Елордада жыл сайын көктемде жол жөндеу жұмыстары қолға алынады. Биыл 25,36 шақырым жолды салу, жөндеу және қалпына келтіру жоспарланған, деп хабарлады қалалық әкімдіктің баспасөз қызметінен.

Астана қаласы автомобиль жолдары басқармасының басшысы Сымбат Мырзағұлов Астана қаласы әкімдігінің ресми сайтының редакциясына берген сұхбатында биыл елордада жол жөндеу бойынша жүргізілетін жұмыстарға толығырақ тоқталып өтті.

«Қаланың көше-жол желісінің жағдайына жүргізілген кешенді талдау бойынша қанағаттанарлықсыз жағдайда деп танылған 117 көше (ұзындығы 287 км) анықталды. Атапа йтқанда, Абылай хан даңғылы Пушкин көшесінен Момышұлы даңғылына дейін, Манас көшесі Абылай хан даңғылынан Қобыланды батыр көшесіне дейін, Кенесары көшесі Пушкин көшесінен Республика даңғылына дейін, Орынбор көшесі Керей мен Жәнібек хандар көшесінен Хусейн бен Талал көшесіне дейін және т.б. Барлық анықталған кемшіліктер бойынша жөндеу жұмыстарының кестесі бекітілді.

Биыл 25,36 км жол салу, жөндеу, қалпына келтіру көзделген. Соның ішінде 15,8 км жол салынады, 1,4 км қалпына келтіріледі, 8,16 км жолға орташа жөндеу жұмыстары жүргізіледі», делінген Сымбат Мырзағұлов берген сұхбатта.

ҚазАқпарат

«ЭКСПО» көрме кешені төңірегіндегі жымысқы әрекеттер енді қатаң бақыланады. «Астана ЭКСПО-2017» ҰК мен Сыбайлас жемқорлыққа қарсы іс-қимыл ұлттық бюросы арасында серіктестік келісімі мақұлданды. Тараптар көрме құрылысындағы ашықтық принципін қамтамасыз етуге келісті. Құжатқа ұлттық компания басқармасының төрағасы Ахметжан Есімов пен ұлттық бюроның төрағасы Қайрат Қожамжаров қол қойды.


astanatv.kz/news/show/id/47416.html

20-30 сәуірде Астанада Дүниежүзілік иммундау апталығы өтеді. Бұл шараның мақсаты вакцинацияға қатысты қоғамның сенімін арттыру, денсаулық үшін вакцинациялау маңызы туралы халыққа ақпарат тарату, инфекциялық аурулардың алдын алу және халық денсаулығын көтеру.

Астана қаласының тұтынушылар құқығын қорғау департаментінің хабарлауынша кез-келген адам, тұрғылықты мекені бойынша (тіркелуі шарт емес) емханалардың бірінде екпе жасата алады. Тек ҚР мемлекеттік тіркеуден өткен вакциналар ғана қолданылады. Вакциянация тегін жүргізіледі, әрбір адамға қолжетімді, тіпті шетелдік азаматтарға да жасатылады.

Профилактикалық жұмыстарды кеңінен жүргізудің нәтижесінде Астанада дифтерия, полиомиелит, құтыру, сіреспе аурулары тіркелген жоқ.

Астана қаласының Салауатты өмір салтын қалыптастыру орталығының мамандары иммундаудың маңыздылығы туралы ақпараттық-білім беру материалдарын таратты. Сондай-ақ, халық көп жиналатын орындарда LED-мониторлар мен лайтбокстардан, сауда, ойын-сауық орталықтарында, әуежайда иммундаудың артықшылықтары туралы аудио- және бейероликтер ротацияланады.

Елордалық медицина қызметкерлері үшін осы кезеңде түрлі семинарлар мен тренингтер ұйымдастырылады.

Соңғы уақытта вакцинациядан бас тарту жағдайлары жиілеп кетті. Бұл мемлекеттегі эпидемиологиялық жағдайға кері әсерін тигізуі мүмкін. Орталық мамандарының пікірінше, халықтың иммунопрофилактикаға қатысты сенімін қалыптастыру, халықтың иммунопрофилактикаға сенімді көзқарасын қалыптастыру, жұқпалы ауруларға қарсы қорғаныс қажеттілігі; вакцинациядан бас тартуға байланысты қауіп-қатер мен себеп-салдар туралы ақпараттандыру қажет.

Материал Астана қаласы әкімдігінің ресми сайты astana.gov.kzдеректері бойынша әзірленді.

Қазақстанда Ұлттық орман отырғызу күні алғаш рет 2014 жылы 19 сәуірде өткізілген болатын. Биыл астаналықтар Ұлттық орман отырғызу күнін жалпықалалық сенбілікпен ұштастырып отыр.



23 сәуірде елордада жалпықалалық сенбілікпен қатар басқа ҚР Тәуелсіздігінің 25 жылдығына және Жер күніне орай ағаштар отырғызылады. Арнайы дайындалған гүлзарларға Сиверс алмасы, емен, қызыл шетен, ақ қайың, сібір шыршасы, ақ тал, пирамидалы терек, қызылтал, сондай-ақ, бальзам иісті терек ағаштарының 1000 астам көшеті отырғызылады.

– Дала өсімдіктері көп өсетін біздің далаларда ағаш аз. Сондықтан жастарды бүкіл жерге ағаш отырғызуға шақырамыз. Ағашты неғұрлым көп отырғызсақ, ауа соғұрлым таза болады, – дейді «Тұрақты даму» Жер қорының биологы Валентина Ободовская.

Биылғы акция «Барыс-Арена» мұз айдыны жанында өтеді. Дегенмен, қаланы абаттандыру және ағаш отырғызу жұмыстары тек бір аумақта емес, үш ауданда жүргізіледі. Астана қаласы әкімдігінің ресми сайты astana.gov.kz хабарлауынша, бұл күні Астанада 16 мыңнан астам ағаш егіледі.

Орынбор көшесінде және «Арай» паркінде, Ақыртас, Ғабдуллин, Уәлиханов көшелерінде, Тілендиев даңғылында және т.б. жаппай ағаш отырғызылады. Көгалдандыру объектілерінде тиісті орындар дайындалып, көшеттер қойылды, инерттік материал (құнарлы жер, топырақ, қара топырақ) қажетті мөлшерде әкелінді.

Осы атаулы күні сіз де ағаш отырғызып, қаланың көркін келтіруге өз үлесіңізді қосыңыз!

Биыл Астаналық паркте қала тұрғындары мен қонақтарын керемет тосын сый күтеді. 1 мамырдан бастап паркте аттракциондар, ашық басейндер, би алаңдары және тағы басқа сауық-сайран нысандары іске қосылады.

Қазіргі кезде би алаңдары мен бар жасалған ашық бассейндер кешендерінің аумақтарын абаттандыру жұмыстары аяқталуда. Паркті қалпына келтіру кезінде «Уақыт өзені» субұрқағымен басты аллея, «Сағат» стеласын, су шымылдықтарымен үңгірлер, «Күннің көзі» композициясы, олимпиада чемпиондары алаңын жасау қарастырылған, сондай-ақ, паркте су арнасы мен жағалау, үш тас көпір, сарқырамасы бар көру алаңы және серпінді су бұрқақтар кешені болады.

Парктегі тоған сақталды, реконструкция кезінде оның аумағы ұлғайтылды.



Парк жаңа аттракциондармен толықты, атап айтқанда, Merry go round және Сircus swing әткеншектері, балаларға арналған Aladin jet 6 мини-джет, Balloon wheel шағын көру дөңгелегі, Wonder Flight көңілді аттракционы және экстремалды Flying School.

Парк салауатты өмір салтын ұстанатын адамдардың да сүйікті орнына айналмақ. Оның аумағында ересектер мен балаларға арналған тренажерлер орнатылған. Енді спортпен шұғылданамын, уақытымды ұтымды пайдаланамын, көңіл көтеремін десеңіз, Астаналық паркке келіңіз!

Материал Астана қаласы әкімдігінің ресми сайты astana.gov.kz деректері бойынша әзірленді.

Сәуірдің 4 күні Астана қаласының әкімі Әділбек Жақсыбековтің төрағалығымен елорда әкімдігінің аппарат отырысы өтті. Бұл жолы отырыста талқыланған өзекті мәселе қалалық денсаулық сақтау жүйесі жұмысындағы кемшіліктер болды.

Биыл қала әкімінің халықпен есеп беру кездесуінде Денсаулық сақтау басқармасына жедел жәрдем бригадасының шақырулар бойынша жету уақытын 10 минутқа дейін азайту міндеті қойылған болатын. Жедел медициналық жәрдем қызметін модернизациялау жөніндегі кешенді жоспар аясында елорда әкімдігі барлық қолайлы жағдайды жасағанына қарамастан «жедел жәрдем» жұмысында кемшіліктер бар. Жедел жәрдем қызметіне қатысты шағымдар әкімдікке әлі де болса, түсіп жатыр. Қала тұрғындарының айтуынша, жедел көмекті күтуге көп уақыт кетеді.



Астана қаласының әкімі Ә.Жақсыбековтың тапсырмасымен Жедел медициналық жәрдем станциясының қызметіне талдау жүргзілді, соның аясында қызметкерлер бригадалармен бірге шақыруларға барды. Бірлескен жұмыс нәтижесінде бірнеше себептер анықталып, ұсыныстар жасалды. Атап айтқанда операторлардың ақпаратты кеш беруі мен кезекші ауруханаларда азаматтарды қабылдаудың сапасыз ұйымдастырылуы бойынша ескертулер жасалды. Бұдан басқа, жедел жәрдемнің шақырулар бойынша кеш баруының объективті себептері де бар, мысалы жолдардағы кептелістер, «Bus Lane» бақыланбайтын жолақтары, тұрғын үйлер аумағында заңсыз орнатылған шлагбаумдар. Осыған байланысты, сәулет, тұрғын үй инспекциясы басқармаларына, аудан әкімдіктері мен жергілікті полиция қызметіне де нақты тапсырмалар берілді.

Проблемаларды айтып өткенімен, осы денсаулық саласы жүйесіндегі жетістіктер де назардан тыс қалмады. Экономикалық жағдайдың қиындығына қарамастан денсаулық сақтау саласын қаржыландыру жыл сайын артып келеді. Елордада жаңа нысандар бой көтеріп, материалдық-техникалық база жақсартылуда, денсаулық сақтау саласы жүйесі мамандарының біліктілігін арттыру бойынша шаралар қабылданып жатыр. Сонымен қатар, Жедел медициналық жәрдем қызметін модернизациялау жөніндегі кешенді жоспар аясында жедел жәрдем мамандарының әлеуметтік-тұрмыстық жағдайын жақсарту бойынша қосымша шаралар қарастырылған.

Астана қаласының әкімі мәселелерді жасырмай, шешу қажет екенін атап өтіп, бұл саланы үнемі назарда ұстайтынын айтты. Оның ойынша осы жұмыстардың нәтижесін бағалайтын халық болуы тиіс. Денсаулық сақтау жүйесіндегі проблемаларды талқылаған соң, өзінің орынбасары Ермек Аманшаевқа барлық ауруханалар мен емханалар бойынша мұқият талдау жүргізуді және Жедел медициналық жәрдем қызметінің жұмысын бақылауға алуды тапсырды.

Материал Астана қаласы әкімдігінің ресми сайты astana.gov.kzдеректері бойынша әзірленді.

16 сәуір. Қарағанды — Жезқазған тас жолына шықтым. Негізгі бағытым Жезқазғанның бер жағындағы Жәйрем кенті. Жәйрем облыс орталығы Қарағанды қаласынан 360 шақырым жерде орналасқан. 3 сағат жүретін жерді бақандай 5 сағат жүріп бардым. Қарағанды — Жаңаарқа арасындағы тас жолы сын көтеретін жағдайда емес. Әрбір 1 км. сайын аюдың апанындай шұңқырлар)

1. Арнасына сыймай жатқан Нұра өзені.


2. Жол бойындағы намазхана


3. Жаңаарқа (Атасу кенті) Жәйремге дейін 150 км қалды


4. Жо-жоқ бұл — Сирия емес! Бұл — ЖӘЙРЕМ!


5. Жәйремде қараусыз қаңырап тұрған бос үйлер көп


6.…


Республикалық трасса болып саналатын Қарағанды — Жезқазған тас жолын жөндесе халық бір қуанып қалар еді.

P/s.
… Жоғымды тауып бер деп жатқан кім бар,
Жолымды жөндеп берсе болды емес па!.. М.Ақанов

Отбасы институтын, адамгершілікті, руханилықты, отбасыларды дәріптеу және кеңінен насихаттауға бағытталған «Мерейлі отбасы» ұлттық конкурсына еңбек, спорт, шығармашылық, интеллектуалдық және ғылым салаларында жоғары жетістіктерге қол жеткізген отбасылар қатыса алады. ШБұл республикалық шара болып табылады. Байқау 3 кезеңнен тұрады: аудандық (қалалық), облыстық, республикалық.

Жергілікті атқарушы органдар өңірлік деңгейдегі ұлттық конкурстың жеңімпаздарын айқындау бойынша өңірлік, аудандық (қалалық) комиссиялар құрады.


Қалалық комиссия аудандық комиссиялардан материалдарды алған кезден бастап бір айдан аспайтын мерзімде екі үздік отбасын іріктеуді жүргізеді, және облыстық конкурстың жеңімпаздары айқындалғаннан кейін құжаттарды ұлттық комиссияға жібереді.

Конкурсқа қатысуға өтінім (төменде тіркелген құжаттан жүктеуге болады) аудандық комиссияға мынадай құжаттармен бірге беріледі: ата-аналардың (қорғаншылардың, қамқоршылардың) жеке басын куәландыратын құжаттардың көшірмелері, балалардың туу туралы куәліктерінің көшірмелері; асырап алушы (қорғаншы) отбасылар үшін — жергілікті уәкілетті органның кәмелетке толмаған балаға қорғаншылықты (қамқоршылықты) белгілеу туралы шешімінен үзінді көшірме; неке қию туралы куәліктің көшірмесі; ата-аналарының біреуі қайтыс болған жағдайда, қайтыс болу туралы куәліктің көшірмесі; балаларды тәрбиелегені үшін алған көтермелеулердің, белгілі бір жетістіктері үшін алған көтермелеулердің бар екенін куәландыратын құжаттардың көшірмелері; балалардың, ата-аналардың (қорғаншылардың, қамқоршылардың) жұмыс (оқу) орнынан анықтамалар және мінездемелер; ұсынымдар (әріптестерінің, көршілерінің, достарының); отбасы мүшелерінің еңбектегі, спорттағы, шығармашылық, зияткерлік, ғылыми жоғары жетістіктерін куәландыратын құжаттардың көшірмелері.

Айта кетейік, өңірлік және аудандық комиссиялар үздік отбасыларды айқындау туралы шешім қабылдау кезінде отбасы мүшелері жетістіктерінің саны мен маңызы; отбасылық дәстүрлер және жәдігерлер; отбасының рухани-адамгершілік кұндылықтары; балаларының жетістіктері; ата-аналарының үлгі тұтарлықтай жетістіктері сияқты критерийлерді басшылыққа алады.

Жеңімпаздарды іріктеуге смс-хабарламалар арқылы елдің барлық тұрғындары белсенді түрде қатысады. Көрермендердің басым көпшілігі дауыс берген отбасыға «Мерейлі отбасы» лауреаты атағы, диплом мен ерекшелік белгісі (мүсінше) беріледі.

Еске салайық, конкурсқа қатысуға өтінімдер тиісті құжаттар қоса тіркелген арнайы нысан бойынша аудандық әкімдіктердің ішкі саясат бөлімдері мен Астана қаласының Ішкі саясат басқармасында 2016 жылғы сәуірдің 1-нен 30-на дейін қабылданады.

Толық ақпаратты 55-67-08, 55-67-01 телефондары арқылы алуға болады. Байқауға қатысу туралы өтінімді Астана қаласы әкімдігінің ресми сайтына astana.gov.kz өтіп жүктей аласыздар.

Естеріңізде болса, 23 сәуір жалпықалалық сенбілікке күні болып белгіленген. Бұл шараға қаланың барлық коммуналды қызметтері қатысады. Қазіргі кезде аудандарда ағаштар мен көшеттер отырғызатын орындар әзірленіп, гүлзарларды, көшелер мен гүлбақтарды тазалау, топырақ пен құм шығару жұмыстары жүргізілуде. Сонымен қатар, қаланы санитарлық тазарту және жерлерді гүл отырғызуға дайындау жұмыстары қолға алынды. Аудандарда барлық учаскелерде жұмыс істеу кестелері жасалып, жауапты тұлғалар анықталды.



— Сенбілікке дайындық қызу жүргізіліп жатыр. 2200-ге жуық ірі ағаш, соның ішінде, қарағай, шырша, қайың отырғызылады. Бұдан басқа, үш ауданда 13 900 көшет егіледі. Атап айтқанда, терек, тал, мойыл, шегіршін, шетен және долана. Биыл бір күнде 16 мың ағаш отырғызылады, — деді «Астана — Зеленстрой» АҚ төрағасының орынбасары Бибігүл Бектемісова.

Елордада Орынбор көшесінде және «Арай» паркінде, Ақыртас, Ғабдуллин, Уәлиханов көшелерінде, Тілендиев даңғылында және т.б. жаппай ағаш отырғызылады. Көгалдандыру объектілерінде тиісті орындар дайындалып, көшеттер қойылады, инерттік материал (құнарлы жер, топырақ, қара топырақ) қажетті мөлшерде әкелінеді.

Айта кетейік, биыл қаланы жинау мен көгалдандыру жұмыстарында шағын механикаландырылған машиналар пайдаланылатын болады. Оның басты басымдықтарының бірі ықшамдылық пен салмағының жеңіл болуы, бұл кеспе тастар мен жолдың жиектерін байқап тазалауға мүмкіндік береді.


Мұнымен қоса, биыл бір жылдық гүлдер аз отырғызылады. Олардың орнына елордада көп жылдық гүлдер, соның ішінде раушангүлдер мен қызғалдақтар егіледі.

Жалпы ауданы 7 мың шаршы метрді құрайтын жерге 25 мың бірлік француз раушангүлі отырғызылмақ. 2016 жылы жалпы ауданы 162 288 шаршы метрлік жерге гүл өсіріледі.

Қала әкімдігі тұрғындарды елорданы абаттандыру мен көгалдандыруға өз үлесін қосып, алдағы сенбілікке қатысуға шақырады.

Материал Астана қаласы әкімдігінің ресми сайты astana.gov.kz деректері бойынша әзірленді.

Астана қаласының коғамдық көліктерінде мамыр айында қэлектрондық төлем жасау жүйесі қолданысқа енгізіледі деп хабарлайлы Астана қаласы әкімдігінің ресми сайты astana.gov.kz.

Елорда әкімдігі ғимаратында өткен Қоғамдық кеңес отырысында Жолаушылар көлігі басқармасының өкілдері қалалық қоғамдық көліктерде электрондық төлем жасау жүйесі (ЭТЖЖ) карталарын қолданысқа енгізу туралы баяндады. Аталған жобаны мамыр айында іске қосу көзделген.

— Біз азаматтардың жеңілдікті санаттары үшін арнайы мәліметтер базасын жасап, карталарды дербестендірдік. Олар автобустармен тегін жол жүреді. Бұл ретте валидация жасауға, яғни автобуста картаны пайдалануға міндетті. Оқушыларға да дербес карталар беріледі, оны жазғы демалыс кезінде 30-шы тамызға дейін қолдануға болады, — деді «Астана LRT» ЖШС басқарма төрағасы Талғат Ардан.

Карталарды арнайы белгіленген орындарда және жүргізушілерден сатып алуға болады. Егер жолаушының картасы болмаса, ол жолақыны жүргізушінің жанындағы терминалмен электронды карта арқылы немесе қолма-қол ақшамен төлейді. Автобус жүргізушісінің және әрбір есіктің жанына валидатор орнатылады.

ЭТЖЖ жолаушылар тасымалының сапасын арттыруға мүмкіндік береді және осы саланың айқындылығын қамтамасыз етеді.