Астанада Журналистер аллеясы ашылды. Журналистер «Сұлу» тұрғын үй кешенінің ауласында ұзақтығы 3 километрді құрайтын бірінші республикалық медиа аллеясын ашты. Аллеяның ашылуы Ұлттық орман егу күніне орайластырылды – деп хабарлайды astana.kz сайты.

БАҚ өкілдері 150 сиверс алма ағашын, емен, қызыл жемісті шетен, ақ қайың, сібір шыршасы, ақ тал, сүмбіл терек, қызылтал, сондай-ақ, ЭКСПО-2017 брендіне айналған арнайы гүлбағында дайындалған мамық түзбейтін бальзамдық терек көшеттерін отырғызды.

«Мемлекет басшысы Нұрсұлтан Әбішұлы жерімізді көгалдандыруға көп көңіл бөледі. Біздің бетпақ даламызда ағаштар аз қамтылған. Сондықтан, жастарды көшеттер отырғызуға шақырамын. Себебі көшеттерді жиі отырғызған сайын, ауа да тазарады. Бұл жерде журналистік аллея бастау алды. Аллея Қазақстанның барлық қалаларында жалғасын табады. Бұл бірегей журналистер аллеясына айналады» дейді шараға қатысқан «Тұрақты даму» жер қорының биологы Валентина Ободовская.

Айта кетейік, Қазақстанда 2014 жылғы 19 сәуірде БҰҰ Халықаралық орман жылын қолдауы мақсатында бірінші Ұлттық орман егу күні өтті. Акция қорытындысы бойынша 2014 жылы мыңдаған еріктілер қатары жалпы көлемі мыңдаған гектарды құрайтын миллионға жуық көшет отырғызды.

Сурет astana.kz сайтынан алынды

«Астана бас жоспары» ҒЗЖИ ғимаратында «Астана агломерациясын аумақтық дамытудың өңіраралық кестесі» жобасы бойынша қоғамдық тыңдаулар өтті.

– Мемлекет басшысының Қазақстан халқына арнаған Жолдауы аясындағы тапсырмаларды жүзеге асыру мақсатында Астана мен Алматы қалаларында агломерацияның ұзақ жылдық жоспары дайындалуда, біздің жоба 2030 жылға дейінгі мерзімнен бұрын дайындалды, – деді кездесу барысында «Астана бас жоспары» ҒЗЖИ ЖШС директорының орынбасары Бахтыбай Тайталиев.

Жобаның негізгі міндеті елорданың ауылшаруашылық өніміне сұранысын қанағаттандыру болып табылады.

Қоғамдық тыңдау барысында Астананың агломерация аумағын дамыту: азық түлік (ауыл шаруашылық және ауылшаруашылық өнімдерді қайта өңдеу, елорданы азық-түлікпен қамтамасыз ету); құрылыс индустриясы (Астана қаласын құрылыс материалдармен қамтамасыз ету); жаңа индустриалдық аймақты дамыту, логистикалық орталық және жаңа спутник-қалалар; көлік инфрастуктурасын дамыту; демалыс орын және туризм (елорда тұрғындарын қысқы уақытқа арналған демалыс орындарымен қамтамасыз ету); жасыл белбеу секілді тақырыптар талқыланды.

Сонымен, Астана қаласының агломерациясына Ақмола облысының үш ауданының (Аршалы, Целиноград, Шортанды) 127 елді-мекендері және Ақкөл ауданының 4 елді-мекені кіреді. Астана агломерациясының жалпы көлемі 2 175 мың гектарды құрап, халықтың саны миллионнан асады. Оның ішінде Астанада 814 мың адам тұрады, қала аймағында 196 мың адам тұрады.

Жобаны дамыту барысында 2020 жылы агломерациялық аймақта 1 млн 200 мың адамға дейін, ал 2030 жылы шамамен 1,5 млн адам тұрады деп жоспарланған.

Астана қаласының төңірегінде агломерацияны дамыту жоспары аясында қала аймағындағы халықтың тұрақты түрде еңбекпен қамтылуы, орта және шағын бизнестің дамуы көзделген.











astana.gov.kz

Астаналық армрестлинг шеберлері 26 қыркүйек пен 4 қазан аралығында Малайзия астанасы Куала-Лумпурда өткен әлем чемпионатынан жүлдемен оралды.

Сайысқа Астана қаласы әкімдігіне қарасты «Жігер» спорт клубының мүшелері қатысты. Тыңғылықты дайындықпен барған спортшыларымыз құр алақан қайтпады. Ересектер арасында Еркін Әлімжанов пен Заир Ахмедов 70 кг дейінгі дәрежеде алтыннан алқа тақса, 100 кг дейінгі салмақта Георгий Дзиранов күміс жүлдегер атанды.

Ал жастар арасында 1-орынды Әлижан Мұратов иеленсе, Анастасия Табарина 3-орынды қанағат тұтты. Жеңімаздар сайыс нәтижелеріне разы екендерін, бірақ алда бұдан да биік белестерден көрінуге ұмтылатындарын жеткізді.

Баға дейтін бас білмейтін асаудың ырыққа көнетін түрі жоқ. Қысқа күнде қырық құбылған доллар бағамы 270 теңгеге (300 теңгеге дейін жеткен кезі де болған – ред.) тұрақтанып тұр әзірге. Ал ішер ас, киер киім, күнделікті тұтынатын заттар, дәрі-дәрмек бағасының шарықтауына етіміз үйрене бастағандай. «Ет үйрене бастады» деп жай өзімізді-өзіміз жұбату үшін айтамыз да, әйтпесе, үйдегі көңіл-күйді базардағы нарықтың бұзатыны бесенеден белгілі ғой. Күнделікті базар аралап, баға аңдып жүрмесек те, астаналық статистер мәлім еткен деректерге қарап бас шайқап қоюдан басқа амалымыз жоқ.

Сонымен, Аstana.stat.kz таратқан мәліметке сенсек, елордада қыркүйек айында азық-түлік бағасы біршама қымбаттады, арзандағаны да жоқ емес. Атап айтар болсақ, жұмыртқа – 14,5 пайызға, қант – 13,7 пайызға, тауық еті – 6,2 пайызға, пастерленген сүт – 1,5 пайызға, айран – 1 пайызға, сары май – 0,2 пайызға қымбаттаған. Ал бірінші сортты ұн (1,4 %) мен сиыр еті (0,4%) керісінше арзандаған. Көкөністерден қызанақтың бағасы – 9,3 пайызға көтерілсе, сәбіздің құны – 26,1 пайызға, картоп – 22 пайызға, орамжапырақ – 21,3 пайызға, қызылша – 17,8 пайызға, пияз – 13,3 пайызға, қияр – 4,4 пайызға төмендеген. Жалпы, күнделікті тұтынатын азық-түліктің Астанадағы орташа бағасы төмендегідей (2015 жылғы тамыз, қыркүйек айларындағы мәлімет):

Жоғары сортты ұн, кг: 154 тг. (тамыз), 154 тг. (қыркүйек).
Пастерленген сүт, литр: 196 (тамыз), 199 (қыркүйек).
Қаймақ, кг: 765 (тамыз), 771 (қыркүйек).
Сары май, кг: 1 651 (тамыз), 1 655
Күнбағыс майы, литр: 303 (тамыз), 303 (қыркүйек).
Сиыр еті, кг: 1 165 (тамыз), 1 160 (қыркүйек).
Жұмыртқа, 10 дана: 173 (тамыз), 198 (қыркүйек).
Қант, кг: 175 (тамыз), 199 (қыркүйек).
Картоп, кг: 82 (тамыз), 64 (қыркүйек).
Орамжапырақ, кг: 89 (тамыз), 70 (қыркүйек).
Пияз, кг: 75 (тамыз), 65 (қыркүйек).
Сәбіз, кг: 92 (тамыз), 68 (қыркүйек).

Қазанның екінші жұмасында Халықаралық Жұмыртқа күні аталып өтеді. Осыған орай Қазақстан Құс өсірушілер одағы Астана қаласы әкімдігінің қолдауымен елордада жәрмеңке ұйымдастырады.

9 қазан күні құс өсірушілер «Шапағат» базарында астаналықтарға отандық құс фабрикаларының өнімдерін төмендетілген бағада ұсынбақ. Атап айтсақ, Ақмола, Солтүстік Қазақстан, Қостанай, Қарағанды, Алматы және Шығыс Қазақстан облыстарының белгілі құс фабрикалары өнімдерін әкеледі. Сондай-ақ, Оңтүстік Қазақстанның «Ордабасы» құс фабрикасы түйетауық етін сатады.
Аталмыш жәрмеңке осымен үшінші рет өткізілмекші. Ал, тарихта жұмыртқа күні алғаш рет 1996 жылы Вена қаласында аталып өтілген.

Астана қаласының Табиғи ресурстар және табиғат пайдалануды реттеу басқармасының хабарлауынша, елордада «Жасыл технологиялар мен инновация» виртуалды байқауы жарияланды.

Байқауға қазақстандық компаниялар, жекеменшік мекемелер және жеке тұлғалар, сондай-ақ, Қазақстан аумағында қызметін жүзеге асыратын шетел компаниялар қатыса алады.

Байқау келесі салалық бағыттарда өткізіледі:

— энергия саласындағы инновация жолдары;

— энерготиімділік және технологияның ресурстарын сақтау;

— экожүйені басқару тиімділігі;

— ауылшаруашылық саласындағы жоғары өндірістік және тұрақты тәжірибе, басқарманың тиімді әдістері мен қоқыс-қалдықтарын өңдеу;

— су ресурстарын тұрақты пайдаланудағы тиімді технологиялар;

— зиянды қалдықтарды азайту.

Байқауға қатысушалыр мына аталымдар бойынша марапатталады: «Жасыл» технологияны өндіретін «Үздік өндіруші», «жасыл» технологияны «Үздік жеткізуші», «жасыл» технологияны пайдаланған «Үздік кәсіпорын».

Байқауға қатысу үшін ағымдағы жылдың 15 қазанына дейін www.gbpp.org, www.gt.greenkaz.org сайттарына тікелуіңіз қажет.

Технологиялық талаптар «жасыл» технология» тізімінде көрсетілетін болады және ЭКСПО-2017 Халықаралық мамандандырылған көрмесі форумында/алаңда орналастырылады.

Астана қаласының әкімі Әділбек Жақсыбеков кезекті аппарат жиналысында әкімдіктің баспасөз қызметіне жаңа басшы тағайындалғанын жария етіп, оны таныстырды. Елорда әкімінің баспасөз хатшысы болып Өтешева Жанар Әзірқанқызы тағайындалды.

Жанар Өтешева 2010 жылдан 2015 жылға дейін Астана қаласы Туризм, дене шынықтыру және спорт басқармасының баспасөз хатшысы болып қызмет атқарған, 2015 жылдан Спорттық жекпе-жек және күш қолданылатын спорт түрлері Конфедерациясының БАҚ-пен байланыс қызметінде жұмыс істеген. Үздік спорт журналисі ретінде С. Бердіқұлов атындағы премиясының лауреаты атанған (2011 ж.). Сонымен қатар, соңғы екі жыл жүзінде БАҚ жұмыс мәселелері бойынша Геннадий Головкиннің командасына көмектескен болатын.

Құрметті ұстаздар!

Сіздерді кәсіби мерекелеріңіз – «Ұстаздар күнімен» шын жүректен құттықтаймын!

Ұстаз – кез келген адам үшін қастерлі тұлға. Ол шәкірттерін білім нәрімен сусындатып, дүниетанымы мен көңіл көкжиегін кеңейтеді. Жақсылық жасауға үндеп, жалпыадамзаттық құндылықтарды бойға сіңіреді. Ұлы Абай «Ұстаздық еткен жалықпас, үйретуден балаға» деп жырлағандай, ең әуелі шәкіртіне тәлім мен тәрбие беріп, білім мен ғылымға баулыған ұстаздың қадірі қашан да биік. Мемлекетіміздің келешегі ұстаздар баулыған жастардың қолында. Сондықтан абыройлы мамандық иелерінің жұмысы жемісті, келешегіміз кемел болсын деп тілек білдіремін.

Дендеріңіз сау, жұмыстарыңыз берекелі болсын!

Құрметпен, Астана қаласының әкімі Әділбек Жақсыбеков

Астанадағы «Алау» мұз айдынында бұқаралық сырғанаудың жаңа маусымы ашылды. Мұз айдыны дүйсенбіден басқа күндердің барлығында жұмыс істейді. Жаңа маусымда қала жұртшылығының сұрауы бойынша күнделікті үш сағатқа созылатын кешкі сағат 19:00-ден басталатын бір сеанс қосымша енгізіліп отыр.

Бір айта кетерлігі, жаңа маусымда сырғау құны ескіше қалды. Сырғанаудың ең төменгі бағасы 250 теңге болса, ал кешкі сеанстың құны 1500 теңгеден аспайды. Сондай-ақ, студенттерге арналған жеңілдіктер қарастырылған күндер ұзартылды.
Бүгінгі таңда коньки спортының Ұлттық құрамасы өз жаттығу жұмыстарын бастап кетті, ал қазан айының соңында «Алау» мұз сарайында коньки тебуден Қазақстан чемпионаты өтеді.

Қаперіңізде жүрсін, шорт-трек пен коньки спорты секциясына балаларды қабылдау жалғасуда.

2016 жылы өтетін Еуропа чемпионатының іріктеу турниріндегі Қазақстан мен Нидерланды құрамалары арасындағы матч билеттері сатыла бастады.

Отандастарымыз Нидерланды футбол құрамасын «Астана – Арена» стадионында 10 қазан күні қабылдайды. Ойын сағат 22.00-де басталады.

Билеттерді «Тикетон» (www.ticketon.kz) жүйесі арқылы сатып алуға болады. Бағасы – 2 000 теңгеден 10000 теңгеге дейін. Бірінші санаттағы жұмсақ орындар құны – 20000 теңге.