Бүгін Астанада Халық қаһарманы Рақымжан Қошқарбаевқа арналған ескерткіштің ресми ашылуы өтті. Қазақ жауынгері 1945 жылдың 30 сәуірінде Қызыл әскер сарбазы Григорий Булатовпен бірге Рейхстаг ғимаратына Жеңіс туын тіккен.

Ескерткіш Б. Момышұлы және Р. Қошқарбаев даңғылдарының қиылысында орналасқан. Жобаға сәйкес, мүсіндік композицияның биіктігі — 6 метр, ал гранит тұғырдың биіктігі 4,5 метр. Ескерткіштің авторы «Қазақ Елі» монументін жасауға қатысқан белгілі мүсінші Асқар Нартов.

«Бүгін қазақ жауынгері Рақымжан Қошқарбаевтың ерлігін мәңгілік ету үшін осы монументті ашып отырмыз. Оның есімі өскелең ұрпақтың жадында ерліктің символы ретінде сақталуы керек, сол себепті Қазақстан тәуелсіздігінің 25 жылдығы қарсаңында елордада аты аңызға айналған нағыз жауынгерімізге арнап ескерткіш орнатылды», — деп атап өтті салтанатты шара барысында сөз сөйлеген Астана әкімінің орынбасары Ермек Аманшаев.

Салтанатты шараға Рақымжан Қошқарбаевтың қызы — Әлия, оның немерелері, сондай-ақ, лейтенант Қошқарбаев туралы кітаптың авторы — Қасым Аппасұлы қатысты.

Монументті орнатуға елорда әкімдігі бастамашы болды, ескерткішті дайындаған және орнатқан — «BI-Group».

Рақымжан Қошқарбаевтың ерлігін көп жылдар бойы кеңестік тарихшылар мойындамай келді. 2007 жылы ғана Екінші дүниежүзілік соғыста Берлинде Рейхстагты басып алу кезінде Рақымжан Қошқарбаев пен Григорий Булатовтың бірінші болып ту тіккендері туралы ресми түрде мәлімдеме жасалды. Осы ерлікті жасаған кезде Қошқарбаев небәрі 21 жаста болған. 2001 жылы Қазақстан Республикасы Президентінің жарлығымен Рақымжан Қошқарбаевқа қайтыс болғаннан кейін «Халық қаһарманы» атағы берілді.

Астана қ. Статистика департаментінің ресми мәліметтеріне сәйкес, елордада тұрғын үй құрылысының қарқыны артып, құрылыс нысандарының саны ұлғайды.

2016 жылғы қаңтар-қыркүйекте тұрғын үй құрылысына бағытталған инвестициялар көлемі 99 081,4 млн теңгені құрады, бұл 2015 жылдың сәйкес кезеңіндегі көрсеткіштің 101,1% құрайды. Негізгі капиталға салынған инвестициялардың жалпы көлемінде тұрғын үй құрылысында игерілген қаражаттар үлесі — 18,3%.

Барлық қаржыландыру көздерінің есебінен 14 903 пәтерге арналған тұрғын үйлер пайдалануға берілді, тапсырылған тұрғын үйлердің жалпы ауданы 1 644 497 шаршы метрді құрады, бұл 2015 жылғы қаңтар-қыркүйектегі көрсеткіштен 29%-ға көп.

Жеке салушылар жалпы ауданы 124 791 шаршы метр тұрғын үй салған. Бұл 2015 жылғы қаңтар-қыркүйектегі көрсеткіштен 3,8 есе көп. Тұрғын үйлерді пайдалануға берудің жалпы көлемінде жеке тұрғын үй құрылысының үлесі 7,6%-ды құрады, 2015 жылғы қаңтар-қыркүйекте 2,6% болған.

Елордада 2016 жылғы қаңтар-қыркүйекте тұрғын үйлердің жалпы ауданының 1 шаршы метрін салудың орташа нақты шығыны 128,9 мың теңгені, оның ішінде жеке салушылардың тұрғызылғаны 105,2 мың теңгені құрады.

Сондай-ақ, нысандардың құрылысында да өсім байқалып отыр.

Ведомствоның мәліметінше, 2016 жылғы қаңтар-қыркүйекте Астана қаласының кәсіпорындары мен ұйымдары 399 775,5 млн теңге сомасына құрылыс жұмыстарын орындады. Орындалған құрылыс жұмыстары көлемінің ең жоғары үлестік салмағы 54,6%-ы жеке меншік мердігерлік ұйымдарға, 45,3%-ы шетелдік мердігерлік ұйымдарға тиесілі, мемлекеттік мердігерлер жалпы көлемнің 0,1%-ын орындады.

2016 жылдың 29 қазанында елордалық театрдың Үлкен залы сахнасында «Астана Опера» театрының артистері мен неаполитандық Сан-Карло театрының белгілі артистерінің қатысуымен Гала-балет ұсынылады. Концерт «Астана Опера» Симфониялық оркестрінің сүйемелдеуімен өтеді. Дирижері Арман Оразғалиев.

Сан-Карло театры атынан 6 солист келеді, олардың арасында Антонелла Альбано, Маурицио Личитра және Сальваторе Мандзо сияқты балет жұлдыздары бар.

«Біз Сан-Карло театрындағы достарымызды көретінімізге қуаныштымыз, олар бұған дейін театрымызға бүкіл кордебалет құрамымен келіп, «Жизель» балетін қойған. Артистер үшін мұндай кездесулер өте маңызды, өйткені өзара тәжірибе алмасып, жағымды сезімнен қуат аламыз, ал, оның бәрі кейін біздің көрерменге беріледі, — дейді Қазақстанның еңбек сіңірген қайраткері Тайыр Ғатауов.

«Астана Опера» әртістері де елорда тұрғындары мен қонақтары үшін бірқатар тосын сый дайындап қойған. Гала-балет бағдарламасы аясында таяуда ғана Балет әртістерінің ІІІ халықаралық байқауының жеңімпазы атанған Бақтияр Адамжан мен Серік Нақыспеков өнер көрсетеді. «Астана Опера» театры балетінің жаңа солисті Олжас Тарланов П. Чайковскийдің «Аққулы көл» балетінде алғаш рет Зигфридтің рөлін сомдайды, онымен бірге балеттің жетекші солисі Әйгерім Бекетаева сахнаға шығады.

19 қазанда қазақстандық құтқарушылар кәсіби мерекелерін атап өтуде. Осыған орай Астанада қызметтік міндеттерін орындау барысында қаза тапқандардың құрметіне ескерткіштің ашылуы өтті. Олар үшін үлкен қауіп-қатермен байланысты жұмыс өздерінің жеке тыныштығы мен амандығынан жоғары тұрды. 1996 және 2010 жылдардың ақпан айы қала тұрғындарының есінен әлі күнге кеткен емес, ол кезде тілсіз жау өтпен күрес қызметінің бес қызметкерінің өмірін қиған еді. 1996 жылы Мичурин атындағы совхозда көпқабатты тұрғын үйдің жертөлесіндегі өртті сөндіру кезінде Александр Величкин және Геннадий Винокуров қаза тапты, ал 2010 жылдың 17 ақпанында елордадағы ғимараттардың бірінде шыққан өртпен күресте Валерий Зайцев, Саят Абеев және Руслан Кәкішевтер көз жұмды.

«Өткенді білмей, болашақ болмас. Біздің батырларымыз туралы жылы естелік біздің жүректерімізді мәңгілік сақталады. Олар кәсіби парыздарын бәрінен де жоғары қойып, жанкештілік танытты», — деп атап өтті өз сөзінде Астана қ. ТЖ Департаментінің бастығы Барат Дұзақбаев.

Осы күні батырлардың есімдерін еске алу үшін олардың туған-туыстары мен достары келді. Кәсіби салқынқандылық, қаймықпас рух құтқарушылардың ең басты айрықша қасиеттері осы. Олар өте қарапайым, олардың ерліктері көпшілікке белгісіз, бірақ еңбектері құрметке лайық, өткені олардың бірінші кезектегі парызы — адам өмірін құтқару.

Қалалық мәслихат депутаттары, «Нұр Отан» фракциясының мүшелері еңбек жағдайларымен танысу үшін және «Даму» қоры бөлген несие қаржысының мақсатты пайдаланылуын тексеру үшін Астананың екі өндірістік кәсіпорнында болды.

Комиссия мүшелері «Нұр Саба» ЖШС-іне барды, ондағы жұмыскерлер металл және ағаш өнімдерін өндіреді. Осыдан үш жыл бұрын кәсіпорын басшысы құрал-жабдықтар сатып алуға және өндірістік ғимаратты жөндеуге 24 млн теңге көлемінде несие алған.

«Несие алғаннан кейін біз жұмыскерлер санын арттырып, өндіріс көлемін алдымен 20, одан кейін 50%-ға ұлғайта алдық», — дейді кәсіпорынның бірінші басшысы Қайрат Исімбеков.

«Проект Монтаж» кәсіпорны желдеткіш ауа өткізгіштерінің өндірістік желісін сатып алуға 130 млн теңгеге жуық қаржы алған. Бұл өндіріс орны елорданың тұтынушылық нарығын мырышпен қапталған материалдан жасалған өнімдерімен қамтамасыз етіп отыр.

«Жұмыскерлерге жалақыны уақытында төлеп тұруға тырысамыз. Жаңа құрал-жабдықтар сатып алудың арқасында өндіріс көлемін 10 есеге ұлғайттық»,- деп атап көрсетті зауыт директоры Ұлан Арынбеков.

«Біз бөлінген қаржының мақсатына сай жұмсалғанын көріп тұрмыз. Екі кәсіпорынның жеткен жетістіктері бар», — деп қорытындылады комиссия төрағасы, қалалық мәслихаттың депутаты Саят Батпенов.

Сондай-ақ, ол «Нұр Отан» партиясының елордалық филиалы осындай рейд шараларын ай сайын өткізіп тұратынын және депутаттардың басты міндеті жұмыскерлер үшін жақсы еңбек жағдайларын жасау «Бизнестің жол картасы» мемлекеттік бағдарламасының маңызды бағыттарының бірі болып табылатынын кәсіпорын жетекшілерінің естеріне салып отыру екенін жеткізді.

22 және 23 қазанда «Хан Шатыр» СОСО маңындағы аумақта Солтүстік Қазақстан облысының «Өңір берекесі» ауыл шаруашылық өнімдерінің жәрмеңкесі өтеді. Елорда тұрғындары мен қонақтарына өңірдің және облыс орталығының 100-ден астам ауыл шаруашылығы құрылымдары мен қайта өңдеу кәсіпорындарының өнімдері қойылады. Астанада 741 тонна ауыл шаруашылығы өнімін сату жоспарланған, соның ішінде: ет және сүт өнімдері, балық, жеміс және көкөністер, шұжық өнімдері, бал және т.б. бар. Жәрмеңкеге 100-ден аса өнім түрлері ұсынылады.

Жәрмеңке аясында Солтүстік Қазақстан облысы шығармашылық ұжымдарының ұйымдастыруымен концерттік бағдарлама ұйымдастырылады.

Бұдан бөлек, елорда тұрғындары мен қонақтарына мазмұнды мәдени бағдарлама дайындалған. 18 қазанда сағат 18:30-да М. Горький атындағы мемлекеттік академиялық орыс драма театрында көрермендер назарына Н. Погодин атындағы облыстық орыс драма театрының «Мағжанның соты» қойылымы ұсынылады.

21 қазан күні сағат 18:30-да Қ. Қуанышбаев атындағы Мемлекеттік академиялық қазақ музыкалық драма театрында С. Мұқанов атындағы қазақ музыкалық-драма театрының әртістері «Елім-ай» тарихи дастанының желісінде «Дауылпаз баба — Қожаберген» спектаклін сахналайды.

Кішкентай көрермендер үшін «Жастар» сарайында 19, 20, 21 қазан күндері сағат 10:00, 12:00, 14:00-де облыстық қуыршақ театры «Әуеле, домбыра!» спектаклін қояды.

Балалар үйінің тәрбиеленушілері үшін 21 қазан сағат 10:00-де «Менің досым — бағдаршам» атты қайырымдылық қойылымы көрсетіледі.

20 қазан сағат 11:00-де Астана қаласының мемлекеттік мұрағатында Солтүстік Қазақстан облыстық мұрағатының ұйымдастыруымен «Солтүстіктің байлығы: бірегей мұрағат құжаттарындағы тарих» көрмесі ұйымдастырылады. Іс-шара аясында қала тарихы, облыс ортылығының атақты тұлғалары туралы «Петропавл қаласы» атты деректі фильм көрсетіледі.

22 қазан сағат 11:00-ден бастап Бейбітшілік және келісім сарайында СҚО-ның мұражайлық бірлестігінің ұйымдастыруымен «Туған жердің тартылысы» көрмесі, сондай-ақ жергілікті суретшілердің «Өңір маржаны» көрме экспозициясы ұйымдастырылады. Осы жерде ағашты оюлау, қайың қабығынан және киізден түрлі бұйымдар жасау сияқты қолданбалы өнер түрлерінен шеберлік дәрістері өтеді.

22 қазан сағат 11:00-де Ұлттық кітапхананың көрме залында С. Мұқанов атындағы облыстық кітапхананың «Солтүстік Есіл өңірі өрісі биік өлке» безендірілген кітаптар көрмесі өтеді.

22 қазан сағат 17:00-де Бейбітшілік және келісім сарайында Солтүстік Қазақстан облысының үздік шығармашылық ұжымдарының «Мағжан елінен-Елорда төріне» атты гала-концерті өтеді.

astana.gov.kz/kk/modules/material/11465

12-22 қазан аралығында елордада Бүкіләлемдік сүт безінің қатерлі ісігі жөнінде ақпараттандыру күніне арналған сүт безінің қатерлі ісігінің алдын алу онкүндігі өтіп жатыр.

Дүниежүзілік денсаулық сақтау ұйымының статистикасы көрсетіп отырғандай, бүгінгі күні қатерлі ісік аурулары адам өлімінің кең таралған себептерінің бірі болып табылады. Мамандардың айтуынша, сүт безінің қатерлі ісігі Қазақстанда және бүкіл әлемде әйелдер арасындағы өлім-жітімге алып келетін онкологиялық аурулардың құрылымында алдынғы орында тұр.

«Осы шараның шеңберінде біз қатерлі ісік алдындағы ауруларды анықтау және алдын алу жөніндегі скринингтерден, алдын алу тексерулерінен уақытында өтіп тұру қажеттілігіне қоғамның және халықтың назарын аударғымыз келеді. Соңғы үш жылда Астанада осы індетпен ауыру көрсеткіші артқан, ауру құрылымы жөнінен елорда бірінші орында болса, өлім-жітім бойынша — үшінші орында. Жыл сайын біз халықтың мақсатты топтары үшін скринингтер өткіземіз, аталған топтарға 50 жастан асқан әйелдер жатады, олар ауру белгілерінің анықталу-анықталмауына қарамастан, әрбір екі жыл сайын алдын алу тексерістерінен өтіп отыруға тиіс», — деп мәлім етті Астана қаласының Онкологиялық орталығының ұйымдастыру-әдістемелік жұмыс жөніндегі бас дәрігерінің орынбасары Бағдаш Мұстафина.

Қазіргі уақытта қалада тұрғылықты жері бойынша онколог дәрігерлерден тегін тексеруден өтуге болатын 11 емхана және 9 ішкі аудит қызметі жұмыс істейді. Мамандардың айтуынша, жүргізілген зерттеулердің нәтижесінде елімізде жыл сайын 400 мыңға жуық науқас әйел анықталады, ал елордада анықталатын науқас әйелдердің саны 250-300-ге жетеді. Қауіп-қатер тобына 50-60 жас аралығындағы әйелдер кіреді. Ауруға жиі себеп болатын жағдайларға генетикалық тұқым қуалаушылық, стресс, гормоналдық бұзылу, ерте жүктілік, ерте түсік жасау, және тәртіпсіз жыныстық қатынас сияқты жағдайлар жатады, дейді онкологтар.

Сонымен бірге, дәрігерлердің айтуынша, бүгінгі күні ауруды ерте анықтаудың және емдеудің жаңа және инновациялық әдістері енгізілген. Ал дәрігер көмегіне уақытында жүгінген жағдайда аурудан толықтай айығуға мүмкіндік бар. Онкологиялық орталықта клиникалық кезеңге дейінгі ерте кезеңде ісікті анықтауға арналған стереотаксиялық биопсия, сондай-ақ, вакуумдық аспирациялық биопсия қолданылады, соңғысының көмегімен ультрадыбыстық зерттеудің бақылауымен кіші көлемді ісіктерді жоюға болады, дейді орталық мамандары.

astana.gov.kz/kk/modules/material/11467

Ағымдағы жылдың 19-қазанынан бастап, Ш. Айтматов пен Сарайшық көшелерінің қиылысына бағдаршам орнатылатындықтан № 17, 44, 61, 101 қоғамдық көліктерінің бағыты өзгертіледі.

Осылайша, № 17, 44 бағдарлар «Қазақ технология және бизнес университеті» аялдамасына дейін өзгеріссіз, одан әрі келесі сызба бойынша жүреді: Сарайшық көшесі – І. Омаров көшесі, Сығанақ көшесі — Ш. Айтматов.

№ 61, 101 бағдарлар «№ 81 мектеп-лицейі» соңғы аялдамасына дейін өзгеріссіз, ал одан әрі І. Омаров көшесі – Сарайшық көшесі – Ш. Айтматов көшесі – Сығанақ көшесі сызбасымен жүреді.

Қосымша ақпаратты 574 – 777 телефоны арқылы байланыс орталығынан алуға болады.

Қазанның 13-і мен 15-і аралығында елордада «Автобус» жедел-алдын алу шарасы өткізілді. Шараның мақсаты — елорда автожолдарындағы апаттылық деңгейін төмендету, жолаушылар және жүк тасымалын жүзеге асыратын жүргізушілер арасында көлік жүргізу тәртібін жақсарту, жол қозғалысына қадағалау мен бақылауды күшейту.

«Автобус» жедел-алдын алу шарасы барысында полиция қызметкерлері мерзімді жолаушы тасымалын іске асыратын, рейс алдындағы техникалық бақылаудан өткен жүргізушілердің Жол жүру ережелерін бұзуының және рейс алдындағы медициналық тексеруден өтпей қалған жүргізушіні рейске жіберудің 720-ға жуық дерегін тіркеген.

Атап өтерлігі, қалада автобус парктерінің 8 лауазымды тұлғасы жауапқа тартылып, 10 автобусты пайдалануға тыйым салынды. 134 жүргізушіге ұялы телефонмен әңгімелескені үшін айыппұл салынса, 87 жүргізуші маневрлеу ережелерін бұзған, және жаяу жүргіншілерге жол бермеудің 13 дерегі тіркелген. Бұған қоса, жедел-алдын алу шарасын өткізу кезінлде тексерістен өтпеген автобустарды пайдалануға берудің 23 фактісі анықталған.

Елорда аумағында қоғамдық көлікпен жолаушылар тасымалы саласында 9 кәсіпорын жұмыс істейді, олардың күнделікті қолданысында 750-ден аса қалалық автобус бар.

Қазақстан Республикасы Тәуелсіздігінің 25 жылдығын мерекелеу аясында елордадағы көлік және коммуникациялар колледжінде Астана қ. Қазақстан халқы Ассамблеясының этномәдени бірлестіктерінің күндері ашылды.

Шараның мақсаты Астана қ. ҚХА қызметін насихаттау, жастарды этномәдени бірлестіктердің қызметіне тарту, Қазақстанда тұратын этностардың әлеуметтік-мәдени мұрасын қайта жандандырып, сақтау. Концерттік бағдарламада немістердің «Возрождение» қоғамының тәрбиеленушілері, «Қырғызстан-Астана» қоғамдық бірлестігінің өкілдері, және «Таң» татар-башқұрт мәдени орталығының мүшелері өнер көрсетті. 2016 жылғы қарашаның соңына дейін ауқымды шаралар елордадағы алты жоғары оқу орнында өткізіледі.

«Біз бастап отырған шаралар кезегі студенттерді, мектеп оқушыларын толеранттылық пен отансүйгіштікке тәрбиелеуге бағытталған этномәдени бірлестіктердің қызметімен таныстыруды көздейді. Тәуелсіздік алғалы бері бауырлас халықтар достық пен келісім жағдайында өмір сүріп келеді. Бізде жексенбілік мектептер қызметі дамуда, ол біздің этносқа өз мәдениетімізді, салт-дәстүрлерімізді сақтауға мүмкіндік береді. Меніңше, мемлекеттің қамқорлығы деген осы», — деп атап көрсетті қырғыз этномәдени бірлестігінің төрағасы, ҚХА мүшесі Шавкат Исмаилов.