Ораза ұстау тәртібі

1. Мұсылман болу: Ораза мұсылмандарға парыз. Сондықтан жаңа мұсылман болған жандарға өткен жылдардағы ораза секілді ғибадаттарына қаза керек емес. Олардың бейне бір жаңа туған сәбидей барлық күнәсі кешіріледі: Құранда Аллаһ Тағала: (Мұхаммед) «Күпірлік еткендерге егер олар жамандықтан тыйылса, өткен күнәлары кешіріледі. Ал егер олар қайталаса, сонда өткендегілердің де үкімі орындалады» де. (Әнфал, 8/38)

2. Балиғат жасында болуы және ақыл-есі түзу болу: Бала мен ақыл-есі ауысқан, талған адамға немесе мас адамға ораза ұстау парыз емес. Бұлардың санасы толық болмағандықтан, мұндай әмір оларға жүктелмейді. Пайғамбарымыз (с.а.у.) былай дейді: «Үш адамға қалам жазылмайды: Балиғат жасына жетпейінше балаға, ақыл-есі түзу болғанға дейін ақылы кеміске, оянғанға дейін ұйқыда жатған адамға» (Бухари, Талақ, 11; Әбу Дәәуд, Худуд, 17). Яғни, сана аса маңызды. Аллаһтың әмірі саналы жандарға келген. Жеті жасқа кірген кезден оразаға күші жететін қыз бала мен ер балаға ата-анасы ораза ұстатып үйрету керек. Мақсат — балаларды оразаға баулу. Ақыл-есі кемтар не есінен танып қалған адамдарға уақытша болса да ораза парыз емес. Ақылы орнына келсе, қазасы өтелмейді.

3. Ораза ұстауға күші жету және тұрғын болу: Науқас немесе жолаушыларға ораза парыз емес. Бірақ ораза ұстаса, оразасы дұрыс. Ал ораза ұстамаса, басқа күндері оразасын қаза етеді. Құранда олар жөнінде былай дейді: «Ораза санаулы күндерде. Кімде-кім науқастанса яки жолаушы болса, басқа күндері өтесін» (Бақара, 2/184). Кәрілік жасқа келіп, ораза ұстауға шамалары келмеген жандарға ораза парыз емес. Сонымен қатар хайыз, нифас кезіндегі әйелдер және өзі немесе баласына зиян тиюі ықтимал екі қабат әйелдер мен бала емізген әйелдерге де парыз емес. Кәрі адамдар ораза орнына пидия береді. Олар оразаның қазасын да өтемейді. Жолаушыға келсек, ол 90 шақырымнан астам жерге жолаушылап шықса, жолаушы саналып, ораза ұстамауына рұқсат. Бірақ кейін ұстамаған күндерінің қазасын өтейді.

ОРАЗА ДҰҒАЛАРЫ

Ауыз бекіту дұғасы:
Нәуайту ән асума саума шаһра рамадана минал фажри иләл мағриби халисан лилләһи таъала. Аллаһу акбар!
Қазақша мағынасы: Аллаһтың разылығы үшін таң білінгеннен күн батқанға дейін рамазан айының оразасын ұстауды ниет еттім.
Ауыз ашу дұғасы:
Аллаһумма ләкә сумту уә бикә әмәнту уә ъаләйкә тәуәккәлту әу ъала ризқикә афтарту фағфирли зунуби ма қаддамту уа мә аххарту. Аллаһу акбар!
Қазақша мағынасы: Аллаһым! Сен үшін ораза тұттым, Саған иман келтірдім, Саған тәуекел еттім. Сенің берген ризығыңмен ауыз аштым. Уа кешірімді Аллаһым! Менің әуелгі және кейінгі күнәларымды кешіре гөр…

Жиі кездесетін сұрақтар мен жауаптарды dintube.ru сілтемесі бойынша таба аласыздар.

✨✨✨ӘЛЕУМЕТТІК ЖЕЛІЛЕР✨✨✨

Вк (негізгі топ): vk.com/juregimde
Вк (әйелдер форумы): vk.com/juregimde1
Вк (ораза 2016): vk.com/juregimde_oraza
Твиттер: twitter.com/juregimde
Инстаграм: instagram.com/zhuregimde

өте пәк,өте кербез сұлу Көкше…
Иә,Қазақстанның қай аймағын алсақ та, ауыз толтырып айтуға тұрарлық мекендер көп. Біреуі табиғатымен ерекшеленсе, енді біреуі зәулім ғимараттары,әдемі қалаларымен мақтана алады. Ал, біз сұлу Көкшенің әрбір орманымен, табиғатымен мақтана аламыз.
Өзім осы Көкшеге жақын тұрсам да жақын аудандарын, ауылдарын һәм тауларына шығып көрмеппін. Және ең үлкен қателігім де сол секілді. Неге десеңіз, колледжіміздің директоры Ахат Нұртас Ахатұлымен бірге Солтүстік Қазақстан облысы Айыртау ауданы аймағына табиғатқа саяхатқа шыққанда түсіндім.(Негізі Көкшетауға Ақмола облысының солтүстігі мен Солтүстік Қазақстанның кейбір аудандары шектесіп жатыр) Керемет табиғаты, жартастардың биігіне шыққандағы бес жағыңда бес көл қоршаған, ормандары мен таулары ерекше таңдандырады. Нағыз жазғы демалысты армансыз өткізуге тұрарлық мекен!-деп ауыз толтырып айтуға болады екен. Біреу білсе, біреу білмес Көкшетауда шығыстан батысқа қарай Көкше, Жақсы Жалғызтау, Жаман Жалғызтау, Имантау, Жыланды, Сандықтау, Үлкентүкті, Бұқпа, Қошқарбай, Зеренді таулары, Айыртау, Сырымбет секілді таулар мен Шортанды, Бүркітті асуы, Үлкен Шабақты, Кіші Шабақты, Бурабай, Айнакөл, Айдабол, Зеренді, Қопа, Атансор, Майлысор, Мамай, Саумалкөл, Шалқар, Үлкен Қоскөл, Кіші Қоскөл, Жолдыбай, Қалмақкөл, Шағалалытеңіз, Сілетітеңіз, Теке, Үлкен Қараой, Кіші Қараой, Қалибек, т.б. көлдер орналасқан.Осылардың ішіндегі біз барған Сырымбет, Айыртау жерлері. Айыртау ауданындағы Шалқар демалыс орынындағы саяхат естен кетпестей өтті. Ақан сері бабамыз жатқан мазарға барып құран бағыштап, кейін Айыртау, Имантау, Сандықтау, Бұқпа, Зеренді таулары мен Шалқар секілді көлдерді бір сәтке көзімізбен көріп қайттық. Оған дәлел төмендегі суреттер.
Сырымбетке жол тартқанымыздың себебі, ол жерде белгілі этнограф-ғалым Шоқан Уалихановтың туып-өскен жер, әжесі Айғаным жатқан жерлерге барып,өлкемен танысып қайту. Шоқанның оқыған мектебі, үйі, мешіті, сайманханасы, моншасына дейін, Сырымбет ауданындағы Шоқан Уалихановқа арналған мұражайыі секілді тың дүниелермен танысып, көріп, біліп қайттық. Сонымен қатар Ағынтай мен Қарасай батырлардың кесенесіне барып,құран оқып, тамашалап қайтқан жайымыз бар.
Қысқа алғанда осы сапарымызда көп дүниелерге қанығып, сусындадық. Қазақстанның әрбір азаматына осы жерлерге барып, көзбен көріп қолмен ұстап қайтуға кеңес беремін)))) (суреттер салайын десем фото форматы келмей, жүктелмей тұр, кешірім сұраймын)
#Көкшетау #Сырымбет #Айыртау

Ақпараттық соғыс деген не еді?

Жалпы соғыс — бір мақсат үшін екі немесе одан көп жақтың қарулы қақтығысы. Ал, ақпараттық соғыстың мақсаты — жауды толық жеңіп, жойып жіберу емес, оған қарсы басымдылыққа ие болу. Бұл дәстүрлі соғыстың жалғасы болуы да мүмкін немесе кез келген уақытта да пайда бола алады. Мысалы, саяси дағдарыс кезінде немесе сайлау кездерінде.

Ақпараттық соғыс әдістеріне ақпарат және байланыс құралдары арқылы манипуляция, үгіт-насихат, дезинформация, түрлі жолдармен деректер жинау кіреді. Жалпы айтқанда психологиялық соғыс деп те атауға болады. Өйткені, басты нысана — сана.

Ақпараттық соғыстың негізгі мүдделері — адамдардың құндылық жүйелеріне әсер ету, олардың ойлау жүйесін бұзу, қарсылық көрсетуге дәрменсіз қылу. Ең күшті қару түрі — БАҚ, оның ішінде — ТВ. Көгілдір экран арқылы таратылатын ақпарат әлде де интернет пен әлеуметтік желілерге қарағанда күштірек, сенімдірек, әсерлірек.

Манипуляция үнемі жасырын түрде жүреді. Егер сіз манипуляцияны байқап қалсаңыз — демек, бұл іске аспай қалды деген сөз. Манипуляция техникасы әрдайым жетілдіріп, жаңа әдістерге жүгініп отырады. Бірінші кезекте не айтылғаны емес, оның қалай айтылғаны маңызды. Қазіргі кезде үгіт-насихат ашық түрде жүрмейді. Яғни, бір нәрсенің нақты жауабы берілмейді. Алайда, қоғамды бір жауапқа қарай итермелейді. Осылайша қоғам шешімді өзі тапқандай ойда болады.

Ақпараттық соғыста манипуляторлардың қолданатын әдістері:

— Терминдер қолдану. Болып жатқан оқиғаны жаңа терминдермен, сөздермен баяндайды. Насихатшылар жаңа ұғым, сөздер арқылы бір топты, оқиғаны жақсы немесе жаман жағынан көрсете алады.

— Статистиканы асыра пайдалану. Сандарды қолдану — мықты әдіс. Кез келген адам сандардың шыншылдығына назар аудара бермейді. Сандарды сенімді ақпарат ретінде қабылдайды.

— Күн тәртібін өзгерту. Манипуляторлар өздеріне қолайлы тақырыптарды алға шығарып, күннің негізгі тақырыбын бұра алады. Ақпараттық соғыс кезінде жан жақтан неше түрлі жаңалықтар легі ағып жатады. Адамдар оның бәріне еріп үлгермейді, басты тақырыпқа байланып қалады.

— Белгісіз ақпарат көзіне сілтеме. Кей ақпарат сенімді болып көріну үшін жалған ақпарат көздеріне сілтеме беріледі. Ал, оны бәрі тексеріп отырмайды. Адамдар ресми ақпаратқа сенбей түрлі сыртқа «ағып» кеткен ақпарат көздеріне сенеді. Нәтижесінде берілген ақпарат сенімді, шынайы болып көрінеді.

— Мамандар пікірі. Бір оқиғаға байланысты мамандардың пікірі жарияланады. Адамдарға бәрібір ол адамның шындығында кім екені, сол тақырыпты жақсы меңгеріп, меңгермегені. Мұндай ақпарат та сенімді болып көрінеді.

— Жеңіл трансқа енгізу. Дыбыстық және бейне ақпараттар легі адамды есінен тандырып, сараптай алу мүмкіндігінен айырады.

— Альтернатив сценариймен үркіту. Кез келген жаман оқиға кезінде болашақта бұдан да жаман болуы мүмкін екені айтылып, шүкір ету режиміне енгізіледі.

Адамдар манипуляциядан неге жеңіледі?

Өйткені, адам өзін қоғамның бір маңызды бөлшегі ретінде сезінеді. Көпшіліктің пікірін дұрыс деп қабылдайды, өзі де көпшілікпен бірге болғысы келеді. Сондықтан да БАҚ көптеген пікірлерді қоғамдағы көпшіліктің пікірі ретінде беруге тырысады. Түсініксіз мәселелердің шешімін астыртын әрекеттерге әкеліп тірейді, қоғам да солай қабылдайды.

Манипуляциядан қорғаныс амалдары қандай?

Негізі жалғыз бір-ақ әдіс бар: БАҚ-ты қадағаламау. Ешқандай жаңалық оқымау, ТВ қарамау, интернетке кірмеу, алыс жаққа қашып кету — әлбетте қиын нәрсе. Мұндай радикал шараларға бармау үшін ең болмаса мына қарапайым қағидаларды ұстанған жөн:

— Жаңалықты қарау емес, оқуға тырысыңыз. Адам бір нәрсені оқыған кезде оның миы да жұмыс істеп, ақпаратты сараптай алатын болады. Ал, бір нәрсені көзбен қарау мидың ондай мүмкіндігін шектейді. Сондықтан адамдар көрген нәрселерінің әсерінде қалып қояды.

— Манипуляция әдістерін біліп жүріңіз. Егер сіз бір әрекеттен манипуляция элементтерін байқасаңыз — демек, бұл сізге әсер етпеді деген сөз.

— Ешқандай ақпаратқа сенбеңіз. Сіз егер бір жақтың манипуляциясынан құтылдым деп ойласаңыз — екінші жақтың тұзағына да түсіп қалуыңыз мүмкін. Ақпараттық соғыс кезінде бәрі өтірік айтады.

Сондай-ақ ақпараттық соғыс бірнеше кезеңге бөлініп жүргізілетінін ұмытпаңыз. Сондықтан ұзақмерзімді «атысқа» шыдамайтын болсаңыз уақытша «ақпарат оразасын» ұстаңыз. Мысалы, бір жаққа демалысқа кету, кітап оқу, жаңа сериалға отыру дегендей.

Астана қаласы әкімінің орынбасары Малика Бектұрова 9-11 маусымда Варшавада (Польша) өткен жыл сайынғы Жаһандық әйелдер саммитіне қатысты. Биылғы саммит «Әйелдер – сандық технологиялар дәуірінде инклюзивті экономиканы құру үшін» тақырыбымен өтті. 70-тен астам елден 1000 астам табысты бизнес пен саясаткер әйелдер осы беделді алаңда өз тәжірибелерімен әрі пікірлерімен алмасты. Бұл саммит мемлекеттік және жеке өмірдің барлық салаларында тиімді дамуға қол жеткізудегі жаңа креативті ойлармен алмасу мүмкіндігін бере алатын аса маңызды іс-шара болып табылады.

«Бүгінгі таңда бизнестегі басшы әйелдердің үлесі 42%-ға жетіп отыр және бұл көрсеткіш тұрақты түрде артып келеді. Астанада бұл үрдіс ШОБ саласында ерекше байқалады, сондықтан озық тәжірибені меңгеруге және жетістіктермен бөлісуге мүмкіндік тудыратын осы сияқты форумдарды өткізу өте орынды» — деп баяндады «Қалалардың болашағы» атты форумда Қазақстанды таныстыру барысында М. Бектұрова.

Астана әкімі орынбасарының Варшаваға сапары барысында Қазақстан Елшілігінің қолдауымен Польша елордасының Вице-Президенті М. Ольшевскимен кездесу ұйымдастырылып, оның барысында Астана мен Варшава арасындағы ынтымақтастықты одан әрі нығайтудың мәселелері талқыланды. Тараптар қалалық әкімдіктер арасындағы серіктестіктің ахуалы мен әлеуетін жоғары бағалады. Қаланы дамыту ісіндегі бай тәжірибені ескере отырып, 2020 жылға дейінгі арнайы ынтымақтастық бағдарламасына қол қою туралы келісімге келді. Сонымен қатар, осы құжат экономикалық және инвестициялық серіктестікті дамытуға бағытталған шараларды қамтитын болады. Алдағы уақыттаВаршавада өткізілетін НАТО Саммиті аясында поляк тарапы ірі халықаралық шараларды жоғары деңгейде, соның ішінде ЭКСПО-2017 өткізу бойынша Астананың тәжірибесін зерделеуге қызығушылық танытты.

М. Бектұрова Польшаның Даму министрлігінде өткен кездесуде поляк бизнес өкілдеріне Астананың инвестициялық шарттары мен басымды жобалары туралы баяндап берді. Бұл кездесу Қазақстан Елшілігі үстіміздегі жылдың мамыр айында ұйымдастырған Польша Даму Вице-министрі Р. Домагальски-Лабэндзки және Астана қаласының Әкімдігі арасындағы келіссөздердің жалғасы болды. Семинарға Қазақстанда жұмыс істейтін және ынтымақтастыққа қызығушылық танытып отырған Польшаның 18 компаниясы қатысты. Кездесу қорытындылары бойынша тараптар Польшаның құрылыс кластерімен белсенді ықпалдастық орнатуға уағдаласты, сондай-ақ тұрғын-үй коммуналдық шаруашылық, баламалы энергетика, ауыл шаруашылығындағы қайта өңдеу және көлік-логистикалық жобалары бойынша ынтымақтастық мүмкіндіктерін зерделеу туралы келісімге қол жеткізді.

Материал Астана қаласы әкімдігінің ресми сайты astana.gov.kz деректері бойынша әзірленді.

Жаздың алғашқы айында «Арман» лагері 1500 астам балаға естен кетпес тамаша жазғы демалыс сыйлады. Мұнда нағыз балалық шақ атмосферасы орнаған. Кішкентай астаналықтар спортпен шұғылданып, түрлі конкурстарға қатысады, тәлімгерлерімен бірге ашық ауада тынығады.



Лагерьде күн таңғы жаттығудан басталады. Балаларды спорт пен дене шынықтыруға баулу үшін салауатты өмір салтына баса назар аударылады. Сонымен қатар, олардың шығармашылық қабілеттіліктері де дамытылады. Әрбір күн белгілі бір қызықты тақырыпқа арналады.

– Мұнда кеш ұйықтайсың, ауа таза, әдемі. Қалада машиналар көп, биік үйлер. Күн сайын өтетін би кештерін ұнатамын. Көңілді, мысалы, кеше жатар жатқанша «Таңқурай күні» өтті, – дейді Камила Ахмеджанова.



«Арман» лагеріне демалуға Астана қаласының Арнайы коррекциялық мектеп-интернатының да шәкірттері келді. Мұнда олар дос болуды, бірін-бірі түсінуді және қоғамда өмір сүруді үйренеді. Сонымен қатар тұрмысы төмен және көп балалы отбасылардан шыққан, сондай-ақ, жетім 250 жуық балаға «Арман» лагері есігін айқара ашып, қонақжайлық көрсетті.

– Оларды да ойындарға тартуға тырысамыз, әрине, егер қиын тапсырмалар болса, оларға оңайларын береміз, бірақ басқа балалардың жанында болатындай. Оларды бөліп тастамаймыз, олар да сау балалардың істегенін істеп, орындау керек, – дейді «Арман» лагерінің бірінші маусымындағы аға тәрбиеші Жәннат Әбенова.



Балалар табиғат аясындағы демалыстың ең үздік екендігін бірауыздан құптады. Жалпы, лагерьде бес маусым өткізілмек. Осы уақыттың ішінде мұнда 1500 астам елордалық балғын тынығады. Соның ішінде 1000 бала – халықтың осал топтарына жатады, олар үш маусым бойы лагерьде тегін демалады.

Материал Астана қаласы әкімдігінің ресми сайты astana.gov.kz деректері бойынша әзірленді.

Соңғы кезде мені профориентация мәселесі толғандырып жүр. Өмірде жар таңдаудан және мамандық таңдаудан қателеспеу керек деген сөздің жаны бар секілді. Өз ісіңнен кайф алып жұмыс жасау — ол да бір бақыт.

Осыдан он екі жыл бұрын армандаған журналистикадан бас тартып, «престижный» заңгер мамандығын игерем деп шештім. Қазірге дейін азды-көпті білім мен тәжірибе жинадым. Алайда, соңғы кезде бұрынғы арманым оянып, қайта-қайта қол бұлғап шақыруда.

Кезекті демалысымды өткізуге барған Жапонияның релакс атмосферасы әсер етті ме, еш алдын-ала жоспарсыз, қолыма телефонымды алып қызық үшін қысқа видео жасадым. Жасаған сайын процесс ұнап, сапардың соңына дейін видео түсірумен болдым. Нәтижесінде бір сағатқа созылған видео шықты. Бастысы, процесс кезінде байқағаным, видеоны түсіріп, оны монтаждап, әуен қосып, толық видео жасаудан рахаттандым, барлығы жеңіл, еш қиындықсыз өзімен өзі жасалғандай болды. Бұл рахаттану — өз бейнеңді жариялап, эгоңды қанағаттандырудан болған рахаттану емес, жай ғана сүйікті нәрсеңді жасаудан болған рахаттану болды.

Қазір «Мен өз сүйікті ісімді таптым, енді жұмысымды тастап, саламды өзгертем» десем артық айтқан болармын. Алайда, шамам келгенше, хобби ретінде өзіме ұнайтын нәрсемен айналысуды жалғастырғым келеді. Бұдан не шығарын уақыт көрсетер. Әзірге дайын болған видеолармен бөлісе отырайын, кім білген, біреуге болмаса, екеуге қызық болар ;)






Бұл серияның соңғы видеосын бұйырса жақын арада жариялаймын. Каналыма жазылсаңыз, оны жариялаған бойда көресіз. ;)

Жаз сайын еліміздің һәм жақын шетелдің бір-екі қалаларын аралап бару жақсы дәстүрге айналып бара жатыр. Мақсаттары әрқашан әртүрлі, қыдырып, я білім алу, туысқандық, немесе жастар лагеріне. Осы жолы еліміздің ескі шаһарларының бірі — Шығыстың қазрігі астанасы (әлбетте, семейліктердің ашуын келтіру үшін жазып жатқаным жоқ) Өскемен қаласына ат басын бұрдым.
Өскеменге жазда келсеңіз бірден көзге түсетіні — ағаштар, парктердің көптігі. Қазақстандағы жалғыз парк осы қалада, Жастар саябағының ортасында отырып, көліктің дауысын есітмейсіз.

Көшеде жайқалып ақ қайындар жатыр. Әрине, қаланың жасыл болуы себебі — экологиясының нашарлығында, әсіресе, «выброс» кезінде. «Выброс» — деген ірі өндіріс орындарының зиянды заттарды шығаруы деп дефинициаласам болады-ау.

Қаланың ішінде «ескілік» дейміз бе, «ретролық» дейміз бе, әйтеуір, кешегі заманның иісі аңқып тұр. Әсіресе, көп қабатты үйлердің мүлдем жоқтығында бір кешегі күннің ала алмай кеткен өші жатқандай.
1720 жылы негізін қалағандықтан болар, бұл қаланың адам саны Павлодар, я Қостанайдан аспаса да, алып жатқан аумағы әлдеқайда үлкен боп көрінді. Яғни, кеңес заманында жоспар бойынша салынған қалалардан қарағанда, елу жыл сайын өз орталықтары мен әкімдіктері пайда болғандықтан сондай-ау деймін. Алайда, сол ертедегі орталыққа бармаса болмайды.


Кешегі көпес қыздарының үйлері бүгінде сұлулық салондарына айналды.

Мына ғимараттың не болғанын білмеймін, алайда, олимптай көршісі барына қарттың мәз еместігі көрініп тұрғандайын.

Өскеменнің көліктерінде де кешегі күннің суықтығы сақталғандай. Ал мына бір көліктің не үшін арналғаның әлі де түсінбей келемін.

«Кеңес Үкіметіненбіз» деп зарлап тұрған тағы бір өзгешелік — автобустар. Жаңа автобустар Астанада бар, Алматыда, бар, Павлодарда бар, бірақ, Өскеменде емес.

Мені «Семейде жасалынатын автобустар бар» дегенге көндіргісі келді, тіпті біреуін көрсетті, сол біреуін көрсетіп отыру үшін әкелген-ау деп қалдым. Қаланың лас болу себебінің бірі осы ескі автобустар да болуы мүмкін.

Жаңадан не бар деген сұраққа "Қазақстан 2050" деді.


Еліміздің шағын және орта бизнес өкілдерінің креативтілігіне қашан да сүйсініп қараушы ем. Мына бір шауырма шығарушылар Макдональдсті теріс аударып тастады.



Мына бір ғимарат жәндіктердің музейі екен. Әрине, ол осындай болуы тиіс, пластмассалы таэурлерде жәндіктер бола алмайды ғой.

Бұл қалада бәрінен де таңқалдырғаны — депутаттардың қоғамдық қабылдауы. Ешбір пафоссыз, еш мақтанышсыз таңдалған офис.


Бәрінен де халқының жол жүру ережесін сақталуы ұнайды. Жасыл жанбағанша ешкім жолды кесіп өтпейді, көліктердің бар-жоғына қарамай, себебі, бұл жерде милиция көп.

Иә, әсіресе, маусым айында қоғам сақшылары көп болады. Жыл сайын бұл жаққа бір елдің басшысы келеді екен. Бір уақытта.

Олар өте көп, әрбір жерде, олардың отыру пунктері бір жағынан шаурма жасайтын бутикке, бір жағынан кішігірім кафеге ұқсайды.

Бұл қаланың басты өзгешелігі — 4 жағалаудың болуы: Ертістің екі жағасы мен, Үлбінің екі жағасы.

Үлбі Кенді Алтайдан бастау алып, Өскеменге келген сәтте Ертіспен бірігеді. Желтоқсанда қатып, сәуірде молданатын қасиетке ие.


Заречный базары — барлығы көк түсті палаткаларда болғаны қызық.

Мен білетін Тимоштардың барлығы «ТамЕрлан» еді, мына бір сауда үйінің атауы Шығыстың Ресейге жақын болуы себепті ме деп қалдым.

Ғимарат үстіндегі жарнама жақсы дамыған қала. олар барлық жерде. Әрбір ғимараттың үстінде. Олар барлық жерде!



Өскеменнің басты символы — "Қазақстан" «голивуды».

Иә, бір қарағанда Ресейдегі Барнаул, Омбы қалаларының типінде. Сырт көзге қазақ санының басымдығы көрінбейді. Заманауи ғимараттар мен биік мұнарлар, тұрғын-үй кешендерін кездестіру қиынға соғады. Бірақ, соған қарамастан, жаз айларында бір қыдырып қайтқыңыз келсе, тауды көріп, тамаша парктерде серуендеп қайтқыңыз келсе — Өскемен керемет қала.
Келетін болсаңыз, ешбір қаламызда жоқ таза орыс асханасынан дәм татып қайтыңыз.

11-13 маусымда Астанада қалалық қоғамдық көліктердің қозғалыс сызбасы уақытша өзгереді. Бұл Орынбор көшесінің Қонаев көшесінен Достық көшесіне дейінгі бөлігінде жөндеу жұмыстарын жүргізуге байланысты жүзеге асырылады.
Қозғалыс сызбасына өзгерістер енгізілетін бағдарлар төменде көрсетілген:
— №№12, 28 маршруттар: Қонаев к-сі – Түркістан к-сі – Достық к-сі, одан әрі сызба бойынша. Орынбор көшесімен жүрмейді;
— №№18, 52 маршруттар: Сарайшық к-сі – Түркістан к-сі – Достық к-сі, одан әрі сызба бойынша. Қонаев және Орынбор көшелерімен жүрмейді;
— №№ 19, 60 маршруттар: Орынбор к-сі – Қонаев к-сі – Түркістан к-сі – Достық к-сі – Орынбор к-сі, одан әрі сызба бойынша.
— №№21, 70 102э маршруттар: Қонаев к-сі – Түркістан к-сі – Достық к-сі – Орынбор к-сі, одан әрі сызба бойынша.
— №32 маршрут: Достық к-сі – Орынбор к-сі, одан әрі сызба бойынша. Түркістан және көшелерімен жүрмейді;
— №35 маршрут: Сарайшық к-сі — Орынбор к-сі – Қонаев к-сі – Түркістан к-сі –Достық к-сі – Орынбор к-сі, одан әрі сызба бойынша.
— №№40, 51, 56, 60, 101э маршруттар: Орынбор к-сі – Қонаев к-сі – Түркістан к-сі – Достық к-сі, одан әрі сызба бойынша.
— №№46, 50 маршруттар: Достық к-сі – Түркістан к-сі – Сарайшық к-сі – Орынбор к-сі – Қонаев к-сі – Түркістан к-сі — Достық к-сі, одан әрі сызба бойынша.

Айта кетейік, қалалық қоғамдық көліктің бұрынғы қозғалыс кестесі Астана қаласының көше-жол желісінде жөндеу жұмыстарының аяқталуына қарай қалпына келтіріледі.

Материал Астана қаласы әкімдігінің ресми сайты astana.gov.kz деректері бойынша әзірленді.

Маусымның 11 күнінен бастап елорданың көше-жол желісіне түсетін жүктемені азайту мақсатында үш көшеде біржақты көлік қозғалысы енгізілді: Абай даңғылы (Сарыарқа даңғылынан Пушкин көшесіне дейін), Кенесары көшесі (Пушкин көшесінен Сарыарқа даңғылына дейін) және Янушкевич көшесі (Абай даңғылынан Иманов көшесіне дейін). Біржақты көлік қозғалысы енгізілген көшелердің жалпы ұзындығы – 9,6 км.



Бастапқы кезеңде жол полициясының қызметкерлері біржақты қозғалыс енгізілген көшелерде жүргізушілерді жол жүру ережесін бұзғаны үшін әкімшілік жауапкершілікке тартпайтын болады. Бірақ апатты жағдайларды болдырмау үшін Әкімшілік полиция басқармасы мен жергілікті полиция қызметінің өкілдері он күн бойы біржақты көлік қозғалысы енгізілген көшелермен жүру ережелерін түсіндіру жұмыстарын жүргізеді. Ал 20 маусымнан бастап тәртіп бұзушылар әкімшілік жауапкершілікке тартылатын болады. Айыппұл мөлшері – 5 АЕК.

Еске салайық, 28 мамырда Әуезов көшесінде (Республика даңғылынан Молдағұлова көшесіне дейін) және Желтоқсан көшесінде (Мәскеу көшесінен Кенесары көшесіне дейін) біржақты көлік қозғалысы енгізілген болатын. Алдын ала мәліметтер бойынша, жол желісіне түсетін жүктемені азайту есебінен көлік ағынының жылдамдығы аталған көшелерде 30% ұлғайған, қиылыстарда тұрып қалу уақыты 78-ден 40 секундқа дейін төмендеді, көлік құралдарының қозғалыс қарқыны 20% өсті.

Ескерту. 11-13 маусымда Қонаев көшесінен Достық көшесіне дейінгі жол бөлігінде жөндеу жұмыстарын жүргізуге байланысты Орынбор көшесі толығымен жабылады.

Материал Астана қаласы әкімдігінің ресми сайты astana.gov.kz деректері бойынша әзірленді.

11 маусымнан бастап елордада жолаушылар мен жүк тасымалдау үшін жаңа тұрақты қалалық бағдарлар іске қосылады.

№ 37 маршрут Т/ж вокзалынан – Ғарыш орталығына дейін жүреді: Т/ж вокзалы –Біржан сал к-сі – Есенберлин к-сі – Бейбітшілік к-сі – Молдағұлова к-сі – Республика даңғылы – Қабанбай батыр даңғылы – № 31 көше – Тұран даңғылы – айналма жол айырығы – Қабанбай батыр даңғылы – содан кейін осы сияқты сызбамен кері қайтады.



№ 58 маршрут «Шарын» базарынан«Бастау» ТК дейін жүреді: «Шарын» базары –Алаш тасжолы – Бөгенбай батыр даңғылы – Айманов к-сі – Дүкенұлы к-сі – Уәлихановк-сі – Кравцов к-сі – Қажымұқан к-сі – Сәтпаев к-сі – Күйші Дина к-сі – Жұмабаев даңғылы – Балқантау к-сі – Қордай к-сі – соңғы аялдама «Бастау» ТК.



№53 маршрут «Шарын» базарынан Клиникалық-оңалту кешеніне дейін: «Шарын» базары – Алаш тасжолы – Бөгенбай батыр даңғылы – Айманов к-сі – Дүкенұлы к-сі –Уәлиханов к-сі – Сейфуллин к-сі – Сарыарқа даңғылы – Тұран даңғылы – Керей, Жәнібек хандар к-сі – Қабанбай батыр даңғылы – Рысқұлов к-сі – Орынбор к-сі – № 31 көше –соңғы аялдама «Клиникалық-оңалту кешені».



Жаңа автобустар сыйымдылығы 110 адам, қозғалыс интервалы 10 — 30 минут.

Материал Астана қаласы әкімдігінің ресми сайты astana.gov.kz деректері бойынша әзірленді.