Алматы облысында «Patriot Qazaqstan» реалити-шоуы басталды. Реалити шоу күнделіктерін 20-шы қараша мен 03 желтоқсан аралығында «Жетісу» телеарнасынан кешкі сағат 19:45 көре аласыздар!
Өңірде алғаш рет ұйымдастырылған «Patriot Qazaqstan» реалити-шоуының финалды кездесуіне және жеңімпаздық белбеуін тапсыру рәсімі өтеді.
Шара 2017 жылдың 3 желтоқсан күні, сағат 18.00-де Алматы облысы, Талдықорған қаласы, «Жастар» спорт сарайында өтеді.

Алматы облысы, Шеңгелді ауылында «Болашаққа бағдар: Рухани жаңғыру» бағдарламасы аясында ауылшаруашылық еңбеккерлерінің күніне орай, ұлттық ат спорты түрлерінен үлкен, ауқымды жарыс ұйымдастырылды. Бұл дүбірлі той жер игеріп, мал басын өсіріп, өсімдік шаруашылығын дамытып, өңірдің өркендеп, өсуіне ат салысып жүрген, сонымен қатар жергілікті халықтың бүтін мейрамы деуге болады. Осы орайда, қала басшысы Талғат Қанатұлы барша жамағатты айтулы мерекемен құттықтап, жылы тідегін білдірді.
Алматы облысындағы іргелі аймақтардың бірі болып саналған Қапшағайда аталмыш шараның өткізілуінің өзі тегін емес. Себебі, Мемлекет басшысы Нұрсұлтан Әбішұлы Назарбаев, ұлттық мәдениетімізді, болмысымызды, салт-дәстүрімізді сақтап, оның кейінгі ұрпаққа аманаттап қалдыру жолында жұмыстар атқарылу керектігін айтқан болатын. Соған орайластырылып отырған мәдени шара нақты айта кетсек, қазақтың қаны мен бойына сіңген, ғұрпын паш ететін ат жарысында көпшілік 5 шақырымға тай, 11 шақырымға құнан, 25 шақырымға Аламан бәйгелерін тамашалады.
Бәйгенің бас жүлдесі –темір тұлпар көлігі, ал қалған қатысушыларға бағалы сыйлықтар табыс етілді. Сонымен қатар, мерекеде қыз қуу, теңге ілу «Қазақша күрес» ұлттық спорт түрлерінен жастар өз бақтарын сынады. Одан бөлек, мейрамда қаланың шығармашылық ұжымдарыны, «Ретро» триосы, «Меруерт» өнер мектебі мен жергілікті өнерпаздардың концерттік бағдарламасы көпшілікке тарту етілді.
Сондай -ақ, этно-мәдени бірлестіктерінің және қол өнер шеберлерінің көрмесі ұйымдастырылды. Тағы бір айта кетерлігі, келген қауымның 20-ға жуық тігілген қазақ үйлерден дәм татуларына да мүмкіндіктер қарастырылды.

Алғаш рет Алматы облысының сән мектебі «DA models»-тің оқушылары «World Asia Beauty 2017» және «Universe Beauty 2017» сынды сән көрсетілімі мен өнері ұштасқан сұлулық байқауларында жүлделі орындар алып қайтты. Олар 5 жасар Кибраева Азалия 2-ші Вице Мисс атанса, 9 жасар Хасен Амина 2-ші орынды және Тарасенко Кира 3-ші орынды иеленді. Бұл туралы облыстық өңірлік коммуникациялар қызметі алаңында белгілі болды.
«DA models» сән мектебі 2017 жылдың сәуірінде ашылды. Қазіргі таңда мектепте 5-25 жас аралығындағы 23 оқушы бар. Жаттығулар І.Жансүгіров атындағы мәдениет үйінде өтеді. Онда оқушылар жас ерекшеліктеріне қарай бірнеше топқа бөлінген.
Мектептің мақсаты балалардың шығармашылық мүмкіндіктерін дамыту, дұрыс сойлеу мәнерін қалыптастыру, деніні қалапты жағдайда ұстауды және камерамен жұмыс жасауды үйрету.
«Талдықорғанда сән мектебінің ашылғанына аз уақыт болса да 14 жасар модель Асқарова Дана шілде айында Францияның Лакост қаласында өткен «World Asia Beauty 2017» байқауының «Super Model Universe Beauty 2017» номинациясы бойынша Гран-при жеңіп алды. Бұл байқау жыл сайын әлемдік сән әлеміндегі аңыз адам Пьер Карденнің қолдауымен өткізіледі. Фестиваль халық арасындағы, әсіресе, әртүрлі елдердің балалары арасындағы достық қарым-қатынастар мен мәдени алмасуларды нығайту мақсатында және балалардың діни көзқарастары мен ұлттарына қарамастан өтеді. Оған 100-ден астам елдің өкілдері қатысады», — деді «World Beauty» Алматы облысы бойынша директоры Кисапова Алия Аскарқызы
Сән мектебінің басты мақсаты Алматы облысының жас өнерпаздарын халықаралық дәрежедегі байқауларға қатыстыру. Олай болса баспасөзге қатысушылар «DA models» сән мектебінің оқушыларына тек сәттілік тілесті.

Ағымдағы жылдың 18-ші сәуірінен бастап 24-ші мамырына дейін Алматы облысында «Әлеуметтік жоба ұсын!» атты конкурсқа іріктеу өтіп, оған 18-29 жас аралығындағы жастар қатысқан. Жалпы облысқа 900 жоба ұсынылып, соның ішінде 233 жоба грант жеңіп алды. Жобалар қазіргі кезде 11 бағыт бойынша жұмыс істеп жатыр. Бес ай көлемінде бөлінген 1 000 000 теңгені дұрыс әрі пайдалы жаратуы қажет. Бұл туралы облыстық өңірлік коммуникациялар қызметі алаңында белгілі болды.
Жалпы жоба мақсаты жастарды қоғамдық өмірге тартылуын ынталандыру, әлеуметтік жәбір шеккен жеке тұлғалар мен коғамдық топтардың әлеуметтік мәселелерін шешуге бағытталғын.
Дүниежүзілік банк пен ҚР Білім және ғылым министрлігі қолдау көрсетіп отырған жастарға арналған жобалар байқауы Қазақстанның төрт облысында жұмыс атқаруда. Олар: Алматы, Қарағанды, Павлодар және Оңтүстік Қазақстан облыстары. Қабылдаушы ұйым ретінде жалпы 14 ұйым өз өтінімдерін беріп, қазіргі таңда жоба қатысушылармен тығыз жұмыс жасауда.
Жиында жастар бастамашыл тобының көшбасшысы, «Рука надежды» жобасының авторы Онербекова Меруерт бірқатар мәселелерге тоқталып өтті:
-Менің жобамның мақсаты көп жылдар бұрын туберкулез дертіне шалдығып, толықтай емделіп жазылған адамдарға алғашқы көмек көрсету шараларын үйрету және оларға қосымша білім бере отырып инструкторлық дәрежеде сертификаттау. Жоба аясында бенефициарларды іріктеп алу үшін Талдықорған қалалық емханасымен келісімшарқа отырып, 5 ай ішінде тренингке қатысу үшін 60 адамды қамтуды мақсаттап отырмыз. Әр ай сайын оқыту 3 тренингке бөлінген. Қазір жобаның жұмысы қызу жүргізілуде және өз мерзімімен жүзеге асуда және алғашқы инструкторлар қатары дайындалды.
Баспасөзге қатысушылар осындай қоғамға пайдалы жобалардың көп болуын және жүзеге асуын тілесті.

І. Жансүгіров атындағы Мәдениет сарайында Ескелді Жылкелдіұлының 325 жылдығына және Елбасының «Болашаққа бағдар: рухани жаңғыру» атты бағдарламалық мақаласына орай «Ерлігі мұра — Ескелді» атты республикалық ғылыми-тәжірибелік конференция өтті.
Конференция «Ер Ескелді» атты бейнефильммен ашылды. Мұнан соң жиынның ресми бөлігін облыс әкімінің орынбасары Жақсылық Омар ашты. Жиында М. Әуезов атындағы Әдебиет және өнер институтының бөлім меңгерушісі, филилогия ғылымдарының кандидаты Тақтар Әлібеков баяндама жасап, Ескелді бидің әулиелігі, көрегендігі, шешендігі, әділдігі, әскери істі жетік білетін шеберлігі, сыртқы саясатта да салмағы зор ірі қайраткерлігі жайлы кеңінен баяндады. Мұнан соң І. Жансүгіров атындағы Жетісу мемлекеттік университетінің оқытушысы, тарих ғылымдарының кандидаты, доцент Күлімкөз Сантаева жоңғар шапқыншылығы жылдарындағы Ескелді бидің ерлігі туралы сөз қозғады. Конференцияда Ескелді Жылкелдіұлының өмірі мен қазақ тарихындағы орны тақырыбында тағы бірнеше ғалымдар сөз алды.
Ұйымдастырушылардың айтуынша, ғылыми конференцияда жасалған баяндамалардың басы біріктіріліп, арнайы жинақ шығарылмақ.
Жалпы мерейтойлық іс-шара конференция алдында Ескелді бабаның кесенесіне гүл қою рәсімімен басталған. Ескелді бидің 325 жылдық тойы түстен кейін Республикалық ақындар айтысымен жалғасты. Айтысқа халықтың ықыласына бөленіп жүрген Балғынбек Имашев, Айнұр Тұрсынбаева, Сара Тоқтамысқызы сынды суырып салма айтыскерлер шақырылған. Ескелдінің ерлігі мен билігін, көрегенділігін, тапқырлығын жырлаған ақындар жетісулықтардың ықыласына бөленді. Тартысты айтыстың бас жүлдесін Сара Тоқтамысова — Семей қаласынан, І орынды Жандарбек Бұлғақов — Алматы облысынан, ІІ орынды Айнұр Тұрсынбаева — Астана қаласынан, ІІІ орынды Сырымбек Сəрсембаев — Атырау облысынан, Ескелді Жылкелдіұлы атындағы арнайы жүлдені Талғат Мықи — Батыс Қазақстан облысынан иеленді. 5 ақын Жалғас Садыр, Арзыгүл Қайыңбек, Сырым Əуезхан, Балғынбек Имашев, Əсет Дүйсебаев белсене қатысқаны үшін ақшалай сыйлықпен марапатталды.

Алматы облысының тілдерді дамыту жөніндегі басқармасының тілдер күніне арналған салтанатты шарасы осы тақырыпта өткізілді. Жеті жұрттың тілін білмекке ұмтылған белсенділер бұл күні жырдан шашу шашып, тілге деген құрметтерін асқақтата түсті.
Оқушылар сарайында өткен биылғы шараның форматы да өзгеше. Салтанатты жиынның шымылдығын облыстық «Жетісу» газетінің жас журналистері жырмен ашты. Қоңыр үнімен киелі сахна төрінде көрермен жүрегін өлеңмен әлдилеген Құралбек Сәбитов, Айдар Қалиев, Мұхтар Күмісбек, Асыл Сұлтанғазы сынды жас ақындар көпшіліктің ыстық ықыласына бөленді. Ал «Анамның тілі, айбыным менің» деп ән салған сегіз жасар Рамазан Оспан тіл мерекесінің шырайын тіптен аша түсті.
***
«Тілге құрмет – елге құрмет». Мемлекеттік тілдің қолданылу аясын кеңейту мақсатында Алматы облысында ауқымды тірліктер атқарылуда. Мекемелер мен кәсіпорындарда, ұйымдарда мемлекеттік тілде іс жүргізуді жетілдіру, сонымен қатар мемлекеттік тілге деген қызығушылықты арттыру бойынша жүйелі жұмыстар қолға алынған. Бұл турлы салтанатты жиында Алматы облысының тілдерді дамыту жөніндегі басқармасының басшысы Айдар Башбаев мәлім етті.
Басқарма басшысы салтанатты жиынға ана тілімізді қадірлеп, қастерлейтін қоғам өкілдері жиналып отырғанын айтты.
Елбасымыз айтқандай «Енді ешкім өзгерте алмайтын бір ақиқат бар! Ана тіліміз Мәңгілік Елімізбен бірге Мәңгілік тіл болады. Оны даудың тақырыбы емес, ұлттың ұйытқысы ете білгеніміз жөн». Бір айта кететін мәселе – тілдер күні әлемнің ешбір мемлекетінде атап өтілмейді. Бұл – еліміз үшін тіл саясатының қаншалықты маңызды екенін айғақтайды», – деген Айдар Карбозұлы өз сөзінде еліміздің латын қарпіне көшу мәселесін де тілге тиек етті. Латын қарпіне көшуде ұлтымыздың ұтары көп екенін, жаңғырудың өзі жазудан басталатынын, бұл мәселеге ел болып қолдау білдіру қажет екенін баса айтты.
Салтанатты шара барысында басқарма басшысы тілімізді дамытуға өзіндік үлес қосып жүрген азаматтарға ҚР мәдениет және спорт министрлігі Тілдерді дамыту және қоғамдық-саяси жұмыс комитетінің Құрмет грамотасын, Алматы облысы әкімінің Құрмет грамотасы мен Алғыс хаттарын және Тіл басқармасының Құрмет грамоталарын табыс етті.
***
Мұнан кейін киелі сахна төріне қазақтың қара домбырасымен «Текті сөздің төресі» атты облыстық байқаудың жеңімпазы, қараша айында өтетін республикалық байқауға жолдама алған Нариман Әбдірахманов шығып, тілдер мерекесіне орай ақын Жұматай Әміреевтің сөзіне жазылған Асулар" атты арнауын орындады.
Көпшілікке терең ой салған тамаша арнаудан кейін сахна төріне ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Алматы облысы бойынша департамент басшысы Серікбай Нұрғисаев шығып, мерекеге орай жылы лебізін білдіріп, тіл мерейін асқақтатуда сүбелі үлес қосып келетін азаматтарды департаменттің Құрмет грамотасымен марапаттады.
***
Өзгеше форматта өткен салтанатты жиында облысымыздағы қазақ тілін меңгерген этнос өкілдері де өздерінің ақ жарма тілегін білдірді. Арнайы бейнежазбада айтылған ұлт өкілдерінің «қазақ тілі – өз тілім», «ұлтым орыс болса да, тілім – қазақ» деуінің өзі мемлекеттік тілді құрметтеуі деп білеміз.
«Тіл — татулық тірегі». Олай болса, көп ұлт пен ұлыстар мекендеген елімізде тіл қадірін жете түсініп, оның мерейі мен мәртебесін өсіру жолында бірлік таныту – өзекті.
***
«Кіл жүйріктен, кім жүйрік». Елбасы Н.Назарбаевтың «Болашаққа бағдар: рухани жаңғыру» атты мақаласы аясында қазақ поэзиясының көрнекті ақыны Тұманбай Молдағалиев жырларын ұрпаққа өнеге ету, мол мұрасы арқылы жастарды отансүйгіштікке тәрбиелеу, өлең құдіреті арқылы мемлекеттік тілдің мәртебесін көтеру мақсатында Алматы облысының тілдерді дамыту жөніндегі басқармасы және «Қазконтент» АҚ «Әдебиет порталы» интернет-жобасының ұйымдастыруымен «Жүрегі жырдан жаралған» атты жазба ақындардың республикалық онлайн-мүшәйрасын өткізген болатын.
«Мәңгілік елдің мәңгілік тілі» атты салтанатты шарада онлайн-мүшәйрасына қатысып, оза шапқан ақындар марапатталды.
Басқарманың арнайы жүлдесін «Жетісу» газетінің бас редакторы, Халықаралық «Алаш» әдеби сыйлығының иегері Әміре Әрін табыс етті.
Мүшәйраның бас жүлдесі Алтынғадыс Күнтуғанұлына ( 100 000 тг.) табысталса, бірінші орынды Оразай Жеңісұлы ( 80 000 тг) иеленді. Жүлделі екінші орын Мәрлен Ғилымханға (70 000 тг) бұйырды. Ал жетісулық жас ақын Мағрипа Сандуғаш үшінші орынға (60. 000тг) лайық деп табылды.
***
Кітап – ғажайып қазына, кітап – өмірсерік. Кітапты сүймеген, Құдайды да сүймейді (Ш. Мұртаза).
Алматы облысының тілдерді дамыту жөніндегі басқармасының ұйытқы болуымен «Жетісу – кітапқұмарлар өлкесі» атты «Букроссинг» облыстық жобасы қолға алынған болатын.
Қоғамдағы «уақыт жоқ» деген стереотипті бұзып-жарған жаңа бастама – «БУККРОССИНГ» – еркін кітап алмасу акциясының өткізіліп жатқанына екі айдың жүзі болды. Бүгінде көшпелі кітапхана халықтың кітапқа деген қызығушылығын оятуға айтарлықтай үлес қосуда.
Жылжымалы кітапхана сөрелеріне қойылған 700-ден астам кітаптың 100-ге жуығын оқырмандар үйдегі кітаптарын алып келіп, ауыстырып алса, 70-тен аса кітап «оқып, қайта алып келемін» деген оқырмандарға берілді. Мәселен, тек «Қаратал» жағалауы бойында орын тепкен көшпелі кітапханаға екі ай ішінде қала тұрғындары 200-ге жуық кітапты сыйға тартты.
Аталмыш жоба аясында белсенділік танытқан қала тұрғындарын тілдер мерекесі күні марапатталатынын осыған дейін әлеуметтік желіде құлағққағыс етіп, жазып келдік. Мерекелік шара барысында жоба аясында белсенділік танытқан қала тұрғындары арнайы үш номинация бойынша марапатталып, сый-сияпат табыс етілді.
«Ең үздік жас оқырман» номинациясымен Талдықорған қаласындағы Бақтыбай Жолбарысұлы атындағы №18 мектеп лицейінің 3 сынып оқушысы Жанна Қасен, «Ең үздік оқырман» номинациясы бойынша облыстық «Жетісу» газетінің журналисі Қозыбай Құрман, ал осы акция аясында ең көп кітап өткізген қала тұрғыны Гүлзада Сыдықова «Ең көп кітап өткізген оқырман» номинациясымен жүлделі болды.
Осы шара аясында өлеңін өмірбаянына, өмірбаянын өлеңіне айналдырған, әдебиет айдынында өзіндік қолтаңбалары қалыптасқан Жетісудың дарынды да, жалынды ақындары Сағыныш Намазшамова, Гүлбақыт Қасен, Жангелді Немеребаев, Торғын Тұрлыбаева, Азамат Нұрмұханов жүрекжарды жырларын оқып, көшпелі кітапханаға өз кітаптарын тарту етті.
«Мәңгілік елдің мәңгілік тілі» атты салтанатты шараны «Алтын қалам», «Алтын тобылғы» әдеби сыйлықтарының иегері, Қазақстан журналистер одағының мүшесі, жазушы Есболат Айдабосын және Алматы облысы тілдерді дамыту жөніндегі басқармасы тіл бөлімінің бас маманы Әсем Кенжеғұлова жүргізді.

Алматы облысының аумағында 1 095 өрт тіркелді. Ол көбіне тұрғындардың өрт қауіпсіздік ережелерін сақтамауынан туындайды.Бұл туралы облыстық өңірлік коммуникациялар қызметі алаңында белгілі болды.
2017 жылдың 20 сәуіріне дейін қатты отынмен жанатын пештерді пайдалану кезінде өрт қауіпсіздік ережелерін бұзу себептері бойынша 120 өрт оқиғасы тіркелген. Оның ішінде 23 адам улы газбен уланған. Жарақат алудың негізгі себептері өрт қауіпсіздігі талаптарының орындалмауы деді өз сөзінде облыстық төтенше жағдай департаментінің азаматтық қорғау подполковнигі Катышева Толқын.
«Жылу беру маусымы басталар алдында пештер тексеріліп, түтіндіктері тазаланып, сылануы керек. От жанып жатқан пешті қараусыз қалдыру өте қауіпті. От жағуға жанармай, жермай, дизель отыны мен басқа тез жанғыш сұйықтықтар мен жанғыш сұйықтықтарды қолдануға болмайды.
Пештің үстіне киімдер мен отынды кептіруге болмайды және де үй жиһаздары, перделер жанып жатқан пештен жарты метрден кем емес ара қашықтықта орналасуы керек. От жағу маусымы басталар алдында шатырларда түтін жолдары өтетін барлық түтін мұржалары мен қабырғалар әктелуі керек», — деді Катышева Толқын.
Тұрғындар арасында өрт қауіпсіздік ережелерін сақтау бойынша Төтенше жағдайлар департаменті ұдайы түрде от жағу маусымының алдында қауіпсіздік ережелерін түсіндіру жұмыстарын жүргізеді.

Бұл туралы Алматы облысының өңірлік коммуникациялар қызметі алаңында белгілі болды. Бүгінгі таңда балалардың жан-жақты дамуы маңызды рөл атқарып отыр. Осы мақсатта Талдықорғандық жас отбасы Мансұр мен Мадина Құрманғалиевтар Мемлекет басшысының «Болашаққа бағдар: рухани жаңғыру» мақаласы аясында мүмкіндігі шектеулі балаларға арналған ағылшын курсын ашып, жұмыс істеп жатыр.
Курста қазіргі таңда 10 бала оқып жүр. Олар екі шағын топқа бөлінген. Оқытушылар балалардың әрқайсысымен жеке-жеке жұмыс жасайды. Балалардың оқу үшін барлық жағдайлары жасалған. Олар тек жазбаша ғана емес берілген тапсырманы ауызша, ойын түрінде қабылдайды.
«Осы тегін курсттың арқасында балалар тек шет ел тілін үйреніп қана қоймай, сонымен қатар бір-бірімен араласып, топпен жұмыс жасауды үйренеді. Бұл балалардың болашағының зор болуына, мүмкіндіктерінің көп болуына септігін тигізеді деп ойлаймын », — деді ағылшын тілі мұғалімі Мадина Құрманғалиева.
Сабақ аптасына 2 рет 40 минуттан өтеді. Онда 2 жоғарғы білімі бар білікті мамандар сабақ береді. Ұстаздардың айтуынша жылдың соңына дейін 30 бала оқыту жоспарланып отыр. Курсқа жазылу үшін 87782863557 нөміріне хабарласуға болады

ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің Алматы облысы бойынша департаментінің ұйымдастыруымен «Қорғас» шекара маңы ынтымақтастығының халықаралық орталығында дөңгелек үстел өтті. Онда «Қорғас» ШЫХО-ның ең маңызды мәселелері көтерілді.
Шарада кеден қызметкерлерімен әкімшілік кедергілер, қызметтік өкілеттіктерін асыра пайдалану, кедендік декларация өтуден жалтару сынды бірқатар мәселелер қаралды.
Кедендік әкімшілендіру және қолданыстағы заңнамаларды сақтау мақсатында 2017 жылы «Алтынкөл» кедендік бекетінің «Қорғас» ШЫХО бақылау пунктінде ШЫХО аумағынан алынатын тауар тасымалын реттеу үшін тауарларды қабылдап, кедендік бақылаудан өтуге оларды біріктіру және багаж терминалына жеткізу үшін «Қазпошта» АҚ жұмысы ұйымдастырылды. Сонымен қатар, 2017 жылдың қаңтар айынан бастап кедендік бақылаудан жеке тұлғалардың біркелкі өтуі мен кептелісінің болмауы үшін 2 өткелдік 3 дәліз жұмыс жасайды. Кедендік бақылау аймағында «Қорғас» ШЫХО бақылау пункті мен Алматы облысының мемлекеттік кірістер департаментінің экономикалық тергеу қызметімен бірлескен экономикалық контрабанда мен сыбайлас жемқорлықты болдырмау бойынша алдын алу шаралары жүргізіледі. Мәселен, ағымдаға жылдың қаңтар-тамыз аралығында 105 әкімшілік құқықбұзушылық анықталып, 5 161 975 теңге айыппұл өндірілді.
«Қараша айынан бастап халық енді тек төл құжаттары арқылы өтетін болады. Бұл адамдардың екі есе көп келуін қамтамасыз етеді. Жұмыс күндері мұнда күніне 2000 адам өтеді, ал демалыс күндері 5000-ға жуық. Әр түрлі жобалардың құрылысы жоспардағы аумақтың 185 га жерден 240 га өсті», — деді «Қорғас» шекара маңы ынтымақтастығының халықаралық орталығының президенті Кахарман Жазин.
Жоғарыда көтерілген мәселелердің орындалуы енді қараша айында белглі болады.

Талдықорған қаласында «Латын қарпіне көшу — бұл қазіргі заманғы таңдау» тақырыбында кездесу өтті. Оған мәслихат депутаттары, Үкіметтік емес ұйымдар, саяси партиялар және БАҚ өкілдері қатысты. Жиынның мақсаты ҚР Президенті Н.Назарбаевтың «Болашаққа бағдар: рухани жаңғыру» бағдарламасын жүзеге асыру аясында тұрғындар арасында латын қарпіне көшу қажеттілігі бойынша түсіндіру жұмыстарын жүргізу және латын қарпіне көшу бойынша өзекті мәселелерді талқылау.
«Ұлтымыздың басынан үш алфавит жүйесін өткергендігін білеміз. Латын әліпбиіне көшу туралы ой-пікірлер 1926-1929 жылдардан бастау алғаны баршамызға белгілі. Жалпы Елбасымыздың латын әліпбиіне көшу саясатын қолдаймын. Себебі, латын әліпбиіне көшудегі негізгі ұтымдылық — тіл ауыспай, таңбаның ауысуы. Сонымен қатар қарапайым тілмен айтсақ, сөзді немесе дыбысты қалай естісек, жазылуын да солай жазамыз. Қазіргі таңда ғаламның 70 % латын әліпбиіне көшкен. Латын қарпіне көшсек бізді бүкіл әлем оқитын болады», — Талдықорған қаласының Қоғамдық Кеңесінің мүшесі Қаламқас Есенқұлқызы.
Жиын соңы пікір-талас, сұрақ-жауап форматымен аяқталды және латын тілі бірнеше параметрлер бойынша оңтайлы болып табылатыны сөз етілді.