Бүгін «Қазмедиа орталығында» жоғары сынып оқушылары мен мемлекеттік мекемелер, бизнес құрылымдар, өнеркәсіптік өндіріс өкілдерінің кездесуі өтті. Аталған шара жастарды жұмысшы мамандықтарды таңдауға шақыруға бағытталған.

— Мұндай кездесулер жоғары сынып оқушыларына серпін беру үшін жыл сайын өткізіледі, олар болашақ кәсіпті өздері таңдайды. Шараға Жұмыспен қамту орталығынан, жастарды жұмысқа орналастыру, кәсіптік бағдар беру, білім беру салаларынан мамандар шақырылады. Сондай-ақ, еңбек мамандықтарының өкілдері де келеді, олар өз тәжірибелерімен бөлісіп, жастарға қандай да болмасын мамандық бойынша айтып береді, — деді «Астана жастары» КММ басшысы Әнуар Нұрпейісов.

Оның айтуынша, 5 және 6 қазанда жастарды жұмысшы мамандықтарға тарту мақсатында «Нұрлы жол» ИИДМБ өнеркәсіптік кәсіпорындарына экскурсиялар ұйымдастырылады. Шараға 3500 жуық оқушы қатысады.

Мектеп оқушыларына «Дұрыс таңдау жаса!» бейнеролигі көрсетіліп, сұранысқа ие мамандықтар, техникалық және кәсіптік білім туралы ақпарат ұсынылды.

— Техникалық және кәсіптік білім беру сервистік қызмет көрсету, білім және медицина, құрылыс, коммуналдық шаруашылық және техника, көлік және коммуникация, экономика және заң бағыттары бойынша жүргізіледі. Сонымен қатар, 2017 жылдан бастап «Тегін кәсіптік техникалық білім» жобасы қолға алынады, ол жұмысшы мамандықтарға ғана қатысты болады, — деді Астана қаласының Білім басқармасы техникалық және кәсіптік білім бөлімінің әдіскері Жанар Төребекова.

Айта кетейік, 10 қазанда елордалық оқушылар дәріскерлермен кездесетін болады.

Жыл басынан бері Астана қаласының аумағында 12 629 жаңа жұмыс орны құрылды, оның 9 534-і шағын бизнес саласында. Биыл Жұмыспен қамту орталығы 10 бос орындар жәрмеңкесін өткізді, олардың нәтижесі бойынша 329 адам жұмысқа орналасты. Елордада еліміздегі ең төменгі жұмыссыздық деңгейі сақталып отыр — 4,7%.

Жұмыспен қамту орталығына 10 472 адам жүгінді. Көрсетілген қызметтердің нәтижесінде 6 117 адам жұмыспен қамтылды. Соның ішінде 572 адам жастар практикасына қатысты, 111-і әлеуметтік жұмыс орнына жіберілді.

Айта кетейік, 381 жас маман жастар практикасынан өтіп, 224 адам немесе 59%-ы жұмысқа орналастырылды. Даярлау, қайта даярлау және біліктілігін арттыру бағдарламасы аясында 693 жұмыссыз азамат оқу курсын тәмамдады. Қоғамдық жұмыстарға 1 801 адам жіберілді. Жалпы алғанда, әлеуметтік қолдау шараларымен 8 611 адам немесе жалпы жүгінген адамдардың 82,3%-ы қамтылды.

Тәуелсіздік сарайында Қазақстан мен Ресейдің ХІІІ аймақаралық ынтымақтастығы форумының жалпы отырысы өтті. Форум барысында Астана әкімі Әсет Исекешев елорданы дамыту жөнінде баяндама жасады.

— Мемлекет басшысы қаланы және оның инфрақұрылымын дамытуға ғана емес, жасыл белдеуге де баса назар аударады. Қала маңына 13 млн астам ағаш отырғызылды, жасыл белдеу аумағы 130 есеге ұлңайып, 86 мың га құрады. Астана өзінің бірегей келбетімен танымал, оны жасауға әлемнің жетекші сәулетшілері қатысқан. Қалада тұрғын үй құрылысы да дамып келеді. 18 жылда 20 млн шаршы м тұрғын үй салынды, биыл 2 млн шаршы метр баспана тапсырылады,- деді Әсет Исекешев.

Ресей аймақтарымен ынтымақтастық жөнінде айта келе, елорда басшысы қаланың тиімді географиялық ортада орналасқанын, ал жаңа теміржол және автомобиль жолдары Астананы Қазақстанның өңірлерімен ғана емес, Ресейдің шекаралас аймақтарымен де байланыстыратынын атап өтті, бұл физикалық және экономикалық қарым-қатынастарды қысқартуға мүмкіндік береді.

Оның айтуыша, Астана Ресей аймақтары үшін сенімді серіктес болып табылады, бүгінде екі ел арасындағы тауар айналымының 16% Астанаға тиесілі.

— Ең алдымен Орал және Сібір аймақтарымен сауда көлемін айтарлықтай арттыру көзделген, азық-түлік тауарларын жеткізу, соның ішінде Орталық азиядан көкөністер әкелінеді. Жалпы алғанда, соңғы екі жылда Астанада төрт ірі көлік-логистикалық орталық салынды, сондай-ақ, жаңа әуежай терминалының құрылысы жүргізіліп жатыр, бұл өткізу қабілеттілігін 6,5 млн жолаушыға дейін көбейтуге жол береді, ал жаңа теміржол вокзалының өткізу қабілеттілігі жылына 12 млн жолаушыны құрайды. Туризм үшін аталған инфрақұрылымның маңызы зор. ЭКСПО қарсаңында Астананы Ресейдің ірі қалаларымен байланыстыру қажет деп санаймын, сондықтан біз аймақтардың губернаторларымен бірге бәрін зерделеп, маршруттарды қолдау тетіктерін анықтаймыз,- деді Әсет Исекешев.

Қазіргі кезде ресейлік бизнесмендер өнеркәсіп, ШОБ салаларында жұмыс істейді. Жалпы Астанада 800 ресейлік компания қызмет етеді, бірқатар маңызды бірлескен жобалар жүзеге асырылды. Алдағы уақытта қала үшін маңызды басымдықтардың бірі қаржылық хабты дамыту болады.

Ғылым мен инновация саласында ынтымақтастықты белсендіру де маңызды. Бүгінде интеллектуалды инфрақұрылым құруға баса назар аударылады, ақылды қала технологиялары пайдаланылады.

Сөз соңында Әсет Исекешев ЭКСПО-2017 көрмесінің өтетінін айтып, ресейлік тарапты шараға белсенді қатысуға шақырды.

Қазақстан мен Ресей мемлекеттік органдарының, квазимемлекеттік сектор мен іскерлік ортаның 1300-ден астам өкілі қатысқан форум барысында инвестиция және сауда-экономика саласындағы екіжақты ынтымақтастық аясын кеңейту жолдары қарастырылды.

Қазақстан Президенті өз сөзінде Ресей Федерациясы еліміздің стратегиялық одақтасы және маңызды сауда-экономикалық серіктесі болып саналатынын атап өтті.

– Біз кең ауқымды бағыттар бойынша өзара тиімді іскерлік ынтымақтастықты жүзеге асырып келеміз. Оған осы өңіраралық форум да септігін тигізетін болады. Биылғы бірінші жартыжылдықта өзара сауда-саттықтың көлемі 6 миллиард долларға жуықтады. Сонымен қатар, дағдарысқа дейінгі кезеңмен салыстырғанда бұл көрсеткіштің 30%-ке төмендегені байқалады. Көп жағдайда оның қарқыны бәсеңдеуі сыртқы жаһандық ахуалдарға байланысты болып отыр, – деді Нұрсұлтан Назарбаев.

Осы орайда, Мемлекет басшысы екіжақты экономикалық ынтымақтастықты дамытуға серпін беру қажеттігін айтты.

– Бізде Ресеймен бірлескен 6 мыңнан астам кәсіпорын жұмыс жүргізуде. Мұнай химиясы, тау-кен металлургиясы кешені сияқты көптеген салада екіжақты инвестициялық жобалар іске асырылуда. Қазіргі уақытта бізде құны 20 миллиард доллар болатын 60-тан астам жоба бар. Олардың іске асырылуына қолдау көрсетілетін болады, – деді Қазақстан Президенті.

Бұдан бөлек, Нұрсұлтан Назарбаев өзара іс-қимыл аясын кеңейту үшін айтарлықтай әлеуеттің бар екеніне назар аударды.

– Біз Еуразиялық экономикалық одақ аясында жұмыс жүргізіп отырмыз. Еркін сауда жөнінде Вьетнаммен келісімге қол қойылып, осындай келіссөздер Қытаймен, Оңтүстік Кореямен және Сингапурмен жүргізіліп жатыр. ЕурАзЭО-мен ынтымақтасуға Үндістан, Мысыр, Иран, Оңтүстік Шығыс Азия елдері қауымдастығының мүшелері және басқа да елдер ниет білдіруде. Біз мақсатты түрде барлық өндірушілер мен инвесторлар үшін ортақ айқын ережелер қалыптастырудамыз. Қазақстанның экономикасына қаражат құя отырып, Ресей бизнесі мұнда өздерін «үйіндегідей» сезінетін болады. Еуропа мен Азия арасындағы қуатты көлік-логистика инфрақұрылымын қалыптастыру мәселесінде елдеріміздің ортақ мүддесі тоғысып жатыр, – деді Мемлекет басшысы.

Сондай-ақ, Қазақстан Президенті республикадағы инвестициялық ахуалдың жақсарып, экономиканың әртараптандырылуына күш-жігер жұмылдырылып жатқанына назар аударды.

Нұрсұлтан Назарбаев экономиканы жандандыру саласындағы, соның ішінде салық режімін ырықтандыру, ауқымды жекешелендіру ісінің келесі кезеңін жүзеге асыру және Астана мен Алматыда инновациялық екі кластер құру бағытында мемлекет қабылдап отырған шаралар туралы айтып өтті.

Сонымен бірге, Мемлекет басшысы алдағы уақытта «Астана» халықаралық қаржы орталығы ашылып, «ЭКСПО-2017: Болашақтың энергиясы» халықаралық мамандандырылған көрмесі өтетінін еске салды.

Соңында Қазақстан Президенті талқыланып жатқан бастамалардың тиімді іске асырылатынына сенім білдіріп, қатысушыларға табыс тіледі.

Астана әкімі Әсет Исекешев пен Татарстан президенті Рустам Минниханов өзара ынтымақтастық және мәдени-гуманитарлық, іскерлік және т.б. салаларда тәжірибе алмасу мәселелерін талқылады.

«Татарстан Республикасымен тарихи тамырымыз ортақ, бауырластық, сыйластық қарым-қатынас орнаған. Бүгінде осы дәстүрімізді табысты жалғастырып келеміз. Татарстан Астана мен Қазақстанның Ресей Федерациясындағы басты экономикалық серіктестерінің бірі болып табылады», — деді Әсет Исекешев.

Татарстан Президенті Қазақстанның астанасына қуана келетінін, сондай-ақ «ЭКСПО-2017» халықаралық мамандандырылған көрмесінің инфрақұрылымының құрылысының қарқынын ерекше атап өтті.

«Астана алдағы дүниежүзілік көрмеге шындап дайындалып жатыр, бұған көзім жетті. Мұнда озық технологиялар пайдаланылып жатыр. Астанада өтетін ЭКСПО-2017 көрмесі үздік көрмелердің бірі болатынына сенімдімін», — деді Рустам Минниханов.

Оның айтуынша, Татарстан салынып жатқан көрме кешендеріне қузығушылық танытуда. 2019 жылы Қазан қаласы кәсіпқой шеберліктен «World Skills Competition» әлем чемпионатына қатысады және оны өткізу үшін көрме кешенін салу керек. Рустам Минниханов осы салада тәжірибе алмасудың пайдалы екендігін атап өтті.

Тараптар 2017 жылы Астанада Татарстан күндерін өткізу мүмкіндігін талқылады. Қос республиканың астаналары бауырлас қалалар болып табылады.

Кездесу соңында Рустам Минниханов Қазақстан басшысына елімізде тұрып жатқан татарларға қолдау көрсеткені және мәдениетті сақтап, дамытуға жағдай жасағаны үшін алғыс айтты.

Астана мен РФ Челябі облысы аймақтар арасындағы көлік-логистикалық байланыс әлеуетін кеңейтуге ниетті. Бүгін Әсет Исекешев облыс губернаторы Борис Дубровскиймен кездесті. Бұл аймақ басшысының биыл Қазақстанның елордасына жасаған екінші сапары.Бұл жолғы сапары Астана мен Челябі облысының арасында жасалған ынтымақтастық жөніндегі бірінші келісімге 15 жылдығымен тұспа-тұс келіп отыр.

«Челябі облысы бізге жақын аймақ. Бүгінде ынтымақтастығымыз дамудың жаңа деңгейіне шықты деп сеніммен айта аламыз. Алдағы уақытта бірлескен жұмыстардың әлеуеті мен көкжиегін айтарлықтай кеңейтетін бірқатар жобалар жүзеге асырылады», — деді Әсет Исекешев кездесу барысында.

Кездесу барысында Астана – Челябі тікелей әуе рейсінің ашылуы талқыланды, ол «ЭКСПО-2017» көрмесі кезінде де, одан кейін де сұранысқа ие болмақ, аймақтар арасындағы іскерлік және гуманитарлық байланыстарды кеңейтуді қосымша ынталандырады. Борис Дубровскийдің атап өтуінше, Челябі облысы «ЭКСПО-2017» көрмесіне міндетті түрде қолдау көрсетеді.

Кездесу барысында Дубровский жас астанамыздың дамуына үлес қосқандығын жеткізді.

«Металлург болғанда, осы қаланы дамытуға қатысқам. Менің көз алдымда өзгеріп, әдемі заманауи қалаға айналды. Келген сайын сүйсіне қараймыз», — дейді губернатор.

Оның айтуынша, Челябі облысы екіжақты қарым-қатынастың одан әрі дамуына ықпал етуге ниетті.

Б. Момышұлы даңғылындағы Оқушылар сарайында алғаш рет «Есігімді қаққан кім?» спектаклі сахналанады. Пьеса теріс ағым жетегіне түскен жас отбасының мәселесі жайлы әңгімелейді.

Шығарманың авторы жазушы-драматург, ҚР Парламенті Сенатының депутаты Жабал Ерғалиев, спектакль оның «Жан шырылы» романы бойынша қойылады.

— Бұл көркем шығарма, онда қиял да, дәлелдер де бар, негізінен, қоғамда орын алған фактілер келтіріледі. Радикалды діни ағымдар Қазақстанда тамырын жайып келеді, жастарымыз олардың ықпалына түсіп, кейбіреулері отбасыларын алып Сирияға кетіп жатыр. Бұл бір халықтың, бір ұлттың ғана мәселесі емес. «Есігімді қаққан кім?» деп аталғанымен, бұл жерде жүрек пен сана туралы айтылған, — дейді автор.

Оның айтуынша, шығарманы жазуға бір жылдан артық уақыт жұмсалған. Жазушы құжаттарды зерттеп, терроризмге қарсы органдардың көмегіне жүгінген.

Қ. Қуанышбаев атындағы қазақ музыкалық драма театрының режиссері, ҚР еңбек сіңірген қайраткері Нұрлан Жұманиязов спектакльді екі айдың ішінде қойған.

Драма қарапайым қазақ отбасы туралы. Асқар мен Гүлнұр атасы мен әжесінің қолында өсіп жатқан қыздарына бір жылдан астам уақыттан бері бармайды. Бұған олардың теріс діни ағымды ұстанатыны себеп болады. Жастар жағдайдың мән-жайын тек қыздарымен бірге шетелдегі террористер лагеріне түскенде ғана түсінеді. Бірақ олар ол жерден шыға алмай қалады.

Спектакль азаматтарды бейбітшілікті, отанымызды және отбасымызды бағалауға, сондай-ақ, басты кейіпкерлердің қателігін қайталамауға шақырады.

Спектакль 17 қазанда сағат 19-да басталады.

astana.gov.kz/kk/modules/material/11425

Астана қаласы әкімінің тапсырмасымен мектеп қажеттіліктеріне ақша жинау жағдайларының жиілеп кетуіне байланысты елордалық мектептерде түсіндіру және алдын алу жұмыстарын жүргізу жөніндегі қоғамдық комиссия құрылды.

Әкімдіктің ресми сайтындағы «Әкімге өтініш» сервисі арқылы әкімнің атына келіп түскен әрбір сауал мен өтініш бойынша тексеру жүргізіліп, актілер жасалады, білім беру ұйымының басшылығына тәртіптік сипаттағы шаралар қолданылады. Аталған жұмыстар Астана қаласының әкімі Әсет Исекешевтің ерекше бақылауына алынды.

Комиссия құрамына «Нұр Отан» партиясының, қоғамдық бірлестіктердің белсенділері, қалалық мәслихат депутаттары, үкіметтік емес ұйымдардың өкілдері, қоғамдық кеңес мүшелері енді.

Сонымен қатар, әр мектепте білім мекемесі жұмсайтын міндетті шығындар тізімі ілінеді. Сыныптарда ақша жинау фактілері, мектеп әкімшілігі немесе жекелеген оқытушылар тарапынан басқа да заңға қайшы іс-әрекеттер тіркелген жағдайда, ата-аналар 55-01-62 және 87782550162 телефондары бойынша Білім басқармасының «қауырт желісіне» хабарласа алады.

astana.gov.kz/kk/modules/material/11432

Жыл соңына дейін тағы да 5 коммуналдық меншік нысаны саудаға шығарылады. Астана қаласы әкімінің орынбасары Андрей Лукиннің айтуынша, коммуналдық меншік нысандарын бәсекелес ортаға берудің нәтижесінде 500 млн теңгеден артық қалалық бюджет қаржысы үнемделді. Бұл қаржы қаланың әлеуметтік қажеттіліктеріне жұмсалатын болады.

Бекітілген тізімге сәйкес саудаға бірнеше нысан шығарылады, атап айтқанда, «Қайсар» спорт клубы» МКҚК; «Астана» көкпар клубы»; «Х.С. Омаров» атындағы шахмат клубы» МКҚК; «Астана батыры» жекпе-жектер клубы» МКҚК.

2015–2016 жылдары аталған нысандарды ұстауға 509 508 000 теңге бөлінген.

2016 жылғы маусым және тамыз айларында «Вечерняя Астана» республикалық қоғамдық-саяси газетінде және www.gosreestr.kz веб-порталында өтеді деп хабарланған аукционның екі кезеңі қатысушылар болмағандықтан жарамсыз деп танылды.

Төрт нысан бойынша үшінші кезең 2016 жылдың 4 қазанында өткізілді. Аукционды өткізу туралы ақпарат «Вечерняя Астана» газетінде және www.gosreestr.kz порталында жарияланды.

— «Қайсар» спорт клубы» МКҚК697 096 теңгеге сатылды. Бастапқы соманың 15% мөлшеріндегі қайтарымсыз кепілдік салымды есепке алғанда (ол қалалық бюджетке түседі), клубты сатып алуға сатып алушы 3 630 346 теңге жұмсаған.

— «Астана» көкпар клубы» МКҚК198 554 теңгеге сатылды. Бастапқы соманың 15% мөлшеріндегі қайтарымсыз кепілдік салымды есепке алғанда (ол қалалық бюджетке түседі), клубты сатып алуға сатып алушы 6 374 654 теңге жұмсаған.

— «Х.С. Омаров» атындағы шахмат клубы» МКҚК — 12 870 теңгеге сатылды. Бастапқы соманың 15% мөлшеріндегі қайтарымсыз кепілдік салымды есепке алғанда (ол қалалық бюджетке түседі), клубты сатып алуға сатып алушы 1 188 270 теңге жұмсаған.

— «Астана батыры» жекпе-жектер клубы» МКҚК — 9 386 426 теңге. Бастапқы соманың 15% мөлшеріндегі қайтарымсыз кепілдік салымды есепке алғанда (ол қалалық бюджетке түседі), клубты сатып алуға сатып алушы 17 037 326 теңге жұмсаған.

Сауда қорытындысы бойынша кепілді салымдар бойынша «Қайсар» спорт клубы бойынша қалалық бюджетке 2 933 250 теңге, «Астана» көкпар клубы бойынша – 6 176 100 теңге, Х.С. Омаров ат. Шахмат клубы бойынша – 1 175 400 теңге, «Астана» жекпе-жектер клубы бойынша – 7 650 950 теңге түскен, жалпы қала қазынасына 17 935 650 теңге түскен.

Қада әкімінің тапсырмасымен нысандардың әлеуметтік маңыздылығын ескере отырып, сауда материалдары құқықтық бағалау жүргізу үшін Астана қаласының прокуратурасына жіберілді. Прокуратураның қорытындысы бойынша, аукциондарды өткізу процедураларын зерделеу нәтижесінде заңнама талаптарын бұзу жағдайлары тіркелмеген.

Қала әкімінің орынбасары Андрей Лукиннің айтуынша, аукцион шартына сәйкес жекешелендірілген нысанның иесі қызмет профилін сақтауға тиіс. Бұл ретте нысандарды беру кезінде онда мемлекеттік әлеуметтік тапсырыс орналастырылады, бұл мүгедектігі бар балаларды және тұрмысы төмен отбасылардан шыққан балаларды тегін сабақтармен қамтуға жол береді.

astana.gov.kz/kk/modules/material/11435

Оңтүстік Қазақстан облысының делегациясы елордалықтар назарына ауқымды бағдарламасын ұсынуда. Таңертеңнен бері «Хан шатыр» СОО жанындағы алаңда өңірдің тауар өндірушілерінің жәрмеңкесі өтіп жатыр. 50 шатырда 300 тоннадан астам өнім сатылуда. Сонымен қатар, демалыс күндері ОҚО тарихымен, мәдениетімен және басты жетістіктерімен танысуға болады.

Ауыл шаруашылық жәрмеңкесіне Астана әкімі Әсет Исекешев пен ОҚО басшысы Жансейіт Түймебаев та ат басын тіреді.

ҚР Ұлттық музейде «Шырайлы Оңтүстіктің шежіресі» атты көрме ОҚО-ның мәдени бағдарламасының шымылдығын ашты. Бүгін ҚР Ұлттық академиялық кітапханасында ақын жазушылар кездесуі және «Ұлысымның ұйытқысы – Оңтүстік» атты кітап көрмесі өтеді.

Бүгін және ертең сағат 11-ден 17-ге дейін Оқушылар сарайында «Балаларға – базарлық», «Толағай», «Қазақстан барысы», «Қазақстан бренді», «Қошқар ата мен теке», «Момын және қарақшылар», «Мұңлық – Зарлық», «Нәурізек» анимациялық фильмдері көрсетіледі. Бүгін «Жастар» театрында сағат 18-де Ж. Шанин атындағы облыстық қазақ драма театрының әртістері С. Досановтың «Тозақ шеңбері» спектаклін сахналайды.

Мәдени бағдарлама ертең де жалғасын табады. Сағат 12-де Қарттар мен мүгедектерге арналған медициналық әлеуметтік мекемеде және Балалар психоневрологиялық медициналық әлеуметтік мекемесінде «Жүректен жүрекке» қайырымдылық шарасы ұйымдастырылады.

Сонымен қатар, ‪16 қазанда Астанада этномәдени бірлестіктердің өкілдерінің қатысуымен «Ет асу» фестивалі және композитор Ш. Қалдаяқовқа ескерткіш орнатуға байланысты белгі қою рәсімі өтеді.

Іс-шаралар легі сағат 18-де Конгресс-холлда «Ән шашуым өзіңе, мерейлі Астанам!» гала-концертімен және «Нұрын шашқан – Оңтүстік» фотокөрмесімен аяқталады.

astana.gov.kz/kk/modules/material/11444