Кәсіпкерлерді қорғаудың ерекше бір түрі «Қамқор» мобильдік қосымшасы. Оны әрбір іскер азамат ұялы телефондары мен гаджеттеріне тегін жүктеп, заңсыз тексерістің алдын ала алады. Бұл туралы Алматы облысының өңірлік коммуникациялар қызметі алаңында Құқықтық статистика және арнайы есепке алу жөніндегі комитетінің өкілі баяндады.
Қазіргі таңда кәсіпкерлік қызметке заңсыз араласуды тоқтату, бизнеске әкімшілік қысымды төмендету бойынша тұрақты жұмыстар жүргізілуде. «Қамқор» мобильдік қосымшасын «Googleplay» және «AppStopre» қосымшалары арқылы жүктеп, тексерудің шынайы тіркелгендігін білуге болатыны айтылды.
«Онлайн режимінде берілген өтініштер прокуратураға түсіп, жұмысты жеңілдетеді. Бұл дегеніміз кәсіпкерлердің сенімділіктерің нығайту. Осы инновациялық жобаның тиімділігі туралы облысымызда да мысалдар бар.
Мәселен, «Қамқор»-ға «Талдықорған комфорт» ЖК азамат Д. Талипов Талдықорған қаласының Ішкі істер департаментінің қызметкеріне заңсыз әрекеті туралы арыз түсірген. Осы заңсыз араласу фактісі бойынша тергеу жүргізіліп, сөгіс түріндегі тәртіптік шара қолданылды», — деді Алматы облысы бойынша Құқықтық статистика және арнайы есепке алу жөніндегі комитетінің аға прокуроры Алмас Қыдырбайұлы.
Кәсіпкерлікті дамыту экономиканың негізгі қайнар көзі болғандықтан, оны барынша сауатты қорғау басты міндет.
Алматы облысының өңірлік коммуникациялар қызметі

«Дәулет» астаналық спорт кешенінде көркем гимнастика бойынша Азия чемпионатының ашылуы өтті.

Қазақстанның сеньорлары арасында Рио-2016 Олимпиада ойынының қатысушысы Сабина Әшірбаева, Алина Әділханова (Оңтүстік-Қазақстан облысы), Анна Афуксениди (Алматы), Селина Жұматаева (Астана) сынды споршылар өнер көрсетті.

Топтық бағдарламада Қазақстанның атынан көркем гимнастика бойынша астаналық арулар Регина Сұлтанова, Даяна Жақыпова, Әнел Талғатбек, Камила Көптілеу, Аружан Қазбекова, Динара Ерғалиева алаңға шықты.

Сеньорлар арасында Әділ Тілекенов, Роза Әдірбекова және Даяна Жақыпова жеке бағдарламада өнерлерін паш етеді. Топтық бағдарламада Сағина Мұратқызы, Айза Рустамқызы, Дария Шарафиденова, Дильназ Мұсабекова, Райана Сүлеймен және Рената Жолдынова сынға түсті.

Жарысқа Азия өңірінен 14 елдің 150-ден астам мықты споршысы қатысуда. Бұл орайда 54 медаль сарапқа салынуда. Жеке бағдарламада 72 споршы өзара сынға түсетін болса, топтық бағдарламада 15 команда бақталасады. Соңғы мәліметтер бойынша, Қазақстанның құрамасы жеке бағдарлама бойынша бірінші орында. Онымен бірге бұл спорт түрінің Жасөспірімдер арасындағы топтық бағдарламасында еліміз 4 орында келеді.

Атамыш чемпионат жыл сайын Азия мемлекеттерінің алаңдарында өткізіледі. Айта кетейік, Қазақстанда бұл жарыс түрі төртінші рет өткізілді.

Соңғы апта ішінде Есіл арнасы мен Астана аумағындағы оның құятын бөлігінен 10 тонна қоқыс жиналған. Бір айта кетерлігі, судың ластануына тұрғындар өздері атсалысады, жағада қалдықтарды тастап кетеді.

Есіл, Ақбұлақ, Сарыбұлақ өзендерінің жағаларын тазалау- кешенді ауқымды жұмыс. Бұл қоршаған ортаны қорғап, сақтап, табиғаттың, су экожүйесінің тазаруына мүмкіндік жасайды. Үш өзенді абаттандыру шаралары жағалауларды және су айдындарын қамтиды.

Жыл сайын қалалық үш өзеннен «Астана-Есіл» МКҚМ балдырларды, шабылған шөптерді, қамыс және тұрмыстық қалдықтарды жинайды.

Балдырлар – барлық су қоймалары, өзендер мен көлдердің мәселесі. Ыстық күндері балдырлар су бетін жабады, Толқын оларды жағаға шығарып тастайды. Жұмысшылар балдырларды қаптарға жинайды.

Балдырларды тырмалармен алу мүмкін болмайтын жерлерге жұмыскерлер қайықпен жүзіп барып айдындарды тазартады. Есілдің бір жерін күнде бірнеше рет жинайды. Өйткені түн ішінде су шөбі толқынмен жағаға жетеді.

-Есіл, Ақбұлақ, Сарыбұлақ өзендері үнемі тазартылып тұрады. Ауа қысымының жоғары болуы балдырлардың көптеп өсуіне жағдай жасайды да су айдынының бетін жауып тастайды, — дейді «Астана Есіл» МКҚМ өкілі Мұхит Бақбергенұлы.

Кәсіпорынның жұмысшылары таңның атысынан батысына дейін еңбектенеді. Ылдиларды тазалау күнделікті жүргізіледі. Қамыстар мен шөптерді шабады да, қаптарға жинайды.

Үш өзенді абаттандыру бойынша шара жағалаулар мен су айдындарында жүргізіледі. «Астана Есіл» кәсіпорны мамандарының айтуынша, қала өзендерін тұрғындардың өздері ластайды. Су қоймаларының экологиялық жағдайын бұзып, қалдықтарды суға лақтырып, жағымсыз көрініс қалыптастырады.

-Үшөзен мен жағалау аумағын күнделікті біздің жұмыскерлеріміз тазалайды. Есіл өзенінің қалалық жағалауында өте көп қалдықтар жиналады. Бірақ барлық жерде қоқыс жәшіктері тұр. Бейнебақылау камералары орнатылған. Жұмысшылар бос шишалар, темекі тұқылдарын, пакеттерді тергенде бір қап жиналады. Соңғы апта ішінде Есіл, Сарыбұлақ, Ақбұлақ өзендерінен 10 тонна қалдық жиналған, — дейді М.Бақбергенұлы

Кәсіпорын жұмысшылары қала тұрғындары мен қонақтарына Есіл өзеніне ұқыпты қарауға шақырады. Себебі ол тек қаланың ғана көркі емес, елорданың барлық экожүйесінің бөлігі.

-Егер қала су қоймаларын ластайтын адамдар өз жауапкершілігін сезінбесе, жұмыскерлердің ауыр еңбегі зая кетеді, — деп түйіндеді М. Бақбергенұлы.

ЭКСПО-2017 Халықаралық мамандандырылған көрмесін өткізу аясында 1-6 шілде аралығында Астана қаласы әкімдігінің Мемлекеттік академиялық филармониясы елордалық Мәдениет басқармасының қолдауымен 3 ауқымды фестиваль өткізеді.

Астана қаласының тұрғындары мен қонақтары «Шашу» халықтық биі ансамблінің ІІ Халықаралық фестиваліне, «Астана Самалы» атты VIII Халықаралық үрмелі оркестр фестиваліне, «Серпер»қазақ халық аспаптароркестрі республикалық фестивалінің мерекелік бағдарламасына көзайым бола алады.

Биыл «Шашу» халықтық биі ансамблінің Халықаралық фестивалі қалалық алаңда 1-3 шілде аралығында өткізіледі. Фестивальге Қазақстанның жетекші ұжымдары қатысады, атап айтқанда: «Шалқыма», Астана; «Назерке», Орал; «Томирис», Қызылорда, «Алтынай», Талдықорган), сондай-ақ Қырғызстанның («Ақмарал»), Башкирия мемлекетінің (Стерлитамак мемлекеттік би ансамблі), Ресейдің («Огоньки»).

Өткізгелі отырған Үрмелі аспаптар оркестрінің фестивалі аясында Астана қаласы әкімдігінің Мемлекеттік академиялық филармониясының ұжымы, оған қоса ҚР Ұлттық гвардиясының оркестрі, Петропавл Ұлттық гвардия институтының үрмеліаспаптароркестрі, Орынбор (Ресей) қаласы муниципалдық үрмелі аспаптар оркестрі өз өнерлерін паш етеді.

Концерт 4 шілдеде «Бәйтерек» монументі алдында сағат 21.00.-де ашылады. 5 шілдеде сағат 10.00.-де түрлі ұжымдар қаланың орталық саябақтары мен өзге де алаңдарында мерекелік бағдарламасын ұсынады. Сол күні, 5 шілдеде сағат 19.30-да «Бәйтерек» монументі алаңының сахнасында бэнд-марафон өтеді. 6 шілдеде сағат 10.00.-де Республика даңғылы бойынша Әскери-тарихи мұражайынан бастап «Жастар» сарайына дейін жалғасатын парадта «Астана Самалы 2017» фестивалінің барлық ұжымдары өнер көрсетеді. Сол күні, 6 шілдеде сағат 16.00.-де әкімдіктің алдындағы алаңда барлық оркестрлердің плац-концерті өтеді.

«Серпер»қазақ халық аспаптар оркестірінің V республикалық фестивалі 4-6 шілде аралығында өтеді. Фестивальдің ашылуы 4 шілде күні сағат 19.00.-де «Бәйтерек» монументі алаңында болады. 5 шілдеде Астаналық, Студенттік және «Жерұйық» саябағында сағат 11.00-ден бастап фестиваль қатысушыларының концерті басталады. Сол күні, яғни 5 шілдеде сағат 17.00.-де «Бәйтерек» монументі алаңында «Күй керуен» концерті басталады, көрермендер Ақтөбе қаласының Ғ. Жұбанова атындағы халықтық аспаптар оркестрінің, Қарағанды қаласының Тәттімбет атындағы қазақ ұлттық аспаптар оркестрі мен Новосібір қаласының Орыс академиялық оркестрінің мерекелік бағдарламасымен таныс болады.

6 шілдеде сағат 13.00.-де қалалық алаңда Астана күніне арналған «Серпер»қазақ халық аспаптар оркестір V республикалық фестивалінің гала-концерті өтеді. Гала-концертте көрермендер «Серпер» және «Сарыарқа» оркестрінің ең танымал күйлерін тыңдай алады. Олар дирижер Айтқали Жайымовтың басқаруымен 200 музыканттың түрлі аспаптармен сүйемелдеуінде өнер көрсетпек.

Қазақ радиосындағы «Ой-Зерек» танымдық-интеллектуал ойынының 12-шығарылымына «Оймақ» командасы қатысып, 2-ойынын өткізді. Есеп тағы да 4:7. Тұрақтылық — класс белгісі.

1.Армян жұмбағы ОНЫ киімімен моншаға кіріп, киімсіз шығады дейді. Ал XIX ғасырда, кір жуу ұнтақтары әлі болмаған кезде, үй шаруасындағы әйелдер ОНЫ сабын, крахмал, ағартқыш сұйықтың орнына қолданған. Оны атаңыз/Ал қандай көлікке мінгенде біз ОНЫ жиі ала жүреміз?

2. 1975 жылы шыққан Дхарматма атты үнді фильмінің сюжеті үлкен қылмыс империясын басқарып отырған адам және бұл істі жалғастырып, жалғастырмайтынын шешуі тиіс ұлы туралы. Хинди тілінен дхарматма сөзін аударыңыз.

3. Соғыс кезінде жазылған Қайым Мұхамеджановтың өлеңі:
«Ер қазақ ежелден еркіндік аңсаған,
Бостандық өмір мен ар үшін қиған жан.
Торлаған тұманнан жол таппай тұрғанда» деп басталады. Аңыз бойынша, Әбділда Тәжібаев пен Ғабит Мүсірепов бұл өлеңге сәл-сәл өзгеріс енгізуді ұсыныпты. Ал сіз бұл өлеңге ән жазған адамдардың кез келгенін атаңыз.

4. Невада штатының таңбасында жұлдыз және бір шөп бейнеленген. Украиндер бұл шөпті чернобыль деп атайды, немістер вермут. Семейде немесе жалпы Қазақстанда бұл өсімдік қалай аталады?

5. Олар қолдарына өткір темір ұстап, бір-біріне қарсы қозғалатын болады. Олар бір-біріне шаршаудан басқа ешқандай зиян тигізбейді. Біреуі алға еңкейгенде, екіншісі артқа шалқаяды. Леонардо да Винчи бұлай қандай процесс жайлы айтқан?

6. Мухамед Кубайси атты дубайлық діни қызметкердің пікірінше Дубайда ораза кестесіне түзету енгізу керек. Бір параметр бойынша 80 көрсеткішінен асқандар үшін 2 минуттық өзгеріс енуі тиіс екен. Бұл қандай параметр?

7. Стендапшы Нұрлан Сабыров жақында “Лексус” алғанын айта келе, онда дым ноқат, сызық болмағанын баяндайды. Бірақ бір ай өтпей-ақ жаңа автокөлігін сырып-сырып алғанын айтады. “Енді бояу керек…” дейді ол. Нені/нелерді?

8. Американ жазушысы Уилсон Мизнердің пікірінше, бір автордан ұрлау — плагиат, ал бірнеше автордан ұрлау — ИКС. Британ немесе Массачусетс университеті ғалымдарына сүйенбей-ақ ИКСті 60 секундта 4 адамдық топтарыңыздың ми еңбегі арқылы тауып көріңіз.

9. Қазақ жұмбақтарынан бір порсы:
Тұтқасыз тобатай,
Ұнатар, көп апай.
Мылжа басты,
Мың көзді.

10. 2015 жылы Мәскеуде өткен бір көрме Экспо-1520 деп аталды. Көрме тақырыбына негіз болған бұл атау егер еуропалық және жалпы әлемде танымал стандартпен өткен болса Экспо-1435 деп аталар еді. Экспо-1520 қандай бағыттағы көрме еді?

11. Бұл адамның әкесі Апулияда, Италия, туған. Айрықша спорттық жетістіктерінің жоқтығына қарамастан, бұл адам 2011 жылы Бүкіләлемдік бокс даңқы залына енгізілді. Оның фамилиясын атаңыз.

Аудиожазбасы — мінекей.

Тұрғындар тарапынан түнгі уақытта құрылыс жұмыстары жүргізілетіндігі жөнінде шағымдардың көбеюіне байланысты елорда әкімдігі Астана қаласының ІІД-мен бірлесіп рейд жүргізді.

Соңғы уақытта «тұрғындардың тыныштығын бұзу(құрылыс жұмыстары жүргізілуде)» бағытына ерекше назар аударылуда. Қала әкімінің тапсырмасынан кейін соңғы екі тәулікте сағат 23:00 –ден 07:00-ге дейін 34 өтініш қабылданды.

Қоңыраулар «109 кезекшілік қызметі» ММ түседі. Қабылданған ақпаратты сараптау тәртібі: өтініш, өтініш білдірушінің мекен жайы, жеке мәліметтері, одан кейін құрылыс насанынның орналасуы туралы ақпарат «102» пультіне, құрылыс басқармасына мемлекеттік сәулет-құрылыс бақылауына және аудандық әкімдіктерге (ауданға байланысты) жіберіледі. Жұмыс мерзімі – өтінішті 2 сағат ішінде қарау. Өз кезегінде «109 кезекшілік қызметі» мәліметтерді 300 бағыт бойынша жүргізеді. Сонымен қатар, өтініш білдірушілер өз шағымдарын Smart Astana қосымшасы, сондай-ақ «109 кезекшілік қызметінің» әлеуметтік желілердегі «Фейсбук», «Инстаграм», «Твитер» ресми парақшалары арқылы бағыттай алады.

Сенбіден жексенбіге қараған түні 23:00-де «Комфорт таун» ТК тұрғынынан қоңырау келіп түсті. Шағымданушы 38 («Саранда» ТК) ауданында құрылыс жұмыстары жүргізіліп жатқанын және құрылыстың дыбысы жақын маңдағы кешен тұрғындарының түн тыныштығын бұзатындығын жеткізді.

-Мен «Комфорт таун» ТК, 3 кезек, 25 көшесі, 38 үй мекен-жайында тұрамын. Осы нысан маңында үнемі құрылыс жұмыстары жүргізіледі, ұйқымызды бұзады. Менің өзім 5-6 рет полиция шақырдым, — дейді тұрғын.

Бұл жерге Астана қаласы Есіл ауданының ІІД қызметкерлері жедел жеткен. Тұрғындардың титығына тиген нысан 39 көшесіндегі «Nova City»ТК орналасқан.Құрылысты «Luxor.kz Company» ЖШС жүргізуде. Шақыртудан кейін мердігер компания өкілі сол уақытта құрылыс басында бетон қабылдау жүргізілгенін, ал қатты дыбыс шығатындай өзге жұмыстар жүргізілмегені туралы түсініктеме берді. Ары қарай аталған ЖШС басшысы атына Есіл ауданының ІІД бөлімшесіне кәсіпкерліктің түрін анықтау үшін барлық қажетті құжаттармен келу туралы шақырту берілді.

-Жаз мезгілінде құрылыс нысандары бойынша өте көптеген өтініш-шағымдар келіп түседі. Егер құқық бұзушылық анықталса, онда біз ӘҚК-нің 437 бабына сәйкес сол жерде әкімшілік хаттама толтырамыз. Мұндай құқық бұзушылық үшін жеке тұлғаларға-5 АЕК, шағын кәсіпкерлік субъектілеріне-10 АЕК, орта кәсіпкерлік үшін -15 АЕК, ірі кәсіпкерлікке-50 АЕК айыппұл қарастырылған, — дейді участкелік инспектор, полиция аға лейтенанты Мадияр Дүйсепбеков. Кәсіпкерлік түрі анықталған соң айыппұл салуға әкімшілік хаттама толтырылады. Жеке тұлғалар үшін хаттама оқиға орын алған жерде жазылады. Кінәлі тарап келіспеген жағдайда 10 күн ішінде бұл шешімге сотта шағымдануға құқығы бар. Егер нақты 1 нысанға үнемі шағымдар келіп түсетін болса, бұзушыға қатысты ұсыныс әкімдікке жіберіледі.

ҚР ақпарат және байланыс күнін тойлау қарсаңында журналистер арасында шағын футболдан жыл сайынғы турнир өткізілді.

Аталмыш шараны қала әкімдігі ұйыдастырды. Бүгін К. Мұңайтпасов атындағы алаңда шағын футбол бойынша өткен ойынға 13 команда мен бұқаралық ақпарат құралдарының 130 өкілі қатысты.

— Шағын футболдан турнир бұқаралық ақпарат құралдарының қызметкерлері арасында кәсіби қарым-қатынасты нығайту, салауатты өмір салтын насиxаттау футбол секілді спорт түріне өскелең ұрпақты баулу мақсатында өткізіледі,- деді Астана қ. Ішкі саясат басқармасы басшысының орынбасары Қайрат Қамбаров.

Өткізілген турнирдің бас төрешісі Даулет Хамзиннің айтуынша, бұқаралық ақпарат құралдарының өкілдері жарыста мықты команда құрып, өздерінің жақсы дайындығы мен қызықты ойынын көрсетті.

— Жыл сайынғы турнир биыл 13 команда арасында өтті, жеребе салу бойынша 4 топқа бөлінді. Командалар алдымен топтық кезеңде ойнап, кейін плей-офф деңгейіне көшті. Ойын барысында БАҚ өкілдері арасынан «Хабар» телеарнасының командасы жақсы нәтиже көрсетіп, алға шықты. Сондай-ақ "Қазақ радиосының" командасы қызықты тартыста турнирдің жеңімпазы атанды. Ала допты соғуда шеберлік танытқан «Елорда Ақпарат» командасы да ерекшелене білді,-дейді Даулет Хамзин.

— Төреші болған соң, ойынның әділ өтуіне ерекше көңіл бөлуге тырыстым. БАҚ өкілдері арасында жыл сайын өткізілетін турнирге 9-шы рет төрешілік етіп отырмын. Халық пен билік арасында көпір болып жүрген журналистердің ерекше еңбегін, қызметін атап өткім келеді. Сіздер арқылы елімізде, әлемде болып жатқан оқиғаларға қанық болып, ақпар аламыз. Осы тұста сіздерді алдағы кәсіби мерекелеріңізбен құттықтай отырып, ойынды қызықты әрі тартысты өткізгендеріңіз үшін раxметімді айтамын,- деп атап өтті Хамзин.

Турнирдің қорытындысы бойынша 3-ші орынды «Хабар» телеарнасы, 2-ші орынды "Қазақ радиосы" алса, 1-ші жүлделі орынға Республикалық " Егемен Қазақстан" газеті ие болды. Оған қоса әртүрлі аталымдар бойынша бұл командалар жоғары нәтиже көрсетті.

Мәселен, команданың ең үздік қақпа қорғаушысы астаналық «Елорда Ақпарат» командасының қызметкері Қуандық Әлімжанов, «КазСпорт» арнасының намысын қорғаған Ермек Төрениязов ең үздік қорғаушы атанды. Сондай-ақ «Жеңіс» командасының ойыншысы Марғұлан Ибраев шағын футбол бойынша ең үздік ойыншы атанды.

Турнирдің жеңімпаздары атанған командалар әкімнің кубогімен, медальдармен, диплом және құнды сыйлықтармен марапатталды.

— Бұқаралық ақпарат құралдары өкілдерінің кәсіби мерекесі қарсаңында біз Астана қ. Кубогіне арнайы турнир ұйымдастырдық. Тіршіліктің қайнаған ортасында жүретін журналистердің қоғамға беретін пайдасы зор. Бүгінгі күні олардың тек өз саласында ғана емес спортта да жоғары нәтиже көрсетіп отырғанына көзіміз жетті. Астана қ. әкімдігі атынан келе жатқан кәсіби мерекелеріңізбен құттықтай отырып, шығармашылық табыс тілейміз,- деді Астана қ. әкімдігінің баспасөз-xатшысы Эльвира Жүргенбаева.

Екі күн бойы елордада тәжірибе алмасқан германиялық және отандық сәулетшілер осы сауалдың жауабын іздеді. Белгілі сәулет докторы Филипп Мойзердің жетекшілігімен өткен дөңгелек үстелге екі елдің жас және тәжірибелі сәулетшілері қатысты, деп хабарлайды елорда әкімдігінің медиа орталығы.

Жиынның алғашқы күні Қазақстан мен Германияның ЖОО оқып жатқан жас сәулетшілеріне арналды. Ал екінші күні алманиялық 30-ға тарта білікті әрі белгілі сәулетші мамандар қатысты. Сәулетшілер Астананың ахуалымен, оның ішінде қала құрылысын дамытуға арналған шешімдерімен танысты. Даму динамикасына, жасыл аймақ пен инфрақұрылымына қатысты таңданыстарын жасырмады.

Ұйымдастырушылардың мәліметінше, елордада алғаш рет өткізілген ашық сұхбат алаңы алдағы уақытта жалғасын табатын болады. Жақын арада дәл осындай кездесу ағылшын сәулетшілерімен бірлесіп өткізілмек.

«Филипп Мойзер еуразиялық қаланың типологиясын жасап шығару үшін келді. Ол посткеңестік кезеңнің қалаларын зерттеп оларды бірнеше топқа жіктеді. Астана еуразиялық қалалар санатына кірді. Оның мақсаты Астанадан еуразиялық қаланың прототипін жасау және нақты еуразиялық қалаларды сипаттайтын нақты өлшемін анықтау. Бұл үлкен ғылыми еңбектің алғашқы бөлігі деп атауға болады.

Келешекте біз оның зерттеу еңбегін құрал ретінде пайдаланып, қолданыста көргіміз келеді», — деді Астана қаласы урбанистика орталығы басшысының орынбасары Асхат Садуов.

ЭКСПО-2017 халықаралық мамандандырылған көрмесінің бекітілген кешенді бағдарламасына сәйкес, Ақтөбе облысының мәдениет күндері 2017 жылдың 26-30 маусым аралығында өтеді.

Облыстың мәдениет күндерінің ашылуы 26 маусым күні сағ.21.30 «Экспо» аумағындағы амфитеатрда Ақтөбе облысының үздік шығармашылық ұжымдарының «Ақтөбе – құтты мекен» гала-концерті өтеді.

Театрландырылған концертте құрамалы оркестр, вокалистер, алдыңғы қатардағы би ұжымдары, ақтөбелік эстрада өнер жұлдыздары, Қазақстан Республикасының мәдениет қайраткерлері Есенгелді Ырза, Өмірқұл Айниязов, сонымен бірге жерлесіміз Ресей Үлкен театрының /Москва қ./ опера әншісі Светлана Касьян және бірнеше дүркін халықаралық ән орындаушылар байқауының, Қытайда өткен «I am singer» байқауының жүлдегері Димаш Құдайберген қатысады. Концертте ақтөбелік композиторлардың шығармалары мен әндері орындалып, өңірдің тарихи-мәдени ерекшеліктері көрсетіледі.

Облыстың мәдениет күндерінің бағдарламасына сәйкес, Астана қаласы «Қазанат» ипподромының аумағында орналасатын этноауылда 26 маусым – 10 шілде аралығында облыс атынан 2 киіз үй тігіледі. Бір киіз үйде облыстық тарихи-өлкетану музейінің қорынан ұлттық этнографиялық бұйымдардан тұратын «Ақтөбе өңірінің жауһарлары» атты көрме жасақталып, «Экспо» штабы ұйымдастыру комитетінің сұрауы бойынша көрме 8 шілдеге дейін жалғасады.
Осы этноауылда орнатылған сахнада 27 маусым күні сағ.15.00-20.00 аралығында облыстың, қаланың және ауданның мәдениет мекемелері өнерпаздарының қатысуымен этноконцерт өтеді. Концерт облыстық филармонияның қазақ ұлт аспаптар оркестрі, фольклорлық ансамбльдері, дәстүрлі әншілері, «Аққу» би ансамблі, эстарадалық әншілерінің, «Достық сазы» фольклорлық ансамблі және халықаралық байқаулардың лауреаты Жадыра Арыстанованың, облыстық драма театрының М.Әуезовтың «Айман-Шолпан» музыкалық комедиясынан, «Алақай» қуыршақ театрының «Жайна, жадыра, достар» арнайы бағдарламасынан тұрады.

26 – 30 маусым аралығында «HasSanat» көркемсурет галереясында ақтөбелік танымал суретшілердің еңбектерінің және Қазақстан Республикасы Қарулы Күштерінің әскери-тарихи музейінде облыстық кітапхананың «Ақтөбе – тарих толқынында» кітап көрмесі, облыстық тарихи-өлкетану музейінің қорынан «Дулығалы дала перзенттері» көрме экспозицияланады.

«Бәйтерек» монументі алаңында 28 маусым күні қалалық мәдениет бөлімінің, Ғ.Жұбанова атындағы облыстық филармония шығармашылық ұжымдарының концерттік бағдарламасы өтеді. 29 маусым сағ.19.00 де «Студенттік» саябағында этно-мәдени орталықтардың концерті ұйымдастырылады. 30 маусым Астана қалалық әкімдігі ғимараты алаңында облыстың өнер ұжымдарының концертімен аяқталады.

«ЭКСПО-2017» көрмесіне орай өткізілетін мерекелік іс-шаралар аясында «Қазанат» қалалық ипподромының аумағындағы этноауыл жұмысына өңірлер шеберлерінің қатысу кестесі бойынша Ақтөбе облысының күндері 1-10 шілде аралығы болып белгіленді.

Астана қаласының Тілдерді дамыту басқармасы Астана күніне орай «Еңселі елім, байтағым» атты Астана жастарының арасында рухани байқау өткізеді.Байқауға 16-30 жас аралығындағы азаматтар, шығармашылық топтар қатыса алады.

Байқау мынадай номинациялар бойынша өткізіледі: «Үздік поэзия», «Үздік блог-пост», «Үздік дизайнерлік жұмыс» (сәулет, сурет, композиция), «Үздік қолөнер бұйымдары» (әшекей бұйымдар, кәдесыйлар), «Үздік интернет канал» (арнайы түсірілген бейне материалдар),«Үздік мақала».

Аталған байқауға ұсынылатын материалдар 2017 жылғы 27 (қоса есептегенде) маусымға дейін қабылданады.Сарапшылар тобы 28-30 маусым аралығында жұмыстарды іріктеп, бағалайды және үздіктерді анықтайды.

Жұмыстар www.BaikauTDB@mai.ru электронды мекенжайына жолдану қажет.

Номинация шарттары жайлы мәліметтермен www.astanafm.kz cайты арқылы танысуға болады.

Марапаттау кеші арнайы фуршеттік ортада, қонақтар мен қатысушылардың коммуникативтік формат ұстануына негізделеді. Сондай-ақ, шағын концерттік бағдарлама және әр номинация бойынша үміткерлердің жұмыстары, еңбектері жайлы әзірленген бейнесюжеттер көрсетілетін болады. Қызығушылық білдірген БАҚ өкілдерін іс-шараға қатысуға шақырады.

«Еңселі елім, байтағым» байқауының жеңімпаздарын марапаттау рәсімі 3 шілде, 16:00-де «Тілеп» қобыз сарайында өтеді. (Керей, Жәнібек хандар к-сі, 18)