Ағымдағы жылдың 19-қазанынан бастап, Ш. Айтматов пен Сарайшық көшелерінің қиылысына бағдаршам орнатылатындықтан № 17, 44, 61, 101 қоғамдық көліктерінің бағыты өзгертіледі.

Осылайша, № 17, 44 бағдарлар «Қазақ технология және бизнес университеті» аялдамасына дейін өзгеріссіз, одан әрі келесі сызба бойынша жүреді: Сарайшық көшесі – І. Омаров көшесі, Сығанақ көшесі — Ш. Айтматов.

№ 61, 101 бағдарлар «№ 81 мектеп-лицейі» соңғы аялдамасына дейін өзгеріссіз, ал одан әрі І. Омаров көшесі – Сарайшық көшесі – Ш. Айтматов көшесі – Сығанақ көшесі сызбасымен жүреді.

Қосымша ақпаратты 574 – 777 телефоны арқылы байланыс орталығынан алуға болады.

Қазанның 13-і мен 15-і аралығында елордада «Автобус» жедел-алдын алу шарасы өткізілді. Шараның мақсаты — елорда автожолдарындағы апаттылық деңгейін төмендету, жолаушылар және жүк тасымалын жүзеге асыратын жүргізушілер арасында көлік жүргізу тәртібін жақсарту, жол қозғалысына қадағалау мен бақылауды күшейту.

«Автобус» жедел-алдын алу шарасы барысында полиция қызметкерлері мерзімді жолаушы тасымалын іске асыратын, рейс алдындағы техникалық бақылаудан өткен жүргізушілердің Жол жүру ережелерін бұзуының және рейс алдындағы медициналық тексеруден өтпей қалған жүргізушіні рейске жіберудің 720-ға жуық дерегін тіркеген.

Атап өтерлігі, қалада автобус парктерінің 8 лауазымды тұлғасы жауапқа тартылып, 10 автобусты пайдалануға тыйым салынды. 134 жүргізушіге ұялы телефонмен әңгімелескені үшін айыппұл салынса, 87 жүргізуші маневрлеу ережелерін бұзған, және жаяу жүргіншілерге жол бермеудің 13 дерегі тіркелген. Бұған қоса, жедел-алдын алу шарасын өткізу кезінлде тексерістен өтпеген автобустарды пайдалануға берудің 23 фактісі анықталған.

Елорда аумағында қоғамдық көлікпен жолаушылар тасымалы саласында 9 кәсіпорын жұмыс істейді, олардың күнделікті қолданысында 750-ден аса қалалық автобус бар.

Қазақстан Республикасы Тәуелсіздігінің 25 жылдығын мерекелеу аясында елордадағы көлік және коммуникациялар колледжінде Астана қ. Қазақстан халқы Ассамблеясының этномәдени бірлестіктерінің күндері ашылды.

Шараның мақсаты Астана қ. ҚХА қызметін насихаттау, жастарды этномәдени бірлестіктердің қызметіне тарту, Қазақстанда тұратын этностардың әлеуметтік-мәдени мұрасын қайта жандандырып, сақтау. Концерттік бағдарламада немістердің «Возрождение» қоғамының тәрбиеленушілері, «Қырғызстан-Астана» қоғамдық бірлестігінің өкілдері, және «Таң» татар-башқұрт мәдени орталығының мүшелері өнер көрсетті. 2016 жылғы қарашаның соңына дейін ауқымды шаралар елордадағы алты жоғары оқу орнында өткізіледі.

«Біз бастап отырған шаралар кезегі студенттерді, мектеп оқушыларын толеранттылық пен отансүйгіштікке тәрбиелеуге бағытталған этномәдени бірлестіктердің қызметімен таныстыруды көздейді. Тәуелсіздік алғалы бері бауырлас халықтар достық пен келісім жағдайында өмір сүріп келеді. Бізде жексенбілік мектептер қызметі дамуда, ол біздің этносқа өз мәдениетімізді, салт-дәстүрлерімізді сақтауға мүмкіндік береді. Меніңше, мемлекеттің қамқорлығы деген осы», — деп атап көрсетті қырғыз этномәдени бірлестігінің төрағасы, ҚХА мүшесі Шавкат Исмаилов.

Дүйсенбі, 2016 жылдың 17-қазаны елорда мектептерінің мыңдаған оқушылары үшін әдеттегі және үйреншікті түрде өтсе, № 54 мектеп-лицейдің бесінші сынып оқушылары үшін бүгінгі күн ерекше күн болды. Олар үшін дене шынықтыру сабағын Данияр Елеусінов пен Юрий Мельниченко өткізді. Оқушылардың айтуынша, 45 минут уақыт байқалмай өтіп кеткен, ал ең бастысы, бұл дәріс олардың жандары мен тәндері үшін пайдалы өтті.

«Бұл мектепке қайта келгеніме қуаныштымын, мен мұнда биыл бірінші қырқүйек күні келгенмін», — деді чемпион журналистерге сұхбат беру барысында. Ол туған білім ордасына қуана келетінін атап көрсетті. Данияр осы мектептің түлегі. Және бүгін ол қонақ емес, дене шынықтыру пәнінің мұғалімі ретінде келіп отыр. Данияр 1996 жылғы Олимпиаданың алтын жүлдегері Юрий Мельниченкомен бірге балалармен алдымен денені ширату жаттығуларын, содан кейін бұлшық еттерді мығым етіп, қозғалыс үйлесімділігін дамытатын жаттығуларды жасады.

«Егер балалар осы жастарында дене шынықтырудың маңызы мен мәнін түсініп, әуестене шұғылданатын болса, денсаулықтары мықты болады. Біз үшін олардың спортшы немесе басқа салада жетістіктерге жететін қарапайым азаматтар болатыны маңызды емес, ең бастысы, табысты адам болғаны. Ал бұл үшін мықты денсаулық қажет», — деді Юрий Мельниченко.

Оқушылар отырып, секіріп жатқанда жоғарғы сынып оқушылары атақты спортшының автографын алып, онымен селфиге түсу үшін сабақтың аяқталғанын тағатсыздана күтті. Астана әкімдігінің және «Samruk-Kazyna Trust» әлеуметтік жобаларды дамыту Қорының қолдауымен ұйымдастырылған «Физкульт-Ура» жобасының арқасында үстіміздегі жылдың сәуірінен бері ондаған мың елордалық мектеп оқушылары Дмитрий Баландин, Гюзель Манюрова, Серік Сәпиев, Ольга Шишигина, Валерий Тихоненко, Ермахан Ыбрайымов және Жақсылық Үшкемпіров сияқты үлкен спорттың жұлдыздарымен кездесуге мүмкіндік алды. Болашақта ұйымдастырушылар жобаны өзге аймақтарда да өткізіп, Ақтөбе және Қарағанды қалаларының мектеп оқушыларын да қуантуды жоспарлап отыр.

Ертең, қазанның 17-і — Бүкіләлемдік сүт безінің қатерлі ісігі жөнінде ақпараттандыру күні елорданың Онкологиялық орталығында (Манас к-сі, 17) сағат 11.00-де онколог, маммолог мамандардың қатысуымен әйелдердің денсаулығын қорғау бойынша ашық есік күні өтеді.

Сондай-ақ, алдын алу бөлімінің және салауатты өмір салтын ұйымдастырушы дәрігерлер үшін: «Сүт безінің қатерлі ісігі. Ерте анықтау» тақырыбында қалалық семинар өткізіледі.

Астана қ. Салауатты өмір салтын қалыптастыру орталығының хабарлауынша, Астана қаласында аталған індетпен ауыру көрсеткішінің 165,8-ден (2014ж) 198,4-ге дейін (2015ж) өсу үрдісі, және өлім-жітім көрсеткішінің 100 мың халыққа шаққанда 82,8-ден 86,6-ға дейін өскені байқалып отыр.

Атап өтерлігі, 2016-2019 жылдарға арналған «Денсаулық» ҚР денсаулық сақтау мемлекеттік бағдарламасын іске асыру шеңберінде онкологиялық ауруларды басқарудың интеграцияланған моделін енгізу бағытында белсенді негізде жұмыс жүргізілуде.

Астанада «Сиқырлы әуен» I Республикалық инструменталды байқауы өтті, шара Астана, Алматы, Көкшетау және Қостанай қалаларынан дарынды балалардың басын қосты.

Ұйымдастырушылардың айтуынша, шығармашылық байқау жас орындаушыларды музыка мәдениеті мен өнеріне баулуға, орындаушылық шеберліктерін шыңдауға, және шығармашылық қарым-қатынас ортасын құруға және рухани мұраны насихаттауға бағытталған.

Байқау екі номинация бойынша өтті: ұжымдар (оркестрлер, ансамбльдер), оған жеке орындаушылар да қатысты (домбыра, қобыз, фортепиано, скрипка, флейта, жетіген, прима-шертер және т.б.).

Байқау қатысушыларын бағалауға Қазақстан Республикасының белгілі өнер қайраткерлері шақырылды.

Байқау жеңімпаздары мен қатысушылары дипломдармен және естелік сыйлықтармен марапатталды.

Елордада «Астана Эко Стандарт» жылыжай кешенінің базасында «жасыл» технологиялар оқыту орталығы ашылды, онда С. Сейфуллин атындағы Қазақ агротехникалық университетінің студенттерімен бірге фермерлер мен кәсіпкерлер де көкөніс өсіру бойынша озық білім алатын болады. Ал келесі жылдың қыркүйегінде бұл жерге ең озық еуропалық жабдықтармен жабдықталған жылыжай кешені орнатылады.

«Астана әкімдігі оның құрылысына арнап жер телімін бөлді. Оның жалпы ауданы 8 200 ш.м. Біз салат пен қиярдың ең жақсы және сұранысқа ие сұрыптарын өсіруді жоспарлап отырмыз»,- деп мәлім етті «Астана Эко Стандарт» ЖШС директоры Жеңіс Досмағанбетов таныстырылым барысында.

Құны 7,1 млн евроны құрайтын жобаға оқыту орталығы мен жаңа жылыжай кіреді, ол Еуропа Одағының қаржылық қолдауымен іске асырылуда және азық-түлік қауіпсіздігін, соның ішінде су қауіпсіздігін күшейтуге бағытталған. Жобаның атқарушы әріптестері БҰҰДБ және БҰҰ ЕЭК.

БҰҰДБ Тұрақты өкілінің орынбасары Мунхтуя Алтангерел ханым бұл жоба бизнес секторда «жасыл» экономиканың қағидаттарын енгізудің көрнекі мысалы болатынына үміт білдірді. С. Сейфуллин атындағы ҚазАТУ проректорының м.а. Нұрлан Серікпаев еліміздің солтүстік және орталық аймақтарында жылыжай шаруашылықтарын дамыту бойынша бірлескен оқу орталығын құру алдағы уақытта жылыжай шаруашылығының дамуына ықпал етіп, республиканың азық-түлік тәуелсіздігін қамтамасыз ететін болады.

«Бүгінгі күні біз жан басына шаққандағы ұн өндірісі бойынша әлемде бірінші орын аламыз. Егер көкөніс өнімдері туралы айтатын болсақ, өкінішке орай, солтүстік және орталық облыстар және жалпы Қазақстан көкөністің 80 % сырттан әкеледі, сол себепті қорғалған топырақтағы көкөніс шаруашылығын дамытудың маңызы зор, — деп атап көрсетті ол.

1. «Асар» РҚБ Көктал т.а. көп пәтерлі тұрғын үй кешені нысаны бойынша ТҚК төрағасы К. Бодауханның инженерлік желілер бойынша жобалық құжаттар «Мемсараптама» РМК-нің қарауында жатқаны туралы; коммуналдық шаруашылық басқармасы басшысының 2017 жылдың бюджетінде магистральдік инженерлік желілердің құрылысына қаржының бар екендігі туралы мәлімдемелері назарға алынды.

ВАК ТҚК мүшелеріне төрағамен бірге әрбір пайшы және шығындар бойынша салынған қаржыға ревизия жүргізуге кеңес берді.

2. Интернациональный кентіндегі «Есіл» тұрғын үй кешеніне су құбырларын және кәріз жүйесін тарту мәселесін қараған комиссия мүшелері «Астана Су арнасы» МКК-сіне елорданың экологиялық департаментімен және табиғат пайдалану басқармасымен бірлесіп тұрғын үй кешенін сумен жабдықтау үшін ұңғыманы бұрғылау үшін белгіленген тәртіп бойынша рұқсат беру құжаттарын рәсімдеуді ұсынды.

3. «Айсанам» ТК құрылыс жүргізушілеріне нысанды мерзімінде пайдалануға тапсыру бойынша процедураларды жеделдету ұсынылды.

4. «Азбука жилья Құрылыс» ЖШС өкілдерінің комиссия мүшелеріне сарапшы ұйымның қарауына тапсыру үшін «Тұмар» ТК бірінші және жоғарғы қабаты бойынша жобалық құжаттар дайын екендігі туралы өтініші назарға алынды.

5. «Жастар-4» ТК құрылысын аяқтауға қатысты «Бақыт-11» ЖШС директоры Д.Т. Кәрімбекованың нысанда 48 адам жұмыс істеп жатқаны туралы; ү.ж. 8 қарашасында екінші транш түсетіні туралы; ү.ж. қараша айының соңына дейін мұрагер жылжымайтын мүлікке меншік құқығын рәсімдеген соң 7 кіреберістің астындағы жер мәселесі шешілетіні туралы мәлімдемесі назарға алынды;

ВАК Сәулет және қала құрылысы басқармасына кезең-кезеңмен пайдалануға тапсыру үшін нысанды кезектерге бөлу мүмкіндігін қарастыруды және Астана қ. ВАК-ты ақпараттандыруды ұсынды.

6. «Оберег» ЖШС директоры А.К.Мақажановтың «Оберег» ТК құрылысын аяқтауды қаржыландыру бойынша әлеуетті инвестормен келіссөз жүргізу туралы мәлімдемесі назарға алынды.

ВАК А.К. Мақажановқа ВАК-тың келесі отырысына «Оберег» ЖШС құрылтайшыларын шақыруды ұсынды.

7. Ал «Тамыз Инвест Групп» АҚ өкілдері құрылысты аяқтау және нысанды пайдалануға тапсыру үшін ТҚК құрылғаны туралы хабарлады.

8. «Номад Строй ЭК» ЖШС директоры А.С. Логвиновтың №188 көшедегі тұрғын үй кешенінің меншік иелеріне пәтерлерді рәсімдеу бойынша жұмыстың басталғаны туралы; «Есіл-1» ТК кәріз желілеріндегі апаттар жойылды, үстіміздегі жылдың 11 қарашасына дейін «Есіл-1» ТК пайдалануға тапсыру туралы; «Есіл-2» ТК құрылысынбастауға 30 адамның кіріскені туралы; «Есіл-1» ТК кәріз желілеріндегі аварияларды жою жұмыстарын аяқтау туралы; «Есіл-2» және «Фьючи Хом» тұрғын үй кешендерін техникалық тексеру бойынша «Стройпрокат» ЖШС-мен келісім жасалғаны туралы өтінішіназарға алынды. А.С. Логвинова ВАК-тың «Есіл-2» ТК жер учаскелерін ТҚК атына қайта рәсімдеу бойынша кеңестері орындалмағаны атап өтілді.

Ағымдағы мәселелерді қарау барысында комиссия Мемлекеттік сәулет-құрылыс бақылау басқармасына «Фьючи Хом» және «Есіл-2» тұрғын үй кешендерінің құрылысы үшін жобалық құжаттарды ұсыну бойынша мәселені шешу үшін жобалаушы ұйымның өкілін және А.С.Логвиновты шақыруды ұсынды.

9. «Үміт-Береке» ТҚК құрылысына қатысты ВАК Сәулет және қала құрылысы басқармасына алдағы 2 жылда инженерлік желілерді жобалау және салудың перспективалары туралы мәселені қарауды ұсынды.

10. «ҚазГазАстана» ЖШС (Ахмедияров Д.К.) нысандары бойынша « ҚазГазАстана» ЖШС-інің коммерциялық директоры Б. Исажанованың «Марсель» ТК-сінің 24 инвесторының 2 инвесторы «Зере-1» ТК-іне, 18 инвестор «Зере-2» ТК-іне ауыстырылғаны және 4 инвестор «Марсель» ТК-інде қалғаны туралы; «Зере-2» ТК-інде сатылмай қалған 102 пәтер; «Зере-1» ТҚК-мен нысанды бірлесіп күзету туралы келісімге қол қою дайындығы туралы мәлімдемесі назарға алынды.

ВАК Б. Исажановаға ВАК-тың келесі отырысына салынған қаржы және қалдық ақшаны, сондай-ақ, сатылмаған пәтерлердің ауданын көрсете отырып сатылған пәтерлер туралы ақпарат беру ұсынылды;

11. «Төленді» ТҚК нысандарының құрылысына қатысты «Столичный-2» ТК құрылысы баяу қарқынмен жүріп жатқаны айтылды; «Көктал» ТК бойынша нобай жобасы келісіліп, жобалауға қаулы берілді. ВАК құрылыс жүргізушіге рұқсат беру құжаттарының жоқтығына байланысты нысандардың құрылысын уақытша тоқтатуды және тапсырылмаған нысандарға қоныстануға жол бермеуді ұсынды.

12. Тұрғын үйді сату фактілері бойынша ВАК «Азия контракт Групп» ЖШС директоры М.М. Сәрсеноваға Е542 және Е567 көшелерінің ауданында орналасқан көп пәтерлі тұрғын үй кешенінің инвесторларына қаражаттарын қайтаруды ұсынды.

Мектепті «3»-ке оқыған бала мұғалім бола алады ма?
Мектеп-кеме, білім-теңіз. Тарыдай болып мектептің табалдырығын аттап, талай қызықты бастан кешіріп, балалық пен шалалықтың тәтті дәмін сезініп, таудай болып ұядан ұшасың. Мектепте әр оқушының сыры бөлек, әр мұғалімнің жыры бөлек. Бірі «5»-ке оқыса, бірі «3»-ке оқып, бірі солардың ортасында жүреді. Бірінің ұстазы қатал болса, бірінің ұстазы жұмсақ болады. Мектептегі ұстаз бен оқушының қарым-қатынасынан, сабақ үлгеріміне қара отырып: «Мектепті «3» деген бағаға оқыған адам болашақта мұғалім бола алады ма?»- деген сұрақ туындайды.
Сұрақтың қысқаша жауабы — «ия». Бірақ бұл дұрыс па? Алдымен, дұрыс жағына көңіл бөлейік. Мектепте түрлі жағдаяттар мен түсініспеушіліктер орын алып тұрады. Сыныпта 20 оқушы болса, әр қайсысының сыры бөлек, мінездері де өзгеше болып келеді. Ғылыми-техникалық революция шарықтау шегіне жеткен заманда оқушының барлық сабақтан нашар оқуы мүмкін емес десек те болады.
Сөздің шыны керек, ұстаз сыныптағы шәкірттерінің бәріне бірдей қарамайды. Бірінің бағасын асырып қойса, бірінің бағасын жасырып қояды. Осындай қылықты көріп өскен оқушыда: «болашақта мен де ұстаз боламын, бірақ мен оқушыларды бөліп қарамаймын»- деген ұстаным пайда болады. Жоғарыдағай жағдайлар көп орын алып жатады. Осындай нәрселерді көре отырып, мұғалімнің оқушы үлгерімін төмен бағалағанына күмән тудырамыз.
Жаратылыстану бағытын жақсы қабылдайтын оқушылар болады немесе гуманитарлық бағытты сүйіп оқитын оқушылар да аз емес. Бір жандар әдебиет, тарих сынды сабақтарды өте жақсы оқып, физика математика тәрізді сабақтарды нашар оқыса, ол оқушыға ауызша сабақтарды өте жақсы оқиды екен деп «үздік оқушы» емес, есеп сабақтарынан төмен баға көрсеткені үшін «үлгерімі төмен» оқуышылар қатарына жатқызады. Келешекте дәл осы оқушы тарих пәнінен мұғалім болып, талай шәкіртті түрлі олимпиадаларға қатыстырып, диссертациялар қорғап, мықты ұстаз саналуы ғажап емес.
Ал, енді, сабағы төмен болған оқушылардың ұстаз болудағы керағар жақтарын зерделесек. Мектепті ілініп-салынып оқып, әрең бітірген оқушы тағдырдың тәлкегімен өзі ұнатпайтын, дұрыс қабылдай алмайтын мұғалім мамандығына түсіп кететін оқиғалар кездесіп жатады. Университеттегі оқуына еркіндікте жүріп, бірде барып, бірде бармай әйтеуір диплом алып шығады. Дәл сол мамандығы бойынша ауылдағы бір мектепте жұмысқа орналасады.
Мектепті кезінде төмен бағаға оқыған адам, шәкіртіне озат оқы деп шарт қоя ала ма? Мұғалімнің статусы оқушыларға кері әсер етіп, ел болашағына кесірін тигізе ме? Адам бір нәрсені талап ету үшін, өзі сол жағынан мінсіз болуы керек. Білімнің нәрін сезінбеген, іргетасын қалай алмаған ұстаз шәкірттеріне қандай білім бере алады? Еңбексіз келген білім өз жемісін бере алмайтынын оқушыларға жеткізе алады ма?
Қазіргі таңда орта біліммен мұғалімдік қызметте жүргендер де бар. Өзі мектепте оқып жүрген кезінде көштің соңы болған мұғалім көшбасшыларды дайындауға қауқары жете ме? Әрине тәрбие болмаған жерде, білімнің орны ойсырайды. Ата-анасының қанымен берілген тәрбие мен жігерлілік, көшбасшылық қасиеті тасып тұрған оқуышыны осындай ұстаздар әрі қарай дамыта алады ма, әлде жолынан адастырады ма?
Ел болашағы- білімді ұрпақтың қолында. Елбасы барлық мектептерге оқушыларды өмір бойы білім алуға шабыттандыру мақсатында түрлі жобалар ұсынуда. Ұстаз- оқушының ең алғашқы кумиры. Ұстаз мінсіз болса, шәкірт сөзсіз мықты болады.
Мектепте өте жақсы оқыған оқушылардың мұғалімдік жолды таңдамауы неде? Осындай ұстаздардың қаптап жатқанына байланысты, сыныбының алды болып үйренген оқушы көптің бірі болмаймын деген ниетте басқа жолды таңдайды. Елдегі ұстаздар — элита емес. Талай мықтыны тәрбиелеп, таңнан кешке дейін шәкірт тәрбиелеген ұстаздың еңбегі бағаланып жатқаны онша байқала қоймады. Осындай олқылықтарды көріп өскен озат оқушының талғамы да, талабы да биік болып, жоғарыны көздейді. Мұғалімдік жол тағы да сапасыз ұстазға бұйырады. Елдегі оқушыларға мүмкіндік жасалғанымен, оларды дайындайтын мұғалімдерге айтарлықтай жағдай жасалмаған. Бұрынғы заманда «қамшымен» тәрбиелеген ұстаздардан шыққан шәкірттер — ел билігінде, қазірге таңда оқушыға қамшы көрсету түгілі, ұрысудың өзі мүмкін емес. Елдегі білімді жастарды көбейтеміз десек, ұстаздарға да қатар жағдай жасалынуы керек. Мұғалімдік жұмыстың төмен емес, элита екенін де оқушыларға көрсетіп, насихаттау керек. Сапасыз ұстаз — санасыз ұрпақ тәрбиелейді, санасы мен сапасы болмағанда, елдегі білім де төмен болады, елдегі білімнің төмендегі — ел болашағына күман тудырады. Жеңілдін үстімен жүріп алынған білім- елді ойлайтын азаматттарды емес, өзін ойлайтын «эгоисттерді» жасап шығарады.
Мектеп- білімнің ошағы, болашақтың кепілі. Мемлекет тарапынан ұстаздарға берілген сыйластықты көріп өскен оқушы, өзінен-өзі өмір бойы білім алуға шабыттанады. Кезекті бір мәселе — мектептегі мұғалімдердің жалақысының аздығы. Білімді ұрпақ тәрбиелегің келсе, ұрпаққа білім берер ұстаздардың жағдайын жасау керек алдымен. Сонда ғана еліміз Жапония сынды алдыңғы қатарлы елдердің тізімінен көрінеді.

М. Горький атындағы мемлекеттік академиялық орыс драма театрының сахнасында «Алпамыс» қазақ жауынгерлік эпосының желісі бойынша қойылған «Аманат» спектаклінің премьерасы өтті. Аталған қойылым Қазақстан Тәуелсіздігінің 25 жылдығына арналып отыр.

Қоюшы режиссері — Қазақстанның еңбек сіңірген әртісі Бекпулат Саттарович Парманов, Алпамыс рөлін сомдаған – астаналық орыс драма театрының актері Максим Ященко, Гүлбаршын рөлін жас актриса Наталья Маштакова орындады. Шығармашылық ұжым репертуарын толықтырған бұл спектакльге театрдың барлық дерлік әртісі жұмылдырылды. Тағы бір ерекшелік – орыс драма театрының актерлері қазақ әндерін орындады. Мысалы: «жоқтау», «Туған жер» және т.б., сондай-ақ, музыкалық әрлеуді жасау барысында қазақ этникалық аспаптар қолданылды: домбыра, қылқобыз, жетіген, шаңқобыз, сыбызғы.

«Биылғы жыл – Қазақстан үшін ерекше. Біз Тәуелсіздігіміздің 25 жылдығын атап өткелі жатырмыз. Осыны ескере отырып, біз үшін мазмұны мен көрінісі жағынан мерейтойлық датаға сай болатын материалды ұзақ уақыт іздедік. Кейін, қазақтың «Алпамыс» атты жауынгерлік эпосын таптық. Ол барлық түркі тілдес халықтары үшін ортақ маңызды әдеби мұра болып табылады. Спектакль атын «Аманат» деп қойдық. Себебі, ғасырдан ғасырға, ұрпақтан ұрпаққа аманат болып жеткен бұл эпосты кейін жастар буынына жеткізу – біздің басты міндетіміз, Премьерадан кейін ұмытылатын спектакльдер аз емес. Өз кезегімізде, біз өз алдымызға ұмтылмас, көркемдік жағынан ерекше, сахнада ұзақ жылдар бойы көрсетілетін спектакльді жасауды мақсат етіп қойдық және де сол мақсатқа жеткен сияқтымыз», — деп атап өтті режиссер Бекпулат Парманов.