Әйелдер боксының жұлдыздары әлем чемпионатына қатысу үшін Астанаға келеді. Мұнда медальдармен бірге үш салмақ дәрежесінде 12 олимпиадалық лицензия ойнатылады, деп хабарлады Қазақстан бокс федерациясынан.



Халықаралық бокс қауымдастығының сайты aiba.org: «Бұл чемпионат өзінің 15 жылдық тарихындағы ең тартымдысы болуы мүмкін», — деп болжады.

Ирландиялық Кэти Тейлор мен үндістандық спортшы Мэри Ком Астанада рекорд орнатып, өз карьерасында алтыншы рет әлем чемпионы атануға ниетті.



Алтынға үміттілердің қатарында америкалық Кларессу Шилдс, британиялық Никола Адамс — Лондон Олимпиадасының чемпиондары, сонымен қатар қытайлық Рен Канкан бар.



Барлығы 326 спортшы қатысуға ниет білдірді. Бұл әйелдер чемпионатының рекордтық көрсеткіші. Әлем біріншілігіне алғаш рет Иордания, Мозамбик және Сьерра-Леоне өкілдері қатысады.

«Командалардың басым бөлігі Астанаға келді, олар боксты дамыту орталығында, «Толқын» спорт кешенінде және «Астана-аренада» жаттығып жатыр. Біздің спортшылар АҚШ, Финляндия және Черногория командаларымен бірлесіп жаттығу өткізді», — деді федерация өкілі.



«Астанадағы әлем чемпионаты әлемдегі әйелдер боксын жаңа деңгейге көтереді, — деді AIBA президенті Чинг-Куо Ву. — Оған атақты чемпиондар мен дарынды жастар қатысады».

Жарыс күндері жанкүйерлер үшін «Барыс-аренаға» кіру тегін. Ашылу салтанаты 19 мамырда сағат 18:00-де өтеді.

Биыл Астанада 4 мыңнан астам түлек ҰБТ тапсырады. Бұл туралы Астана қаласы әкімдігінің ресми сайты хабарлады.

Ұлттық бірыңғай тестілеуге дейін аз уақыт қалды. Өтінімдерді қабылдау нәтижесі бойынша елордада 4106 оқушы жылдың басты емтиханын тапсырады. Қазіргі кезде оқушылар арасында сынақ тестілеу ұйымдастырылып жатыр. Сонымен қатар, мектептерде мұғалімдер қосымша сабақтар өткізіп, әрбір түлектің жеке психологиялық дайындығына баса назар аударуда.



ҰБТ қарсаңында мұғалімдермен, ата-аналармен және мектеп түлектерімен ақпараттық-түсіндіру жұмыстары жүргізілді. Бұдан басқа, Sar Edtech нәтижелерді талдау электронды жүйесін пайдалана отырып, онлайн тестілеу жүргізілуде, бұл әрбір оқушының нәтижелерін талдап, жеке картасын әзірлеуге, оның қателіктері мен кемшліктерін көрсетіп, жеке-жеке жұмыс істеуге мүмкіндік береді.

Әдеттегідей, түлектер бірыңғай емтиханды Л.Н. Гумилев атындағы Еуразия ұлттық университетінің, С. Сейфуллин атындағы Қазақ агротехникалық университетінің, Қазақ гуманитарлық заң университетінің базасында тапсырады. Тестілеу 1-7 маусымда өтеді. Тестілеуге үш жарым астрономиялық сағат (210 минут) уақыт бөлінеді.

ҰБТ тапсыратын оқушылардың ішінде, 196-сы «Алтын белгі» медалін және 89-ы ерекше үлгідегі аттестат алуға үміткер.

Еске салайық, шекті деңгейге (50 балл) қол жеткізе алмаған оқушылар басты ұлттық емтиханды тамыз айында ақылы негізде қайта тапсыра алады. Тестілеуді қайта тапсыру құны — 2242 теңге. Тестілеуге қатысу үшін ЖОО-ға өтініш, төрт 3х4 фотосуретін, жеке куәлік пен мектепті бітіргені туралы аттестатты ұсыну қажет.

Тестілеу қорытындысы бойынша университетке түсу үшін шекті балл жинаған, бірақ оны жақсартқысы келетіндер ҰБТ қайта тапсыруға жіберілмейді. Мысалы, қандай да бір пән бойынша түлек «2» бағасын алса, бірақ шекті балл жинаса, ол ҰБТ қайта тапсыра алмайды.

Отбасы күнін Республикамыздың барлық өңірлері атап өтуде. Отбасы институтын дамытуда бұл шаралардың маңызы зор. Елорда тұрғындары мен қонақтары бұл атаулы күнді өздерінше тойлады. Жексенбі күні Астаналық паркте жеті команда, яғни жеті отбасы көңілді жарыстарда бәсекеге түсті.



Спорттық мерекеге жанұялар толық құраммен қатысты. Балалары мен ата-аналары шет қалмай, жеңіске жету үшін ептілігі мен жылдамдығын көрсетті. Көңілді старт бағдарламасына асық ату мен арқан тарту сияқты ұлттық ойындар да енді.

— Халықаралық отбасы күні 1993 жылы бекітіліп, жыл сайын 15 мамырда аталып өтіледі. Біз отбасылық жарыстар, саяхаттар және т.б өткіземіз. Бұл жолы мереке саябақта жаттығу жасаудан басталды. Содан кейін кезек жарыстарға берілді, — деді Астана қаласы салауатты өмір салтын қалыптастыру орталығының директоры Ақмарал Құрманбаева.



Әденовтер әулеті осы сияқты бұқаралық шараларға бүкіл отбасымен қуана қатысады. Олар бүгін де тыс қалған жоқ.

— Әдеттегідей бүкіл отбасымызбен – бесеуіміз келдік. Әр демалыс сайын таза ауаға шығып отыруға тырысамыз, қалалық саябақтарда ұйымдастырылатын ойын-сауықтарға қатысып жүреміз. Осындай қызықты спорттық жарыстар өткізу — тамаша идея, мұндай шараларды жиі ұйымдастырған дұрыс, — деп Асқар Әден өз пікірімен бөлісті.



Шараға таэквондодан Қазақстан федерациясының вице-президенті, Бейжіңдегі Олимпиада ойындарының қола жүлдегері Арман Шылманов та келді.

— Спорт пен дене шынықтыру — денсаулыққа пайдалы, адамдардың бүкіл отбасымен бірге салауатты өмір салтын ұстанатыны қуантарлық жайт, — дейді спортшы.

Еске салайық, 8 мамырдан бастап Астаналық паркте демалыс күндері ашық аспан астында бұқаралық спорттық және фитнес жаттығулар жасау ұйымдастырылып келеді. Тәжірибелі нұсқаушылардың жетекшілігімен йога, зумба және кроссфиттен сабақ алуға болады.

Материал Астана қаласы әкімдігінің ресми сайты astana.gov.kz деректері бойынша әзірленді.

Мен тамашалаған Тараз…
Тарих пен Тараз егіз ұғым.Жыры тасыған Жамбыл да, қайраты тасыған батыр да дүниеге келген мекен, толастамас сезім мен аласармас асқақ армандар мекені, аңызға айналған ғашықтардың ордасы, тасын түртсең тарихы көрінетін көне қала, жасыл желекке оранған шаһар. Бұл әрине – ТАРАЗ!
Тараз — тарихымыздың алтын діңгегі болғандықтан бірнеше ғасыр артқа шегініс жасап, араб саяхатшысы Әл-Макдисидің көзімен көріп өту де артық етпес, сірә. Саяхатшы қалаға табан тіреген кезде алған алғашқы әсерін былай суреттейді: «Тараз – аса мықты бекінісі бар алып шаһар. Ішінде халқы көп, бау-бақшасы, 4 қақпасы бар, жан-жағы ормен қазылған. Қаланың айналасында елді-мекендер аса көп»-дейді. Иә, бүгінде сол Тараз заманның ағымына сәйкес, өзіндік кейіпте. Жасыратыны жоқ, тарих пен Тараз жасың түгіл жасымысыңның сөздік қолданысында егіз ұғымға айналып кетті. Оған дәлел былтыр ғана сәні мен салтанаты келісе тойланған Қазақ хандығының 550 жылдығы.
Ендігі жерде әлеуметтің әлеуетін бағамдайтын әлеуметтік желіге шолу жасап көрсем, біздің қаламызда өткен биылғы блогқұрылтайдың қатысушысы атанып, қонақ болған замандас-құрбыларым мен ағаларымыз бірнеше күндік әсерлерін жазған екен. Олардың жазған жазбалары көңілге қонымды. Қош, сонымен тарихи шаһардың жас тұрғыны һәм болашағы ретінде суреттеп көрсем…
Әлқиссамды бастамастан бұрын әуелі өзім жайлы қысқаша ақпарат бере кетейін. Бұл қалада менің кіндік қаным тамған емес. Бірақ алғаш рет бұл қаланың топырағын 5 жасымда бастым. Содан бері осы уақытқа дейін шаһардың шырайына түскен күннің әрбір сәулесі де менің бетімді аймалай, жүрегімнің түкпіріне сыр боп сақтаулы. Жауған жаңбырдың тырсылы жыр болып, құлағым әсем әуендей әндетсе, самал желін самайыммен сезбесем оны да сағынамын. Ал түні… Түнін мен бәлкім суреттей алмаспын. Тараздың тұңғиық тәтті түні өлеңмен өріліп, ғазалдардың ғажап жауһарларына айналғалы қашан?! Әлі де айнала бермек! Сол 5 жасымнан мектеп табалдырығын аттадым. Сосын бойжетіп, осындағы мектептің жүрегін, һәм бар ғылымның анасын даярлайтын Тараз мемлекеттік педагогикалық институтына оқуға түстім. Әлбетте, өмірлік мақсатыммен. Бүгінгі таңда қаламызда 58 мектеп бар екен. Оның барлығына үздіксіз соғатын жүрегіне жүрек қосып келе жатқан институттың еңбегі орасан.
Жасыратыны жоқ қазіргі Тараз керегесін кеңейтіп, босағасын босаңсытпай аумағын кеңінен құлаш сермеп үлкейтіп келеді. Сондай-ақ сұлулығы да ажарланып, тотыдай таранып әсемдену процесінде. Жоғарыда атап өткенімдей, бүкіл республика болып тойлаған хандықтың 550 жылдығы қарсаңында әр облыс біздің шаһарға өз тартуларын сыйға тартқан еді. Әрине, әр тартуда тарихи элементтер өзіндік орын алған. Біз, яғни осы шаһардың тұрғындары тарихпен тыныстап жүрміз десем артық айтқандық бола қоймас. Сонымен қатар сол бұрынға базар орнында ескі қаланың орны ашылып, туристердің де қызығушылығын тудыруда. Әрі мұнда «Көне Тараз» кешені орын теуіп, ондағы бақылау мұнарасымен қалаға көз тастау — ерекше сезімге бой алдырары хақ. Сондай-ақ, Қазақстан бейнесі бейнеленген глобуста, тарихтың сырын шертер мұражайда ерекше көзге түсіп, келушілердің назарын өзіне аударады. Мұнымен қоса бүгінде бұл аумақта құрылысы ерекше «Достық» үйі салынуда. Қарахан мавзолейінің маңында биік гүлзар еңсе түзеп, көркемдігі жөнінен республикадағы сәнді мешіттерден еш кем түспейтін Алла үйінің жөні де бір бөлек. Серуендейтін саябақтардың да саясы сылынып, кербезденіп келеді. Сайып келгенде, қаланың әр қалтарысы өркениет көшіне ілесіп, заманның ағымынан бір елі қалыс қалған емес. Және тағы бір айта кететінім, соңғы кездері бой көтеріп жатқан зәулім мейрамханалар мен еңсесі биік ғимараттар еуропалық стандарт негізінде салынуы. Бұлда болса тарихпен сыр шертісіп, өз үйлесімін тауып отыр. Жалпыға ортақ жолдың жағдайы да дендеп оң өзгерістерге қарай қадам басуда. Олай дейтінім, күн санап көлік саны артып келе жатқан мына алмағайып заманда, жол кептелісі басты мәселеге айналып кететіні айдай ақиқат. Осы тұста біздің шаһарда басты көшелерде айналма бұрылыстары бой түзеп, проблеманың алдын алуға жәрдемдесуде. Мұндайды республиканың көп қалаларынан байқай бермейсің. Сондай-ақ адамдар көп шоғырланған жерлерде жерасты өткелдері салынып, пайдалануға берілуде, әлі де беріледі деген сенім басым.
Дейтұрғанмен, «Жүрген соң бауырыңды күнде көріп, таулардың биіктігі байқалмайды» дегендей, бір сәт қаладан алысқа ұзасақ оның көркемдеуге тіліміз жетпей қалатыны бар. Және оның құшағын анамыздың құшағынан еш кем сағынбайтынымызды қаланың әрбір тұрғыны біліп, ұғынады. Дегенмен, мен көрген, өскен, болашағымның баяны мен мұндалап тұрған Таразымды бір жазбаға сыйдыру әсте мүмкін емес. Бұл тақырыпта ой қорытып, жазба жазудың қандай ауыр дүние екенін оқырманның бірі білсе, бірі білмес. Өйткені, бұл тұрғыда алақандай ғана жүректің елжіреп, ақылға бой алдырмай кететінін сезудің өзі ғажап!

Құнанбай Асылзат Бақытқызы
Тараз қаласы
Тараз мемлекеттік педагогикалық институты

Астана қаласы әкімдігінің қолдауымен «Жастар» сарайы ұйымдастырып отырған музыкалық жоба 16 жастан жоғары талантты орындаушыларды оған қатысуға шақырады. Музыкалық білімі болған-болмағанына қарамастан, тілек білдірушілердің бәрі де өзінің сүйікті әндерінің бірін орындап, іріктеуден өте алады.

Кастингіден өткен талантты орындаушылар үшін вокал бойынша тәжірибелі оқытушылармен тренингілер, жұлдыздармен шеберлік сабақтары және басқа да шаралар өтеді.

Чемпионат ережесіне сәйкес қатысушылар үш топқа бөлінеді: «музыкалық білімімен 16-дан 30 жасқа дейін», «музыкалық білімі жоқ 16-дан 30 жасқа дейін»; «музыкалық білімі бар-жоғына қарамастан 31 жастан жоғарылар үшін».

Ұйымдастырушылардың айтуынша, финал 2016 жылғы 5-6 шілде күндері Астана күнін мерекелеу кезінде болады. Үш топтағы жеңімпаздар «Караоке чемпионы-2016» атағына және ақшалай сыйлыққа ие болады. Ең көп балл алған қатысушы Астана қаласы әкімінің кубогын иеленеді.

«Бәріміз ән саламыз!» караоке чемпионаты алғаш рет Астанада 2015 жылы өтті. Оған екі жүзге жуық өтінім қабылданды. Оның қорытындыларымен Денис Ни, Нұрлан Төкенов және Милана Серікова жеңімпаз атанған болатын.

inform.kz/kaz/article/2903535

ҚР Парламенті Мәжілісі төрағасының орынбасары Владимир Божко елордалық этномәдени бірлестіктердің өкілдерімен кездесті. Кездесу барысында республикамыздың жоғары өкілдік органының тоғыз депутатының қызметі сөз болды. Сондай-ақ, отырыс барысында Астанада Достық үйін құру идеясы да талқыланды.

– Өздеріңіз білетіндей, Қазақстан халқы Ассамблеясынан Мәжіліске тоғыз адам сайланды. Біз депутаттық корпустың ниетін қарап, ҚХА-ның Парламенттегі тобын құрдық, оған 107 депутаттың 31-і енді, оның ішінде барлық партиялардың өкілдері бар. Топ «Мәңгілік ел» патриоттық актісін қабылдауға орай құрылды – бұл ұлттық идея, аталған топ басты алты бағыт бойынша жұмыс істейді. Жұмыс жоспары айтарлықтай, оны ҚХА сайтында жариялайтын боламыз, – деді В. Божко.

Оның айтуынша, депутаттық қызмет аясында ҚХА атынан сайланғандар бірнеше құралға ие – регламент бойынша менистрліктер мен ведомстволардан қандай да болмасын мәселелерді шешуді талап ету, үкіметтік сағат ұйымдастырып, сайлаушылар мүдделі болып табылатын проблемаларды тыңдау, көшпелі отырыстар өткізу.

Сонымен қатар, барлық этномәдени орталықтардың жұмысымен байланысты ақпаратпен, жетістіктермен, ұсыныстармен алмасу бойынша ұйымдастыру жұмыстары қолға алынды. Бұл облыстық филиалдарда ҚХА аясында мазмұнды жұмыс істеу үшін жақсы әдістермен және тәжірибемен бөлісу үшін қажет.

Бұл ретте В. Божко қызмет саласына жастар орталықтарын тартуға баса назар аударып, бірлескен мерекелер мен шараларды жиі өткізуге, этномәдени орталықтарда үштілділік бойынша белсенді жұмыстар жүргізуге, бұрын қабылданған заңдарды пайдалануға шақырды.

– Осындай заңдардың бірі – меценаттық туралы. Қайырымдылық көрсетушілер ақша салатын қорлар құруға болады. Мысалы, ол ақша балаларды басқа елдерде өтетін шараларға апаруға жұмсалуы мүмкін, – деді В. Божко.

Сонымен қатар, Астанада Достық үйін құру мәселесі көтерілді. Божконың сөзіне қарағанда, Бейбітшілік және келісім сарайын жалдау ақысын төмендету керек, не болмаса Достық үйін құру мәселесін қарау керек.

– Барлығы бір жерде болғаны дұрыс, сонда тәжірибе алмасады, ортақ мерекелер ұйымдастырады, — деп санайды В. Божко.

astana.gov.kz/kk/modules/material/10531

ҚР Тұңғыш Президенті музейінде оқушылар арасындағы «Әлемді өзгертетін идеялар» байқауының жеңімпаздарын марапаттау салтанаты өтті. Байқауда «Күн сәулесі арқылы жарықтандыру құрылғысы» және «Ел экономикасының баламалы түрге – «Жасыл экономика» форматына ауқымды бетбұрысы» тақырыбындағы жобалармен Асхат Әбубәкіров пен Әсел Орынбекова көш бастады.

Еліміздің Тәуелсіздігінің 25 жылдығына орайластырылған шара «100 нақты қадам» Ұлт жоспары шеңберінде қоғамдағы өзекті мәселелерді танып-білуге және жүзеге асыруға бағытталған оқушылардың ғылыми-зерттеушілік және оқу-танымдық қызығушылығын ынталандырады.

Биыл байқау екінші рет өткізілді, оған 36 жобамен 46 бала қатысып, өздерінің ғылыми жобаларын қорғады. Байқау үш кезеңмен өткізілді. Бірінші тур қалалық мектептерде ұйымдастырылды, содан кейін жобалар сараптамадан өткізілді, ал үшінші кезеңде мектептер өзара жарысты.

Қазылар алқасының шешімімен байқау жеңімпаздары мен жүлдегерлері политехникалық және гуманитарлық бағыттар бойынша анықталды. Ғылыми жобалардың басым бөлігі қазақстандықтардың өмір сүру сапасын жақсартуға бағытталған жоғары технологияларға арналған.

– Байқау оқушылардың Мемлекет басшысының идеяларымен таныс болу деңгейін, Қазақстан тарихын қаншалықты білетінін анықтауға мүмкіндік береді. Жобаларда Президенттің идеялары көрініс тапқан. Қазылар алқасы гуманитарлық бағыттағы еңбектердің ішінен «Мәңгілік Ел» идеясының дамуына, қазақстандықтардың ынтымақтастығы мен бірлігінің нығаюына ықпал ететін адами құндылықтардың дамуына бағытталған ғылыми жұмыстарға баса назарына аударды: «Жыл сайынғы Қазақстан халқына Жолдауы», «Қазақстан халқы Ассамблеясы. Ұлттық бірлік», «Жастарға арналған қазақстандық әлеуметтік желілер»,- деді «Астана Дарыны» ӨҒПО ғылыми-техникалық зертханасының меңгерушісі Гүлбақыт Буралкиева.

Байқау дарынды жас зерттеушілерді анықтауға және оларға қолдау көрсетуге мүмкіндік береді, бұл елімізде дұрыс интеллектуалдық әлеует қалыптастыруға септігін тигізеді.

astana.gov.kz/kk/modules/material/10530

Жазда астаналықтарды керемет спорттық думан күтеді. 1-5 маусымда елордада стритболдан Әлем біріншілігі (FIBA 3х3 U18 World Championships) өтеді. Оған 30 астам мемлекеттің спортшылары қатыспақ. Ойындар «Астана Опера» театры ғимаратының жанындағы алаңда өткізіледі.

200 астам спортшы көше баскетболын ойнайды. Жарыс барысында ерлер мен әйелдер командалары төрт топта шеберлік байқасады. Қазақстанның ерлер құрамасы «С» тобында өнер көрсетіп, Румыния, Индонезия, Италия және Қатар команаларымен күш сынасатын болады. Еліміздің әйелдер құрамасы Нидерланды, АҚШ, Италия және Польша командаларымен «В» тобында кездеседі.

Әлем біріншілігін ұйымдастырушылар – Қазақстан Стритбол лигасы (SLK), ҚР Ұлттық баскетбол федерациясы және FIBA 3х3.

– Көше баскетболы немесе стритбол қазіргі заманғы урбан мәдениетінде – ең демократиялық спорт, оны жастар ойнайды. Стритбол адамдарды біріктіріп, оларға сенім береді, үлкен жетістіктерге қол жеткізуге құштарлықты оятады, – дейді SLK президенті Нұрлан Құсайынов.

Көрермендер назарына стритболдан 3х3 форматындағы кездесулер мен ойын-сауық бағдарламалары ұсынылмақ. Баскетбол мен стритворкауттан шеберлік дәрістері өткізіледі, чирлидерлер, брейкдансерлер мен урбан-мәдениетінің басқа да өкілдері өнер көрсетпек. Елордада алғаш рет баскетбол фристайлер және ұшатын акробат-баскетболшылар командалары өз шеберліктерін ортаға салады. Әртістер қала қонақтарын еліміздің ұлттық колоритімен таныстырады. Ал кішкентай астаналықтар үшін арнайы аймақ ұйымдастырылады.

Айта кетейік, осы күндері бұқаралық турнирлер, соның ішінде Астана кубогы өткізіледі. Жарыстарда 10 жастан асқандардың барлығы бағын сынай алады.

Шаралар белгілі диджейлердің хиттерінің сүйемелдеуімен өткізіледі. Шараның ашылуында қазақстандық және ресейлік урбан-жұлдыздар өнер көрсетеді.

Жарыс 1 маусымда сағат 13:00 басталады. Спорттық додаларды Kazsport телеарнасынан және FIBA-ның Youtube-тағы ресми каналынан тікелей эфирден тамашалауға болады.

astana.gov.kz/kk/modules/material/10529

Конгресс-холлда қала тұрғындары мен қонақтарының назарына отандық жне шетелдік композиторлардың классикалық музыкалық шығармалары ұсынылады.

Сенбі күні, 14 мамырда «Көңіл толқыны» концерті өтеді. Кеш барысында ҚР еңбек сіңірген әртісі Секен Тұрысбековтың әндері мен күйлері орындалады.

Астана қаласы әкімдігі Мемлекеттік филармониясының XV концерттік маусымының жабылуы 26 мамырда сағат 19:00 Конгресс-холл концерт залында өтеді. Филармонияның үрмелі аспаптар оркестрі белгілі қазақстандық және шетелдік композиторлардың шығармаларын орындайды.

Шығармашылық ұжым репертуарында түрлі жанрдағы (классика мен джаздан бастап халық әндері, күйге дейін) 500 астам шығарма, 10-нан артық тақырыптық бағдарлама бар. «Солистер шеруі», «Кино музыкасы», «Вена музыкасы», «Жаңа Әлем музыкасы», «Дирижерлар шеруі» елордалық тыңдарманның құлақ құрышын қандырады.

Сонымен қатар, Балаларды қорғау күніне орай 28 мамырда сағат 17:00 Конгресс-холл концерт залында «Ғажайыптар әлеміне саяхат» мерекелік концерті өтеді.

ҚР еңбек сіңірген қайраткері Нұрлан Хамзин жетекшілігімен «Сарыарқа» халық аспаптары ансамблі эстрадалық вокал әртістерімен бірге сүйікті балалар әндерін орындайды.

Сахна төрінде М. Өтемісов атындағы Оқушылар сарайының ұжымдары: «Алтын дән» халық би ансамблі, «Джамбо» эстрадалық би тобы және «Гүлдәурен» вокалды студиясы өнер көрсетеді.

astana.gov.kz/kk/modules/material/10528