Елордада алдағы қысқы маусымға дайындық жұмыстары қарқынды жүргізіліп жатыр. «Астана-Тазалық» ЖШС хабарлауынша, қазіргі кезде қар тазалауға арналған 292 техника дайын.

Астана қаласының коммуналдық қызметі 18 қыркүйектен 10 қазанға дейінгі аралықта техникаларды тексеруден өткізуде. Өзінің мамандандырылған техникасынан бөлек компания қар тазалау жұмыстарына өзге мекемелердің қосымша самосвалдарын тартады. Бір ауысымда қосымша 150-200 жуық КамАЗ жалданады. Бұдан бөлек, коммуналдық қызметкерлер көктайғақты алдын алу мақсатында 33 мың текше метр тұзды-құм қоспасын дайындады. Сонымен қатар, қосымша 7 мың текше метр құм әкелу жоспарланған.

Айта кетейік, қыс кезінде елордалықтардың қауіпсіз қозғалысын қамтамасыз ету үшін жұмыскерлер жолдарды және олардың жиектерін қардан тазалайды. Күн сайын тиісті жұмыстарға 750 арнайы техника мен 450 жұмысшы тартылады.

astana.gov.kz/kk/modules/material/9213

Елордада жыл сайын 1 тамыздан 30 қыркүйекке дейін «Мектепке жол» республикалық акциясы өткізіледі. Астана қаласының Білім басқармасының хабарлауынша, биылғы акция аясында №13, 45, 55 мектептерде халыққа консультативтік көмек көрсететін қоғамдық қабылдаулар жұмыс істеді. Шара барысында 82-ге жуық елорда тұрғыны көмекке жүгінген.

Астана қаласының Кәсіпкерлік және өнеркәсіп басқармасының ұйымдастыруымен тамыз айында оқу жылы қарсаңында орталық алаңда мектеп жәрмеңкесі өтті. Жәрмеңкеде Астана, Алматы және Қарағанды өңірлерінің 30 шақты кәсіпкерлері мен тауар өндірушілерінің қатысуымен мектеп формасы, оқуға қажетті құрал-жабдықтар, оқулықтар нарықтағы бағадан арзандатылып сатылды.

Шара барысында аз қамтылған және көп балалы отбасылардан шыққан 8 727 балаға жалпы сома 92 миллион 156 мың теңгеге көмек көрсетілді.

Айта кетейік, былтырғы жылы «Мектепке жол» акция барысында 68506,2 мың теңге көлемінде 7 667 балаға көмек көрсетілді. Жыл сайынғы шараның мақсаты – жетім, ата-анасының қамқорлығынсыз қалған балаларға, тұрмысы төмен және көп балалы отбасылардан шыққан балаларға қолдау көрсету, оларға қоғамның қамқорлығын сезінуге мүмкіндік беру болып табылады.

astana.gov.kz/kk/modules/material/9138

2015 жылдың 1 қазанынан бастап Астана қаласының Жолаушылар көлігі және автомобиль жолдары басқармасынының «Astana LRT» компаниясымен бірлесіп, қоғамдық көліктерде тегін жүру құқығына ие тұрғындар санаты үшін төлем карталарына бұрын фотосуреттерге түспегендер үшін қайта тіркеу басталды.

Айта кетейік, фотосуретке түсу тегін жүргізіледі және қоғамдық көліктерде электрондық жүйе енгізу аясындағы жоба болып табылады. Бүгінгі күнде Астана қаласында екі фототіркеу пункті жұмыс істеуде:

— Астана қаласы Жұмыспен қамту және әлеуметтік бағдарламалар басқармасы (Иманбаев к-сі, 16, 1 қабаттың холында). Жұмыс кестесі: 9.00 бастап 18.00 дейін.

— Зейнетақы төлеу жөніндегі мемлекеттік орталық (Иманбаев к-сі, 16, 3 қабаттың холында). Жұмыс кестесі: 9.00 бастап 18.00 дейін.

Еске салайық, жеңілдікке ие азаматтар қатарына:

— ҰОС ардагерлеріне және оларға теңестірілген азаматтар;

— жас және еңбек өтілі бойынша зейнеткерлер;

— көпбалалы отбасы;

— мүмкіндігі шектеулі тұлғалар;

— 16 жасқа толмаған мүгедек балалар жатады.

Фототіркеуден өту үшін тұлғаның жеке куәлігі, сондай-ақ, Астана қаласының аумағында тіркелгенін растайтын құжат қажет. Фототіркеу рәсімі, сондай-ақ, жеке жол жүру картасы тегін жасалынады. Аталмыш карталар қоғамдық көліктерде электрондық жүйе енгізілгеннен кейін иелеріне беріледі.

Айта кетейік, қоғамдық көліктерде электрондық жүйе енгізу жол жүру ақысы мәселелерін шешеді, жолаушылардың көлікте лық толуын азайтады және жол жүру ақысы жүйесінде келеңсіз жағдайды шешеді. Жол жүру ақысының жаңа жүйесі халыққа қызмет көрсету сапасын жақсартады.

Барлық сұрақтар бойынша 57-47-77 call-орталығына хабарласа аласыздар.

astana.gov.kz/kk/modules/material/9144

Бүгін «Астана су арнасы» МҚК инвестициялық жобалар мен кәсіпорын активтерін модернизациялаудың ашықтығын көрсету мақсатында арнайы пресс-тур ұйымдастырды. Аталмыш шараға Астана қаласы мәслихатының депутаттары, «Нұр Отан» ХДП Астана қалалық бөлімшесі, Кәсіпкерлер палатасы, «Әділет» тұтынушылар құқығын қорғау қауымдастығы» ҚҰ мен БАҚ өкілдері қатысты.

Бүгінгі таңда «Астана су арнасы» 1200 шақырым су құбыры жүйелері мен 694 кәріз жүйесін қамтамасыз етеді. Инвестициялық жобаны жүзеге асырудағы 5 жылдық жұмыс нәтижесінде 2010 жылдан бастап сумен қамту жүйесі 360 шақырымға ұзартылған, ал кәріз жүйесі 251 шақырымға көбейді.

Уәлихан Досаев, «Астана су арнасы» МҚК бас директоры:

– Біздегі жұмыс көлемі өте үлкен және ауыр, сондықтан алдыңғы қатарлы жаңа технологияларды қолдануға тырысамыз. Қалалық су арнасында жоғары білікті мамандар қызмет етеді. Ұжымымыз үлкен, себебі, су құбыры мен кәріз жүйелерін толық қамту оңай шаруа емес.

Атап өту керек, «Астана су арнасының» 2015 жылға арналған инвестициялық бағдарламасы 800 миллион теңгені құрайды.

5 жыл көлемінде кәсіпорын су мөлшері көрсеткіштерінің азаюын 18% дейін төмендетті, 2011 жылы бұл көрсеткіш 11% тең болатын. 2010 жылдан бергі инвестициялық бағдарламалардың жалпы сомасы 5,1 миллиард теңгені құрайды. Бұл уақыт аралығында кәсіпорын 24 шақырымнан астам кәріз және су жүйелерін жөндеуден өткізген.

astana.gov.kz/kk/modules/material/9143

Елордада орташа тәуліктік ауа температурасы +10°С градустан төмен деңгейде орнауы салдарынан, бүгін Астана қаласының әкімдігі жылыту маусымын бастау туралы шешім қабылдады.

Астана қаласының жылыту маусымын дайындау және өткізу туралы ережелеріне сәйкес, келесі нысандарға жылу беріледі:

1. балалар, емдеу, білім мекемелері, кәсіби мектептер, әлеуметтік-медицина мекемелері;

2. тұрғын үйлер, жатақхана, қонақүйлер;

3. әкімшілік ғимараттар, оқу ордалары, театрлар;

4. басқа мекемелер.

Анықтама: Қазақстан Республикасының 2001 жылдың 23 қаңтардағы «Қазақстан Республикасының жергілікті мемлекеттік басқару және өзін-өзі басқару» Заңына, сондай-ақ, Астана қаласындағы жылыту маусымына дайындық және маусымды өткізу туралы ережелерге сәйкес, Астана қаласы мәслихатының 2014 жылдың 27 маусымындағы №249/36-V Қаулысына сай бес күннің жүзінде орташа тәуліктік ауа температурасы +10 °С градустан төмен көрсеткішті құраған жағдайда, Астана қаласының атқарушы органдары жылыту маусымын бастау туралы шешімді қабылдайды.

Сонымен қатар, елорданың 2015-2016 жылғы жылыту маусымында елорданың үздіксіз электр энергиясымен қамтылуы үшін қала шаруашылығын алдағы күз-қыс кезеңіне дайындау бойынша қажетті шаралар жүргізілді.

Қаланы электр қуатымен жабдықтау бойынша. «Астана-Энергия» АҚ (жылу және электр энергияны шығаратын кәсіпорындарды қосқанда) жылу және электр энергияны толықтай беруге дайын.

«Астана-РЭК» АҚ (электр энергияны беретін және тарататын кәсіпорын) бүгінгі күнде жөндеу бағдарламасы аясында:

52 трансформаторлық бекеттер мен пункттерді, 74,6 шақырым электр сымын (оның ішінде: 21,9 км – 0,4 кВ, 18,01 км – 10 кВ, 34,6 км – 110 кВ) күрделі жөндеуден өткізді;

8 тірек және 38 трансформаторлық бекеттердің жылу желісі, 186,1 км жылу желісі (оның ішінде: 27,4 км – 0,4 кВ, 21,02 км – 10 кВ, 137,7 км – 110 кВ) ағымдық жөндеуден өтті.

Қаланы жылумен қамтамасыз ету бойынша. Бүгінгі күнде «Астана-Теплотранзит» АҚ (жылумен қамтамасыз ететін кәсіпорындар) қала әкімдігінің бекітілген режим картасына сәйкес толықтай жылумен қатмамасыз етуге дайын.

Елорданың барлық 50 жылу магистралінде гидравликалық сынақтар аяқталды.

Сондай-ақ, қаланың 6 ауданының қазандықтарында күрделі жөндеулер жүргізілді, дайындығы 100 пайызды құрайды.

Қатты және сұйық отын қорының қажетті мөлшерін жинақтау бойынша. Аталған сұрақ түбегейлі шешілді. 2015-2016 жылдары «Астана-Энергия» АҚ мен «Богатырь Комир» ЖШС арасындағы 3 млн. тонна көлемінде көмір жеткізу бойынша, оның ішінде ТЭЦ-2 – 2,6 млн. тонн, ТЭЦ-1 – 0,4 млн. тонна көлемінде көмір жеткізуге келісім жасалынды.

Бекітілген ережелерге сәйкес күз-қыс маусымына 20 күндік эксплуатациялық отын қоры қажет: ТЭЦ-1 көмір қоры 34,5 мың тоннаны құрайды (30 тәулікке), ТЭЦ-2 көмір қоры 184,9 мың тоннаны құрайды (20 тәулікке). Мазут қоры ТЭЦ-1 бойынша 8,3 мың тоннаны құрайды, 197 тәулікті құрайды, ТЭЦ-2 – 537 тонна, 38 тәулікті құрайды.

Әлеуметтік сала нысандарының және тұрғын үй қорының дайындығы. Алдағы жылыту маусымына 169 білім беру нысанадары, 37 – денсаулық сақтау мекемесі, 15 – мәдени, 2116 – көп пәтерлі тұрғын үй толықтай дайын.

Автономдық жылу беру көздері бар кәсіпорындар бойынша дизель жанармайына қаражат қарастырылды, жылыту маусымына қазандықтар дайындау жұмыстары жүргізілді.

astana.gov.kz/kk/modules/material/9141

Жыл сайын қазан айының екінші жексенбісінде Қазақстан Республикасында мүгедектер күні аталып өтеді.

Мүгедектерді жұмысқа орналастыру айлығы шеңберінде ағымдағы жылдың 1-2 қазанында сағат 15:00-ден 17:00-ге дейін Астана әкімдігінің Жұмыспен қамту орталығында «Мүгедектің жұмысқа орналасу мүмкіндіктері» тақырыбында семинар-тренинг өткізілетін болады. Барлық ниет танытушыларға қатысуға болады.

astana.gov.kz/kk/modules/material/9142

Бүгінгі таңда Астана қаласында жыл басынан бері 10 мыңнан астам пәтер пайдалануға берілді. Бұл туралы бүгін ҚР Президенті жанындағы Орталық коммуникациялар қызметінде өткенде баспасөз мәслихатында Астана қаласы әкімінің бірінші орынбасары Сергей Хорошун мәлімдеді.

– Шілде айынан бастап қаланың тұрғын үй қоры 300 мың шаршы метрге ұлғайған. Барлығы жыл басынан бері 1 миллион 198 мың шаршы метр тұрғын үй пайдалануға берілді, бұл 10 895 пәтерді құрайды және өткен жылдың көрсеткіштерінен 75 пайызға артық. Бұл уақыт аралығында елордада апатты жағдайдағы үйлерді сүру бойынша пилотты жоба асында 28 тұрғын үй сүріліп, тұрғындар 328 қайтарымсыз пәтерге ие болды, — деді С. Хорошун.

Оның айтуынша, «Қол жетімді баспана-2020» бағдарламасы аясында жыл басынан бері 228 мың шаршы метр тұрғын үй пайдалануға берілген. Астана үй құрылысы бойынша елімізде бірінші орында тұр. Қазіргі уақытта 210 көп пәтерлі тұрғын үй кешенінің құрылысы жүргізілуде. Жобалау сатысында 551 нысан бар.

Сонымен қатар, брифинг барысында Үлескерлік туралы заңды бұзған 20 құрылыс компаниясының нысандары бойынша да сөз қозғалды. Астана әкімінің бірінші орынбасары Сергей Хорошунның айтуынша, аталмыш құрылыс компанияларға қатысты Астана әкімдігі мен прокуратура тексеріс жүргізіп жатыр.

— Үлескерлік қатысу туралы заңды елемей, тұрғындардан пәтерге алдын ала қаражат жинаған құрылыс компанияларына қатысты құқық қорғау органдарының қатысуымен арнайы комиссия құрылды. Қазіргі уақытта 44 нысан бойынша тергеу жүргізілуде. 25 нысан жобалау үстінде болса, 19 нысан құрылысы жүріп жатыр. Ол нысандардың құрылысын 20 компания салып жатыр, — деп атап өтті әкімнің орынбасары.

С. Хорошунның айтуынша, олардың басым бөлігі тіпті, құрылыс жұмыстарын жүргізуге рұқсат та алмаған болып шықты. Жыл басынан бері ешбір құжатсыз әрекет етіп келген құрылыс компаниялар саны 125-тен 13-ке дейін азайған. Жыл соңына дейін бұл мәселе түбегейлі шешіледі.

Мұндай компаниялар қатарында «Азбука жилья», «Төленді», «Әл-Барақат», «Сезам стройсервис», «Шейx Казинвест» және «Тамыз инвестгрупп» компаниялары кірген.

astana.gov.kz/kk/modules/material/9158

2003 жылдан бастап тұрғын үй көмегi Астана қаласында тұрақты тұратын тұрғын үй иесi немесе жалдаушысы (қосымша жалдаушысы) болып табылатын аз қамтылған отбасыларға ақшалай төлем түрінде беріледі. 2015 жылдың басынан тұрғын үй көмегі 74 млн. теңге сомасында 1356 отбасына көрсетілді.

Астана қаласы мәслихатының 2010 жылғы 22 қыркүйектегі №387/51-IV шешімімен бекітілген Астана қаласында «Тұрғын үй көмегін көрсету» ережесіне сәйкес аталған көмек коммуналдық және басқа да қызметтерге ақы төлеуге шығындар, тұрғын үй көмегін тағайындау жөнінде хабарласқан алдындағы тоқсандағы отбасының орташа айлық жиынтық кірісінің сегіз пайызынан асып кеткен жағдайда ұсынылады.

Сонымен қатар, 2011 жылдан бастап Басқарма Қазақстан Республикасы Үкіметінің 2011 жылғы 30 сәуірдегі №473 қаулысымен бекітілген Қазақстан Республикасының тұрғын үй-коммуналдық шаруашылығын жаңғыртудың 2011-2020 жылдарға арналған бағдарламасына сәйкес тұрғын үйді ұстауға, оның ішінде ағымдағы және күрделі жөндеу жүргізуге тұрғын үй жәрдемақысын ресімдеуге құжаттарды қабылдау жүргізеді.

2011 жылдан 2014 жылға дейінгі кезеңде тұрғын үйді ұстауға, оның ішінде ағымдағы және күрделі жөндеуге ақы төлеуге тұрғын үй жәрдемақысымен 317,9 млн. теңге жұмсалды, 1286 отбасы қамтылды. Ағымдағы жылдың 1 қыркүйегі жағдайы бойынша тұрғын үй жәрдемақысын 244 отбасы алды, төлемдердің жалпы сомасы 51,2 млн. теңгені құрады.

astana.gov.kz/kk/modules/material/9156

Бүгін елорданың барлық медициналық ұйымдарында Қарттар күніне орай мерекелік шаралар өтті. Атап айтқанда, №4 қалалық емхана базасында орналасқан «Алтын жылдар» зейнеткерлер клубының мүшелерінің қатысуымен салтанатты шара ұйымдастырылды.

Астаналық ардагерлер үшін мерекелік концерт әзірленіп, оған елордалық мектеп оқушыларынан бөлек, «Астана Опера» театрының жетекші әртістері де қатысты.

Елена Сорокина, №4 қалалық емханасы кәсіподақ комитетінің төрағасы:

– Қарттар күніне орай №4 қалалық емханада мерекелік шара ұйымдастылды. Сондай-ақ, емханада «Алтын жылдар» клубы жұмыс істейді, бүгін бұл клубқа 5 жыл толып отыр. Мереке аясында «Алтын жылдар» клубының мүшелерін мерейтойымен құттықтадық. «Астана Опера» театрының жетекші әртістері, №56 мектеп және қалалық музыка академиясы оқушыларының қатысуымен концерт өтті. Сондай-ақ, бүгінгі шараға денсаулық сақтау саласына еңбек сіңірген ардагерлер де қатысты.

Өз кезегінде, зейнеткерлер алғыстарын білдіріп, шараның ұйымдастырушылары мен қатысушаларына сәттілік тіледі.

astana.gov.kz/kk/modules/material/9155

Астанада Халықаралық қарттар күніне орай ардагерлердің қатысуымен мерекелік шара өтті. Астана қаласы әкімдігінің алдындағы алаңда жүзге жуық денешынықтыру мен спорт сүйер қауымының қатысуымен «Ардагерлер салауатты өмір салты үшін» атты флешмоб өткізілді. Шара аясында елордалық ардагерлер кеңесінің өкілдері, еңбек ардагерлері, зейнеткерлер фитнес нұсқаушысының жетекшілігімен дене шынықтыру жаттығуларын жасады.

Астана қаласы туризм, дене шынықтыру және спорт басқармасының ұйымдастыруымен өткен бұл шара ешкімді бейжай қалдырмады.

Астана қаласы Ардагерлер кеңесінің төрағасы Амангелді Сыздықовтың айтуынша, шаралардың барлығы қариялардың тұрмысы мен өмір-тіршілігіне көп көңіл бөлуге, қосымша жағдай мен қызмет көрсетуге бағытталған. А. Сыздықов, сонымен қатар, еліміздің барлық қарияларын осы айтулы күнімен құттықтап, бар жықсылықты тіледі.

Таңғы жаттығуға қатысқан барлық зейнеткерлер М. Өтемісов атындағы Оқушылар сарайында өткен концертті тамашалауға да мүмкіндік алды.

Айта кетейік, Халықаралық қарттар күні БҰҰ Бас Ассамблеясының шешімімен 25 жыл бұрын бекітілген. Халықаралық қарттар күні 1 қазан күні аталып өтеді.

Сондай-ақ, бүгін Ардагерлер ұйымының белсенділері ҰОС ардагерлерінің, зейнеткерлердің үйлерін аралады. Қарттар күніне орай «Алматы» ауданының әкімдігі ауданға қарасты Ардагерлер ұйымы және кәсіпкерлермен бірлесіп 150 зейнеткерге, соның ішінде ҰОС және тыл еңбеккерлеріне арнап қайырымдылық ас берді.

Бұдан бөлек, бұл күні шахмат, дойбы, тоғызқұмалақ және басқа да халықтық ойындардан шағын орталықтарда жарыстар өткізілді. Бүгін, сондай-ақ, «Жастар» сарайының киноконцерттік залында, сағат 19.00-де елорданың ҰОС ардагерлері мен зейнеткерлеріне арналған мерекелік концерт өтеді.

astana.gov.kz