Бұл туралы елорда әкімдігінің тілшісіне берген сұхбатында Астана қаласы әкімдігі табиғи ресурстарды және табиғат пайдалануды реттеу басқармасының өкілі Нұралы Елібаев мәлімдеді.

Нұралы Елібаевтың мәліметтеріне сүйенсек, 2017 жылдың соңына дейін пайдалануға берілетін шағын гүл бақтарының құрылысына 962,5 млн теңге қарастырылған.

Шағын гүл бақтары Астананың Біржан сал, Желтоқсан, Суворов, Тәуелсіздік, Қошқарбаев көшелерінің бойында жайғаспақ. Мұнымен қоса, жыл аяғына дейін Сейфуллин көшесіндегі гүл бағы қайта жөндеуден өтеді.

«2017 жылы Жалайыр көшесіндегі саябақтың құрылыс жұмыстары аяқталып, ол пайдалануға берілді. Жылдың соңына дейін 5 шағын гүл бағының құрылыс-монтаждық жұмыстары аяқталады деп жоспарланған. Жаңа демалыс орындары қалалық №1 емхананың, қалалық перинаталды орталықтың, Біржан сал, Желтоқсан, Суворов көшелерінде пайда болады. Бұл жұмыстардың аяқталу мерзімі болып, жылдың соңы белгіленді», — деді Астана қаласы әкімдігі табиғи ресурстарды және табиғат пайдалануды реттеу басқармасының бас маманы.

Әкімдіктің табиғи ресурстарды және табиғат пайдалануды реттеу басқармасында белгілі болғандай, биыл сондай-ақ, «Көктал» шағын ауданындағы саябақтың құрылысы бастау алған. Жоспарға сәйкес, құрылыс жұмыстары келесі жылы аяқталмақ.

«Биыл Көктал ауданында саябақтың құрылысы басталды. 2017 жылы іске асатын жұмыстарға 683 млн теңге қарастырылып отыр. Жобаның жалпы құны 3 млрд 386 млн теңгені құрайды. Саябақ 2018 жылы пайдалануға беріледі деп жоспарланып отыр», — деп мәлімдеді Нұралы Елібаев.

Мұнымен қоса, бас маманның мәліметінше, 2018 жылы Астана қаласындағы апатты жағдайда тұрған үйлердің орнында желекжолдар мен гүл бақтары салынатын болады. Қазіргі таңда аталмыш нысандардың құрылысына бөлінетін қаражат көлемі бюджет нақтыланғаннан кейін анықталмақ.

«Астана қаласы әкімінің тапсырмасы бойынша 2018 жылы көне апатты үйлердің орнына желекжолдар мен шағын гүл бақтарының құрылысы жоспарланады. Оның ішінде 3 желекжол, 8 гүл бағы салынады делінген. Желекжолдар Жеңіс даңғылында (ұзындығы шамамен 100-150 метр), Абай даңғылында және Кеңесары көшесінің бойында орналасатын болады», — деп түйіндеді сөзін Астана қаласы әкімдігі табиғи ресурстарды және табиғат пайдалануды реттеу басқармасының бас маманы Нұралы Елібаев.

Астана қаласы әкімдігінің медиа орталығы қаламызда демалыс күндері өтетін мәдени және спорттық іс-шаралар кестесін ұсынады.

7 қазан күні сағат 18:00-де «Астана Опера» театрында, орыстың ұлы композиторы П.И.Чайковскийдің шығармашылығына арналған «Растворил я окно» атты концерті өтеді. Билет құны – 1 500 теңге.

18 қазанға дейін Ұлттық музейде «Образы Кореи» атты фотокөрме жалғасады. Көрме сейсенбі, жексенбі күндері аралығында, сағат 10:00-ден 18:00-ге дейін ашық. Кіру құны — 300-700 теңге.

Ырғақты биді ұнататындар 8 қазан күні «Астана Нұры» мейрамханасында өтетін аргентиналық танго би кешіне барса болады. Басталуы сағат 19:00-де, кіру құны — 2 000 теңге.

Демалыс күндері қаламызда мынадай спорттық шаралар өтпек.

7 қазан күні «Дәулет» СК ММА жекпе-жек бəсекесінен V әлем чемпионаты өтеді. Кездесуге 30 елден 100 спортшы қатыспақ. Кештің басталуы сағат 19:00-де, кіру құны — 1 000 теңге.

8 қазан күні «Барыс Арена» мұз айдынында ВТБ бірыңғай лигасының тоғызыншы маусымы ашылады. Президенттік «Астана» баскетбол клубы маусым басталар алдында құрамын айтарлықтай жаңартты. Басталуы сағат 15:00-де, кіру құны — 100 теңге.

Жылдың қай мезгілінде де бақ өзінің жұмбағымен, құпиясымен, ғажайыптылығымен адамзат баласын баурап тұрады. Жақында ғана ашылғанына қарамастан, Арай саябағымен шектесетін «Қазақстан — Корея достығы» бағы астаналықтардың сүйікті демалыс орнына айналып үлгерген.

Арай және Жауқазын көшелерінің қиылысында орналасқан елорданың жаңа көрікті жерінде медиа орталықтың тілшілері де барып, бақтың көз тартарлық әсемдігіне тамсанып қайтты.

Екі ел арасындағы достықты дәріптейтін баққа келушілерді ең алдымен, «жастық қақпасы» қарсы алады. Корей халқының нанымы бойынша, екі жаққа бірдей ашылатын есіктің ортасынан өткен сайын адам бір жылға жасарады екен. Астанаға қазан айының басында тосыннан түскен ұлпа қар айналаны ақ көрпеге орап, баққа кірер жанның сол бақтың құпиясын танимын деген құштарлық сезімін ұлғайтса керек.

«Бір жылға жасарып», есіктің ортасынан өткен соң, сіздің көз алдыңызда корей халқының дәстүрлі сәулеті қанатын жаяды. Кеңістік ұлттық нақышта безендірілген есіктер, қақпалар, аркалар, дуалдар сияқты нысандармен толтырылған.

Мұнтаздай төселген кеспе тас, гүлзарлар, шыршалары мен қайыңдары бар бақ сұлулығымен көздің жауын алады. Бақта жасанды бұлақ та, кішкене су бұрқақ та бар. Үлпілдеген қардың астында жатса да бұл нысандар баққа өзіндік рең беретінін байқамау мүмкін емес.

Достық қоңырауы – бақтағы ең ерекше нысан. Таңғы леп елінде қоңыраудың соғылуы жылдың басы мен соңын білдіреді екен. Ал біздің елордалықтар достық бағындағы қоңырауды соқса, ойлаған тілегің орындалады деген сенімді қалыптастырып үлгеріпті. Біз де қоңырауды соғу рәсімінен тыс қалмадық.

«Қазақстан — Корея достығы» бағындағы серуен жақсы әсерге толы болды. Бақтағы нысандардың барлығы достық, махаббат, бейбітшілік, бақыт сияқты ұғымдарды тереңірек түсінуімізге сеп болатынына сенім мол.

Естеріңізге салайық, «Қазақстан — Корея достығы» бағы 27 қыркүйекте салтанатты түрде ашылған болатын. Оның ашылуына Корея республикасының ҚР-дағы елшісі Ким Дэсик қатысқан еді. Атап өту керек, «Қазақстан — Корея достығы бағы» жобасы Президент Нұрсұлтан Назарбаевпен Корея Республикасы Президентінің 2014 жылғы сапары кезінде келісілген әріптестік жобасы болатын.

Мәтін: Әсем МЫРХАЙДАРОВА

Фото: Адильхан ИЛЬЯСОВ

Астанада 12 қазанда мүмкіндігі шектеулі азаматтарға арналған бос орындар жәрмеңкесі өтеді, деп хабарлайды елорда әкімдігінің медиа орталығы.

Астана қаласы әкімдігі мен Халықты жұмыспен қамту орталығының ұйымдастыруымен 12 қазанда елорданың «Жастар» сарайында (Республика даңғылы 34) мүмкіндігі шектеулі азаматтарға арналған бос орындар жәрмеңкесі өтеді.

Жәрмеңкеге «Биотехнология ұлттық орталығы», Ұлттық музей, № 1 емхана, «Элара-Астана» ЖШС, «Каздорпроект» ЖШС, «Апрель 2030» ЖШС сияқты 40-қа тарта елордалық жұмыс беруші қатысады деп күтілуде. Онда кіші ғылыми қызметкер, зертханашы, мейірбике, жүргізуші-экспедитор, күзетші, өнер мен мәдениет маманы секілді 250 бос жұмыс орны ұсынылмақ.

Шара сағат 10:00-де басталып, 13:00-де аяталады, — делінген таратылған хабарламада.

Астанада түрік әлемінің математика қоғамының VI Конгресі өз жұмысын аяқтады, деп хабарлайды елорда әкімдігінің медиа орталығы.

Қазанның 2-5 аралығында өткен шараға 20 елдің 100-ден астам көрнекті ғалымдарын қоса алғанда, барлығы 500-ден аса адам қатысты.

Конгресстің ғылыми секциялары математиканың барлық негізгі бағыттарын қамтыды. Төрт күн ішінде ғалымдар алгебра және математикалық логика, геометрия және топология, функция теориясы, дифференциалды теңдеулер мен математикалық физика, ықтималдылық теориясы мен математикалық статистика, есептеу математикасы, басқару теориясы мен оңтайландыру әдістері, математикалық модельдеу, ақпараттық технологиялардың теориялық негіздері, түрік халықтарының математиканы оқыту тарихы мен әдістемесі сияқты бағыттар бойынша өзекті мәселелерді талқыға салды. Конгресстің жұмысына түскен 507 баяндаманың 320-сы тыңдалған болатын.

Конгресстің барысында «Functional analysis in interdisciplinary applications» халықаралық конференциясы, «Inverse and Ill-posed Problems and its applications» шағын симпозиумы, «Non-associative algebras and combinatorics» және «Mathematical Modelling» тақырыптарындағы семинарлар сияқты ерекше шаралар өтті.

Шараға төрағалық еткен Қазақстанның математика қоғамының президенті Бақытжан Жұмағұлов түрік әлемінің математика қоғамының VI Конгресі жұмысының жемісті болғандығын атап өтті.

«Бүгінгі таңда адамзат баласы математикалық модельдерді, ақпараттық технологияларды, компьютерлік, сандық жүйелерді өмірдің барлық салаларында дерлік кеңінен қолданып жүр. Біздің өміріміздің белсенді түрде сандарға айналуы математика ғылымының жетістіктеріне негізделеді. Бүгінде ҚР Президенті Нұрсұлтан Назарбаев еліміздегі математика ғылымының дамуына үлкен көңіл бөледі. Біз Конгресстің күн тәртібіне қойылған барлық сұрақтарды қарастырдық. Өзекті мәселелерді шешу жолдарын талқыладық. Көптеген елдермен пікірімізбен, тәжірибелерімізбен алмастық. Аталмыш конгресс барысында шығарылған ортақ шешімдер түрлі елдердің ғалымдары арасындағы байланысты нығайтып, заманауи математиканың өзекті проблемаларын шешудің тиімділігін арттыратынына сенімдімін», — деді Бақытжан Жұмағұлов.

Сондай-ақ, Конгресс барысында түркітілді елдердің математикалық қоғамы басқармасының отырысы өтті. Онда қоғамның жаңа құрамы сайланған болатын. Қатысушылар бірауыздан түркітілді елдердің математикалық кеңесінің келесі мерзімге президенті етіп танымал ғалым-математик, академик Бақытжан Жұмағұловты сайлап, келесі Конгресстің өтетін орнын анықтады. Түрік әлемінің математика қоғамының VIІ Конгрессі Өзбекстанда өтеді деп шешілді.

Конгресс жұмысының қорытындысы бойынша математика ғылымының дамуына сүбелі үлес қосқан жетекші ғалымдар мен жас математиктер дипломдармен марапатталды.

Айта кетейік, түрік әлемінің математика қоғамының конгресстері 3 жылда 1 рет өтеді. Алғашқы Конгресс 1999 жылы Түркияда өткен болатын.

Қаланың экологиялық интегралды көрсеткіші, ауа сапасы қалыпқа сай, деп хабарлайды Астана қаласы әкімдігінің медиа орталығы Астана қалалық табиғи ресурстар және табиғат пайдалануды реттеу басқармасына сілтеме жасап.

«Жыл басынан бері атмосфералық ауаның тым жоғары ластануы тіркермеген. Егер басқарма атына «Қазгидромет» ШЖҚ-дан ауаның жоғары ластануы туралы ақпарат түссе, ластау ошағы анықталып, ауаны ластауды тоқтатуын талап ететін әкімшілік нұсқама беріледі»,- делінген ведомство мәлімдемесінде.

Қазіргі күнде Астана қаласы бойынша ауаның ластануын анықтайтын 7 бекет жұмыс жасайды.

«Қазгидромет» ШЖҚ-ның мәліметі бойынша тамыз айында ауаның жоғары ластануы тек №3 бекет маныңда тіркелген (Лесозавод аймағы). Оған себеп осы аймақта көліктің көп шоғырлануы», — деп түсіндірді Астана қалалық табиғи ресурстар және табиғат пайдалануды реттеу басқармасы.

Азот диоксидінің 1,5 есе жоғарылауы (орташа тәуліктік концентрация) бұл ауа ластануының бір айлық көрсеткіші, дейді экологтар.

«Қазгидрометтің метеорологиялық анықтамасына сәйкес, бұл жағдай желдің жоқтығынан және «Шапағат» сауда үйі мен Тұран даңғылы бағытында көлік ағынынын көптігінен орын алған. Жәнеде бұл ауа ластануының жоғары көрсеткіші болып саналмайды», — деп түсіндірді жауапты мекеме.

Астана қалалық табиғи ресурстар және табиғат пайдалануды реттеу басқармасының мәліметіне сәйкес, Астана қаласында бірінші жарты жылдықта экологиялық көрсеткіш және ауа тазалығы нормативтік көрсеткішке сәйкес келеді.

«Астана қаласынның ауасы өмір сүруге қолайлы және жәйлі», — деп хабарлады басқарма.

Шешуді талап ететін үлескерлік құрылысқа қатысушылардың бұл мәселесі сәрсенбі күні Астана қаласы прокуратурасының үйлестіру кеңесінде талқыланды, деп хабарлайды елорда әкімдігінің медиа орталығы.

Күн тәртібінде үлескерлік құрылыс саласында проблемалардың қалыптасуы, азаматтардың қаражатты жымқыру себептері, сондай-ақ осы санаттағы қылмыстық істерді тергеу кезіндегі мәселелерді шешу тұрды.

Отырысқа қала әкімінің бірінші орынбасары Сергей Хорошун, Астана қаласы ІІД басшысы Амантай Аубакировпен басқа да құзырлы мемлекеттік органдардың жетекшілері қатысты.

Астана қаласының прокуроры Болат Дембаевтың айтуынша, соңғы жылдары жосықсыз үй салушылар мен алаяқтардың заңсыз әрекеттерінен 13,5 мыңнан астам азамат зардап шегіп, 53 нысанның құрылысы аяқталмай қалыпты.

«Қала прокуратурасының органдарымен үлескерлік құрылыс проблемаларына ерекше көңіл бөлінеді. Аталмыш проблемалар 2006 жылдан бастау алған. Бұдан кейін «Тұрғын-үй құрылысына үлескерлікпен қатысу туралы» Заң қабылданған болатын. Десек те, заңның қабылдануы ешқандай нәтиже берген жоқ. Үй салушылар оны айналып өтсе керек. Аталмыш мәселені шешу біздің жұмысымыздың басым бағыты», — деді Болат Дембаев.

Прокуратураның деректеріне сүйенсек, қолға алынған іс-шаралардың нәтижесінде жосықсыз 31 үй салушы сотталды. Құрылыс компанияларының 12 жетекшісіне қатысты қылмыстық іс қозғалған. Болат Дембаев үлескерлердің проблемалы сұрақтарына қатысты жағдай күн сайын мониторингтен өтетінін айтты.

«Прокуратура қызметкерлері күн сайын кеңес беру және заңды көмек көрсетеді. Олардың мүддесі үшін шағымдарды түсіреміз. Бүгінге дейін 4000 азаматтың мүддесін қорғайтын 24 шағым қанағаттандырылды. Бұл нысандар сот шешімімен тұрғын үй – құрылыс кооперативтеріне берілді. Қазіргі таңда олардың бірқатары бойынша құрылыс жұмыстары жүріп жатыр. 7 шағым сот қарауында», — деп атап өтті қала прокуроры.

Айта кетейік, қала прокуратурасымен проблемалы нысандардың құрылысын аяқтай алатын әлеуетті кәсіпкерлер мен инвесторларды іздестіру бойынша түрлі шаралар өткізілуде.

«Құрылысты аяқтау мақсатында инвесторларды тарту бойынша шаралар қолға алынды. Астана әкімдігімен бірлесіп екі жәрмеңке өткіздік, 18 нысанның жобасы таныстырылды. Олардың 9-на инвесторлар қызығушылық танытып отыр. Төрт нысан бойынша келісім-шарт жасалып, 5 нысан бойынша жобалық құжаттар зерттелу үстінде. Қараша айында үшінші жәрмеңке өтеді деп жоспарланды. Қазіргі таңда сот шешіміне сәйкес үлескерлерге жосықсыз үй салушылардың активтерін беру жұмыстары жүргізіліп жатыр», — деді Болат Дембаев.

Прокуратурадағылардың пікірінше, мемлекеттік және құқық қорғау органдары арасындағы қарым-қатынастың жоқтығы құрылысшылардың заңсыз әрекеттеріне қатысты уақытылы шара қолдануға мүмкіндік бермейді. Осы орайда прокуратура МСҚБ мен қылмыстық қудалау органдарының арасында қарым-қатынасты орнатудың тәртібін өзгертуді ұсынды.

Астана қаласы прокурорының орынбасары Алмат Байшұлақов уақытылы әрі тиімді шара қолдану үшін аталмыш кезеңде құқық қорғау органдарында мамандандырылған бөлімшелерін немесе үлескерлердің мәселесін шешумен айналысатын топтарды құру қажет деп есептейді.

«МСҚБ-нан басқа да мүдделі тұлғалардан түсетін ақпаратты мұқият тексеру, үлескерлерді тарту бойынша заңсыз қызметті уақытында тоқтатуға мүмкіндік береді. Бұл өте маңызды жағдай. Сараптаманы қорытындылай келе, біз үлескерлік құрылыста проблемалардың қалыптасуының негізгі себебі, баспананы мерзімінен бұрын сату болып табылады деген шешімге келдік», — деп түйіндеді Алмат Байшулаков.

Айта кетейік, прокуратураның бастамасымен тамыз айында ХҚК ғимараттарында үлескерлерді қолдау орталығы құрылған болатын. Онда мәселелер қаралып, заңды көмек көрсетіледі. Орталық жұмысын бастағаннан бері 190 азаматты қабылдады.

Елордада «қара тізімге» енген 50-ге тарта құрылыс компаниясы бар. Бұл бағытта әкімшілік жұмыстарды жалғасып жатыр. Бүгінде елорда билігі бақылауға проблемалы 53 нысанды бақылауға алды.

Қазан айының басында Астанада құрылысы аяқталмай қалған нысандардың жәрмеңкесі өтеді. Жәрмеңкені Астана қаласы әкімдігімен қалалық прокуратура бірлесіп өткізеді, деп хабарлайды Астана қаласы әкімдігінің медиа орталығы.

Осыған дейін өткен екі жәрмеңкеде проблемалы 17 нысан аукционға шығарылған болатын. Соның жетеуін жәрмеңкеге қатысқан құрылыс компаниялары алған. Яғни құрылысты жалғастыратын инвесторлар табылған.

Ал, осы жолы өтетін жәрмеңкеге тұрғын үй кооперативтері құрылысы тоқтап тұрған 13 нысанды шығарады. Олар: «Тұран Сығанақ», «Триумф Есиль», «Зере 2», «Магистральный», «АРАБИ 2», «Үміт Береке», «Аниса 2,3», «Мой мирный дом», «Жаңа Отан», «Ақниет Экспо», «Рур Нурхат», «Тамаша үй», «Успешный дом» нысандары.

Құрылысы аяқталмаған нысандар жәрмеңкесіне қатысуға 30 құрылыс компаниясы шақырылған.

«Біз проблемалы нысандарды жәрмеңкеге дайындаймыз, ал мемлекеттік сәулет-құрылыс бақылау басқармасы құрылыс компанияларын шараға қатысуға шақырады. Жәрмеңкеге қатысуға ниет білдірген компаниялар нысандар туралы жан-жақты ақпарат алып, өз шешімдерін айтады», — деп хабарлады «ОДА» үлескерлер қоғамдық бірлестігінің төрайымы Татьяна Чурсина.

Қазір жәрмеңкеге шығарылатын 13 нысан бойынша үлескерлердің талап-арыздары қанағаттандырылған. Яғни бұл нысандар енді үлескерлердің өздеріне тиесілі. Бұл жұмыс қалай жүзеге асатыны туралы «ОДА» үлескерлер қоғамдық бірлестігінің төрайымы Татьяна Чурсина айтып берді.

«Біз проблемалы нысандарды жәрмеңкеге шығарамыз, ал нысанға көңіл аударған құрылыс компаниялары қарастырып отырған нысан туралы жан-жақты ақпарат алады және өз ұсыныстарын айтады әрі келіссөз жүргізеді. Егер ниет білдерген құрылыс компания нысанның алғашқы жобалау үлгісін өзгерту, кеңейту, қосымша ғимарат жалғау бойынша ұсыныстар айтса, оны қарастырамыз. Оның барлығы үлескерлермен келісіп шешіледі. Үлескерлер инвестордың ұсынысын қабыл алуға ниетті болуы тиіс. Өйткені, бізге нысанның құрылысы жүріп, тездетіп берілгені жақсы», — дейді төрайым.

Айта кеткен жөн, мұндай жәрмеңке осымен үшінші мәрте өткелі отыр. Ал осыған дейінгі жәрмеңкеде инвесторлар алған нысандарда құрылыс жұмыстары қызу жүруде.

Бірінші орында сауда саласы тұр, деп хабарлайды Астана қаласы әкімдігінің медиа орталығы.

Камералық бақылаудың көрсеткіші бойынша Астана қаласы қазынасына ең мол салықтық түсімдер қызмет көрсету саласынан түседі екен, себебі, көрсеткіш — 5,4 млрд. теңгеге жеткен.

Екінші орында — тамақтану саласы (салықтық түсім 1,7 млрд. теңге), үшінші орында — пәтерді жалға алу (0,8 млрд. теңге), ал төртінші орын — ойын-сауық және мекендеу саласына тиесілі (0,3 млрд теңге).

Астана қаласының Кәсіпкерлік және өнеркәсіп басқармасы, қаламызда қайдан отын сатып алуға болатының айтты, деп хабарлайды Астана қаласы әкімдігінің медиа орталығы.

Астана қаласының кәсіпкерлік және өнеркәсіп басқармасы БАҚ беттерінде және әлеуметтік желілерде Елордамызда көмір тапшылығы сезіліп жатыр деген ақпаратты жоққа шығарды.

«Қазір кей БАҚ-ры мен әлеуметтік желілерде бас қалада көмір тапшылығы сезілуде деген ақпарат тарап жатыр және ол қатты отынның қымбаттауына себеп болуда. Айта кетейік, қазіргі таңда қала бойынша көмір тапшылығы жоқ және болуы да мүмкін емес», — деп хабарлады Астана қаласы әкімдігінің медиа орталығына қалалық кәсіпкерлік және өнеркәсіп басқармасы.

Көмірді төмендегі мекенжайлар бойынша сатып алуға болады:

«Жылу НС 2030» ЖШС (Астана, Герцен көш, 6/1, тел.: 43 51 42; «Жылы Алем kz» ЖШС (Абая-Жұбанов қиылысы, Мясокомбинат аймағы); «Астана инвест» ЖШС (Придорожная-1 көш, Герцен көш, 6/2, тел.: 48 67 61); «Север энерго» угольснаб» ЖШС, (Литейная-1 көш); «Ұмар кз» ЖШС (Дулатов көш,182 (центр бетон).

Аталмыш кәсіпорындарға көмір мына кен орындарынан жеткізіледі: «Қаражар» (Шығыс Қазақстан облысы), «Богатырь» (Павлодар облысы), «Майкөбе» және «Шұбаркөл» (Қарағанды облысы).

Орта есеппен 1 тонна көмір 11 800 теңге тұрады.

«Қаламызда көмір жеткілікті және апта сайын толықтырылып отырады», — деп хабарлады Астана қаласының кәсіпкерлік және өнеркәсіп басқармасы.