Көптен бері жазба жазбағаныма кешірім сұрай отырып, жаңа бастап келе жатқан блогерлерге немесе болашақ журналистерге пайдалы болар деген ниетпен мына хабарландыруды жариялап отырмын.

Алғашқы қазақстандық тәуелсіз Журналистика мектебі журналистика курсына қабылдау қабылдау мерзімінің аяқталуға жақындағанын хабарлайды.

MediaSchool – еліміздің шынайы медианарығына бейімделген журналистика және PR Мектебі.
Журналистика мектебі журналистік шеберлікті меңгергісі келетіндерге, бірақ БАҚ саласына қажетті тәжірибесі жоқ адамдарға арналған. Оқу қазақ және орыс тілдерінде жүргізіледі.

Қарқынды практикалық оқыту бағдарламасы мынадай блоктардан тұрады:
• Баспасөз БАҚ-ы;
• Ақпараттық агенттіктер мен электронды БАҚ құралдары;
• Заманауи медиа;
• БАҚ және Құқық.
Оқу барысында студенттер Қазақстанның бұқаралық ақпарат құралдары туралы жалпылама мәлімет алып, жарияланымдардың құрылымын зерттеп, әр түрлі форматта мақала жазуды, ақпарат көздерін тауып, телевизиялық жаңалықтар сюжетін жасауды үйренеді.

Сонымен қатар жаңа медиамен жұмыс жасаудың ерекшеліктерімен, мультимедиялық журналистиканың заманауи талаптарымен танысып, этикалық және заңдық нормаларды сақтай отырып мақала жазудың қыр-сырын меңгереді. Дәрістер тренинг түрінде өтеді. Оларды тәжірибелі мамандар – журналистер, блоггерлер, редакторлар, саясаттанушылар, сарапшылар, құқыққорғаушылар, инфографистер, заңгерлер өткізеді.

Журналистика Мектебіне қабылдау 2013 жылдың 1 сәуіріне дейін жалғасады. Сабақ 2013 жылдың 2 сәуірінде басталады. Оқу ақысы айына – 25 000 теңге.
Курстың оқу мерзімі – 4 ай (3 ай – оқу, 1 ай – тәжірибе). Дәріс сейсенбі және бейсенбі, жұма күндері кешкі уақытта жүреді.
Қосымша ақпаратты топ үйлестірушісінен ала аласыз: Рысгүл Рамазанова, +7 727 261 66 69, +7 778 907 16 08, rasti.comwashington@gmail.com

P.S: Журналистика немесе блогқа қызығатын адамдарға үлкен пайдасы тиетініне сенімдімін. Жаңа блог бастаушылар, студенттер осы жолғы курсқа үлгеруге тырысыңыздар!

Шамамен 2000 шақырымдық жерді артқа қалдырып, Шымкентке де келіп жеттім.БлогҚұрылтайға бірінші рет қатысуым болғандықтан, алғаш алған әсеріммен бөлісуді жөн санадым. Тіркелуден басталған БлогҚұрылтай алғашқы күні ресми түрде өтсе, екінші күні табиғат аясында бейресми түрде өтті.

Ары қарай суреттер сөйлесін:

Бұл жазбаны ешқандай конкурсқа ұсынбаймын. Блогкэмптегі әсерім ғой. Алда-жалда жүлдеге лайықты деп жатсаңдар, үшінші орынды бере салыңдар

Кіріс*

Басында Шымкентке бармаймын деп ойлаған едім. Ауылға барып наурыз өткізу, көмектесу тәрізді жұмыстар блогкэмпке баратын жолымды жапқандай көрінген. Наурыз мерекесі күні таңертең қым-қуыт басталды да, ештеңе ойлауға мұрша болмады. Бір қарасам ұялы телефоныма хабарлама келіп түсіпті. «Наурыз құтты болсын!» Кобус Блок. Әлі ешкімге хабарласпағаным, оның үстіне алғаш болып шетелдік мені құттықтағанына ұялып кеттім. Бірден телефонға жармасып, «А» әріпінен басталатын контактілерге қоңырау шала бастадым. Аты «А»-дан басталатын блогшылар көп екен менде. Олардың дауыстарынан-ақ блогкэмптің аурасы, құрылтайдың қызықты өтетіні бірден сезілді. Соған дейін «барайын ба, бармаймын ба?» деген сұрақ ойландырып келсе, блогшылармен сөйлескеннен кейін нақты шешімге келдім. Барамын! Аман-есен наурызды өткізгесін, 23 күні таңертең «Шымкент қайдасың» деп тартып кеттім.

Әрине отырып алып сынаудан оңай нәрсе жоқ, мұндай үлкен жиынды ұйымдастыру оңай шаруа емес, әсіресе қолында қаржысы жоқ жастар үшін тіптен қиын, ол жағынан ұйымдастырған жігіттерге әрине құрметпен қараймын.

1. Мақсат қандай?

Ең алғашқы блогкамп өткен кезде мақсат айқын болып еді, блоггерлер бас қосып тәжірибе алмасу, бір-бірімен танысу, қазақ тіліндегі жаңа жобалардың дүниеге келуіне жол ашу, сол арқылы қазақша контенттің дамуына сеп болу болатын. Басты мақсат әрине блогтың не екенін жалпақ жұртқа түсіндіру, блогшылардың сапасын арттыру болса керек, бұл құрылтайда осы мақсаттар 50 пайызға орындалды дегенге сене алмадым.

2.Кімге не үшін керек?

Бас қосып көңіл көтеруге таптырмас орын негізінде, олда керек, оған еш қарсылығымыз жоқ егер жоғарыдағы мақсаттар есте болса, «Шіркін, келесі блогқұрылтай қашан болар екен» деп тамсанатындар үшін несімен қызық болдлы екен, әрине достарымен кездесу көңіл көтеріп қалу. Қазақ ғаламторы қазақша сапалы контентпен толыға түсуіне, осы блогқұрылтайдың бір себі болса екен деп жүрген көшбасшылар әрине болды.

3. Марапаттау

Егер мүмкіндік болса, жылдың ең үздік блогы, ең үздік тақырыптық блог (егер ол бар болса) жаңа есім, деген номинациялар бойынша елге үлгі болатындай блогтарды насихаттап, жаңа өсіп келе жатқан блогшыларға көрсетілсе құба құп болар еді.

4. Шеберлік кластар

Мұны жұртты жалықтырып алмайтындай ұйымдастыру керек, барлық қатысушыларға арнап бір ғана шеберлік клас өткізілуі керек, ол бір ғана слайдтың төңірегінде өрбісе жеткілікті, алдымен бір тех маман шығып блог ашудың техникалық жағын түсіндірсе, келесі біреуі шығып тақырыпқа сай безендірілуін айтсын, келесі адам қандай тақырыптар қазақша блогсферада ақсап тұр, сол жағын түсіндірсін яғыни контент жағын, осылай 15 минутта бітіруге болады.

5. жаңа жобалар

Өте керек, бірақ іріктеу жағы атүстілеу ме қалай? қысқа уақыттың ішінде қандай жобаның болашағы зор екендігін анықтауда қиын, атам қазақ «Сайт ашу оңай, сайт болу қиын» деген екен, сол сияқты сайт ашқанның бәрі жоба емес, ол үшін алдын-ала жіберілу керек, жобаның бағыт-бағдары, болашақтағы жоспары анық жазылып көпшілікке ұсынылып онлайн дауысқа салыну керек, сосын қорытындысы құрылтайда жарияланса болды.

Қорытынды

Бұл сынау емес тек іліп алар бірдеңе болса ескерілер дедім, жалпы құрылтай керек, жылдан жылға сапалы, берері мол бола түссе, блогтардың сапасы артып тақырытық блогтар көбейсе екен, қазақша контенттің ақсап жатқан тұстарын дөп басса екен деген ой ғой біздікі.

Негізінде трайбализм деген терминнің мағынасын – жүзге бөлінушілік деп түсінемін.
Кезінде отарлаушы Ресей кең байтақ қазақ жерін оңай жаулап алу үшін, қазақ халқының осындай осал тұстарын шебер пайдалана біліп, «бөліп алда, билей бер» деген саясатын күні кешеге дейін жүзеге асырып келгенін тарих айғақтайды ғой.
Ал қазір егемен ел болып, өз билігіміз өз қолымызға тигенде, сол трайбализм деген пәле жаңаша түр, жаңаша сипат алып, басқаша айтқанда жалпы халықтық қауыпты іс-шараларға айналып бара жатқанға ұқсайды, және сол бәленің отын үрлеп жүргендер өзіміздің кейбір қазақ тілді ақпарат құралдары сияқты көрінеді.
«Дат» газетінің №1 нөмірінде белгілі қоғам қайраткері Ә.Қосановтың «фейсбуктегі» жазбалардан деген үзінділерінен мынадай сөздерді оқыдым да таң қалдым. «Трайбализм мен өсекизм кейбір БАҚ-тың анық тенденцияларына айналып барады. Қазақ баспасөзін құртатын қаржының аздығы, не билік тарапынан жүргізіліп отырған цензура емес, дәл осы кеселдер! Және де жоғарыдан осының бәріне бата беріп отырған бір күштер бар сияқты!» Таң қалғаным — мемлекеттік дәрежедегі белгілі саясаткердің мен сияқты шала сауатты, қарапайым оқырманның көптен көкейінде жүрген ойын дөп басқаны.
Сонау бала кезімізден сүйіп оқитын «Лениншіл жас», қазіргі «Жас Алашымның» соңғы кездері Батыс өлкеден шыққан биліктегі азаматтарымызды сын садағына жиі ала бастағаны алаңдатады. Соның ішінде ала бөтен Аслан Мусин жөнінде небір жөн-жосықсыз айтылып жатқан әңгімелер қаншама?!
Құдай-ау нелер айтылмады?! Жаңаөзендегі жазықсыз жандарды атқызған, бұйрық бергізген Мусин екен деп жақтары талмастан қақсағанын елдің бәрі біледі. Тіпті, Б.Рысқалиевке арандату үшін бұзақылар тобын жібергізген екен деп те естідік. ҰҚК басшысы Н.Әбіқаевтің беделін түсіру үшін Арқанкергендегі шекарашыларды қырғызған да Мусиннің ісі екен деп те шығарды. Бір басылымда Мусинді Сталиннің қанды қасапшысы Берияға теңеп, «Қазақтың Бериясы» деген айдар тағып қойды. Мемлекеттің бәленбай миллиард қаржысын жымқырған Атыраудың әкімі Б.Рысқалиевті шетелге қашырып жіберген Мусин болып шықты.
Сонда дейміз-ау, қаншама құзырлы органдар бар, қаншама күштік құрылымдар бар, ай қарап отырғаны ма? Бірнеше миллиардтап жоқ болып жатқан қаражаттың бақылаушысы, іздеушісі жоқ болғаны ма?
Германияға емделуге барған Мусиннің артынша «Ойбай, қашып кетіпті» — деп те шығарды.
Жақсы, дегендеріне жетті ғой, Мусинді президент әкімшілігінің басшысы қызметінен кетірді, енді басына тыныштық орнаған шығар десек, «Жас Алаштың» жаңа жылдағы кезекті санында елбасының кезекті ауыс-түйістерін саралай келіп, ендігі кезек бас прокурор мен ішкі істер министрі деп жазыпты. Себебі, бұлар да Мусиннің адамдары депті. Мусин бұл адамдарды басқа құрлықтан, басқа елден жетектеп әкелген жоқ қой. Кезінде осы елде туылып, оқып-тоқып, қызмет сатысында өсіп жетілген қазақ елінің таза қанды қазақ азаматтары емес пе?!
Бұлай Батыс өлкеден шыққан бірлі-екілі азаматтардың соңына шырақ алып түсуді трайбализм демей не дейміз?! Жоғары жақта болып жатқан қателіктер мен жөнсіздіктерді бір адамның басына таға салудың өзі жөнсіздік. Біздің елді бір ғана адам — президент басқарып отырғанын естен шығармауымыз керек емес пе? Барлық мемлекеттік маңызы бар мәселелер сол кісінің дегенімен жүзеге асырылмай ма?
Сіз болып, біз болып дегендей, А.Мусинді кетірдік. Қонжитып К.Мәсімовты отырғыздық. Не ұттық, болашақта ұтарымыз не?
Негізінде, А.Мусинді аса ұстамды да сабырлы, салқын қанды азамат екен деп қалдым. Баспасөзден талай мәрте оқыдық емес пе, аса ірі көлемде жер иеленуші депутат Ромин Мадинов деген «ар-ожданыма тіл тигізді, өтемақы талап етемін» деп, тілшісімен қоса бүкіл газет ұжымын сотқа сүйреген жоқ па еді?! Сондай-ақ, шеттегі байлығымды елге жариялап қойды деп, Қ.Қожамжаровтың әйелі де Г.Ерғалиеваны сотқа сүйрелеп, ақыры газетін, ғаламтордағы сайттарын жапқызып тастағанын көзі қарақты оқырманның бәрі біледі.
А.Мусин ондай сорақы істердің біріне бой алдырмай, өзін сабырға жеңдіріп отыр. Мемлекеттік ірі шенеуніктерге тән салқынқандылықты, ұстамдылықты осы кісіден ғана көріп отырғанымыз өтірік емес.
Сонау 60-шы жылдары КСРО-ны Н.С. Хрущев басқарып тұрғанда, терістегі астықты облыстарды Ресейдің қарамағына қоспақ болғанда, министрлер кеңесінің төрағасы ма, әлде Қазақ ССР-і Жоғары кеңесі президумының төрағасы ма (есімде жоқ) қазақ халқының келешегін қара басынан биік қоя білген асыл азамат Жұмабек Тәшенов қарсы тұрып, жолын кескен екен. Ол кезде бала болсақ та естігенбіз.
Н.С.Хрущев арам ойын іске асыру үшін сол кездегі Қазақ ССР-ін басқарған Д.А.Қонаев атамызды басшылықтан босатып, орнына Исмаил Юсупов деген ұйғыр біреуді қойыпты. Сол ұйғырдың қолымен астықты өлкелерді — Батыс Қазақстанды, Ақтөбенің біраз бөлігін Ресейге, мұнайлы түбекті Түрікменстанға, мақталы Оңтүстік облысты Өзбекстанға қосып беріп, бүкіл Шығыс пен Жетісуды «Ұйғыр автономиялық республика» етіп құрмақ болған деседі. Н.С.Хрущев арам пиғылының жүзеге аспауына, қазақ мемлекетінің бөлшектенбей қалуына Л.И. Брежнев бастаған саяси бюроның Кремльдегі жасаған төнкерісі басты себеп болған дегенді құлағымыз естіді.
Бірді айтып, бірге кетеміз-ау, билік мансабын ел мүддесі жолында мансұқ ете білген, астықты өлкелерді Ресейге беруге табандап қарсы тұрған сол асыл азамат — Жұмабек Ахметұлы Тәшенов еңбек жолын біздің облыстан бастап, 1952-1955 жылдар аралығында облыстың, қаланың өркендеуіне зор үлесін қосқан екен. Өкініштісі, сондай ірі тұлғаға қаламыздағы қаптаған Тургенев, Некрасов сияқты көшелердің біреуінің атауын қия алмай отырғанымызда.
Мәсімовке байланысты 1960 жылдарды еске алып отырғаным түсінікті болған шығар. Өткен тарихтың опық жегізе жаздаған жәйттерінен сабақ алғанымыз жөн-ау.
Қарап отырсақ кіші жүзден биліктің биік мансабына барып жатқан тұлғалар көп емес екен. Кезінде Ж.Досқалиевті қандай күйге түсіргенін көрдік. Енді А.Мусинді елбасының қасынан кетіргенін көрдік. Тағы бірде «Тасмағанбетов таққа отырса» деген мақала оқыдық. Бұл жайды Тасмағанбетовты Елбасыға бақталас, жеккөрінішті етіп көрсету үшін арандату мақсатында жасалған тірлік деп білемін. Демек, тағы бір батыстық азаматты аяқтан шалу үрдісі іске асты дей беріңіз.
Мақсатым А.Мусинге ара түсіп, сөзін сөйлеу емес. Менің ара-ағайындығымды қажет ете де қоймас. Тұрақты жаздырып алып, жастана жатып оқитын жаныма жақын екі газетім «ДАТ» пен «Жас Алашым» құйтұрқы саясат ұстанушы, ел тұтастығына зиянын тигізетін, ниеттері лас әлдебір топтардың қолшоқпарына айналып кетпесе екен деген жанашырлық пендеуи тілек қой.
Айтылған сөздерді өзімнің жеке пікірім деп қабылдағайсыздар.

P.S. Мақала бұрынырақ «Жас Алаш» газетіне берілген болатын. Газет ұжымының ықшамдап, бірқатар өзгерістермен баспаға бергендеріне түсіністікпен қараймын.

Мырзағали Қартеменұлы.
Зейнеткер.

Блок Құрылтайы 2013
Мен блогер емеспін, бірақ сонда да барып қатыстым. Қазақ сайттарының пайдаланушысы ретінде. Керемет емес, Тамаша өтті Блог Құрылтайы бірінші күні. Ұйымдастырған адамдарға көп көп алғысымды білдірем. Менің бірінші қатысуым еді. Шымда өтеді деген сөзді сайттан көріп өте қатты қуандым.
22 не жатар кезде не деген ойлар кірді қобалжығанымнан. Бармай ақ қоя салайыншы, кейінірек сайттан оқи салам, не болғаны туралы деген ойлар келді. Ойлана келе бір шешімге өттім. Себебі мынау еді: Керекинфо сайтына наурыздың 17 ші жұлдызында кіріп оқып қалсам, кілең Блоггерлер туралы жазылған тақырыптар көп екен. Түсіне алмаған соң барлығын ашып оқи бастадым. Алдынғы болған жерлерін жазыпты, онда қандай тақырптар қозғалған, не болғандығы туралы. Кейін бір сілтемеге қарасам Тіркелгендер тізімі тұр екен, оған жазылған пікірлерде: Наурыздың 16 да тіркеу бітіп қалыпты. Көңілім түсіп кетті. Іштей барып, көргім келеді. Қалай тіркеледі? деген сұраққа: arshato@mail.ru -ға тіркеуіңізді өтінем деп хат жазу арқылы! – деп Данияр жауап жазыпты. Сол сілтемені басқаным сол жаңадан хат жазу шыға келді. Ойланып отырып қалдым, жазсам маған кешігіп қалдың тіркелу бітіп қалды демей ма? деген ой келді. Шешінген судан тайынбас дегендей, хат жібердім. Хатта:
Мени тіркей аласыз ба? әлде кеш қалдым ба? Сейтова Марьяш (Шымкент)
Ертеңгі күнді асыға күттім, күнді емес Аршаттың жіберетін шешімін. Кешке қарай үйге асыға кіріп, blogcamp.kz сайтына ноуттан кіріп қарасам, тіркелгендер тізімінде аты – жөнім қалам тұр, 339 нөмер беріліпті. Қатты қуанғаным соншалықты «УАУ!!! Тіркепті» – деп айқайлап жібердім. Сонда қасымда ұялы телефонымды ойнап отырған 3 жасар інім сілк ете қалды. Маған біртүрлі қарады да тұрып, бұрылып кетіп қалды. Содан бастап, кімнің қаншалықты күткенін білмеймін мен сол күн жеткенше кун санадым. (Аршатқа улкен алғысымды білдіремін, тіркеп шанс бергені үшін) Баста қорқыныштар болды Барсам ешкімді танымаймын? Сонда не істеймін? Кіммен араласам, кіммен сөйлесем? Бөтен адам сияқты жүріп қалам ғой – деген ойлар маза бермеді. Бұл сұрақтардың бәрі Құрылтай өткен соң бос ой болып қала берді.
23-не азанда ерте тұрдым. Бармас алдын тағы сайтқа кіріп Берікболдын телефонына хабарластым. Саламатсыз ба? Бұл Берікбол ма екен? Ары қарай әр түрлі мені ойландырған сұрақтар кетті. Ол барлық сұрағыма нақты жауап берді.
-Университетке адамдар жиналды ма? Барсам кіргізе бере ма?
-Ия, бара беріңіз онда адам көп. 3 қабатында жиналып жатыр.
Сол қобалжумен 5 минутта Университетке жетіп, кірдім. Үшінші қабатына көтеріліп, қарасам екі блогерді таныдым: Гастербайтер мен Қалдықыз, басқа ешкімді тани алмадым. Алдымнан 3-4 қыз көк футболкка киген, бейджик таққан әдемі келген қыздар қарсы алды. (соның бірі -Мақпал) Амандасып, тіркеп, қолыма футболка, блакнот, бейджик, Блог Құрылтайы 2013 бағдарламасын берді. Ары қарай үлкен залға кіріп қарасам, недеген көп блогерлер бір – бірімен сөйлесіп, араласып, кейбірі амандасып, ду-ду болып жатқан халық. Кейбірінің қолында фотоапаратттар, планшеттер, сонғы модельдегі ұялы телефондар, ноутбук, нетбуктар. Бірін – бірін естелікке түсіріп жатыр. Шатасып басқа тойға кіріп кеткен адам сияқты сезім болды. Барып бір орынға отыра кеттім.
Көп ұзамай көптен күткен Құрылтай басталды. Жүргізушілер қаншама біліндірмейін десе де қобалжып сөйледі, не дегенмен қаншама халық жиналып соларды қарап, қадағалап отыр. Әр түрлі қаладан келген, жоооқ тек Қазақстаннан емес басқа шет елдерден келген қонақтар сөз сөйлеп жатыр, кейде сұрақ-жауап емес, Дебатқа ұқсап кетті. Ең активті жастар жиналғаны көрініп тұр. Сұрақ қойғысы келгендер көп болғанымен, уақыттың тапшылығына қарай сұрақтарын қоя да алмаған блогерлер болды. Өте тамаша тақырыптар қозғалды: Қазақ сайттарындағы веб-дизайн, Сайтпен ақша табу, Контент мәселесі, Блог жүргізудегі шет ел тәжірибесі. Керемет жауап беріп жатқан азаматтар болды. Жауапқа көңілі толған жастар да бар еді. Қай қайсы болса да, осы блог Құрылтайын көптен күткен жандар сияқты. Қымбат уақытын бөліп Облыс әкімі ортаға шығып сөз сөйледі. Күнделікті галстугін шешіпті, қарапайым тілде қазақ сайтын дамыту туралы тақырыптарды қозғады. Ол кісі да бос қол кеткен жоқ Блогкемп жазуымен қара футболка және арнайы блакнот сыйлыққа алды.
ОҚМУ асханасындағы түскі үзілістен кейін Стартаптар конкурсы басталды. Недеген керемет ойлар, тамша сайттарды ашу, жастарды қазақ сайтына қызықтырып, пайдаланушыларын арттыру. Қозғалған тақырыптар: мотиватор naqul.kz, tamble.kz, электронды күнделік, Қазақ контентінің мүмкіндігін арттыру, IT-саласына қатысты сұрақ-жауап, материалдар ресурстар, tuttey.com, Жас пресс. Ең көп дауыс жинаған«Дәстүрлі ән сайты», куйлерді, қазақ әндерін бір сайтқа жинау үшін әдемілеп, ән жазып келген Амангелді Сейілхан керемет ән айтып, домбырасының сыңғырлаған даусын айтсаңшы пах-пах. (жұп болсын дегім келді))).) бұндай дайындық үшін Билайн комапаниясының 100 мың теңгесі аз сияқты болып көрінді маган. Қатысушылардың көбісі ерлер еді, арасынан атылып шыққан екі қыздың болашақ сайттары Атырау қаласы туралы talgam.kz және Ақшолпан Жүсіпованың Қыран.кз Әскери сайты ұнады.
Марапаттап жабылу кеші өте керемет, Блог Құрылтайының бірінші күнгі университеттегі бағдарламасы мықты өтті. Соған қоса барлығы бір үйдің баласындай естелікке суретке тусті. Сол арада Университет алдына автобустар келіп тоқтап, халық ішіне лық толып лагерге қарай жол жүрді. Лагерге барар жолда Автобус ішінде адамдар у-шу болып, тур турлі тақырыптар қозғалып, керек десең блогерлер ән салды.
Кешкі тоғыздар шамасында кешкі асқа кіріп жиналып, тамақтандық біріншіге өте дәмді сорпа, ал екіншіге балдай тәтті палау берілді, көршіміз өзбек қой. Кешкі астан шығып Домбыра пати бағдарламасы басталды. Ортаға ұзын қылып (менің бойымнан биік)от жағылып, жан жағына жастар лық толды. Бір керемет ән кеші басталды. Оттың жалыны бет қаратуға шыдатпады. Қаншама өнерлі блогерлер ән айтып, куйлетіп, домбыраның сыңғыры үзілмеді. Екі жаққа бөлініп жарысулар да болды. Дауыстар: пах-пах, шап, бас, жұп қыл – деп шығып жатты. Осылай қазақ жастары өздерінің таланттарын көрсетті. Сағат түнгі 2-лерге қарай жастар бір-бірлерін қимай жататын орындарына қарай тарқасты.
Ары-қарай мен болмаған себепті (қайтып кетіп едім)жалғастыра алмаймын. Мен журналист емеспін, сондықтан бұрыс жерлері болса сөге көрмеңіздер. Бұндай Құрылтайдың 6 айда бір рет болса да артықшылығы жоқ екен…

футбол ойнау керек…

Ескерту: Аяғы ауыр әйелдерге, ми-жүйке ауруына шалдыққандарға, жүрегіне жақын қабылдағыш адамдарға және aza мен оның байқауына төрелік ететін қазылар алқасына бұл жазба оқуға ұсынылмайды.

Барлық оқиғалар өмірден алынған, қандай да бір фантазиямен бірдей болуы сәйкестік деп бағаланады.

Жазба жеке адамның субъективті көзқарасы мен ұсыныстарын білдіреді және ақиқаттың анасы, шындықтың шешесі болуды көздемейді.

Тұғырнама атаулыны зорлап жатқан Blogcamp туралы жазбалардың қатарында жылт етіп көрініп қалу үшін кәлләмізді кернеп, жадымыздың гигабайттарын алып жатқан жағдайлар туралы жазуға бел шештік.

ЖОЛ
Өткенде Блог Құрылтайға баруға міндеттейтін себептердің алғашқысы ретінде достармен жолға шығуды көрсеткен едім. Бұл жолы да достармен бір пойызда болу бақытына ие адамдардың бірі едім. 23 сағаттық жолымыз тез өте шықты. Аз ұйқы, көп әңгімемен өтті де кетті.

ДОСТАР
Шымкентте түскен бойда бізден бір күн бұрын келген алматылық алконавттарға жалданған пәтерге жетіп келдік. Түнде футбол қарап және пәтерде думандатқан топ 1-2 сағаттай болған екен ұйықтағандарына, ояттық ептілерді. Жуындық, шайындық, құрылтайға бірге аттандық.

ҚҰРЫЛТАЙДЫҢ БІРІНШІ КҮНІ
Құрылтайдың алғашқы сағаттары әрине бұрыннан таныс, түкпір-түкпірден келген достармен құшақтасумен өтті. Кейін классикалық кіріспесөз, мастер-класс, сессиялар, сұрақ-жауаптар, кофе-брейк, стартаптар, қорытындылар, марапаттаулар. Бірінші рет планшетті болдым. Демеуші болған Талғатқа үлкен рахмет!

Біз бір-бір бірлестік құрайық)
Шымкентте өткен 3-ші құрылтайдың қатысушысы болдым. Көзбен көргенімді, ойға түйгенімді айтайын. Екі мәселеге назарларыңызды аударғым келеді.

Біріншісі Қазақ блогерлері шын мәнінде қоғамдық пікір қалыптастыратындай үлкен күшке айналғанына анық көзім жетті. Саяси күшке. Қоғамдық-саяси процестерге араласатын болса, кез-келген саяси науқанның парша-паршасын шығарады бұлар. Саналы түрде, бас тартып отыр саясаттан. Әзірше. Алған бағыттарынан ауытқып кетулері, әбден мүмкін. Саясиланып. Онда ешкімге оңай соқпайды. Әсіресе билікке. Ресейдегі жағдайды көріп отырмыз. Орыс блогерлері, екі күннің бірінде Дума депутаттарын мандаттарынан «айырып» жатыр. Екі мағынасында да. Қалай түсінсеңіз, солай қабылдаңыз. Владимир Пехтин ұшты думадан. Майамиде вилласы бар екен бұл пақырдың. Блогерлер біліп қойып, быт-шытын шығарды сабаздың. Алексей Кнышовты да депутаттық мандаттан бас тартуға мәжбүрлеген блогшылар. Кезекте Руслан Гаттаров, Владимир Бурматов, Ришат Абубакиров, Владислав Третьяк тұр. Орыс блогерлері бұл депутаттар дессертацияларын көшіріп алған деп айыптап отыр. Плагиат. Қоғамдық пікір арқылы, думадан қумақ. Біздің мәжілісте де қателеспесем ғылым докторлары да баршылық. Шет елдерде жылжымайтын мүліктері барларын айтпағанда. Енді ойланып көріңіз. Қазақ депутаттарын мәжілістен кетіруге мәжбірлемесе де, халық алдында қара бет қылуға қауқарлы қазақ блогерлері.
Екіншісі. Мем хатшы Марат Тажин айтқан тезистерге қатысты. Билік, блогерлермен тығыз жұмыс істеу керек деген болатын. Алғашқы қадам жасалды. Шымкентте. Блогқұрылтайға Оңтүстік Қазақстан облысының әкімі Асқар Мырзахметов қолдау көрсетті. Қолдау көрсетіп ғана қоймай, өзі келіп қатысты. Формат. Галстуксыз. Бейресми. Жас блогерлердің еркін сұрақтарына жауап берді. Алдарыңызға, топтың ортасынан төбе көрсетіп, көптің ортасынан көзге түсу үшін келгенім жоқ деді әкім. Диалог қалыптасты. Атқарушы билік өкілі мен блогшылар арасында. Әдемі әңгіме болды. Шынайы. Блогерлер бұқпантайламады. Мырзахметов мысымен баспады. Асқар Исабекұлы атқарып жатқан, игі істерімен мақтанбады. Әкімге шапан жабылмады. Естелікке блогерлер футболка сыйлады. Демократия. Ашық айтылды. Пікірлер. Ойлар. Позициялар. Қысқасы, екі тарап та кездесуден қанағаттанды. Болады екен. Бірге жұмыс жасауға. Стратег, Марат Тажин айтқандай. Меніңше, билік те, блогерлер қауымы да әріптестік қарым-қатынасқа мүдделі болулары керек. Әйтпесе, жоғарыда айттым ойымды. Билік түсінуі керек. ОСДП сияқты саяси партиялардан, қазақ блогерлері ықпалды, қуатты саяси күш екенін…
P.S. Айтпақшы, Блогқұрылтайдың ашылуына Облыс әкімі Асқар Мырзахметовты, қортындысына білім және ғлым вице министрі Мұрат Әбеновты алып келген Берік Уалидің азаматтығын айтпасақ әділетсіз болар! Блогқұрылтайдың бас қасында болып, жан-жақты қолдау көрсеткен. Билікпен блогерлерді байланыстырған. Бар болыңыз аға! Мемлекетшіл жұмыстарыңыз нәтижелі бола берсін...
Еркебұлан Алдабергенов