жұмысқа кірістің екен — істе. Істемесең — көбірек айлық беретін жерге тайқай, бұл орынға адам табылады.

Жарайды, бұл менің бастық болсам — қырар едім деген фашистік армандарымның үзігі.
Тақырыбыма оралайын.
Постымның соңында мен өзіміздің қазақ компанияларының миссияларын көрсетпекпін.
Компанияның миссиясы түсінікті ме? Жарияланған миссияларына компания қызметі сай ма? Компанияның бизнесі сізге түсінікті ме? Сіз сол компанияға жұмысқа тұрғыңыз келе ме? Құндылықтарына мойынсұнар ма едіңіз?
Осы сұрақтар төңірегінде пікір білдірсеңіздер апашка қуанып қалар еді.
Сонымен:

САМҰРЫҚ-ҚАЗЫНА: Қордың миссиясы – ұйымдардың ұзақ мерзімді құнын ұлғайту және Қор тобына кіретін активтерді тиімді басқару арқылы Қазақстан Республикасының ұлттық әл-ауқатын арттыру.

ҚАЗМҰНАЙГАЗ: Ұлттық мұнай-газ саласын дамытуға қатысудан Қазақстан Республикасы үшін барынша жоғары тиімділікті қамтамасыз ету; Компания активтерінің ұзақ мерзімді құнын арттыру, рентабельділікті жоғарылату, өндірістің қауіпсіздігін қамтамасыз ету; Халықаралық нарықта бәсекеге қабілетті, интеграцияландырылған мұнай-газ компаниясы ретінде орнығу; Бизнесті әлеуметтік-жауапкершілік тұрғысынан жүргізу, отандық тауарлар, жұмыстар мен қызметтердің жеткізушілерін қолдау, жергілікті кадрларды дамыту.

САМҰРЫҚ ҚАЗЫНА ЖЫЛЖЫМАЙТЫН МҮЛІК ҚОРЫ: Мегажобалардың іргелі девелопменті, «жасыл» технологиялар қолданылатын құрылысты инвестициялау, сондай-ақ құрылыс саласына инновациялар енгізу арқылы Қазақстан Республикасының құрылыс саласы мен жылжымайтын мүлік нарығын дамытуға жәрдемдесу.

ҚАЗПОШТА: Барлық клиентке Қазақстан Республикасының бүкіл аумағында олардың қажеттіліктерін толығырақ қанағаттандыратын, заманауи сапалы почталық, қаржылық және логистикалық қызметтер спектрін ұсыну.

ҚАЗАҚСТАН ТЕМІР ЖОЛЫ: Жүйе құраушы инфрақұрылымдық компания бола тұрып, біз экономиканың тұрақты өсуі үшін сапалы көліктік негізді қамтамасыз етеміз, Акционер үшін құнды құрамыз, қажет және бәсекеге қабілетті көлік-логистикалық қызметтерді көрсету жолымен тұтынушыларға және тұтастай қоғамға пайда келтіреміз.

KCELL: Миссия компании — создание новых продуктов и услуг, чтобы удовлетворять существующие и новые потребности клиентов новыми, захватывающими способами; принесение пользы людям и создание комфортной жизни с помощью инновационных услуг, основанных на наших навыках в области информационных и коммуникационных технологий (қазақша нұсқасында миссия туралы ештеңе жоқ)

AIR ASTANA: Біз Еуразия жүрегінен әлемдегі ең үздік әуекомпаниялардың бірін құрып жатырмыз.

КАЗКОМ: Казкоммерцбанк работает для того, чтобы повысить качество жизни людей, открывая для них широкие возможности мира финансовых и банковских услуг, позволяющих осуществить планы, надежды и мечты с пользой для себя, своей семьи, своей компании, бизнеса, общества и страны.

BEK AIR: обеспечить безопасные, эффективные и финансово доступные основной массе населения авиаперевозки по Республике Казахстан и за ее пределы. Для этого компания выбрала надежные модели воздушных судов Fokker-100, имеющие наиболее подходящую для региональных полетов конфигурацию.
(соңғы жағында қосып қойыпты: Главные лозунги Авиакомпании «BEK AIR» — «Не надо нам помогать — просто не нужно нам мешать и мы всё сделаем сами!» :) )

Бұл туралы оқу орнының Стратегиялық жоспарлау, ғылым, xалықаралық байланыстар жөніндегі проректоры С.В.Могильный Қытайдағы Шыңжаң аграрлық университетіндегі әріптестерімен кездесуінде айтты. Оның айтуынша, аграрлық бағыттағы жоғарғы оқу орындар бір-бірімен ынтымақтаса тәжірибе алмаса жұмыс істеуі керек. Бұл кездесу мақсаты да осыны көздейді. Естеріңізге сала кетейік, осы жылдың 9 мен 18 мамыр аралығында С.Сейфуллин атындағы Қазақ агротеxникалық университетінің 15 үздік студенті мен оқытушы-профессорлары Қытай елшілігінің грантымен аспан асты елінде тәжірибе алмасу мақсатында іс сапарда жүр. Былтырғы жылдың қазан айында Қытай мемлекетінің ғылым және теxника вице-министрі Цау Джянлин мен Қытайдың Қазақстандағы төтенше және өкілетті елшісі Чжан Ханьхуэй ҚазАТУ ректоры, профессор А. Күрішбаевпен кездесуінде бұл грантты бөлу жөнінде мәлімдеген болатын. Іс-сапардың алғашқы күні университет студенттері Үрімші ауыл шаруашылық университетінің ветеринария факультетінің зертxанасында болып, оқытушы-профессорлардың ғылыми жаңалықтарымен танысып, өзара тәжірибе алмасты. Келесі күні, ҚХР дағы ауыл шаруашылығында маңызды рөл атқаратын Синь Янь ауыл және орман шаруашылығы университетінің басшылығымен кездесіп, екі жақты келісім шартқа отырып, меморандумға қол қойды. Келісім бойынша тараптар алдағы уақытта, ғылыми зерттеу саласындағы ынтымақтастық байланысын жаңа деңгейге көтермек. Үрімші қаласындағы Шың Жаң ауыл шаруашылық университетіне Қытайдың ғылым және теxника министрлігі ветеринария саласы бойынша бір, жем-шөп әзірлеу саласы бойынша тағы бір грант бөлді. Тағы бір қуанышты жаңалық, Солтүстік-Батыс ауыл және орман шаруашылығы (Сиань қаласы, Шэньси провинциясы) Университетінің жариялаған байқауына қатысқан университеттің үздік түлегі Жасұлан Қадырбаев докторантураға түсіп, Қытайдың мемлекеттік грантын жеңіп алды. Кездесу барысында делегаттарды бастап барған С. В.Могильный Университеттің бүгіні мен келешектегі ғылыми әлеуеті туралы баяндама жасады. Екі елдің студенттері де, тәжірибе алаңында болып, алдағы бірлескен жоспарлары туралы өзара келісті. Дерек көзі: С.Сейфуллин атындағы Қазақ агротеxникалық университеті баспасөз орталығының директоры Б. Иманғалиев. Тел: 8701 106 35 25 Астана-Үрімші-Сиань

Әлфия бір үйдегі төрт қыздың артынан ерген сүт кенже болатын.Ол ес біліп, етек жиғалы бері үйдегі бес әпкелі сіңлілілердің біреуі де шаш өсіріп көрген емес. Әлфияның жалғыз арманы, иықтан төгіліп тұратын қолаң шаш еді. Бірақ өкінішке орай бұл орындалмас арман ғана болып қалды.
Себебі, Әлфияның әкесі қыздарына шаш жіберуге қатаң тиым салып қойған.Бүгінде әкесі елуді еңсеріп, егде тартса да көру қабілеті әлі де нашарлай қойған жоқ. Әркез қыздары үйге келген бойда, ол ең алдымен бойжеткендердің шаштарына, содан кейін ғана жүздеріне зер салады.
Бір жолы үйге Әлфияның екі жыл бұрын шалғай жерге ұзатылып кеткен ең үлкен әпкесі қыдырып келді. Әлфия әпкесін көрген бетте таңданысын жасыра алмады. Өзі бұрынғыдан бетер сұлуланып кеткен бе қалай? Бойында әлдебір өзгеріс бар секілді. Анықтап қараса әпкесі шашын өсіріп, онысын қақ ортасынан жарып, қос өрім етіп өріп алыпты. Әпкесінің жотасында бұлғақтаған бір жұп қап қара жылтыр бұрымдарға Әлфияның қызыққаны соншалық, қайта қайта қолына алып ұстай берді. Осы кезде үйге әкесі де келіп қалды. Үлкен қызын көрген сәтте жүзі сұрланып кетті. Тіпті сәлемдеспей жатып, ол тұңғыш қызына түскі астан соң шашын кесіп тастауға бұйырды. Әпкесі үндеген жоқ. Түскі ас аяқталды, алайда оның шашын қиятын ойы да жоқ секілді. «Өзім әрең дегенде өсіріп алған шашыма қайшының ұшын да тигізбеймін, онсыз да бұл үйде көп тұрақтамаймын ғой, ертең ақ қайтып кетемін» деді.
Бірақ кешке таман күтпеген оқиға орын алды. Үлкен қызының әлі ұзын шашпен жүргенін көрген әкесі, қайшы әкеп бір ақ сәтте бұлғақтаған қос бұрымның тағдырын шешті. Қайшының қыршылдаған даусы естіліп, жып жылтыр шаштар жерге сусылдап түсіп жатты.
Сөйтіп білектей бұрымдардың иесі болған Әлфиянің әпкесі әп сәтте, қысқа шашты қуыршаққа ұқсап қалды.
Әкесінің ұзын шашқа деген өшпенділігін себебін Әлфия түсіне алмай қойды. Анасынан сұрап еді, ол да жарытып аузын ашқан жоқ.
Сол күні кеште Әлфияның шыдамы шегіне жетті. Әрі әкесінің қойған әділетсіз қатаң талабына ашуы келген ол, үйінен жүгіріп шығып, жақын дүңгіршектен бес алты тал шаш буғыш сатып алып келді. Содан басындағы енді өсіп келе жатқан қысқа шаштарын шашбуғышпен екі жерден буып алды да, қалғандарын білегіне тақты.
Кешке әкесі де жұмысынан қайтты. Әлфия жүгіріп астыңғы қабатқа түсті де оның алдына барып тұра қалды. Әкесі әдетінше қызын құшағына алмақ болып ұмтыла беріп, бір сәт кідіре қалды. Содан Әлфияның басындағы шашбуғыштарды көріп кері шегінді. Ашуланған әкесі оның шашындағы шашбуғыштарын күшпен тартып алды. Кішкене қызының қолындағы шашбуғыштарды көрген кезде ол тіпті ыза болды да Әлфияның қолынан қыса ұстап тұрып білегіндегі шашбуғыштарды жұлып алды. Шашбуғыштың біреуі өткір ұшты әшекеймен безендірілген болатын, онысы аңдаусызда Әлфияның білегін жырып өтті. Әлфия әкесінің оқыс қимылынан үрейленіп жылап жіберді.Дауысты естіген анасы кеп, қызын бөлмеге ертіп әкетті.
Әлфия әкесіне әбден ренжіді.Не үшін елдің бәрі, шаш өсіріп, күніне сан алуан шаш үлгісін жасап, сұлуланып жүрген кезде, бұл еркекшора секілді қысқа шашпен шолтаңдап жүру керек? Бірақ әкесінің суық көзқарасын көрген сәтте ол ләм дей алмады.
Айлар мен жылдар өз кезегімен жылжып өтіп жатты. Әлфия да бой түзеп, сәмбі талындай бұралған бойжеткен болды. Бір жолы ол қаладағы арнаулы фотостудияға барып, суретке түсті. Фотосуреттің әдемі шыққаны сондай фотограф оның бір данасын студиядағы кішкене көрмеге қойып қойды. Әлфияның қуанышына шек болған жоқ. Ол суретті қолына алып отбасылық фотоальбомға салып қоюға үйіне асықты.Үйге жеткен ол ең алдымен фотоальбомдарды алып шықты. Үш фотоальбомның екі кішкенесі әпкелерінің суретімен толып қалыпты. Тіпті сурет жабыстыратын орын да жоқ екен. Енді қалғаны ең үлкен фотоальбом. Бұл әкесінің фотоальбомы болатын. Негізінде оны ашуға ешкімнің қолы бармайтын. Азырақ ойланған Әлфия бар батылдығын бойына жинап, барқытпен қапталған дәу қара альбомды ашып ақтарыстыра бастады. Бұл суреттерді ол тұңғыш рет көруі екен. Әкесінің бала кезіндегі, оқушы кезіндегі, әскерде болған кезіндегі ақ қара суреттер альбомға қатар қатар жабыстырылыпты. Арасында тіпті әкесі мен шешесінің үйлену тойында түсірілген суреттер де бар екен. Соңына жете берген кезде кенеттен Әлфияның көзі бір суретке түсті. Суретте ай десе аузы, күн десе көзі бар белгісіз бойжеткен күлімсіреп тұр. Сұлу жүзінен нұр тарап тұрғандай. Қап қара жылтыраған ұзын шаштарын, қос бұрым етіп өріп біреуін алдына, енді біреуін артына жіберіп қойыпты.
Бұл кім болды екен? Анасы дейін десе, түрі сәл келіңкіремейтін секілді.Әлфия суретті алып дереу әпкелеріне барып сұрады. Олар да бұл суреттегі сұлудың кім екенінен бейхабар болып шықты. Бір білсе сол бірдеңе біледі ау деген үмітпен ол анасын іздеді. Біра анасы жауап берудің орнына салқын ғана: «Альбомды жинастырып орнына қой, ендігәрі оған жолама» деді. Әлфия бұл құпияның шешімін таба алмағанына қанша мұңайса да, әкесінің қаҺарынан жасқанып, фотоальбомды алған жеріне қайтып қойып қойды.
Бұл жұмбақтың шешуі көп ұзамай белгілі болды. Күндердің күнінде әкесі Әлфияны ертіп қала шетінде орналасқан кішкене қыстаққа келді. Ескі үйдің әлдеқашан сыры кеткен темір қақпасын қағып тұрған кезде Әлфия әкесінен: «Бұл кімнің үйі?» деп сұрады. « Әжеңнің үйі» деді әкесі жай ғана. «Әжемнің үйі? Әжем баяғыда ауырып қайтыс болып кетті деуші едің ғой?» деген сұраулар Әлфияның ойын қанша мазаласа да ол әкесінен сұрауға бата алмай,үнсіз тұрып қалды. Осы кезде есік ашылып екеуі ішке кірді. Бұларды самайын ақ шалған, өңі егде тартқан қарт ана қарсы алды. Бұны көре сала қарт кемпір «құлынымдап» бауырына басып, маңдайынан иіскеді. Әкесі де « Қане балам әже дей ғой енді, бұл да сенің әжең болады!» деді. Үйге кіре берісте Әлфия төрде ілініп тұрған суретті көзі шалды. Бұл өткен жолы альбомды аударып отырып көрген суреттің үлкейтілген түрі болатын. Сол ақ екен Әлфияның суретке деген қызығушылығы арта түсті. « Демек бұл суретке мына «әжемнің» де қатысы бар болды ғой? Әйтпесе неге іліп қояды? Бұл суреттегі қызды, танитын адам бар болса, сөзсіз осы «әжем» болу керек! Мен одан міндетті түрде бұл суреттің сырын сұрап білуім қажет!» деп ойлады ішінен. Ол енді осы жұмбақтың шешуін таппаққа бекінді. Әкесінің көзінше сұрауға батылсызданған Әлфия, оңтайлы сәтті күтіп отырды. Шәй ішіліп болып, дастарқан жиыла бергенде әкесі, темекісін тұтатып далаға шығып кетті. Осы мезгілді пайдаланған ол әжесінен: « Әже, ана төрде ілініп тұрған суреттегі кім?» деді. «Ее қарғам ай!» деді кейуана бір күрсініп алып. « Бұл суреттегі сенің туған әжең, менің үлкен әпкем. Жасында елге танымал сұлу да өнерлі қыз болатын. Атаң екеуі бас қосып, отау құрғандарына бірнеше жыл болған кезде соғыс басталып кетіп, атаңды соғысқа алып кетеді. Қолында төрт жасар баласымен қалған әжең, қай жұмыстан болсын бас тартпай, құлшына еңбек етіп, өмірдің ыстық суығын кешіп жүреді. Біраз уақыттан соң атаңнан келетін хаттар легі де сирей бастайды. Сөйтіп жүргенде әжеңе жасы егделеу тартқан, әйелі мерез ауруынан өліп кеткен, ауыл бастығы болып жүрген кәрі шал сөз салады. Күйеуінің аман есен оралатынына күмәнданып көрмеген әжең болса, оның сөзін керек қылмай, алдынан кесіп өте шығады. Сұлу да тәкаппар келіншекке ойы кеткен ауыл бастығы, оны қалай да қолға келтірудің амалын қарастырады. Сөйтіп бір күні ашуға булыққан ол «өз еркімен келмесе, күшпен ұстап әкеліңдер» деп, жендеттерін жібереді. Өзіне іздеу салынғанын естіген әжең, баласымен бірге қайда жасырынарын білмей, қорадағы үйіліп тұрған тезектің арасына тығылып кіреді. Кеш батқан шақта, бүкіл ауылдың үйлері мен қора қопсыларын толығымен тіміскілеп тексеріп шыққан жендеттер, енді әжеңнің үйін соңғы рет мұқият қарап шығуға бел буады.Бір кезде үш төрт адам қораға қарай бет алады. Жиналып тұрған тезекті әрі бері айналған олар, алакөлеңкеде ештеңе де көре алмай ақыры кетпекші болады. Есіктен енді шыға бергенде, ішінде көзі өткір біреуі, тезектің арасынан жылтырап тұрған қара бұрымға көзі түсіп, «Әне ол! Ұстаңдар» деп айғай салады. Осылайша әжеңді ауыл бастығының жендеттері ұстап әкетеді. Ал баласын, төркіндерінің қолына өткізеді. Бірақ өкінішке орай әжеңнің тағдыры бақытсыз болды. «Өлсем де қаусаған шалға әйел болмаймын!» деген әжең, екінші күні, ауыл шетіндегі өзенге суға кетіп өлді. Міне,әкеңнңің бұрымға деген өшпенділік сезімі осыдан қалған, шырағым!» деп аяқтады әңгімесін қарт кемпір. Бұл хикаяны ұйып тыңдаған, Әлфия әкесінің жүрегінде орын алған қайғысын енді түсінгендей болды.
Әлі күнге дейін Әлфия жібектей сусылдаған ұзын шашты арман етіп келеді. Бірақ әкесінің ескі жүрек жарасының бетін тырнап алуға қорқып, тек қысқа дөңгеленте қиылған қысқа шашына қанағат қылып жүр.

Қолдарына ІІ Дүниежүзілік соғысқа қатысқан туыстарының суреттерін ұстап, жүздеген адам Тәуелсіздік даңғылынан «Отан қорғаушылар» монументіне дейін жүріп өтті.

Астана ең салауатты қала. Оның дәлелі бүгін Fitness Park Astana-да болған спорттық-бұқаралық шарасы. Қолайсыз ауа райына қарамастан белсенді өмір салтын ұстанатындар мен спортқа әуес жандар Астаналық паркте жиналды. Шара кардионұсқаушымен бірге таңғы жаттығу жасаудан басталды. Әртүрлі жастағы астаналықтар музыканың сүйемелдеуімен түрлі іс-қимылдар жасап, позитивті энергия жинады.



— Барша әлемде барлық тұрғындарға арналған спорттық шаралар өткізіледі. Әрине, біз оны Астаналық паркте өткізуге ұйғардық. Бұл жерге елорда тұрғындары да, қонақтары да көптеп келеді, сондықтан біз бүгін баршаға қызықты болатынның бәрінің басын қостық. Адамдар белсенді жаттығулар жасайтын бағыттар — кроссфит, кардиожаттығулар, комбат-батл, зумба және джиу-джитсу. Осының бәрін біріктіріп, үлкен шара ұйымдастырдық. Ол әр жексенбі сайын өткізілмек. Бәрін де күтеміз, — деді Астана қаласының мәдениет, мұрағаттар және құжаттама басқармасының басшысы Болат Мажағұлов.



Парк аумағы бірнеше бөлікке бөлінген. Олардың бірінде тәжірибелі нұсқаушылар кеңінен танымал спорт бағыты кроссфиттен, екінші бөлігінде Combat Battle жаттығу жүйесінен сабақтар өткізді. Бұдан басқа, адамдар жүрек-қан тамырлары жүйесін жаттықтыруға бағытталған сабақтарға қатысу мүмкіндігіне ие болды.



Мұнда бразилиялық джиу-джитсуден де сабақтар өткізілді, кәсіпқойлар татамиде күресіп, өз машықтарын көрсетсе, жаңадан келгендер өзін-өзі қорғауды үйреніп, спорттық айла-тәсілдерді меңгерді.

Қыздар ашық аспан астында зумба билеп, йога сабақтарына қатысты.

— Бүгін паркке келгеніме қуаныштымын, жаңбыр мен суық желге қарамастан позитивті энергия алдым, спорттық жаттығулар жасағанда тонбайсың, — деп қала тұрғыны Әлия өз әсерлерімен бөлісті.

Әр жексенбі сайын қала тұрғындарына музыкалық тарту да жасалмақ. Fitness Park Astana шарасы барысында қазақстандық эстрада жұлдыздары өнер көрсетеді.


Айта кетейік, Астана қаласының әкімдігі ашық алаңдарда мәдени-бұқаралық шаралар өткізуге баса назар аударады, бұл елорда тұрғындары мен қонақтары үшін барынша қолжетімділікті қамтамасыз етеді. Алдағы жазғы маусымда барлық парктер мен саябақтарда әр түрлі мәдени және спорттық бағдарламалар өткізу жоспарланған.

Материал Астана қаласы әкімдігінің ресми сайты astana.gov.kz деректері бойынша әзірленді.

Бүгінгі пост өткен посттарға қарағанда өзгешелеу болмақ… Өзінің техникасымен ерекшеленіп жүрген боксшы жайлы. Василий Ломаченко 1988 жылы 17 ақпанда дүниеге келген. Украинаның кәсіпқой-боксшысы. Олимпиада ойындарының екі дүркін чемпионы ( Бейжің-2008, Лондон-2012), екі дүркін әлем чемпионы (Милан-2009, Баку-2011), Еуропа чемпионы (Ливерпуль-2008), Вэл Баркер кубогінің иегері. Әуесқой бокста 397 кездесу өткізіп оның біреуінде ғана Чикаго-2007 әлем чемпионатында, ресей боксшысы Альберт Селимовтан ұтылған әділетсіз жекпе-жек). Бірақ сол Альберт Селимовпен Бейжің-2008 Олимпиада ойындарында кездесіп тас-талқан етіп жеңеді. Жеке бапкері-өзінің әкесі Анатолий Ломаченко. Менің ойымша әкесі өте ақылды адам, Василий бокспен айналысып жүрген шағында, оны биге қатыстырған. «Себебі, би- аяқта көп қимылдауға және денені икемділікке үйретеді»- деген Анатолий Ломаченко. Керемет ойлап тапқан. 2013 жылы 26 шілдеде әйгілі промоутер Боб Арумның «Top Rank» компаниясымен келісімшартқа отырды. Кәсіпқой рингте алғашқы кездесуін мексикандық Хосе Рамиреспен (25-3) жұдырықтасып, жеңген болатын. Василий чемпиондық атаққа екінші кездесуінде шығатын болды, оның қарсыласы мексикандық 33 жасар Орландо Салидо (60-43-13-3) болды. Егер де Вася осы кездесуде жеңіске жеткенде ең қысқа мерзімде чемпиондық атаққа қол жеткізген бокс тарихында бірінші боксшы атанар еді, бірақ өкінішке орай тағы да төрешілер тарапынан әділетсіздік болып, ұтылып қалды. Ломаченко өзінің чемпиондық атағын көп ұзамай үшінші кездесуінде американдық Гэри Расселмен (28-27-1) өткізіп WBO тұжырымы бойынша әлем чемпионы атанды. 2014 жылы 24 қарашада Василий тайлық Чонлатар Пирияпиньоға (52-1) қарсы өзінің алғашқы белбеу қорғау кездесуін өткізіп жеңіске жеткен болатын. 2015 жылы 2 мамырда (Мейвезер-Пакьяо кездесуі, естеріңізде болса) Лома пуэрторикалық Гамальера Родригесті (25-5) 9-раундта нокаутқа түсірген. 2015 жылы 7 қарашада мексикандық Ромуло Коасичпен (25-4) кездесіп 10-раундта мерзімінен бұрын аяқтаған. Келесі жекпе-жегі осы жылдың 11 маусымында пуэрторикалық Роман Мартинеспен (29-2-3) болмақ. Василий ақылды, айлакер және өте еңбекқор боксшы. Сол еңбегінің арқасында қазір мықтылар сапында… Сенесіздер ме?! Василий әр жекпе-жектің алдында 9 шақырымдық өзенді жүзіп өтеді екен… Бокстың тірі аңызы Майк Тайсон «ақ адамдар Ломаченко сияқты бокстаса алмайды»-деген. Сол сөзінің жаны бар… ЛОМАЧЕНКО-МЫҚТЫ!!! www.youtube.com/watch?v=xymGH9COHZI-Альберт Селимов (Чикаго-2007) www.youtube.com/watch?v=jH5SXgvyB_s (ең үздік сәттері) www.youtube.com/watch?v=8HSn3mZmADc (Ломаченко туралы деректі фильм)

Бүгін Астанада Ұлы Отан соғысында қаза тапқан жауынгерлерді еске алу рәсімі барысында жауынгерлер зиратына Даңқ гүлшоқтары мен гүл себеттері қойылды. Жиналған қауым сарбаздар мен оркестрдің маршымен қаза тапқан жауынгерлер зиратының басына барды.



Салтанатты шараға Астана қаласы әкімінің орынбасары Ермек Аманшаев, мәслихат хатшысы Жанат Нұрпейісов, ҰОС ардагерлері, ҚР Қорғаныс министрлігінің, түрлі конфессиялардың өкілдері, әскери бөлімшелер, оқушылар мен қала тұрғындары қатысты.

— Бүгін Отаны үшін жанын құрбан еткен адамдарды еске алу үшін жиналып отырмыз. Ақмола өңірінен 30 адам Кеңес Одағының батыры атанғанын білесіздер. Олар әрқашан да жадымызда. Олар соғыстан аман оралып, еліміздің қалыптасуына да өз үлесін қосты. Біздің жанымызда жүргендеріңіз, бүгінде тәуелсіз мемлекетте өмір сүріп жатқанымыз үшін рахмет, жасаған ерліктеріңіз үшін алғыс айтамыз, — деді Астана қаласы әкімінің орынбасары Ермек Аманшаев.



Ұлы Жеңістің 71 жылдығына орай жауынгерлер зиратына елорда әкімдігінің, қалалық мәслихаттың, соғысқа қатысқандардың атынан гүл шоқтары қойылды.

— Құрметті жолдастар, бүгін сұрапыл соғыс жылдарын еске алып отырмыз. Майдандас жолдастарымыз әрқашан жадымызда. Ешкім де, ештеңе де ұмытылмайды. Аға ұрпақ өз міндетін орындады, ал жастар – Отанымызды қорғау керек. Мемлекет тәуелсіздігін алды. Баршаға бақыт, денсаулық, қуаныш тілеймін! Ұзақ жасаңыздар! – деді Ұлы Отан соғысының ардагері Алексей Фролов.

Айта кетейік, ертең 9 мамырда Жеңістің 71 жылдығына орай «Отан қорғаушылар» монументінің жанында Даңқ гүл шоқтары мен гүлдер қою рәсімі ұйымдастырылады. Сондай-ақ, сағат 12:30 Тәуелсіздік даңғылынан «Отан қорғаушылар» монументіне дейін «Жаужүрек полк» шеруі жүріп өтеді.

Материал Астана қаласы әкімдігінің ресми сайты astana.gov.kz деректері бойынша әзірленді.

Қабырғадағы календарь — қып-қызыл…

Астана қаласы әкімдігінің Жұмыспен қамту орталығы 12 мамырда сағат 10:00-13:00 аралығында «Astana Mall» сауда, ойын-сауық орталығында «Барлығы үшін еңбек» атты Бос орындар жәрмеңкесін өткізеді.

Шара барысында жұмыс іздеушілер әлеуетті жұмыс берушілермен әңгімелесуден өтіп, қайта оқыту мен жаңа мамандықдыты теңгеру мүмкіндігі туралы ақпарат алады.



Қызмет көрсету, білім беру мекемелері, денсаулық сақтау ұйымдары, құрылыс фирмалары, қонақ үйлер, автопарктер, ішкі істер органдары саласындағы 25-тен артық жұмыс беруші бос жұмыс орындарын ұсынатын болады.

Материал Астана қаласы әкімдігінің ресми сайты astana.gov.kz деректері бойынша әзірленді.