Соңғы уақытта әлеуметтік желілерде білім беру жүйесіндегі реформаларға қатысты әңгіме көбейіп кеткен соң ба, Білім және ғылым министрі бір топ блогерлермен кездесуге ұсыныс жасады. Келістік. Бардық. Бірақ мемлекеттік қызметкерлердің жұмыс уақытында гаджет, смартфон ұстауға тыйым салатын заңнаманың күшіне енуіне байланысты кездесуге «қару-жарақтарымызбен» кіре алмадық. Сондықтан министр Ерлан Сағадиев мырза айтқан сөздерінің есімде қалғанын, көкейіме қонғанын баяндайын.



Реформа не үшін қажет?
Қазақстандық мектеп оқушылары еуропалық қатарластарынан екі жылға кенже қалған. Бұл PISA (Programme for International Student Assessment) мектеп оқушыларының білім деңгейін бағалайтын халықаралық бағдарлама қорытындысы. Яғни сіздің 8-сынып оқитын балалардыңыздың білімі Еуропалық 6-сынып оқушысының білім деңгейінде. Бұған әсер ететін факторлар әрине көп, бірақ бастысы тіл. Ғылым қазір күн сайын қарыштап дамуда. Ғылым тілі ағылшын тілі екені белгілі. Онда ол ақпарат ағынын аударуға тырысу мүмкін емес. Осы орайда Ерлан Кенжеғалиұлының TEDxте сөйлеген сөзі есіме түсті. Көрмесеңіз, көруге кеңес беремін. Жалпы аудармаға қатысты, тағы бір мәселе — терминдер. Егер қазақ тілін музей экспонаты сияқты сақтағымыз келсе еркіміз. Бірақ біз тілді қолдануымыз, модернизациялауымыз, дамытуымыз қажет. Түсініксіз аудармадан гөрі, түсінікті «кірме» сөздер артық. Мысалы, медициналық оқулықтағы 30 мың сөздің аудармасы жоқ екен. Егер сол сөздерді түгелімен қазақшаға аударар болсақ, мен осы кітаппен оқыған дәрігерге қаралғанша, шетелде емделе берер едім.



STEAM білім беру
STEAM (S – science, T – technology, E – engineering, A – art, M – mathematics) қазіргі кезде әлемге ең қажетті пәндер. АҚШ, Малайзиядағы білім беру реформасы мен экономикасының бәсекелестігін арттырудың синонимі осы STEAM білім беру болады. Қазақстандағы реформа (реформа деу артығырақ, бұл жобаның әзірленіп, қолға алынғанына біраз жыл) бойынша информатика, химия, физика және биология пәндері ағылшын тілінде оқытылмақ. Дәлірек айтқанда, оқулықтар ағылшын тілінде болады. Ал оқытушы өз ыңғайына қарай қалаған тілінде түсіндіруге құқылы. Информатикадағы терминдердің дерлігі ағылшын тілінде екенін ескерсек, бұл логикалық дұрыс шешім деуге болады. Осы өзгерістер бір күн, бір жылда емес, кезеңмен жүзеге асырылады. Алдымен 2017 оқу жылында информатика пәні ағылшын тіліне өтеді. Қалған пәндер 2020 жылға дейін біртіндеп көшіріледі. Кадр мәселесіне келетін болсақ, ниеті, бейімі бар мамандар жазғы демалыс кезінде ағылшын тілін үйренеді. Қазірдің өзінде ҚТЛ, Назарбаев мектебінің оқытушы, оқушылары волонтерлік негізде жұмыс жасауға тілек білдіріп отыр.

Өзгенің қаңсығын таңсық қылып...
«Менің Өзбекстанға бірнеше рет сапарым түсті. Тарихы, мәдени жәдігерлері бай ел. Бірақ ол жаққа тағы барғым келмес еді. Себебі кедей халық, төмен тұрмыс деңгейі, жоқшылық. Ал салыстырмалы түрде Азиядағы елдер — Корея мен Жапонияға қанша барсам да қызық. Мәселе мәдениетте емес. Өмір сүру деңгейінде, тұрмыс-тіршілігінде. Өз еліңнің экономикасы, білім-ғылымы, әлеуеті жоғары болса, жастарымыз сакураға тамсанып, кәріс сериялдарын тамашалап, Америка арманы туралы қиялдайды деп ойламаймын. Бай ел әлемді тамсантатын мифті қолдан болса да жасап ала алады».



Ауыл баласының зоотехник болуы шарт емес
Ауыл және қала баласының арасы алшақ. Білім деңгейі әртүрлі. Қазір не үшін ауылдарға интернет тартып әлек болып жүрміз? Уақытын қызықты өткізуі үшін емес, тең мүмкіндік алсын деп. Мектептерде ағылшын тілі енгізілсе, біздің оқушылардың білім көкжиегі де кеңейеді. Ауыл мектебінің түлегі Каир, Кембридж, Оксфорд университеттерінің есігін именбей ашсын десек, ағылшын тілі пәнін енгізу қажет. Тіпті француз тілі 16 мемлекеттің ресми тілі бола тұрса да, француздар 1-сыныптан бастап ағылшын тілі пәнін енгізді. Бұл ұлтының тілін кемсіту емес, болашағын ойлау.

ЖОО туралы бірер сөз
Жоғарғы оқу орындарындағы профессор-оқытушылардың ғылыми дәрежесі мәселесіне келсек. Қазіргі кезде жасы келіп қартайса да, білім берудегі басшылықты уысынан шығарғысы келмейтін профессорлар барын білем. Барлығы емес, кейбірі кәсіби құндылығын жоғалтқан. Сонда да кафедра меңгерушілігіне таласу, өз адамдарын жинау сияқты жоғары білім сапасын кері тартатын әрекеттер жасайды. Бұл оқу процесіне, сапалы мамандар даярлауға кесірін тигізеді. Сондықтан қазір оқытушылар құрамындағы ғылыми дәреже көрсеткішін аздап өзгерту керек. Зейнет жасындағы, кәсіби тұрғыда деңгейі төмендеген профессорларды шығарып салатын кез келді. Штаттық құрамның 30% — PhD докторлар, 60% — магистрлер, қалған 10% — кәсіби практиктер (өз саласында кемінде 2-3 жыл басшылық қызмет атқарған) болғаны жөн.

P.S. Негізі айтқан уәждері осы. Айтпақшы, елді қол жинатып, «жаға ұстатқан» реформалар туралы бірер сөз. Жазғы демалыстың ұзартылуы:
1-сынып оқушыларының жазғы демалысы небәрі 5 күнге кемиді.
Орта және жоғары сынып оқушыларінікі бар болғаны 10 күнге қысқарады.

Қазақ, ағылшын, орыс тілдерінде оқытылатын пәндер (барлық мектептерде):
Ағылшын тілінде информатика, биология, химия, физика пәндері оқытылады (10-11 сыныпқа ғана қатысты).
Қазақстан тарихы, Қазақ тілі, Қазақ әдебиеті қазақ тілінде ғана оқытылады (6-сыныптан бастап)
Орыс тілі мен әдебиеті (бұл екі сабақ бірікітіріледі), дүниежүзі тарихы орыс тілінде оқытылады.

Әлемдегі ең үздік футбол лигасы- Ағылшын премьер лигасы екені белгілі. Осы маусымдағы сенсацияға дайын болайық. Себебі, Лестер Сити кезекті мәрте жеңіске қол жеткізді. Клаудио Раньери шәкірттері сырт алаңда Қара мысықтардан(Сандерленд) 2:0 есебімен басым түсті. Осы маусымдағы басты қаҺарман Джейми Варди дубль авторы атанып, өзінің голдар санын 21 ге дейін жеткізді, Ал «Түлкілер» болса қатарынан бесінші жеңістеріне жетті. Осылайша, 72 ұпаймен көш бастап чемпиондық атаққа тағы бір қадам жақындады. Лестер сырт алаңда Сандерлендті 1935 жылдан бері ұта алмаған көрінеді. Міне енді ол да аяқталды.
Енді екінші орындағы Тоттенхэмнен алты ұпай айырмашылық бар. Тек қана сол айырмашылықты сақтап қалса болғаны, 36 турда мерзімінен бұрын чемпион атануы мүмкін. Өз кезегінде Почеттино шәкірттері де қарап қалмай, Қызыл сойқандарды 6 минут ішінде бокс тілімен айтқанда нокаутқа жіберіп, чемпиондық атақты оңай бере салмайтынын көрсетті. Ал Луи Ван Гал шәкірттеріне келесі жылға Чемпиондар Лигасына берілетін жолдамаға біраз тер төгу керек сияқты…

Дидар атты қазақтың жігіті қазір Шу қаласында өнімдерін шығарып жүр. Былғарыдан әмиян, сөмке, кілтсалғыш деген сияқты бұйымдар жасайды. Сүйікті ісіңді кәсібіне айналдыратындардың табысы қандай? Бұл сұраққа Grand Craft табиғи тері өнімдерін шығарушы Дидардың жауабы төменде. Бұл өнім ұнап жатса, Алматыдағы Достық сауда орталығынан табасыз. Меніңше, ер адамдаға сыйлық іздеп сабылғанда, қыздар үшін керемет көмек болады деп ойлаймын. Сапалы, бағасы да жақсы. Если что, 7 мамырға да аз уақыт қалды. ;);) Ал, өзге қолөнершілердің айтқандары туралы осы жақтан оқуға болады. businessnews.kz/2016/04/kazakstannyn-handemade-industriyasy-kalaj-damuda/



Дидар Мұқашев, Grand-Craft табиғи тері өнімдерін шығарушы:

Жалпы тері бұйымдарымен жұмыс жасауды 2013 жылы жолдасым екеуміз бастадық. Интернет желісінен жинаған мәліметтерге жүгіне отырып жасап шыққан ең алғашқы бұйымның нәтижесі көңілімізден шығып, ары қарай осы бағытта жұмыс жасауға бел будық. Арада біраз уақыт өткен соң, бірнеше бұйымдар жасап көрдік. Жасаған дүниемізді көпшілік қауымға ұсыну үшін, кәсібімізге ат қоюды ойластыра бастадық. Осылайша, 2014 жылы «Grand-Craft» атаулы тері бұйымдарын өндіретін шағын ғана шеберхана дүниеге келді. Grand-Craft-тың кәсібі өте шағын. Бүгінгі таңда шеберханамызда екі адам ғана еңбек етеді.


Өкінішке орай, шетелден әкелінген шикізатты алуға тура келіп отыр. Бірақ, жақында отандық тері комбинаттың бірінде өндірілетін шикізаттың сапасын көріп қайттық. Сондықтан, болашақта бұйымдарымыздың бір бөлігін отандық шикізаттан жасайтын ойымыз бар. Біздің өнімдеріміз Алматы қаласы, Dostyk Plaza ойын-сауық кешеніндегі Experimentarium дүкенінде сатылады.Сол сияқты интернеттегі әлеуметтік желілер арқылы да сатамыз. Шындығына келсек, өнімдердің кең таралуына және жарнама жасауға, қажетті көңіл бөле алмай жүрмін.



Кәсібім шағын болғандықтан, мен әлі көптеген қиындықтармен жолықпаған шығармын. Бірақ өз көзқарасымды айта кетейін. Біріншіден, шикізат құны. Шетелден импортталатын шикізат құны жоғары келеді. Соған байланысты біз өндіретін бұйымдардың бағасы да өседі. Екіншіден, отандық шикізат өндірісінің тапшылығы. Ойдағы бұйымдарды іске асыру үшін, отандық шикізаттың ішінен түрі немесе түсі табылмай жатады.


Отандық шикізат өндірісін барынша дамытса, біз үшін шетелдік шеберлермен бәсекелеске түсуге зор мүмкіндік пайда болатын шығар деп ойлаймын. Әрине, Қазақстанда тері бұйымдарымен айналысатын көптеген шеберлер бар. Бірақ, мен әлі бәсекелестікке түсетін дәрежеге жеткен жоқпын. Кәсібім дамып жатса, бәсекелестік бағымды сынап көрермін.

Өткен жылғы жазбамызда баламыз екеуіміз конструкторлық эраға старт бергенімізді жазғанмын, яғни, конструктор ойыншықпен ойнап үйрене басатағанымызды баяндағанмын (авт. әрі қарай текст бойынша қайта-қайта „конструктор ойыншық„ дегенше жай ғана „конструктор„ деп жазамын).
Осы жолы балама Sluban M38-B0382 деген конструкторды сатып алдым.

Ойыншықты бала қолына ұстатпас бұрын -ең бірінші өзің ойнап көр -деген дағды бойынша ойыншықты қорабынан шығардым. Жалпы, конструктор көмегімен құрастыралатын трансформер идеясы жаман іске асырылмаған. Робот-автомобильге, автомобиль роботқа трансформатталады. Трансформерді құрап тұрған бөлшектер түсі қара, ақ, қызыл. Негізгі түс ақ. Конструкторды құрап шықтым. Жалпы. Құрастыру, құрап шығу әрекеті конструктор ойыншығының ерекшелігі -ойын қызығы. Sluban M38-B0382 конструкторында құрап шығу ойынның қызығы бар ма?
Конструкторды құрап шығуды қиындатқан тұстар. Біріншіден құрастыру нұсқасында берілген нұсқаулар бір беттің екі жағында бірінің үстіне бірі міңгесіп орналасқан. Екіншіден бөлшектер сапасы төмендеу, төрт бөлшекте өңделмей қалған қылау кездесті.
Конструкторда тағы бір кемшілік болуы мүмкін. Құрастыруға арналған бөлшектің жетіспеуі деген. Sluban M38-B0382 конструкторында мұндай кемшілік жоқ.
Қорытынды. Конструктордың жақсы жағын атап өтейін. Конструкторды құрап шыққан соң „транформер„ ойыншығы алынды. Робот автомобильге және кері бағытта оңай трансформатталады. Трансформатталған соң роботты бала робот деп таниды, автомобильді автомобиль ретінде қабылдайды.
Жағымсыз жағы. Трансформерді құрап тұрған бөлшектер бір-бірінен оңай ажырап шашылады (трансформатталаған кезде). Жақсы конструктор бір рет емес бірнеше рет қайта-қайта жинап, құрастыруға жарамды. Қарастырып отырған конструкторымыз бір-ақ рет жиналғанның өзінде қиындықпен жиналды. Бұзып-құрап ойнау үшін жарамсыз. 6-10 жастағы балаға құрастыру нәтижесінде алынған трансформермен ойнау үшін бөлшектерін желіммен желімдеп беріңіз.

Астанада Бирхофф мейрамханалар кешеніне қарасты Сабантуй кафесінде КерекИнфо блогерлерінің ұйымдастыруымен Керек-Ринг ойыны өтті. 4 команда қатысқан бұл ойында Тараздағы Блог-Құрылтайда өткен ойынның жеңімпаздары Бақсы командасы тағы да жеңіске жетті. Marco бастаған, Basic AKY Karakyz қостаған команданы жеңістерімен құттықтаймыз!



Іріктеу кезеңіндегі сұрақтар:

— Мемлекет атымен аталған химиялық элементтер бар. Мысалы Полоний – Польшаның құрметіне, Германий – Германияға, Америций – Америка. Ал, қай елдің аты химиялық элементтің атымен аталады?
(by asaubota )

— Ленинге қатысты алғашқы құжатқа Василий Умов атты священник және дьякон Знаменский қол қойған. Бұл қандай құжат еді?
(by asaubota )

— Алексей Добротворский деген ғалымның пайымдауынша, тарихта орны толмас, қайталанбас жалғыз бір тұлға бар. Оның атын атаңыз.
(by asaubota )

— 1775 жылдан бастап Лондонда каучук кубиктер сатыла бастады. Ол не үшін пайдаланылатын еді?
(by asaubota )

— Карелиядағы Кижи аралында орналасқан шіркеу соборында 33 күмбез бар. Неліктен?
(by asaubota )

— Эдмунд Хиллари — Амундсен мен Скоттан кейін Оңтүстік полюсті бағындырған 3-ші кісі. Бұл кісі бірақ әлемдегі басқа бір нүктені бірінші болып бағындырды? Қай жерді?
(by asaubota )

— Неміс ғалымы Классен тас және темір метеоритердің құрлықтар бойынша жайылуын зерттеген екен. Зерттеулер бойынша Еуропа, Азия және Африка құрлықтарында тас метеориттер темір метеориттерге қарағанда көбірек кездесіпті. Ал, Америка мен Австралияда тең дәрежеде. Классен бұның неге бұлай екенін біледі. Ал сіз ше?
(by asaubota )

— Бұл сөзді Гитлер әр 53 сөзінің бірінде қолданған екен. Муссолиниде 1/83, Рузвельтте 1/100, Чемберленде 1/249. Бұл қандай сөз?
(by asaubota )

— 1915 жылы бір бірімен шекараласатын үш ірі мемлекет АВС атты ортақ келісімшарт жасасқан. Бұл қай мемлекеттер?
(by asaubota )

— Ағылшын сөздерінің басым бөлігінде «q» [кью] әрпінен кейін «u» [ю] келеді. Ерекше жағдай үндіеуропалық тілдерден келмейді, әдетте: мысалы, faqir [факир], qadi [кади], Iraq [Ирак]. Алайда, «q» [кью]-ден кейін «u» [ю] келмеген бір сөз сырттан енген болып табылмайды. Бұл сөзді сіз анық көрдіңіз, алты әріптен тұрады және он тоғызыншы ғасырдың соңында пайда болды.
(by MERmukhanov )

— Сағидолла Мұсақынұлының тақпағы:
…
Шебер-ақсың жұмысқа
Азық жинап қуысқа,
Қол жаймайсың «туысқа».

Тақпақтың бірінші шумағын атаңыз.
(by MERmukhanov )

Финалдық кезең сұрақтары:

— Бұл санды гректер мен римдіктер білмеген. Ал, көне мысырлықтар білген. Иероглифтерінде бұл санды қолдарын таңданыспен көкке көтерген адам кейпінде бейнелеген. Бұл қай сан?
(by asaubota )

— Бұл күн америкалықтардың әзілдеуінше АҚШқа шабуыл жасау үшін ең ыңғайлы күн екен. Тіпті 1984 жылдың 20 қаңтарында Роналд Рейганның инаугурациясы бұл оқиға үшін бір күнге шегеріліпті. Американ қорғанысын әлсірететіндей бұл қандай күн?
(by asaubota )

— Ортағасырдағы араб тарихшысы, саяхатшысы Масуди Жерді алып құсқа теңеген. Оның айтуынша құстың құйрығы – Африка, оң қанаты – Үндістан мен Парсы мемлекеті, сол қанаты – Яджудж бен Маджудж мекендеген жерлер. Ал, құстың көздері ше?
(by asaubota )

— Оның заты – атына қарсы. Бірақ оның бойында құрғақтық пайда бола берген сайын заты атына сай бола береді. Оның мұңды тағдырын еске ала отырып, оны атаңыз.
(by MERmukhanov )

— Сперанский Тобольск қаласына тарихшы досына сый жібере отырып, хатқа: «Саған уақыт және мәңгілік жіберіп отырмын» деп жазды. Жіберген түйіншегінде сағат және екінші сыйлық жатты. Қандай?
(by MERmukhanov )

— Мына суреттердің авторы ХІХ ғасырдың ортасында туылған. Оған КСРО және Қазақстанның пошта маркалары арналған. Сурет авторын атаңыз.

(by MERmukhanov )

— 20 ғасыр соңы — 21 ғасырдың басында көше атауларын өзгертуден бұрынғы КСРО қалаларының ешқайсысы қашып құтылған емес. Сол кезеңде Ақмола қаласында Ленин көшесі Абай даңғылы, Октябрьская — Мұхтар Әуезов көшесі болып атала бастады. Ал осы қаладағы Совет Конституциясы көшесі қалай аталды?
(by MERmukhanov )

— 1996 ж. ақпанында көптеген америкалық газеттер бұл адамның портретін шығарып, мысалы, «USA Today» газетіндегідей: «Бұл адам адамзат нәсілі үшін тұрып бере ала ма?» дегендей тақырыптар қойды. Бұл кім адам?
(by MERmukhanov )

— 1850 жылдардың соңында Сатурн сақиналарын зерттеп болған Джеймс Максвелл басқа сақиналара жайлы ойлана бастады. 1858 жылғы мамырдағы Күн тұтылуынан соң, оның айтуынша, ол алдағы оқиғаның уақытын анықтаумен айналысып, шамамен – маусымның басы деген нәтиже алады. Бұл оқиғаны атаңыз.
(by MERmukhanov )

— Людовик XVI, граф Монте-Кристо, Петр I, кардинал Ришелье, Шерлок Холмс. Бұл адамдарды әдеби шығармалардан басқа не біріктіреді?
(by MERmukhanov )

— Сұрақ авторына, яғни маған мына факт әркез қызық көрінетін. Бірінші дүние екіншісінен бұрын ойлап табылғандығы.
Бірінші дүниенің қазіргі типтесін 1823 жылы Иоганн Деберейнер ойлап тапты. Ол химиялық процесстерге негізделді.
Ал қазіргідей Екінші дүние одан 3 жыл өткесін барып ойлап табылды. Джон Уокер 91 см-лік затты 1826 жылы ойлап тауып, 1827 жылы коммерциялық келісім-шартқа отырды.
Ол нәрселер бәрінде бола бермейді, бірақ көбінде бар.
Бірінші және екінші затты атаңыз.
(by MERmukhanov )

— Оның аумағы Флорида, Пуэрто-Рико және айталық, Гамильтон арасын құрайды. Гамильтон ненің астанасы?
(by MERmukhanov )

Көпшілігі бұл ойынды білетін болар. Дегенмен қайталап жіберейін.
Мен бір сөзді жасырамын. Мысалы, көбелек. Бұл сөзді буынға бөлемін. Осы әр буыннан басталатын сөздерге ассоциация 3 сөз жазамын.
Кө: (көкөніс) 1. Жеміс, вегетариан, бақша
бе: (безбүйрек) 2. қатыгез, сезімсіз, тасжүрек
лек: (лексус) 3. автомобиль, RX, жапония
Түсінікті ғой? Еншеде, ал кеттік!

1. Төре; Ысқақ; Байбек.
2. Вибрация; Дұғалова; Тоңғақ.
3. Ұйқы, Үрей, Кома.
4. Көпшіл, Өзімшіл, Жіктеу есімдігі.
5. Дөрекі, Балуан Шолақ, Зіркілдеу.

Бұдан бұрын хабарлағанымыздай Астанада «Автобус» жедел алдын алу іс-шарасы өткізілді. Шараның мақсаты елордамызда жол апатын азайту, жолаушылар мен жүк тасымалдауды жүзеге асыратын жүргізушілердің мәдениетін арттыру, жол қозғалысын бақылау және қадағалау болды.

Осы шараға әкімшілік полиция және жергілікті полиция қызметі бөлімшелерінен 500 астам қызметкер тартылды, соның ішінде көліктік бақылау, Астана қаласының Кірістер департаментінің де өкілдері бар.

Арнайы жасақталған топ қала аумағында автобустардың техникалық жағдайын, жүргізушілердің тіркеу құжаттарының толық болуын, сондай-ақ, жүргізушілерді медициналық тексеру бойынша рейдтер өткізді. Полицейлер «Рубеж» шекара бекеттерінде заңсыз тасымалдаушыларды анықтау бойынша тексеру шараларын жүргізді.

«Автобус» жедел алдын алу іс-шарасын жүргізу барысында тәртіп сақшылары жолаушылар автобусы жүргізушілерімен Жол қозғалысы ережелерін бұзудың 650 астам фактісін тіркеген, соның ішінде 84 — автобусты басқару кезінде телефонды пайдалану, 58 – маневрлеу ережелерін бұзу, 6 – техникалық байқаудан өтпеген автобусты басқару фактісі болған.

Сонымен қатар, 6 — жылдамдық режимін бұзу, 15 — жүргізушілердің еңбек пен демалыс режимін сақтамау және 7 -заңсыз қайта жабдықтау жағдайы анықталған.


Бұдан басқа, желіге шықпас бұрын автобустардың техникалық жағдайын тексеру кезінде техникалық ақауы бар 39 автобусты пайдалануға тыйым салынды, автобус парктерінің 11 лауазымды тұлғасына қатысты әкімшілік іс өндіріске алынды.

Полицейлердің айтуынша, осы сияқты рейдтер жолаушылар көлігінің қатысуымен орын алатын жол-көлік апаттарының санын азайтуға септігін тигізеді.

Материал Астана қаласы әкімдігінің ресми сайты astana.gov.kz деректері бойынша дайындалды.

Мемлекеттік бағдарлама аясында атаулы әлеуметтік көмек Астана қаласында тіркелген және тұрғылықты тұратын орташа жан басына шаққандағы табысы кедейлік шегінен төмен (күн көріс деңгейінің 40%) азаматтарға тағайындалады. Осы категорияға енетін 742 елорда тұрғынына атаулы әлеуметтік көмек көрсетіледі, деп хабарлайды Астана қаласы әкімдігінің ресми сайты astana.gov.kz.


Аталған жәрдемді көп балалы, толық емес отбасылар, құрамында мүмкіндігі шектеулі адамдары бар отбасылар алады. 2015 жылы 1000-нан астам аз қамтылған азамат мемлекеттік атаулы әлеуметтік көмекпен қамтылды. Мемлекеттік қызметтерді алу үшін өтініш беруші тоқсанына бір рет Халыққа қызмет көрсету орталығына хабарласады.

Адамға атаулы әлеуметтік көмектің мөлшерін жан басына шаққандағы орташа табыс пен отбасының әрбір мүшесіне есептелген кедейлік шегінің белгіленген айырмасы түрінде есептейді. 2016 жылдың 2 тоқсанында кедейлік шегі 9157 теңгені құрайды.

Айта кетейік, 2018 жылдан бастап жәрдемақының үш түрі біріктіріледі: атаулы әлеуметтік көмек, 18 жасқа дейінгі балалары бар отбасыларға арналған мемлекеттік көмек, арнаулы мемлекеттік жәрдемақылар және жаңа форматта ұсынылатын болады. Жаңа атаулы көмек екі түр бойынша жіктеледі — шартты және шартсыз.

Мемлекеттік атаулы әлеуметтік көмек ең төмен күнкөріс деңгейінің 50 % төмен орташа жан басын шаққандағы табысы бар еңбекке қабілетті азаматтарға отбасының барлық еңбекке қабілетті мүшелерінің жұмыспен қамтуға жәрдемдесудің бағдарламаларында міндетті түрде қатысқан жағдайда ғана тағайындалатын болады.

Шартсыз көмекті отбасы құрамында еңбекке қабілеттілігі жоқ мүшелері немесе объективті себептер бойынша жұмыспен қамтуға жәрдемдесудің шараларына қатыса алмайтын еңбекке қабілетті азаматтардың отбасылары алады.

Дәлірегі қазақша нұсқасындағы «Жан жарым» деп аталатын әнді Қайрат Нұртас пен Еркін Нұржанов айтады. Бізде бұл ән хит болмаса да, кемі 2-3 жыл бұрын жарыққа шығып, той тансполдарын бірәз дүркіретіп еді. Енді дәл осы әнді былтыр армяндардың аса танымал емес әншісі Азнавур Пашаян басқа тілде орындап, тіпті клип түсіріп хит қылған екен. Хит дейтін себебіміз оның Ютубтағы клипын 1 миллион 300 мыңнан астам рет қарапты. Сонымен көриік)))

Түн. Кішкентай кезімде жек көретінмін. Түн болмаса екен деп ойлайтынмын. Сол кездің ассоциациялары: Аленький цветочек — мамам осы ертегіні ғана айта беретін. Қоңыр көрпе — әжем бізге арнап түйенің жүнінен тіккен көрпесі. Папам ертегі айтқанда кейде осы көрпені иіскейтін. Мамасын сағынған шығар. Қасқырлар — көшеде түнде қасқырлар жүреді деп ойлайтынмын. Мастар — көшеде сәл шу шықса, әне мастар жүр деп қорқытушы еді.

Түн. Он-он екі жастамын. Ауылдағы жазғы түндерді жақсы көретінмін. Ойыннан түн ішінде келетін едік. Қазір есіме түсетіні: Қорқынышты әңгімелер — ол кезде мастардан да, қасқырдан да қорықпайсың. Қорқатының қызыл перчатка, ақ адам, қара радио. Алқа-қотан отырып алып, бір біріңе тығылып, қорқынышты әңгімеден қалш-қалш етіп. Кейде құлағыңды жауып аласың. Не зорлық деймін де қазір. Сосын, көршінің огороды. Ел жатты ау дегенде, іші пысқан балалар көршінің огородына түседі. Не ұрлайды дисіз, баяғы қияр мен қызанақ. Кедйе ауыл сыртындағы орыс шалдың жүгерісіне түсеміз. Үйдегі огород көршілердікінен екі есе үлкен. қиярлар жиналмай сарғайып кетеді. Бірақ көршінікі тәтті ғой.
Сосын Тоқылдақ. Картошка немесе тасты жіпке байлап қойып, ақрын барап терезе жақтауына шеге не скрепке тығып қоясың да, соған іліп анааау жерге тығылып жіпті тартасың. Әлгі үйдің теезесін тық-тық қағып. Ең есуас көршіні таңдаймыз ғой. Бажылдап шығып, тырқыратып қуатын.
Ең әдемі, ең жарқын ассоциация жұлдыздар. Ондай жұлдыздарды кейін көрмеген сияқтымын. Үйге қайтып келе жатып аспанға қарайсың. Жұлдыздар көп болса, ертең жылы болады. Жылы болса, өзенге барамыз деген сөз. Жыпыр жыпыр етіп тұрады ғой. Өздері жап-жарық, үп-үлкен.
Бұл кезде ешкім ертегі айтпайды. Есесіне сенің қиялың Андерсеннің ертегілерінен де ғажайып.

Түн. Бойжеткенмін. Құрсыыын. Дым қызығы жоқ. Үйге жылдам бару керек. қазір тағы сөз естимін ау. Сонда бір қызық болсашы, сол ұрысты естуге тұратындай. Мамаға бір-екі сағаттан кейін келем дейсің де. Ұрысса міңгірлеп «айттым ғой бір-екіде келем деп»… Жүйкеңді тоздырыппын ғой)))
Ғашық болған түндер. Түндер шынымен барқыт қой. Ай ше? Күннен әдемі ғой. Жұлдыздар шынымен жымыңдайды. Әрине, бала кездегідей емес, бірақ сәл болса, сол жұлдызға жетейін деп тұрсың ғой. Қолыңды созсаң болғаны))) Шегірткелердің дауысы не деген тәтті еді. Тәтті жаз, ыстық дем, қысқа түн.

Түн. Қазір түн ұзааақ болса екен деп тілеймін. Енді әдемі жұлдызды түндер экранның мониторында ғана болатын шығар… Балалар ұйықтады, үй шаруасын да бітіргендеймін. Енді бір материалды жазып тастау керек. Ми істемей тұр, тоңазытқышта не бар екен. Қарным ашып кетті ғой. Бутербродымды жеп отырып видеоны қарай салайыншы. Мыналар онлайн боп тұр ғой. Неге ұйықтамайды екен осы жұрт. Қой, киноның жалғасын сосын көрем. Бір сағат жұмысымды жасайын. Әлде ертең ерте тұрып «на свежую голову» кірісейін ба? Ой, білем ғой қалай жасайтыныңды. Өшір давай интернетті… Қой, сағат алты боп қалыпты. Жатайын, ертең ерте тұру керек.