«Дәулет» ұлттық теннис орталығында екінші Халықаралық жауынгерлік өнер фестивалі өтеді. Шара барысында Қазақстан, Ресей, Қытай, Италия, Филиппин және Жапония мемлекеттерінің үздік жекпе-жек өкілдері бір аренада өз өнерлерін ортаға салады.

Фестиваль бағдарламасы бойынша көрермендер назарына 11 дисциплинадан көрнекі ұрыстар көрсетеді, соның ішінде джиу-джитсу, киокушинкай-кан каратэ, қоян-қолтық ұрыс, сумо, таэквандо, муай-тай (тайс боксы), вин-чун, қазақ күресі, бразилиялық джиу-джитсу, шаолинь-цюань, пекити-тирсия кали.

Биыл шараға аралас стильдегі кәсіпқой спортшы Хабиб Нурмагомедов, кәсіпқой ресейлік тайбоксер және кикбоксёр, тай боксынан Ресейдің Еңбек сіңірген спорт шебері Артем Левин сынды әйгілі тұлғалар қатысады. Өткен жылғы фестивальге қатысқан актер, кәсіпқой спортшы, жауынгерлік жекпе-жек бойынша әскери нұсқаушы Сергея Бадюк спорт сүйер қауым үшін тосын сый болмақ. Маңызды спорттық шарадан қазақстандық спортшылар да тыс қалмайды.

Сонымен қатар, 29 маусымда екінші Халықаралық жауынгерлік өнер фестивалінің қатысушылары Астана қаласының спорт мектептерінің шәкірттеріне арналған шеберлік дәрістерін өткізеді. Олар тай боксының ерекшеліктері мен артықшылықтарын іс жүзінде көрсетіп, жаңа бастап отырған спортшыларды қызықтырған барлық сұрақтарға жауап береді.

Қала тұрғындары мен қонақтары әдемі мерекелердің бірі – елорда күнін қарсы алады. Ару Астана жаңа кейіпке енбек – ғимараттардың мерекеге орай безендірілген қасбеттері, жарқ-жұрқ еткен конструкциялар және шағын сәулетті пішіндер ерекше атмосфера орнатпақ.

Алматы ауданында 21 жарықдинамикалық панно мен 375 кронштейн орнатылған. Басты көшелерге консольдік тулар, ал Бейбітшілік пен келісім сарайының және «Жерұйық» паркінің алдына ту паннолары қойылды. Парктердегі шамдар мен көпірлер мерекеге орай гүл шарлармен безендіріледі.

Жалпы, «Алматы» ауданының аумағында шағын сәулеттік пішіннің 22 жиынтығы орнатылып, ғимараттардың қасбеттері әрленеді.



Сол жағалауда керемет шарлар мен тырналар көздің жауын алады. Ал баршаның көзайымына айналған «I Love Astana» конструкциялары Есіл өзенінің жағасына, Астаналық паркте, Қабанбай батыр даңғылы мен Керей, Жәнібек хандар көшесінің қиылысында, «Жан Жүрегім Астана» – «Астана Опера» театрының жанында, «Керуен» сауда, ойын-сауық орталығының жанында және Тұран даңғылы мен Сығанақ көшесінің қиылысында «Я люблю Астану» конструкциясы орнатылды.

Елорданың туған күніне орай ағаштар да безендіріледі, «Құрманғазы» гүлбағында декоративтік рәсімдеу жұмыстары жүргізілуде. «Арай», «Ғашықтар» парктерінде, «Астаналық цирк» гүлбағында, «Астана Опера» театры ауданындағы гүлбақта және «Есіл» ауданы әкімдігінің жанында жарықтандыру тіректерінде кронштейндер безендіріліп жатыр. «Хан шатыр» сауда, ойын-сауық орталығына қарсы жерасты өткелі, «Астана Опера» театрының алдындағы көпір, Орынбор көшесіндегі екі жаяу жүргіншілер көпірі мен «ҚазМұнайГаз» көпірі, Сығанақ көшесіндегі «Транстроймост» көлік жолайырығы әдемі жарықтандырылатын болады. Мұнымен қоса, тұрғын үйлердің қасбеттерін безендіру бойынша жұмыстар жүргізілуде.

«Сарыарқа» ауданының әкімдігі орталық көшелерді, алаңдар мен мерекелік шаралар өтетін орындарды безендіруді қолға алды. Осылайша, Есіл өзенінің жағасында арка орнатылып, жаяу жүргіншілер көпірі безендірілді, қалалық алаңда ту конструкциялары мен сауда шатырлары болады.



Аудан аумағында «Көбелек», «Көбелектің ұшуы», «Астана күні», «Кемпірқосақ», «Жүзімнің сабағы», «Геометриялық тоннель», «Стильденген жануарлар», «Кілт», «Гүл аркалары», «Көше жиһазы» және т.б. шағын сәулеттік пішіндер орнатылады.

Ал теміржол вокзалының жанында, қалалық алаңда, Есіл өзенінің жағалауында, ҚР қаржы министрлігі ғимаратының және абай ескерткішінің жанында қала тұрғындары мен қонақтары «Инстаграм» және «Астаналық фото» гринобустарымен (фотостендімен) естелікке суретке түсе алады.

Ел ордасы — Астана қала тұрғындарын қуантып, қала қонақтарын қарсы алуға дайын.

Астанада Оқушылар сарайында жыл сайынғы IV «Аялаған Астана – 2016» республикалық конкурсы басталады, оған Қазақстанның өңірлерінен кастингтен өткен 7-13 жастағы 12 талантты бала қатысады. Конкурс 2 шілдеде сағат 13:00 «Қазақстан» телеарнасында тікелей эфирде өтеді. Жобаның бас продюсері Лина Арифулина бастаған қазылар алқасы балалар шығармашылығына өз бағасын беретін болады. Сонымен қатар, ұнаған қатысушыға оның тиісті номері бойынша СМС арқылы дауыс беруге болады.

Айта кетейік, балалар музыкалық ұжымның сүйемелдеуімен жанды дауыспен ән айтады.

Қатысушылар Астанаға келді және Қазақстан мен Ресейдің үздік педагогтарымен дайындалуда. Конкурсқа қатысушылардың бос уақыттары жоқ. Олар қаланың көрікті жерлерін аралап, «балапан» телеарнасының түрлі балаларға арналған шараларына қатысады.

«Аялаған Астана – 2016» конкурсының гран-при иегері белгілі «Артек» лагерінде өтетін «Балалар Жаңа толқыны — 2016» халықаралық байқауына қатысуға жолдама алады.

Аталған жобаны ұйымдастырушылар – Астана қаласының әкімдігі, «АРС» компаниясы (Ресей), «Қазақстан» РТРК және «Нұр Отан» партиясы.

astana.gov.kz/kk/modules/material/10857

Дәстүр бойынша елорданың туған күніне орайластырылған мерекелік шаралар «Сахнадан сәлем!» IVХалықаралық театрфестивалінен басталады. Фестиваль аясында Қазақстан мен таяу шет мемлекеттерінің үздік әртістерінің орындауындағы көрнекті қойылымдар көпшілік назарына ұсынылатын болады.



Астанадағы театр апталығының шымылдығы 20 маусымда елордалық «Жастар» театрының әртістерінің орындауындағы«Моцарт» мюзиклімен ашылады. Келесі күні Қ. Қуанышбаев атындағы мемлекеттік академиялық қазақ музыкалық драма театры режиссер Б. Ұзақовтың «Бір кем дүние» драмасын ұсынады.

Фестивальдің үшінші күні театр сүйер қауым Батыс Қазақстан облыстық қазақ дарама театрының (Орал қ.) «Жалт еткен бір сәуле», сондай-ақ, Өскеменнен келген қонақтардың Шығыс Қазақстан облыстық драма театрының «Үйлену» қойылымдарын тамашалайды.

23 маусымда көрермендер елордалық М. Горький атындағы Мемлекеттік академиялық орыс драма театрының жаңа «Пробуждение» треш-драмасын және Ж. Шанин атындағы облыстық қазақ драма театры шымкенттік әртістердің орындауындағы «Бас» драмасын көре алады.

Бұдан басқа, келесі күні С. Қожамқұлов атындағы Жезқазған қазақ музыкалық-драма театры тарихи драмаларды ұнататындарға «Құлан қыпшақ – Кейкі батыр» қойылымын ұсынады. Ал фантастикаға әуес жандар елордаға «Зверь» фантастикалық хикаясын ала келген Ф. Достоевский атындағы орыс драма театрының (Семей қ.) қойылымын тамашалайды.

Ғ. Мүсірепов атындағы балалар мен жасөспірімдерге арналған Алматы қазақ мемлекеттік академиялық театрының қонақтары астаналықтардың назарына «Қара шекпен» мысалын ұсынбақ.

Сонымен қатар, фестивальге Ресей мен Украина әртістері де қатысады. 25 маусымда «PaperWall» Киев театрыкөрермендергережиссер М. Назаренконың«ОнОнаЖизнь»визуалды-пластикалық спектаклін көрсетеді. Театр апталығы «Театр Луны» мәскеулік театр әртістерінің орындауындағы «Антракт» драмасымен аяқталады.

Фестивальдің тұсауы 2013 жылы кесілген. Бұл уақиға Астананың 15 жылдық тойы аясында өтті.

Жыл сайын «Сахнадан сәлем!» халықаралық фестивалінің ауқымы кеңейе түсіп, оған қатысатын қалалар мен мемлекеттердің саны артып, Қазақстанның театр әлеміндегі айтулы оқиғаға айналды. 2013 жылдан бері фестивальге Қазақстанның барлық өңірлерінің, сондай-ақ, таяу және қиыр шетелдердің: Ресей, Литва, Түркия, Дагестан, Грузия театрлары қатысты. Биыл бағдарламада 11 театр өнер көрсетпек.

Фестивальдің құрметті қонақтары әрі қазылар алқасы құрамында танымал драматург, театр сыншысы Еркін Жуасбек бастаған өнер қайраткерлері болады. Атап айтсақ, Қазақстанның Халық әртісі, еңбек ардагері, «Құрмет» орденінің иегері, профессор Гүлжахан Әспетова, Қазақстанның Халық әртісі, Шәкен Айманов атындағы ха¬лық¬аралық сыйлықтың иегері, профессор Талғат Теменов, сондай-ақ шетелдік қонақтар – театр және кино актері, режиссер, Ресей театр менеджерлері гильдиясының мүшесі, «Мәдениет қайраткерлерінің астаналық цехі» Кеңесінің мүшесі Игорь Краснопольский, театртанушы, «Балтық үйі» жобасының үйлестірушісі, ТМД және Балтия елдерінің «Ресейдегі кездесу» Халықаралық театрлар фестивалінің жетекшісі Мария Юрьева келеді.

Қаланың барша тұрғындары мен қонақтарын «Сахнадан сәлем» фестиваліне шақырамыз. Билеттер Конгресс-холл, «Жастар» сарайы, «Қазақстан» ОКЗ, «Мега», «Сарыарқа», «Керуен» ойын-сауық орталықтарында сатылады.

Материал Астана қаласы әкімдігінің ресми сайты astana.gov.kz деректері бойынша әзірленді.

Елордада заңсыз қоқыс орындарын анықтау және жою мақсатында апта сайынғы тексеріс өткізілді. Құрамына «Астана-Тазарту» ЖШС инспекторлары және бақылаушылары енген комиссия тексеру барысында қаланы абаттандыру, санитарлық күтіп ұстау, қала аумағын тазарту және тазалықты қамтамасыз ету ережелерін бұзып келген нысандарды анықтады.



Тексеру барысында комиссия Балқантау к-сі 94 мекен-жайы бойынша барып, бірнеше нысанды анықтады, оның иелерінде қатты тұрмыстық қалдықтарды шығаруға келісім болмай шықты.

— Аталған мекен жай бойынша қонақ үй, жатақхана, дәмхана орналасқан, жеке тұлғалардың атына берілген немесе заң бөлімі арқылы жасалған құжат жоқ. Сәйкесінше, олардың қоқысты қайда тастайтыны түсініксіз. Қоқысты өздері шығаратындарын айтады, бірақ қолдарында арнайы келісім жоқ, ал оларда полигонмен келісім болуға міндетті, — деп мәлім етті «Астана-Тазарту» ЖШС-інің бас директоры Иван Лавриненко.



Жатақханада тіркелген тұрғындардың саны іс жүзінде тұратын адамдар санымен сәйкес келмейді. Мұндай қоғамдық тұрғын үйдің тұрғындары жақын маңдағы контейнерлерді пайдаланады, бірақ қоқыс шығарғандары үшін төлем жасамайды.

Мысалы, Қосалқа, 4 мекен жайы бойынша орналасқан жатақханада бір тұрғын ғана тіркелген. Алайда ғимаратта 60-қа жуық бөлме бар. «Астана-Тазарту» ЖШС өкілдері онда іс жүзінде тұрып жатқан адамдардың нақты санын біле алмады.

Толстой, 32 мекен-жайы бойынша да осыған ұқсас жағдай анықталды. Құжат бойынша мұнда 24 адам тұрып жатыр. Құрылыс шамамен 110 бөлмеге есептелген алты қабатты ғимарат болып табылады. Ал Уәлиханов 22/9 көшесіндегі жатақханада 30 тұрғын тіркелсе, іс жүзінде ғимарат 60-70 бөлмеге есептелген.

Осындай жағдайлар анықталған соң аталған құрылыстардың иелері онда тұратын адамдардың нақты санын көрсете отырып, келісімге қайта отыруға мәжбүр болды.

Материал Астана қаласы әкімдігінің ресми сайты astana.gov.kz деректері бойынша әзірленді.

Бірнеше күн бойы 10-25 жас аралығындағы жас дарындар өзара жарысты. Бұл жолы Дельфий ойындары «Болашаққа тәуелсіздікпен!» ұранымен өтті. Қазылар алқасының шешімімен Аида Қажмаханның бейнеролигі үздік деп танылды. Ал Ирина Гураева креативті сурет жасаған. Жансая Беспайдың «Тұмар Ханым» коллекциясы ерекше атап өтілді.

«Прима қобыз» номинациясында Наргиз Бақтығалиева топ жарса, домбырада ойнаған Асанәлі Әшімов пен Табыс Құдайберген көпшілікті тәнті етті. Фортепианода Мария Шавтельская үдік атанды. «Номад» би ансамблі және «Самұрық» би мектебі «Халық биі» номинациясында көш бастады.



Ойындар аясында музыка жекпе-жектер өткізілді. Халық әндерін орындауда Маржан Әбдірахманова және Набира Рақымжан үздік болды. «Эстрадалық ән» аталымында Әйгерім Русланова жеңіп шықты, академиялық ән салуда әділ қазылар алқасын Талғат Аллабиринов пен Құдайберген Әбілдин таң қалдырды. Мишель Слобода үздік диджей атанды.

Биыл алғаш рет «Ымдау тілі әні» номинациясы енгізілді. Оған 16-дан 25 жасқа дейінгі Астана тұрғындары қатысып, Алмат Теңізбай жеңіске жетті.

«Театр» номинациясы қатысушылардың да, көрермендердің де қызығушылығын оятты. Қазақ ұлттық өнер университетінің «Драма театры және киноактер» мамандығы бойынша студенттері ең үздік қойылым көрсетті. «Бейнелеу өнері» санатында Дәулет Досмағанбетов жеңіске жетті.

Барлығы конкурсқа 200 астаналық қатысты. Ойындар жас таланттарды анықтауға және дамытуға, өскелең ұрпақты эстетикалық тәрбиелеуге көмектеседі, тұлғаның рухани қалыптасуына қолдау көрсетеді.

Материал Астана қаласы әкімдігінің ресми сайты astana.gov.kz деректері бойынша әзірленді.

Елорда әкімдігінде Астана қаласы әкімінің орынбасары Қосман Айтмұхаметовтың төрағалығымен елорданың экологиялық жағдайына қатысты мәселелер бойынша кеңес өтті. Оған қалалық департаменттер мен басқармалардың, табиғат пайдаланушы және коммуналдық кәсіпорындардың басшылары қатысты.



Астана қаласы бойынша Экология департаментінің басшысы Абзал Егембердиев қаланың экологиялық жағдайы туралы баяндап, туындаған мәселелерді шешудің жолдарын ұсынды. Атмосфералық ауаға шығарылатын лас заттарды азайту, қалдықтардың шығарылуы мен өңдеуді төмендету, көгалдандыру аудандарын ұлғайту бойынша ұсыныстар жасалды, сондай-ақ, қаланың экологиялық ортасын сақтауға және жақсартуға мүмкіндік беретін басқа да шаралар енгізілді. Жаңартылатын энергия көздерін дамыту, экологиялық таза көлік түрлеріне, көлікті отынның баламалы түрлеріне ауысу, көлік құралдары мен қаланы жылытуды экологиялық таза отын – газға ауыстыру мәселелеріне ерекше назар аударылады. Велосипед қозғалысын одан әрі дамыту мәселелері қаралды.

Кеңес барысында қала әкімінің орынбасары Қосман Айтмұхаметов көтерілген экологиялық проблемалардың өзектілігі мен маңыздылығын атап өтті. Оның айтуынша, экологиялық жағдайды өзгерту үшін елордада экологиялық таза жасыл технологияларды енгізу, сондай-ақ, барлық мүдделі тараптардың: мемлекеттік органдардың, ғылыми мекемелердің, ҮЕҰ, қалалық кәсіпорындардың өзара іс-әрекетін дамыту қажет.

Материал Астана қаласы әкімдігінің ресми сайты astana.gov.kzдеректері бойынша әзірленді.

Елордада медицина қызметкерлерінің төл мерекесі қарсаңында Оқушылар сарайында үздік дәрігерлерге арналған салтанаты шара өткізілді. Қаланың денсаулық сақтау саласының дамуына елеулі үлес қосқан 100 медицина қызметкеріне марапаттар табысталды.



Шара барысында Астана қаласы әкімінің орынбасары Ермек Аманшаев дәрігерлерді құттықтап, сөз сөйледі.

— Бідің өміріміздегі сиқыршылар – сіздер. Біздің тарапымыздан, мемлекет тарапынан, қала әкімдігімен денсаулық сақтау саласына баса назар аударылады, соңғы уақытта елордада аталған саланың қарқынды дамуы байқалады. Осы күні сіздерге еңбектеріңіз үшін алғыс айтып, төл мерекелеріңізбен құттықтаймын! – деді Е. Аманшаев.



Денсаулық сақтау саласында көп жылдар бойы табысты еңбек еткені, халыққа сапалы қызмет көрсету жөніндегі мәселелерді шешуге белсенді атсалысқаны үшін үздік медицина қызметкерлеріне «Денсаулық сақтау ісіне қосқан үлесі үшін», «Денсаулық сақтау ісінің үздігі» төсбелгілері, сонымен қатар, Астана қаласының әкімі Әділбек Жақсыбековтің және елордалық Денсаулық сақтау басқармасының басшысы Ерік Байжүнісовтың атынан құрмет грамоталары мен алғыс хаттар табысталды.



Биыл алғаш рет дәрігерлер бес номинация бойынша марапатталды. Әрбір марапаттаудың алдында жиналған қауым дәрігердің қызметі туралы толық баяндайтын бейнеролик тамашалады.

Медицина қызметкерінің асқан шеберлігін атап өтетін «Мамандығына адалдығы үшін» арнайы номинациясында Ольга Замолотова, «Бірегей операция өткізіп, адам өмірін құтқарғаны үшін» номинациясында №2 қалалық аурухана дәрігерлерінің командасы: Марат Жақсылықов, Баймаханбет Садуов, Болатхан Лепесбаев марапатталды.



Мұнымен қоса, «Диагностикалау мен емдеудің жаңа әдісін ойлап тапқаны үшін», «Мамандығына адалдығы үшін – отбасылық әулеттер» номинациялары белгіленді. «Жаңа өмір сыйлағаны үшін» номинациясында Астана қаласының әкімдігі №1 Перинаталды орталығының жаңа туған сәбилерді күту және патологиялар бөлімінің меңгерушісі Ирина Цубенко марапатталды.

Бүгінгі таңда Астанада 36 ұйым медициналық қызметтер ұсынады. Соңғы 5 жылда елордада 9 медициналық мекеме салынып, оларда 9 424 медицина қызметкері, соның ішінде 3 202 дәрігер жұмыс істейді. Елордалық клиникаларда емдеу мен диагностикалаудың жаңа әдістері ұдайы енгізіліп отырады, бұған дейін тек республикалық ауруханаларда ғана көрсетіліп келген жоғары мамандандырылған медициналық көмек көрсетіледі.

Материал Астана қаласы әкімдігінің ресми сайты astana.gov.kz деректері бойынша әзірленді.

Астана қаласының Дағдарыстық орталығы үш жылдан бері жұмыс істеп келеді. Мекеме 50 кереует-орынға есептелген, барар жері жоқ тұрмыстық зорлық-зомбылықтан зардап шеккен әйелдер көмек сұрап осында келеді.

Әйелдер мен балалар орталыққа құқық қорғау органдарының қаулылары бойынша және Астана қаласы Жұмыспен қамту, еңбек және әлеуметтік қорғау басқармасының жолдамасымен қабылданады.

– Аналар Орталықта бір айдан жарты жылға дейін, кейбір жағдайларда комиссияның шешімімен бір жылға дейін болады. Орталықта қызмет алушыларға арналған бөлмелер жасалған, әр бөлмеде душ бар, 50 адамға арналған асханада бес рет тамақ беріледі. Төсек-орын, жуынатын, жеке гигиена заттарын береміз, барлық жағдайлар жасалған, – дейді Астана қаласы әкімдігінің «Зорлық-зомбылық немесе зорлық-зомбылық қатерінің салдарынан қиын жағдайға тап болған тұлғаларға арналған дағдарыстық орталық» КММ директоры Нұрбол Зұлқарнаев.

Тұрмыстық зорлық-зомбылық көрген әйелдер орталыққа ешбір жолдамасыз кез келген уақытта келе алады. Оларға 72 сағат уақыт беріледі. Қазіргі кезде мұнда 26 адам тұрып жатыр, соның ішінде 9-ы 21 мен 58 жас аралығындағы әйелдер, қалғаны балалар.



– Көп жағдайда әйелдер шыдайды. Бір болғаннан қашып кететіндер аз, негізінен отбасын сақтап қалуға тырысады. Ал шегіне жеткен кезде көмекке жүгінеді. Басым бөлігі құқық қорғау органдарына барғысы келмейді, өйткені, біріншіден — сенбейді, екіншіден олар өзін ренжіткен адамды ашуландырып алудан қорқады, — дейді Н. Зұлқарнаев.

Орталықта әйелдерге психологиялық, құқықтық және медициналық қызметтер ұсынылады. Әлеуметтік қызметкер мекемеге түскен сәттен бастап әр әйелмен әңгімелеседі. Іс-әрекеттер жоспары әзірленіп, кеңестер беріледі, зорлық-зомбылықтың себептері анықталады.

– Бізге келген әйелдердің көбі жұмыс істемейді, арнайы білімдері жоқ, бұл да тұрмыста жанжалға себеп болады деп ойлаймын. Олар неге қайтып келеді, өйткені, барар жері, басар тауы жоқ. Туыстарында бір-екі күн ғана, одан артық болмайды, ешкім де осындай жағдай жасамайды, қонақ үйге бара алмайды – қалтасы көтермейді, – дейді әлеуметтік қызметкер Гүлнар Әлібаева.



Жұмыспен қамту орталығы да қол ұшын созуда. Алдымен әйелдер шаштараз, уқалаушы, аспаз және т.б. мамандықтар бойынша курстарға жіберіледі, содан кейін жұмысқа орналастырылады. Балалар қазақ және орыс тілдеріндегі жақын маңдағы мектептерде оқитын болады.

Материал Астана қаласы әкімдігінің ресми сайты astana.gov.kz деректері бойынша әзірленді.

Елордалық бесайысшы Павел Ильяшенко Рио-де-Жанейрода өтетін жазғы Олимпиада ойындарына жолдама алды деп хабарлайды Астана қаласы әкімдігінің ресми сайты astana.gov.kz. Халықаралық рейтингтің қорытындысы бойынша қалалық Мамандандырылған жоғары спорт шеберлігі мектебінің спортшысы төрт жылдықтың басты додасында бағын сынайтын болды.

Олимпиадаға дейін 50 күн қалды, қазіргі кезде еліміздің намысын қорғайтын спортшылар құрамасы жасақталып жатыр. Қазіргі заманғы бессайыстан елордалық атлеттер бұған дейін бір лицензияға қол жеткізген болатын. Бейжіңде өткен Азия чемпионатында Елена Потапенко жазғы Олимпиада ойындарына қатысу құқығын қорғап қалды.

Павел Ильяшенко Лондонда өткен Олимпиада ойындарына қатысқан. Спортшы қазіргі заманғы бессайыстан Қазақстан құрамасының мүшесі, халықаралық дәрежедегі ҚР спорт шебері, командалық біріншілікте Еуропа және әлем чемпионаттарының бірнеше дүркін күміс жүлдегері және Азия чемпионы.

«Өткен Олимпиадада Павелге тәжірибе жетпеді, ол дайын болған жоқ, әрі жас, оған бүкіл елдің атынан үлкен жауапкершілік жүктелді, бала абыржып қалды. Осы жылдардың ішінде Павелмен көп жұмыс істедік, нәтижелерді арттырдық, жақсарттық, бәйге алуға жігерлендірдік», – деді қазіргі заманғы бессайыстан ҚР мемлекеттік бапкері және спортшының жеке жаттықтырушысы Оксана Дмитриенко.

Айта кетейік, қазіргі заманғы бессайыс – бес дисциплинадан тұратын спорттық көпсайыс: конкур, семсерлесу, ату, жүгіру және жүзу. Спортшылар әр сайысқа қатысудың нәтижелері бойынша ұпайлар жинайды.

Спорт түрлері бойынша ұлттық құрамалар төрт жылда бір өтетін додаға дайындық кезеңдерін аяқтап қалды. Еске салайық, жазғы Олимпиада ойындары тамыздың 5-і мен 21-і аралығында Рио-де Жанейрода өтеді.