Астана қаласының әкімдігінде әкімнің орынбасары Е. Аманшаевтың жетекшілігімен бүкіл әлемдегі маңызды проблемалардың бірі болып табылатын суицид мәселелері бойынша Астана қаласы әкімдігінің жанындағы денсаулық сақтау жөніндегі Үйлестіру кеңесінің кезекті отырысы өтті.

Суицид бойынша жалпы әлемдік көрсеткіш 100 мың халыққа 16 жағдайды құрайды және бүкіл әлемде суицид жетекші өлім себептерінен оныншы орында тұр, ал жас санаты бойынша 15-тен 44 жас аралығын құрайды – бұл жетекші үш өлімнің бір себебі болып табылады.

Халықаралық статистиканы зерттеу бойынша жүргізілген талдаудан ең төмен көрсеткіш мұсылман елдерінде (БАӘ, Әзірбайжан, Мысыр, Араб елдері мен Сирияда – 100 мың халыққа кемінде 6,5 жағдай) байқалады. Бұл діндар адамдарда тұрақты діни сенімдері жоқ адамдарға қарағанда суицид әрекеттеріне деген қауіп әлдеқайда төмен екендігімен байланысты.

Отырыс барысында халықтың осал тобы мен себептері анықталды, діни конфессияны қосқанда мемлекеттік және жеке құрылымның көптеген қоғам секторларын үйлестіретін және ынтымақтастықты талап ететін өз-өзіне қол жұмсауды ескерту бойынша жолдар талқыланды.

Діни бірлестіктердің өкілдері суицидке қатысты қоғам пікірімен ортақ, өйткені барлық әлем діндерінде өз-өзіне қол жұмсау жасалатын күнәнің ең ауыры болып табылады және тыйым салынған, бұл туралы Успендік кафедралды шіркеудің дін қызметшісі проторий Дмитрий мен наиб имамы Сәлімов Асхат айтып өтті.

Отырыстың қорытындысы бойынша халықтың осал топтарын анықтау, журналисттер үшін суицид мәселелерін дұрыс жариялау қағидалары бойынша тренинг жүргізу, интернет-ресурстарға блок қою бойынша құқықтық өрісін қарастыру, суицидті алдын алу бойынша баспа өнімдерін басып шығару және БАҚ пен қоғамдық орындарда әлеуметтік бейнероликтер мен жарнамаларды көрсетуге бағытталған негізгі басым бағыттары анықталды.

astana.gov.kz

Астанада Қазақстан Республикасы Денсаулық сақтау және әлеуметтік даму министрлігінің шешімі бойынша жарияланған «Қазақстанда іске асырылатын үздік әлеуметтік жобалар» республикалық байқауына қатысуға өтінімдерді қарастыру бойынша комиссияның отырысы өтті.

Байқаудың өңірлік іріктеуіне қатысу үшін өз қызметін қаржыландыру көздеріне қарамастан халықты әлеуметтік қорғау жүйесі шеңберінде жүзеге асыратын қоғамдық бірлестіктер, мүгедектер ұйымы, заңды тұлғалар және басқа да үкіметтік емес ұйымдармен іске асыратын 12 әлеуметтік жоба келіп түсті.

Өтінімдерді қарастыру нәтижесі бойынша комиссия республикалық көрмеге қатысу үшін 5 үздік әлеуметтік жобаланы іріктеді:

— Динаш Ауталипованың аурухана клоундары жөніндегі әлеуметтік жобасы;

— Бану Исқақованың «Жарайсың!» қазақстандық тауар маркасымен оңалту техникалық құралдарды өндіру бойынша жобасы;

— «Сенсорлы құралдардың соқырларға қолжетімділігі» жобасы;

— «Үнсіз әлем» қоғамдық қорының сурдоаударма қызметі орталығының жұмысы жөніндегі жобасы;

— Рамазан Сұлтановтың мүмкіндігі шектеулі балаларды тәрбиелеп отырған отбасыларына, ҰОС қатысушыларына және зейнеткерлерге жөндеу жұмыстарына ақысыз көмек көрсетуге бағытталған әлеуметтік жоба.

astana.gov.kz

Биыл 8 тамызда Қытайдың Шанхай қаласынан басталған «Жібек жолы» автошеруі еліміздің елордасы Астанаға келіп жетті. Жолаушылар осы ұзақ сапар барысында ЭКСПО көрмесі өтетін қалаларға арнайы ат басын тіреуді мақсат етіпті.

Керуен бағытының соңғы нүктесі – 2015 жылы ЭКСПО көрмесін өткізетін Италияның Милан қаласы. Жолға 8 көлікпен шыққан автошеру қатысушылары 16 мың шақырымды бағындырмақ. Қазақстаннан соң Ресей асып, Грузия, Түркия, Грекия елдерін кесіп өтіп, діттеген жері Италияға 31 қазан күні барып тоқтайды.

– Біздің бұл сапарымыз достық қарым-қатынасқа негізделген. Жаңа «Жібек жолы» мемлекеттер арасындағы байланысты нығайтып, стратегиялық ынтымақтастықты арттыруға септігін тигізеді деп сенеміз. ЭКСПО көрмесі өтетін қалалардың көтеріп отырған тақырыптары өте маңызды мәселе. Сондай игі іске әлем назарын аударуға біз аз да болса ықпал етсек – мақсатымыздың орындалғаны, — деді «Жібек жолы» авторшеруі комитетінің атқарушы директоры Фу Цзянь.

Қонақтарды жылы қарсы алған ҚР Мәдениет және Спорт министрлігі Спорт және дене шынықтыру істері комитетінің төрағасы Елсияр Қанағатов біздің елдің Шығыс пен Батыс елдерінің түйіскен жері екенін, өркениеттердің алтын көпірі болып келе жатқанын атап өтті.

Елсияр Қанағатовтың сөзін қолдаған Қытай Халық Республикасының Өнер қауымдастығы президенті Шенг Джонг Го Қазақстан Қытайды Еуропамен жалғайтын сенімді әріптес екенін айтты.

Мемлекет басшысы жетекші шетелдік және отандық БАҚ-қа сұхбат берді. Сұхбат барысында Қазақстанның экономикалық, әлеуметтік, мәдени дамуы жайлы айтып кетті. Елбасының негізгі пікірлері туралы толығырақ ORTCOM.KZ порталынан оқи аласыз.

Астана қаласының құрылуы Қазақстанның дербес мемлекет ретінде қалыптасуының ең ауыр кезеңінде дамуға серпін берді, деп мәлім етті Мемлекет басшысы Нұрсұлтан Назарбаев.

— Кеңес Одағы құлдырағаннан кейін ауқатты ел бола алатынымызға күмән келтіргендер көп болды. Астана бұл жағынан шенеуніктер мен халықтың дамуына серпін берді. Жаңа елорда – болашағымыздың және еліміздің ұлы мүмкіндіктерінің бейнесі. Астананың арқасында басқа да қалалар дамып келеді, — деп атап өтті Елбасы.

Елбасының пікірінше, елорда ғылыми, мәдени, спорттық орталыққа айналды.

— Бұл қала қай жағынан алып қарасақ та, болашақтың қаласы. Астанада «ЭКСПО-2017» көрмесін өткізу, жаңа орталықтардың салынуы қала келбетін жақсы жағынан көрсетеді. Астана ғылыми ілгерілеудің, барша қазақстандық ұлттың дамуының орталығына айналады, — деді Нұрсұлтан Назарбаев.

astana.gov.kz

Астана қаласы Статистика департаментінің хабарлауынша, елорда халқының саны ағымдағы есеп бойынша 2015 жылғы 1 тамыздағы жағдай бойынша 866 039, соның ішінде «Алматы» ауданы бойынша – 381 635 (44,1%), «Есіл» ауданы бойынша – 133 402 (15,4%), «Сарыарқа» ауданы бойынша – 351 002 (40,5%) адамды құрады.

Жыл басымен салыстырғанда Астана қаласы халқының жалпы саны 13 157, соның ішінде «Алматы» ауданы бойынша — 1781 адамға, «Есіл» ауданы бойынша — 6574 адамға, «Сарыарқа» ауданы бойынша 4802 адамға артқан. Үстіміздегі жылдың қаңтар-шілде айларында халықтың табиғи өсімі 12 684 адамды, көші-қон өсімі 473 адамды құрады.

Аталған мерзімде Астана қаласы бойынша тұтастай алғанда 149 95 сәби туған, бұл өткен жылдың сәйкес кезеңімен салыстырғанда 8,5% көп. Сонымен қатар, халықтың табиғи өсімі өткен жылғы қаңтар-шілдемен салыстырғанда 8% өсіп, 12 684 адамды құрады.

2015 жылғы қаңтар-шілдеде АХАТ органдарында тіркелген некелер саны өткен жылдың сәйкес кезеңімен салыстырғанда 2,1% азайды, ажырасулар саны 10% өскен.

astana.gov.kz

Астанадағы айнадай жарқыраған ғимараттардың бой көтеруіне былтыр ғана ашылған «ҚазҚұрылысШыны» ЖШС айтарлықтай үлес қосып үлгеріпті. Шынында, энергия үнемдегіш әйнек пакеттер мен қауіпсіз шыны өңдейтін зауыттың алғашқы қадамдары қалай екен? Осы мақсатта Индустриалды паркте орын тепкен кәсіпорынды бетке алған едік.

Астанадағы алып өндіріс алаңының бір мүйісін мекендеген шыны зауытының іші қайнаған қызу тірлік. Қол қусырып қарап отырған жан жоқ. Бізді жылы қарсы алған кәсіпорын директоры Әнуар Алдамұратов жұмыс барысымен таныстыра жүріп, ашылғанына аз ғана уақыт болған өндіріс ошағының бітірген ісін айтып, ағынан жарылды.

– Біздің өнімдеріміздің артықшылығы – энергия үнемдейтіндігі, — деп атап көрсетті зауыт директоры Әнуар Алдамұратов. – Қыста бөлме іші жылуының 50 пайызы терезе арқылы сыртқа кетіп қалады. Жылудың сақталмауы шынымен қапталған нысандарда бұл көрсеткіштен әлдеқайда жоғары. Біз өңдеген құрылыс материалдарымен жылу мәселесін оңтайлы шешуге болады. Шыныларымыз қауіпсіздік деңгейінің жоғарылығымен, экологиялық тиімділігімен және қуат сақтағыштығымен сипатталады. Қаламыздың өркендеуіне үлес қоса алсақ, ісіміздің алға басқаны. Қазірдің өзінде Астанадағы тірліктің қарқынына қарқын қосқан әлемдік ЕХРО көрмесі үшін тұрғызылып жатқан ғимараттарды шынымен қамтамасыз етуді қолға алдық. Одан бөлек, тағы бірнеше үлкен жобаларға қатысамыз. Ол – астаналықтар асыға күткен «Абу Даби Плаза» мұнарасы, «Talan Towers» кешені. Осы құрылыстар аяқталса, бұл ғимараттарды биіктігі ғана ерекшелемейді, сондай-ақ, біз өңдеген шынылар айдындай жарқыратып көрсетеді, — деді Ә.Алдамұратов

Аузымызды аштырмастан кәсіпорынның аяқ алысын аңдатқан зауыт басшысы бізді алдымен әлі өңделмеген, қалыпқа түспеген шынылар сақталатын қоймаға бастап жүрді. Ондағы десте-десте шикі өнімдерді шекаралас Ресей жөнелтеді екен. Ресейден келеді дегеніміз болмаса, бұл шикізаттар АҚШ-тың «Guardian», Англияның «Pilkington», Жапонияның «AGC» атты әлемдік деңгейдегі шыны компанияларына тиесілі.

Қоймадан шыққан шынылар бірінші түрлі өлшемде кесіледі. Тынымсыз қозғалған адамдардың қарасы көп болғанымен, жұмыс күшінің денін арнаулы аппараттар құрайды. Зауыт шыны өндірудегі шаруаны жеделдететін әлемдік алдыңғы қатарлы технологиялармен толықтай қамтылған. Мысалы, Германиядан алдырған заманауи «Bystronіc» жабдығы жылына 300 мың шаршы метр шыны кесуге мүмкіндік береді. Кесу жылдамдығы – минутына 120 метр.

Шыныны жылтырата қашау, ойықтар жасау, тесу, кесу сынды жұмыстар италиялық «Intermac Master 45» аппараты арқылы атқарылады. Одан соң материал «Emar» жуу машинасында жуылып, кептіріліп пешке салынады. Ал, шынылардың шыңдалатын орны – Испаниядан әкелінген «Heat Soak Test» пеші. Бұл пеш шынының қолданылу уақытын 50 жылға дейін ұзартып, қауіпсіздігін арттырып, энерготиімділігін одан әрі үдете түседі.

Бұдан бөлек, кәсіпорындағы шыныларды түрлі-түсті бояу, жиектеу және тағы басқа ұсақ-түйек шаруалар нәзік қолды арулардан артылмайды. Сондай-ақ, жүкті тасымалдау, көтеру сияқты жұмыстарды құрыш білектілер арнаулы машиналар арқылы оңай жайғастыра салады екен.

Зауыт директорының айтуынша, кәсіпорын алғаш ашылғанда 58 адамды жұмыспен қамтамасыз етіпті. Ал, қазір жұмысшылар саны 90 адамға жетіп жығылады. Күнделікті нәпақасын осы жерден теріп жеп жүрген еңбекқорлар жұмысқа қабылданарда алдымен 2-3 ай оқу курсынан өтеді. Өйткені, мұндағы қаптаған технологияның тілін үйрететін елімізде ешқандай оқу орны жоқ. Арнаулы бейімдеу сынағынан сүрінбей өткен үйренушілер оператор болып жұмысқа алынады. 1-2 жыл тәжірибе жинап, тісқаққан маманға айналған операторлар шебер дәрежесіне көтеріледі. Тиісінше, еңбекақылары да жоғарылайды. Операторлардың орташа еңбекақысы 110-120 мың теңгені құраса, шеберлердің айлығы 150 мың теңгенің үстінде.

– Мен зауыт ашылғанда жұмысқа үйренуші емес, үйретуші ретінде қабылдандым. Себебі, мен бұған дейін басқа кәсіпорындарда біраз тәжірибе жинағанмын. Мына жерде орналасқан технологияның бәрін бес саусағымдай білемін. Осындай дамыған заманда адамның мықтығылы күшінде емес, білімінде екенін сөзсіз мойындайсың. Өйткені, дене күшін жұмсамастан, роботтық машиналармен бәрін әп-сәтте орындай саламыз. Тек басқара алсаң, жетіп жатыр, — деді шебер Алмат Әлжанов.

Астанада ашыла салысымен, қаланың шаруасына білек сыбана кірісіп кетіп, үлкен жобаларға ауыз салған зауыттың алғашқы адымдары таңғаларлық емес. Себебі, аталмыш «ҚазҚұрылысШыны» қатардағы өндірісшілердің бірі емес, Қазақстан нарығында тәжірибесі мол. Компанияның негізі 2004 жылы Алматы қаласында қаланған. Астанада жұмысын бастаған бұл зауыт – «ҚазҚұрылысШынының» екінші өндіріс орны.

Елордадағы «ҚазШыныҚұрылыс» өнімдері бүгінгі таңда Астана, Көкшетау, Петропавл, Павлодар, Өскемен қалаларына тарайды. Зауыт жақында Өскемен қаласында іргесі қаланған «Huyndai center» нысанын шынымен қаптап шығыпты. Күніне 5 мыңнан 15 мың шаршы метрге дейін өнімді өңдеп, дайындайтын кәсіпорын қазірдің өзінде Астанадағы шыны нарығының 30-40 пайызын құрап отыр.

Астана қаласы Экономика және бюджеттік жоспарлау басқармасының хабарлауынша, 2015 жылдың 1 қыркүйектегі жағдайы бойынша жұмыс істеп тұрған шағын және орта кәсіпкерлік субъектілерінің саны 96,9 мың бірлікті құрады. 2014 жылдың сәйкес кезеңімен салыстырғанда өсім — 9,5%.

Шағын және орта кәсіпкерлік саласында 234,8 мың адам (2015 жылдың І тоқсанында) жұмыс істейді, бұл өткен жылғы кезеңмен салыстырғанда 17,8% артық. Шағын және орта кәсіпкерлікті қолдау мақсатында «Бизнестің жол картасы — 2020» бағдарламасы жүзеге асырылады. Бағдарлама аясында ағымдағы жылы республикалық бюджеттен 3 млрд теңге бөлінді.

«Бизнестің жол картасы — 2020» бағдарламасы жүзеге асырылғаннан бері 83,9 млрд теңгені құрайтын 470 жоба, ал 2015 жылы жалпы құны 11,4 млрд теңгелік 57 жоба мақұлданды.

«Астана» ФК матчының билеттері 21 қыркүйекте онлайн-сатылымға түсті, деп хабарлайды Sports.kz. Ұйымдастырушылар билеттердің көбін онлайн режимде сатуды жоспарлап отыр.
Билеттердің саны шектелген, бір адам банк карточкасы мен электронды поштасы арқылы тек 4 билет қана ала алады. Енді кезекте тұрудың қажеті жоқ, себебі қол астында ұялы телефон, планшет немесе компьютер болса, алдағы ойынға билеттерді оңайлықпен алуға болады. Бағалар УЕФА өкілдерімен реттеліп белгіленген. Ал «Галатасарай» мен «Бенфикаға» қарсы өткізетін ойынға арналған билеттердің құны 2000 теңге мен 10000 теңгенің аралығында болады. Ал мадридтік «Атлетикомен» өткізетін матч билеті ең қымбаты болмақ, яғни 12000 теңгені құрайды. Үш матчтың билеттері де бір уақытта сатылымға шығады. Осылайша жанкүйерлер өздеріне ыңғайлы орындарды таңдай алады. Сондай-ақ әлемге аты мәлім фастфуд компаниялары «Астана» құрамасының 30000 жанкүйерін тамақтандыруға дайын. Айта кетейік, матч Астана уақыты бойынша сағат 22:00-де басталады. Дәл осы күні ұйымдастырушылар жанкүйерлерді тасымалдау үшін арнайы автобус бөліп отыр. Автобус арқылы жанкүйерлер «Астана Аренаға» дейін және ойын аяқталғаннан соң қалаға дейін жетіп қалады. Автобус 30 қыркүйек күні Астана уақыты бойынша сағат 19:00-де жанкүйерлерді мына мекенжайлар бойынша алып кетеді: 1. «Қазақстан» спорт кешені; 2. Мұнайтпасов атындағы стадион; 3. «Нұр Астана» мешіті; 4. Салтанат Сарайы.

сілтеме

Ертеңнен бастап Астанадағы кейбір қоғамдық көліктердің жүру бағыты уақытша өзгереді. Бұл – елордадағы Уәлиханов-Омаров көшелері қиылысының жабылуына байланысты орын алған жағдай. Аталған көшелерде жылу жүйелерін жөндеу жұмыстары жүргізілмек. Астанадағы Уәлиханов-Омаров көшелері қиылысындағы қозғалыс бүгін сағат 23:00-ден бастап шектеледі.

Бұл уақытша келеңсіздіктер қысқы маусымға дайындық шаралары себебінен болып отыр. Елордалықтарды орталықтандырылған жылумен уақытылы қамтамасыз ету мақсатында аталған ауданда жылу желілерін жөндеу жұмыстары жүргізілмек. Қозғалыс 30 қыркүйекке дейін қайта жанданады деп жоспарлануда. Осыдан кейін Республика-Жангелді көшелеріндегі қозғалыс бір бағытта тоқтатылмақ. Алайда жол полициясы басқарамасы бұл шаралар тұрғындарды айтарлықтай әбігерге салмайды деп сендіреді.
Нұрлан Уваев, Астана қаласының Жол полициясы басқармасы жол бақылау бөлімінің бастығы:

— Жол полициясы бекеттерінің орналасу орындары белгіленді. Жақын маңдағы қиылыстардағы қозғалысты реттеу үшін барлық шаралар қолға алынды. Мұнымен қоса жөндеу жұмыстары аяқталғанға дейін бас-аяғы 20 қоғамдық көліктің жүру бағыты да уақытша өзгереді.

Тұрсынғали Жакенов, Көлік басқармасы жолаушылар тасымалын ұйымдастыру бөлімінің бас маманы:

— № 4, 16, 24, 30, 39, 70, 73 бағдарлары Сембинов көшесі арқылы айналып, ары қарай қолданыстағы сызба бойынша жүреді. № 1, 2, 13, 26, 33, 38, 42, 48, 49, 52, 76, 103, 127 бағдарлары Республика даңғылы арқылы айналып, ары қарай қолданыстағы сызба бойынша жүреді.

Астана қаласының Жол полициясы басқармасы елорда тұрғындары мен қонақтарына алдын ала басқа қозғалыс бағытын таңдап, мұқият болуға, сондай-ақ жол белгілерін қатаң сақтауға шақырады.

сілтеме

Астанада фотоэлектр модулдерін немесе күн батареяларын шығаратын зауыт жұмыс істейді. Шикізат ретінде отандық кремний пайдаланылады. Зауыттың жылдық қуаттылығы — 50 МВт.

Күн батареяларын шығару тұтастай Қазақстанда жүзеге асырылады және негізгі шикізат — кремний өндіруден бастап ол үш кезеңге бөлінеді.

Рустам Османбеков, «Astana Solar» ЖШС жөндеу инженері:

– «Astana Solar» – Қазақстанда фотоэлектр индустриясын дамытудың тік интеграцияланған жүйенің «KazPV» деп аталатын тізбегінің бір түйіні. Бұл жоба үш кезеңнен тұрады:

Алматы обл. Үштөбе қ. шикізат өндіру, онда кремний өндіріліп, екінші кезең Өскемен қаласына жіберіледі. Кремний түрлі қоспаларды тазарту арқылы өңделеді, содан кейін блоктар дайындалады, ұяшықтарға бөлінеді — күн ұяшықтары жасалады. Кейін олар Астанаға жеткізіліп, соңғы кезеңде дайын өнімі — күн модулдері дайындалады.

Зауыт толығымен автоматтандырылған. Қол еңбегі аз пайдаланылады, негізінен, жұмыс барысын бақылау және өнім сапасын тексеру кезінде ғана. Зауытта шығарылған батарея 25 жылға дейін жұмыс істейді.

Кәсіби кадрлар — «Astana Solar» ЖШС мақтанышы, мұнда түрлі саладан 200 жуық қазақстандық маман жұмыс істейді. Зауыттың үзіліссіз жұмысын қамтамасыз ету үшін 8 сағаттан екі ауысыммен 25 адамнан тұратын 4 өндірістік бригада бар.

Зауыттың өнімділігі – сағатына 30 модульді, тәулігіне – 240 модульді құрайды. Кәсіпорын жылына қуаттылығы 50 МВт-тық дайын фотоэлектр модульдерін, 217 000 астам фотоэлектр модулін шығаруға мүмкіндік беретін қазіргі заманға сай еуропалық автоматтандырылған қондырғылармен жабдықталған.

Айта кетейік, Қазақстанның «жасыл экономикаға» өтуіне және «Энергия үнемдеу – 2020» бағдарламасын жүзеге асыруға орай жобаның өзектілігі артады.

Рустам Османбеков, «Astana Solar» ЖШС жөндеу инженері:

– Біздің зауыт үшін мұндай шара өте маңызды. Өйткені басқа елдерде баламалары бар, бірақ біз сапаға кепіл береміз. Сондай-ақ орналасқан жері де тиімді, біз әрқашан да көмектесеміз және кепіл береміз. Еліміздің әрбір тұрғыны отандық өнімді және «Қазақстанда жасалған» акциясын қолдауы қажет.

Зауыттың құрылысы Қазақстан Республикасының үдемелі индустриялды-инновациялық даму бойынша мемлекеттік бағдарламасының және Қазақстанның Индустрияландыру картасының бөлігі болып табылады.