Жыл сайынғы ЖОО арасындағы журналистердің Xреспубликалық пән олимпиадасы 29-30 наурыз аралағында Е.Бөкетов атындағы Қарағанды мемлекеттік университетінде өтті. Олимпиадаға жалпы саны 16 команда қатысты. Еліміздің белді оқу орындарынан келген болашақ журналистердің білімі мен білігін анықтауға бағытталған сайыс екі кезеңнен тұрды. Қатысушылар олимпиаданың алғашқы күні таныстыру және эссе жазу бойынша бақ сындады. Олимпиада тақырыбы Қазақ телевизиясының 60 жылдығына орай «Теледидар және дәуір» болды. Командаларға әділ баға беруге БАҚ саласының майталмандары жиналды. Университет ұжымы олимпиада қатысушыларына қаланың көрікті жерлерін аралатты. Студенттер қонақтарға арнап жырдан шашу шашып, көңілді кеш сыйлады. Сайыстың екінші күні мамандыққа арналған пәндер бойынша тест тапсырмалары орындалды. Шешуші жедел ақпарат кезеңінде қатысушылардың журналистке тән жеделділігі мен нақтылығы сыналды. Олимпиада қортындысы екі кезең бойынша анықталып, жеңімпаздар марапатталмақ.

Л.Н.Гумилев атындағы
Еуразия ұлттық университетінің
«Күлтегін» командасы

Е.А.Бөкетов атындағы Қарағанды мемлекеттік университетінде журналистика пәні бойынша Х республикалық пән олимпиадасы өтіп жатыр. Оған еліміздің түкпір-түкпірінен 16 ЖОО студенттері келді. Жыл сайын өткізу дәстүрге айналған журналистер додадасына биыл студенттер ерекше көп жиналды. Республика бойынша барлығы 48 қатысушы бақ сынауда. Шараның шымылдығын ф.ғ.д., профессор Қойлыбай Асанов ашып берді. Содан соң ҚарМУ-дің филология факультетінің деканы, ф.ғ.д. Мұхамедқали Ілиясұлы мен облыстық «Saryarqa» телеарнасының директоры Берік Смағамбетұлы Дүйсетаев сөз сөйлеп, барша қатысушыларға сәттілік тіледі.
Екі күн бойы болашақ журналистерге телевизия, газет, интернет-журналистика саласында көп жылдар бойы қызмет етіп жүрген білікті журналистер әділ қазылық етеді. Атап өтер болсақ, облыстық «Saryarqa» телеарнасының аға-редакторы Әли Тойжігіт, ф.ғ.д., профессор Қойлыбай Асанов, ҚарМУ оқытушысы, ф.ғ.к., доцент Жанар Сембекқызы, «Хабар» телеарнасының Қарағанды қаласындағы меншікті тілшісі Ардақ Қабыханов, «31 арнаның» қаламыздағы меншікті тілшісі Мейрамкүл Салқымбаева, облыстық «Орталық Қазақстан» газетінің тілшісі Қызғалдақ Айтжанова, республикалық «Qasym» сайтының редакторы Нұрлыхан Қалқаманұлы.
Байқау екі кезеңнен тұрады. Бірінші кезең — таныстыру. Әр қатысушы команда «Теледидар және дәуір» тақырыбына дайындап келген 5 минуттық бейнематериалдарын көрсетіп, өз топтарын таныстырды. Ал, екінші кезеңінде әр студенттің шығармашылық қабілеті сыналды. Олар ұсынылған тақырып бойынша эссе жазудан жарысты. Эссе жазу барысында студенттің берілген тақырыпты аша алуы, өзіндік ой-пікірі, ойын жеткізе алуы, сауаттылығы сияқты мәселелер басты назарға алынды. Бүгінгі сынақтар осымен аяқталып, қатысушылар академик Е.А.Бөкетов атындағы Қарағанды мемлекеттік университетінің тарихи мұражайына саяхат жасады. Ал кешке ұйымдастырушылар мен студенттер келген қонақтарға «Университет» мейрамханасында концерттік бағдарлама дайындап, дастархан жайды. Олимпиаданың екінші күнінде, яғни бүгін студенттер тағы екі сайыс кезеңдерінен өтеді. Ол «Жедел ақпарат» және «Қазақ журналистикасының тарихы», «Қазіргі журналистиканың жанрлық пішіндері мен қызметі» және «Телерадиожурналистика» пәндері бойынша тест тапсырмалары.

Көктемгі сулардың еруіне байланысты елорданың кейбір аудандарына су басу қаупі төнеді. Оның алдын алу мақсатында қаланың коммуналдық қызметтері судың астында қалуы мүмкін аудандардың мониторингін жүргізіп, нөсер су канализациясын тазартады. Ал су қоймаларының жанында орналасқан аудандар коммуналдық қызметтердің ерекше бақылауында, деп хабарлайды елорда әкімдігінің ресми сайты.

Астана аумағында су астында қалуы мүмкін 27 учаске бар. Бұл жерлерде бақылау жұмыстары тұрақты түрде жүргізіледі.

Кешенді жоспарды тиімді түрде жүзеге асыру мақсатында арнайы құрылған топ нөсер су канализациясы коллекторларының баулықтарын,қабылдағыштары мен торларын, су өткізу арналарын, құбырларды, арықтарды тазарту жұмыстарын қадағалап отырады.

Мәселен, бүгін Сарыарқа ауданында жүргізілген жұмыстардың нәтижесінде қардың 430 текше метрі шығарылып, су өткізетін құбырлардың 550метрі, арықтар мен нөсер су канализациясының 440 метрі тазартылды. Қарды шығару, суды сору жұмыстарына арнайы техниканың 70 бірлігі жұмылдырылды.

Алматы ауданында қыскы кезеңде қардың 1,2 млн текше метрі шыгарылды. Аталмыш жұмыстарға арнайы техниканың 109 бірлігі тартылған болатын. Сондай-ақ, көктемгі кезеңде еріген суларды еш қиындықсыз өткізу мақсатында арық-науа желілерінің 11,9 шақырымы қар мен мұздан тазартылды. Су таскындары кезеңінің басынан суды сору шараларына 209 арыз түсті. Олардың барлығы бойынша тиісті жұмымтар атқарылды. 23 наурыздағы жағдайға сәйкес тасқындарға қарсы шаралардың аясында мердігер ұйымдар Есіл ауданының аумағын қардан тазарту жұмыстарын жүргізіп жатыр. Аталмыш жұмыстарға арнайы техниканың 138 бірлігі тартылды. «Астана-Тазалық» ЖШС арық-науа желілерін қардан тазарту жұмыстарын жүргізді.

Тасқын суларға қарсы жұмыстар елорданың әр ауданында жүйелі түрде жүргізіледі.

Астана әкімінің орынбасары Қосман Айтмұхаметов бүгін қаланың шеткі аудандарында болып, су астында қалуы мүмкін аудандардағы жағдайды өз көзімен көріп қайтқан болатын. Оның айтуына қарағанда, қаладағы проблемалы аудандардың саны көп емес. Алайда тұрғындардың өзіне тиесілі аумақтан қарды дер кезінде шығармауы салдарынан көшелер мен аулаларда сулар көптеп жиналса керек. Мысалы, Кирпичный ауданын, Көксеңгір, Арқалы, Қамысты көшелерін су біршама басқан.

Жалпылай алғанда, қаладағы су басу қаупіне қатысты жағдай бірқалыпты. Қазіргі таңда елордада ауа райы жауын-шашынды.

Жүргізіліп жатқан шаралардың барлығы төтенше жағдайдың, қала аумағындағы жеке аудандардың су астында қалуының алдын алуға септігін тигізіп, көктемгі кезеңдегі еріген, тасқын суларды қауіпсіз түрде өткізу жұмыстарын ұйымдастыруды қамтамасыз етеді.

Су басу қаупі төнген жағдайда елорда тұрғындары 109 номері арқылы қала әкімдігінің бірыңғай байланыс орталығына хабарласа алады.

Ұлыстың ұлы күні – Наурыз мейрамына орай елордада мәдени ойын-сауық бағдарламасы әзірленді. Дәстүр бойынша басты шаралар 21-22 наурызда қаланың ашық алаңдарында сағат таңғы 10.00-ден кешкі 18.00-ге дейін өтеді, деп хабарлайды елорда әкімдігінің ресми сайты Мәдениет, мұрағаттар және құжаттама басқармасына сілтеме жасап.

Биыл халықтық серуен «ЭКСПО» көрмесі аумағында ұйымдастырылады. Мерекелік шаралар, сондай-ақ, «Қазақ елі» алаңында, Қалалық алаңда, «Студенттік» саябақта және қаланың тұрғын алаптарында да өтетін болады.

«21-22 наурызда «Астана ЭКСПО» халықаралық мамандандырылған көрмесі аумағында киіз үйлер тігіліп, Этноауыл ашылады, жиналған қауымның назарына мерекелік концерт ұсынылады. Астана қаласы театрларының әртістері мен этномәдени бірлестіктердің өкілдері әрбір киіз үйдің жанында қазақ халқының салт-дәстүрлерін көрсетеді. Бұдан басқа, фуд-корт аймағы ұйымдастырылады. Онда палау, наурыз көже мен бауырсақ дайындауға арналған қазандар тұрады.

Сауда орындарында шығыс аспаздығынан ыстық тағамдар сатылады. Сондай-ақ сәндік-қолданбалы өнер бұйымдарын сату-көрмесі ұйымдастырылады», — делінген хабарламада.

Этноауыл аймағында халық арасында қазақ күрес, арқан тартыс, гір көтеру, қой көтеру сияқты ұлттық ойындар ойнатылады.

Мұнымен қоса, Наурыз мейрамын мерекелеу аясында этноауыл аумағында ит жарысы, тазы мен төбеттер көрмесі өтеді.

Астананың мәдениет мекемелерінде де Наурыз мейрамына арналған шаралар ұйымдастырылады.

21 наурызда Конгресс-орталықта қазақстандық «Жаңарған жер, бақ қонған нұрлы ел» мюзиклі көрсетіледі.

«Шараға жас таланттар, опера, балет, театры сынды сахна өнеріндегі жаңа тұлғалар тартылған. Мюзикл барысында симфониялық оркестр әлемдік классикалық музыка, қазақстандық композиторлардың белгілі композицияларын орындайтын болады», — делінген ведомствоның хабарламасында.

Осы күні «Астана» концерт залында «Ауылым — әнім» атты концерт өтсе, «Жастар» сарайының қонақтары 20 наурызда «Женщина-весна» концерттік бағдарламасын тамашалай алады.

Ал 16 наурызда «АЛЖИР» мұражайында Балалар үйінің, мамандандырылған интернаттардың тәрбиеленушілері үшін «Добро пожаловать, Наурыз!» атты мерекелік танымдық ойын-сауық бағдарламасы, «Мәңгілік ел» қақпасында елорданың жас суретшілері мен фотосуретшілердің көрмесі өтеді деп күтілуде. Ал тарихи-мәдени мұра нысандары мен ескерткіштердің сақталуын қамтамасыз ету жөніндегі дирекция «Наурыз – бейбітшілік және достық мерекесі» атты шара өткізеді. Сәкен Сейфуллин музейінде 19-23 наурыз аралығында «Астанаға қош келдің – ӘзНаурыз» экспозициясы жұмыс істемек.

Мереке күндері елорданың барлық кітапханаларында кітап экспозициялары, ұлттық салт-дәстүрмен таныстыратын театрландырылған кештер, библиошоу, тақырыптық викториналар, этнографиялық көрмелер көпшілік назарына ұсынылады.

Шаралардың толық кестесі www.madeniet.astana.kz сайтында жарияланған.

12 ақпанда еңселі Елормадызда жаңа – «Байқоңыр» ауданының ашылатындығы туралы жаңалық жарыққа шықты.

Байқоңыр – адамзат баласы тұңғыш рет ғарыш көгіне самғаған Қазақстанның қаситетті жері. Күні бүгінге дейін адам баласын ғарыш көгімен байланыстырып келе жатқан стратегиялық орталық. Сондықтан жаңа ауданға Байқоңыр атауын таңдау, бір сөзбен бейнелеп айтсақ арайлы Астанамыздың биікке ұмтылған өміршең мұраттарын білдіреді.

Жаңа аудан өзінің алдына қойылған тиісті міндеттердің үдесінен шығып, халықтың игілігіне қызмет етеді деп сенемін.

Арман НҰРҒАЗИН
«Астана қаласының азаматтық альянсы» заңды тұлғалар бірлестігінің төрағасы

Суырып салар ұйқаспен жырды, өлеңді,
Ақын емеспін құрайтын дастан көлемді.
Кез-келген адам сезінер, бəлкім, ойында
Тізіліп жатқан маржандай жолды — өнерді.

Болсадағы бойда өнер, қасиет,
Өңдеу керек күнде оны еселеп.
Сонда ғана пайда берер ол саған,
Тұншықтырып қою неткен қасірет!

Енді, міне, қысайындеп тақымды,
Ояттым мен ішімдегі «ақынды»,
Ұйқасы көп санамдағы бұл сөздер
Шабыт дейтін «досымды» кеп шақырды.

2018 жылдан бастап «Астана LRT» ЖШС жолақыны төлеудің электронды жүйесіне толықтай көшетінін мәлімдеді, деп хабарлайды елорда әкімдігінің медиа орталығы.

Осыған байланысты, «Астана LRT» елорданың барлық автобус паркі валидатормен жабдықталып, ASTRA PLAT транспорттық электронды картасымен төлем жасайтынын мәлімдеді. Егер автобуста валидатор істен шықса, ол автобус маршруттық бағыттан шығарылып тасталады немесе жолаушылар тегін қатынайтын болады.

Сондай-ақ, келесі жылы айлық жол жүру билеті де алынып тасталады. Қағаз билеттің орнына пластикалық карта шығады. Бағасы бұрынғыша – 7500 теңге күйінде қалдырылады. Ал транспорт картасының бағасы – 400 теңге. Бұл жаңалық жолақыны электронды жүйемен төлеуге толықтай ауысудың алғышарты.

Сонымен қатар, жыртылып берілетін билет орамы да алынып тасталады, бұл көлеңкелі ақша айналымын тоқтатады. Жүргізушінің қасындағы (валидатор жүргізушінің жанында орнатылады) мөр басылған билет жолақының төленгенін растайды.

Транспорт картасын алып үлгермеген азаматтар картаны арнайы мамандандырылған кассалардан, RTVM терминалынан және де халыққа ыңғайлы болу үшін Касса24 немесе QIWI терминалы арқылы толтыруына болады.

25 желтоқсаннан бастап транспорт картасын сататын және электронды картаны толтыратын сауда орындарын көбейту жоспарланып отыр.

Кассалардың мекен-жайы:

№12 касса — «Гранд Астана» ТК, Ж. Нәжімеденов көшесі, 10/1.

№8 касса — Астаналық цирк, Қабанбай батыр к-сі, 5.

№14-15 касса — Орталық кеңсе, Қ. Мұңайтпасов к-сі, 14

№17 касса — Теміржол вокзалы, Гёте көшесі, 1.

Оқушы — Мұғалім — Ата-ана үшбұрышына арналған түрлі кешендік бағдарламалар бар. Елімізде үлкен қолданыстағы жүйелердің бірі — Bilimal. Заманауи білім және әлеует басқару құралы. "Өрлеу" инновациялық технологиялар орталығының бұл өнімі — 100% отандық өнім. Қарағанды облысында кеңінен пайдаланылатын бұл жүйе UNICEF-тің Out-Of-School Children Monitoring Framework есебінеде жоғары бағаланған.

Bilimal кешенін 3 түрлі ракурстан қарап көретін болсақ:

Ата-аналарға

• Балалардың барлық бағаларын өз смартфонынан қарай алады.
• Тоқсандық немесе жылдық қорытынды бағаларға кері әсерін тигізуі мүмкін күрделі тақырыптарды анықтап, білімінің деңгейін бақылай алады.
• Ұсыныстар мен электронды оқытудың онлайн курстарына негізделе отырып, балалардың сабаққа дайындалу барысына өздері қатыса алады.

Оқушыларға

• Оқуға түсуге арналған емтихандарға дайындық.
• Қиындық туғызатын тақырыптар мен пәнді игерудегі олқылықтарды анықтауға көмектеседі.
• Болашақ мамандықты таңдауға көмек.

Мұғалімдерге

• Қашықтықтан оқытуды жүргізіп, оқушыларға үй тапсырмаларының тақырыптарын беріп, баға қоя алады.
• Жүйе Жалпылай Оқытумен бірге қажет есеп түрлерін өзі құрады.
• Порталда мұғалімдер кәсіптік қауымдастықтарға қатысып, әріптестерімен ой бөлісе алады.

Жүйеге қосылу үшін немесе толық ақпарат үшін:
bilimal.kz
www.facebook.com/bilimalkz
vk.com/bilimal

Астана қаласының әкімдігі Қазақстан Республикасының Үкіметімен, құзырлы орталық мемлекеттік органдармен бірлесіп, «Нұрлы жер» бағдарламасы аясындағы үлескерлік құрылыстың проблемалы нысандарының құрылысын аяқтау жұмыстарын жүргізіп жатыр.

Пысықталып жатқан механизмдер нысандар құрылысының аяқталуын көздейді. Осының негізінде бөлінген мемлекеттік қаражаттың қайтарымдылығы қамтамасыз етіледі.

Нормативті шешімдер мен тәртіптердің қабылдануы 2018 жылдың 15 қаңтарына дейін аяқталады деп жоспарлануда. Осыдан кейін үлескерлік құрылыстың әр нысаны кесте бойынша жеке қаралатын болады. Кесте өз кезегінде 2018 жылдың 10 желтоқсанына дейін жарияланбақ.

Астананың 20 жылдығына арналған брендбукты анықтау байқауына өтінім қабылдау аяқталды. Нәтижесінде үздік 8 төлтаңбаның жобасы іріктелді, деп хабарлайды елорда әкімдігінің медиа орталығы.

«Байқауға елорда мен еліміздің басқа аймақтарында жұмыс істеп жатқан заңды және жеке тұлғалардан 61 өтінім (150-ден астам жұмыс) түсті. Атап өтетін жайт, қатысушылар арасында елорда мектептерінің оқушылар мен әлемнің беделді университеттерінің түлектері – дизайнерлер бар. Жастардың азаматтық ұстанымдарын көрсетуте белсенділік танытқаны қуантады», — деді Астана қаласының Ішкі саясат басқармасының басшысы және үздік брендбукты анықтау комиссиясы төрағасының орынбасары Ерлан Каналимов.

Байқаудың идеологиялық маңызын ескере отырып, ұйымдастырушылар жұмыс тобының аноноимді дауыс беруі үшін арнайы парақшалар әзірледі. Жоба авторларына өз жұмыстарын таныстыруға мүмкіндік жасалды. Жұмыс тобының дуыс беру нәтижесінде байқаудың үздік 8 жұмысы іріктелді.

«Алдағы уақытта іріктелген үздік жұмыстар таныстырылып және келістірілу үшін Қазақстан Республикасының елордасы — Астана қаласының 20 жылдығына дайындау және өткізу жөніндегі комиссияның қарауына жолданды», — деді Е.Каналимов.

Айта кетейік, үздік брендбук байқауына өтінімдер қарашаның 6 мен 27 аралығында қабылданды. Елорданың 20 жылдық мерекесіне арналған төлтаңбаны анықтау байқауын Астана қаласының Ішкі саясат басқармасы өткізді.

Үздік брендбук авторы 8 млн теңге көлемінде сыйақы алады. Ал үздік қолтаңба елорданың 20 жылдығын мерекелеу кезінде жарнамалық және маркетингтік, сонымен бірге мәдени шаралар кезінде қолданылады.