BlogCamp-2013. Алматыдан қашу операциясы.

Пролог
Алматылықтар бұл күнді асыға күтті. Алматыдан қашуды ең көп қалаған e_zhalgas екеуміз сияқтымыз, вокзалға 21-ші наурыз күні еп-ерте келіп алыппыз. Пойыз қойылып, бәрі жиналғанда топырлап, айқайлап-шулап мініп алдық. Алматы қаласынан шыққан соң пойыздың «Ресторан» деп аталатын бөлігіне қоныс аудардық. Ол жерде не болғанын жазбаймын, өйткені оны сол жердегілер ғана біледі және сол түннің куәгерлерінен бөтен адамдар білуге міндетті емес

Арт жағымыздағы көрініске орай білдірген эмоциямыз

Табалдырық
Қаланы алғаш көруім. Вокзалдан күтіп алған Берікбол мен Көркем аздап таныстықтан кейін пәтерге орналастыру жұмысына кісіріп кетті. Біздер пәтерге барар жолда төңірекке алақ-жұлақ қарау мен ыржақтап күлуден басқа ештеңе істеген жоқпыз. Жалпы ештеңе де болған жоқ. Қаланың ескі болса да үлкен екені, халықтың көп екені сезіліп тұрады былай.

Біз мінген такси тиісті жеріне жетті

Препати
Препати фотоға түсумен ғана ерекшеленді. Әнастар, ғарышқа сапар шексе, жалпы шексе — фотоға түсуден бүйтіп маньяктық танытпас. Шырт-шырт еткен шүріппе: құдайға шүкір фотоаппараттыкы, «мені бүйтіп түсірші», «мен былай түсейінші», «кел, сенімен түсейін», «енді бәріміз бүйтіп түсейікші»… Камасутра поза таңдаудан жеңіліс тапқанын мойындап, шарасыздықтан сөреден секіріп өлетіндей жағдай. Тарайтын уақыт жарияланғанда да, бір сағат көлемінде айналсоқтап жүріп алдық, себеп сол: фотоға түсу.

Препатиден пәтерге келген соң Қазақстан-Германия матчын көру үшін жігіттер-қыздар болып жиналып алдық. Ішіп-жейтінімізді пакетпен алып келдік. Бірақ сүреңсіздеу басталған кештің жандануына әжетхананың ілмек кілті себеп болды. Әжетімді өтеп, есікті ашайын десем — ашылмайды. Жарты сағаттай іште отырдым. Матчтың басталғанын жамырап айтылған әнұран арқылы білдім.

Әнұран әжетхана орналасқан жаққа қарап айтылғандықтан, маған анық естілді

BlogCamp
Абыр-сабыр амандасулардан кейін басталып кетті. Gastarbaiter екеуміз қатар отырған екенбіз залда, күліп білмейтін адамдар екенімізді ескеріп, әр нәрсені айтып ыржалақтаумен болған түрімізге төңіректегілер түсіністікпен қараған шығар деген үміттемін. Соның ішінде Гастаның біреуге қатысты айтылған «гоблиннің ұрғашысы» деген теңеуі есіме түссе әлі күнге дейін күліп қоя беремін.

Бәрінен бұрын облыс әкімінің әй-шәй жоқ кіріп келіп, жарты сағат сөйлегені біртүрлі көрінді. Шыны керек: оның облысқа қатысты айтылған жоспарлары жиналған қауымды қызықтыра қойды деу қиын. Жастар ісіне қолдау білдіру дұрыс-ақ, бірақ бұл жақсылықты міндет еткендей сахнадан түспей қою керек дегенді білдірмесе керек. Қалай десек те бұл ресми шара емес қой, жай ғана блогерлердің жиыны.

Біркөлік
Лагерьдегі күніміз тамаша өтті. Көптен көріспеген жолдастар мен достарды көріп бір қауқылдасып қалдық. Көп жылдарға дейін естен кетпейтін басқосу еді бұл. Мейлі "Қара ленталылар" футболдан жеңіле берсін, судьяның әділ болмағандығын бәрі көрді ғой

Блогкэмп форматы туралы айтқым келген. Бірақ осыған дейін талай жігіттер өз ойларын жазып кетіпті. Қайталап бастарыңды ауыртпайын. urimtal оралған соң, келесі блогкэмп ұйымдастыру қарсаңында осы мәселе сол кісінің ақыл-кеңесімен қайта қаралса. Қалай десек те, BlogCamp-тың алғашқы жасалуына түрткі болған Асхат қой.

Қоштасудың қиынны-ай
Есіме алсам әлі ішім (ішіп?) удай ашиды. Қалып қойған жігіттерге қызығып-қызғанып қарап, Алматыға жүріп кетуге мәжбүр болдық.

Айтпақшы, қыздар-жігіттер ешкімге айтпай стихиялы түрде Harlem Shake билепті:


Посттағы фотосуреттер Розатайдыкы
«Видеодағы» суреттер Айнұрдікі (которая Ракишева ше)