Алматы облысының тілдерді дамыту жөніндегі басқармасының тілдер күніне арналған салтанатты шарасы осы тақырыпта өткізілді. Жеті жұрттың тілін білмекке ұмтылған белсенділер бұл күні жырдан шашу шашып, тілге деген құрметтерін асқақтата түсті.
Оқушылар сарайында өткен биылғы шараның форматы да өзгеше. Салтанатты жиынның шымылдығын облыстық «Жетісу» газетінің жас журналистері жырмен ашты. Қоңыр үнімен киелі сахна төрінде көрермен жүрегін өлеңмен әлдилеген Құралбек Сәбитов, Айдар Қалиев, Мұхтар Күмісбек, Асыл Сұлтанғазы сынды жас ақындар көпшіліктің ыстық ықыласына бөленді. Ал «Анамның тілі, айбыным менің» деп ән салған сегіз жасар Рамазан Оспан тіл мерекесінің шырайын тіптен аша түсті.
***
«Тілге құрмет – елге құрмет». Мемлекеттік тілдің қолданылу аясын кеңейту мақсатында Алматы облысында ауқымды тірліктер атқарылуда. Мекемелер мен кәсіпорындарда, ұйымдарда мемлекеттік тілде іс жүргізуді жетілдіру, сонымен қатар мемлекеттік тілге деген қызығушылықты арттыру бойынша жүйелі жұмыстар қолға алынған. Бұл турлы салтанатты жиында Алматы облысының тілдерді дамыту жөніндегі басқармасының басшысы Айдар Башбаев мәлім етті.
Басқарма басшысы салтанатты жиынға ана тілімізді қадірлеп, қастерлейтін қоғам өкілдері жиналып отырғанын айтты.
Елбасымыз айтқандай «Енді ешкім өзгерте алмайтын бір ақиқат бар! Ана тіліміз Мәңгілік Елімізбен бірге Мәңгілік тіл болады. Оны даудың тақырыбы емес, ұлттың ұйытқысы ете білгеніміз жөн». Бір айта кететін мәселе – тілдер күні әлемнің ешбір мемлекетінде атап өтілмейді. Бұл – еліміз үшін тіл саясатының қаншалықты маңызды екенін айғақтайды», – деген Айдар Карбозұлы өз сөзінде еліміздің латын қарпіне көшу мәселесін де тілге тиек етті. Латын қарпіне көшуде ұлтымыздың ұтары көп екенін, жаңғырудың өзі жазудан басталатынын, бұл мәселеге ел болып қолдау білдіру қажет екенін баса айтты.
Салтанатты шара барысында басқарма басшысы тілімізді дамытуға өзіндік үлес қосып жүрген азаматтарға ҚР мәдениет және спорт министрлігі Тілдерді дамыту және қоғамдық-саяси жұмыс комитетінің Құрмет грамотасын, Алматы облысы әкімінің Құрмет грамотасы мен Алғыс хаттарын және Тіл басқармасының Құрмет грамоталарын табыс етті.
***
Мұнан кейін киелі сахна төріне қазақтың қара домбырасымен «Текті сөздің төресі» атты облыстық байқаудың жеңімпазы, қараша айында өтетін республикалық байқауға жолдама алған Нариман Әбдірахманов шығып, тілдер мерекесіне орай ақын Жұматай Әміреевтің сөзіне жазылған Асулар" атты арнауын орындады.
Көпшілікке терең ой салған тамаша арнаудан кейін сахна төріне ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Алматы облысы бойынша департамент басшысы Серікбай Нұрғисаев шығып, мерекеге орай жылы лебізін білдіріп, тіл мерейін асқақтатуда сүбелі үлес қосып келетін азаматтарды департаменттің Құрмет грамотасымен марапаттады.
***
Өзгеше форматта өткен салтанатты жиында облысымыздағы қазақ тілін меңгерген этнос өкілдері де өздерінің ақ жарма тілегін білдірді. Арнайы бейнежазбада айтылған ұлт өкілдерінің «қазақ тілі – өз тілім», «ұлтым орыс болса да, тілім – қазақ» деуінің өзі мемлекеттік тілді құрметтеуі деп білеміз.
«Тіл — татулық тірегі». Олай болса, көп ұлт пен ұлыстар мекендеген елімізде тіл қадірін жете түсініп, оның мерейі мен мәртебесін өсіру жолында бірлік таныту – өзекті.
***
«Кіл жүйріктен, кім жүйрік». Елбасы Н.Назарбаевтың «Болашаққа бағдар: рухани жаңғыру» атты мақаласы аясында қазақ поэзиясының көрнекті ақыны Тұманбай Молдағалиев жырларын ұрпаққа өнеге ету, мол мұрасы арқылы жастарды отансүйгіштікке тәрбиелеу, өлең құдіреті арқылы мемлекеттік тілдің мәртебесін көтеру мақсатында Алматы облысының тілдерді дамыту жөніндегі басқармасы және «Қазконтент» АҚ «Әдебиет порталы» интернет-жобасының ұйымдастыруымен «Жүрегі жырдан жаралған» атты жазба ақындардың республикалық онлайн-мүшәйрасын өткізген болатын.
«Мәңгілік елдің мәңгілік тілі» атты салтанатты шарада онлайн-мүшәйрасына қатысып, оза шапқан ақындар марапатталды.
Басқарманың арнайы жүлдесін «Жетісу» газетінің бас редакторы, Халықаралық «Алаш» әдеби сыйлығының иегері Әміре Әрін табыс етті.
Мүшәйраның бас жүлдесі Алтынғадыс Күнтуғанұлына ( 100 000 тг.) табысталса, бірінші орынды Оразай Жеңісұлы ( 80 000 тг) иеленді. Жүлделі екінші орын Мәрлен Ғилымханға (70 000 тг) бұйырды. Ал жетісулық жас ақын Мағрипа Сандуғаш үшінші орынға (60. 000тг) лайық деп табылды.
***
Кітап – ғажайып қазына, кітап – өмірсерік. Кітапты сүймеген, Құдайды да сүймейді (Ш. Мұртаза).
Алматы облысының тілдерді дамыту жөніндегі басқармасының ұйытқы болуымен «Жетісу – кітапқұмарлар өлкесі» атты «Букроссинг» облыстық жобасы қолға алынған болатын.
Қоғамдағы «уақыт жоқ» деген стереотипті бұзып-жарған жаңа бастама – «БУККРОССИНГ» – еркін кітап алмасу акциясының өткізіліп жатқанына екі айдың жүзі болды. Бүгінде көшпелі кітапхана халықтың кітапқа деген қызығушылығын оятуға айтарлықтай үлес қосуда.
Жылжымалы кітапхана сөрелеріне қойылған 700-ден астам кітаптың 100-ге жуығын оқырмандар үйдегі кітаптарын алып келіп, ауыстырып алса, 70-тен аса кітап «оқып, қайта алып келемін» деген оқырмандарға берілді. Мәселен, тек «Қаратал» жағалауы бойында орын тепкен көшпелі кітапханаға екі ай ішінде қала тұрғындары 200-ге жуық кітапты сыйға тартты.
Аталмыш жоба аясында белсенділік танытқан қала тұрғындарын тілдер мерекесі күні марапатталатынын осыған дейін әлеуметтік желіде құлағққағыс етіп, жазып келдік. Мерекелік шара барысында жоба аясында белсенділік танытқан қала тұрғындары арнайы үш номинация бойынша марапатталып, сый-сияпат табыс етілді.
«Ең үздік жас оқырман» номинациясымен Талдықорған қаласындағы Бақтыбай Жолбарысұлы атындағы №18 мектеп лицейінің 3 сынып оқушысы Жанна Қасен, «Ең үздік оқырман» номинациясы бойынша облыстық «Жетісу» газетінің журналисі Қозыбай Құрман, ал осы акция аясында ең көп кітап өткізген қала тұрғыны Гүлзада Сыдықова «Ең көп кітап өткізген оқырман» номинациясымен жүлделі болды.
Осы шара аясында өлеңін өмірбаянына, өмірбаянын өлеңіне айналдырған, әдебиет айдынында өзіндік қолтаңбалары қалыптасқан Жетісудың дарынды да, жалынды ақындары Сағыныш Намазшамова, Гүлбақыт Қасен, Жангелді Немеребаев, Торғын Тұрлыбаева, Азамат Нұрмұханов жүрекжарды жырларын оқып, көшпелі кітапханаға өз кітаптарын тарту етті.
«Мәңгілік елдің мәңгілік тілі» атты салтанатты шараны «Алтын қалам», «Алтын тобылғы» әдеби сыйлықтарының иегері, Қазақстан журналистер одағының мүшесі, жазушы Есболат Айдабосын және Алматы облысы тілдерді дамыту жөніндегі басқармасы тіл бөлімінің бас маманы Әсем Кенжеғұлова жүргізді.

Алматы облысының аумағында 1 095 өрт тіркелді. Ол көбіне тұрғындардың өрт қауіпсіздік ережелерін сақтамауынан туындайды.Бұл туралы облыстық өңірлік коммуникациялар қызметі алаңында белгілі болды.
2017 жылдың 20 сәуіріне дейін қатты отынмен жанатын пештерді пайдалану кезінде өрт қауіпсіздік ережелерін бұзу себептері бойынша 120 өрт оқиғасы тіркелген. Оның ішінде 23 адам улы газбен уланған. Жарақат алудың негізгі себептері өрт қауіпсіздігі талаптарының орындалмауы деді өз сөзінде облыстық төтенше жағдай департаментінің азаматтық қорғау подполковнигі Катышева Толқын.
«Жылу беру маусымы басталар алдында пештер тексеріліп, түтіндіктері тазаланып, сылануы керек. От жанып жатқан пешті қараусыз қалдыру өте қауіпті. От жағуға жанармай, жермай, дизель отыны мен басқа тез жанғыш сұйықтықтар мен жанғыш сұйықтықтарды қолдануға болмайды.
Пештің үстіне киімдер мен отынды кептіруге болмайды және де үй жиһаздары, перделер жанып жатқан пештен жарты метрден кем емес ара қашықтықта орналасуы керек. От жағу маусымы басталар алдында шатырларда түтін жолдары өтетін барлық түтін мұржалары мен қабырғалар әктелуі керек», — деді Катышева Толқын.
Тұрғындар арасында өрт қауіпсіздік ережелерін сақтау бойынша Төтенше жағдайлар департаменті ұдайы түрде от жағу маусымының алдында қауіпсіздік ережелерін түсіндіру жұмыстарын жүргізеді.

Бұл туралы Алматы облысының өңірлік коммуникациялар қызметі алаңында белгілі болды. Бүгінгі таңда балалардың жан-жақты дамуы маңызды рөл атқарып отыр. Осы мақсатта Талдықорғандық жас отбасы Мансұр мен Мадина Құрманғалиевтар Мемлекет басшысының «Болашаққа бағдар: рухани жаңғыру» мақаласы аясында мүмкіндігі шектеулі балаларға арналған ағылшын курсын ашып, жұмыс істеп жатыр.
Курста қазіргі таңда 10 бала оқып жүр. Олар екі шағын топқа бөлінген. Оқытушылар балалардың әрқайсысымен жеке-жеке жұмыс жасайды. Балалардың оқу үшін барлық жағдайлары жасалған. Олар тек жазбаша ғана емес берілген тапсырманы ауызша, ойын түрінде қабылдайды.
«Осы тегін курсттың арқасында балалар тек шет ел тілін үйреніп қана қоймай, сонымен қатар бір-бірімен араласып, топпен жұмыс жасауды үйренеді. Бұл балалардың болашағының зор болуына, мүмкіндіктерінің көп болуына септігін тигізеді деп ойлаймын », — деді ағылшын тілі мұғалімі Мадина Құрманғалиева.
Сабақ аптасына 2 рет 40 минуттан өтеді. Онда 2 жоғарғы білімі бар білікті мамандар сабақ береді. Ұстаздардың айтуынша жылдың соңына дейін 30 бала оқыту жоспарланып отыр. Курсқа жазылу үшін 87782863557 нөміріне хабарласуға болады

ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің Алматы облысы бойынша департаментінің ұйымдастыруымен «Қорғас» шекара маңы ынтымақтастығының халықаралық орталығында дөңгелек үстел өтті. Онда «Қорғас» ШЫХО-ның ең маңызды мәселелері көтерілді.
Шарада кеден қызметкерлерімен әкімшілік кедергілер, қызметтік өкілеттіктерін асыра пайдалану, кедендік декларация өтуден жалтару сынды бірқатар мәселелер қаралды.
Кедендік әкімшілендіру және қолданыстағы заңнамаларды сақтау мақсатында 2017 жылы «Алтынкөл» кедендік бекетінің «Қорғас» ШЫХО бақылау пунктінде ШЫХО аумағынан алынатын тауар тасымалын реттеу үшін тауарларды қабылдап, кедендік бақылаудан өтуге оларды біріктіру және багаж терминалына жеткізу үшін «Қазпошта» АҚ жұмысы ұйымдастырылды. Сонымен қатар, 2017 жылдың қаңтар айынан бастап кедендік бақылаудан жеке тұлғалардың біркелкі өтуі мен кептелісінің болмауы үшін 2 өткелдік 3 дәліз жұмыс жасайды. Кедендік бақылау аймағында «Қорғас» ШЫХО бақылау пункті мен Алматы облысының мемлекеттік кірістер департаментінің экономикалық тергеу қызметімен бірлескен экономикалық контрабанда мен сыбайлас жемқорлықты болдырмау бойынша алдын алу шаралары жүргізіледі. Мәселен, ағымдаға жылдың қаңтар-тамыз аралығында 105 әкімшілік құқықбұзушылық анықталып, 5 161 975 теңге айыппұл өндірілді.
«Қараша айынан бастап халық енді тек төл құжаттары арқылы өтетін болады. Бұл адамдардың екі есе көп келуін қамтамасыз етеді. Жұмыс күндері мұнда күніне 2000 адам өтеді, ал демалыс күндері 5000-ға жуық. Әр түрлі жобалардың құрылысы жоспардағы аумақтың 185 га жерден 240 га өсті», — деді «Қорғас» шекара маңы ынтымақтастығының халықаралық орталығының президенті Кахарман Жазин.
Жоғарыда көтерілген мәселелердің орындалуы енді қараша айында белглі болады.

Талдықорған қаласында «Латын қарпіне көшу — бұл қазіргі заманғы таңдау» тақырыбында кездесу өтті. Оған мәслихат депутаттары, Үкіметтік емес ұйымдар, саяси партиялар және БАҚ өкілдері қатысты. Жиынның мақсаты ҚР Президенті Н.Назарбаевтың «Болашаққа бағдар: рухани жаңғыру» бағдарламасын жүзеге асыру аясында тұрғындар арасында латын қарпіне көшу қажеттілігі бойынша түсіндіру жұмыстарын жүргізу және латын қарпіне көшу бойынша өзекті мәселелерді талқылау.
«Ұлтымыздың басынан үш алфавит жүйесін өткергендігін білеміз. Латын әліпбиіне көшу туралы ой-пікірлер 1926-1929 жылдардан бастау алғаны баршамызға белгілі. Жалпы Елбасымыздың латын әліпбиіне көшу саясатын қолдаймын. Себебі, латын әліпбиіне көшудегі негізгі ұтымдылық — тіл ауыспай, таңбаның ауысуы. Сонымен қатар қарапайым тілмен айтсақ, сөзді немесе дыбысты қалай естісек, жазылуын да солай жазамыз. Қазіргі таңда ғаламның 70 % латын әліпбиіне көшкен. Латын қарпіне көшсек бізді бүкіл әлем оқитын болады», — Талдықорған қаласының Қоғамдық Кеңесінің мүшесі Қаламқас Есенқұлқызы.
Жиын соңы пікір-талас, сұрақ-жауап форматымен аяқталды және латын тілі бірнеше параметрлер бойынша оңтайлы болып табылатыны сөз етілді.

Бүгін Алматы облысы әкімінің орынбасары Жақсылық Омар жастардың жобасына ақ жол тілеп, жетісулықтар «WELCOME to ZHETYSU» фильмін түсіруді бастап кетті. Бұл туынды Жетісу өңірінің көрнекті жерлерін кино тілімен насихаттайтын ерекше жоба болмақ. Бұл туралы Алматы облысының өңірлік коммуникациялар қызметі алаңында өткен баспасөз мәлихатында белгілі болды, — деп хабарлайды Алматы облысы әкімінің баспасөз қызметі.
Кино желісі өте қызықты, түрлі шытырманға толы, әзілмен әрленген. Жетісу өлкесінің тамаша жерлері де осы туындының ішінде көрсетіледі. Сценарий авторы Жұмабек Әділеттің айтуынша, кино қазақ тілінде түсіріледі, аталмыш туындыдағы негізгі рөлдерді Т.Жүргенов атындағы Қазақ ұлттық өнер академиясының ең үздік түлектері ойнамақ.
Фильмнің қысқаша мазмұны: жаңа танысып қосылған жолдастар Жетісу жерінен әсерлі бейнеролик түсіруді көздейді. Мақсаттарына жету жолында түрлі кедергілерге тап болғанына қарамастан, барлық қиындықты еңсеріп шығады.
«Елбасымыз айтқан рухани жаңғыру ең алдымен жастардың өз өлкесін танудан басталады. Сондықтан жетісулық жастар туған жердің топырағын насихаттауды кино тілімен жеткізуге талпыныс жасап отыр. Бұл орайда облысымыздағы қолға алынып отырған алғашқы тың жобаның маңызы зор деп есептеймін. Оны жүзеге асыру үшін біздің жастарда күш-жігер де, қуатты рух та, патриотизм де жеткілікті. Сондықтан тың жоба өзінің нәтижесін беретініне сенімдіміз», — деді облыс әкімінің орынбасары Жақсылық Омар.
Жалпы, кино түсіруге 13,8 млн. теңге бөлінген. Фильмнің ұзақтығы 90 минут болады деп межеленуде. Актерлер құрамында Ерболат Құдайберген, Рамис Кулаxметов, Рүстем Омаров, Мейірхан Шерниязов, Салтанат Құдайберген, Елдар Ташкенбай, Олжас Қасым, Райымбек Бекет бар. Фильм шамамен қараша айында көрерменге жол тартады деп жоспарланып отыр.

Тұңғыш рет Талдықорған қаласында облыстық прокуратурада Конституция күніне орай азаматтарды қабылдау орталығы салтанатты түрде ашылды. Бұл туралы облыстық өңірлік коммуникациялар қызметінің көшпелі баспасөз мәслихатында белгілі болды.
Азаматтарды қабылдау орталығы облыстық прокуратураның бақылау-өткізу пунктінің орнында бой көтерді. Орталықтың жұмысы «бір терезе» жүйесі бойынша жүзеге асырылады, яғни азаматтар барлық мәселелерін тек бір жерден шешу мүмкіндігіне ие болды. Осындай жаңа форматтағы жүмыстың арқасында жетісулықтар білікті заңгерлердің көмегіне тікелей жүгіне алады.
Жаңа орталық прокуратура мен халық арасында тығыз қарым-қатынасты орнатып, арадағы көп ресми рәсімдердің қысқаруына көмектеседі. Кезекші прокурорлар халыққа тікелей көмек көрсететін болады.
Орталықта азаматтар мемлекеттік мекеме басшыларына видео жазу арқылы сауалдарын қоя алады. Сондай-ақ, облыс тұрғындары прокуратураның барлық деңгейдегі басшыларының қабылдауына жазылуға мүмкіндік туғызылған. Азаматтар өтініштерінің қаралу барысы жайлы ақпарат пен жауаптардың көшірмелерін де ала алады.
«Жаңа орталықтың ашылуы халыққа сапалы қызмет пен қолжетімді заңға байланысты қызметтер көрсетіледі. Ең бастысы халық пен прокурорлар арасында ешқандай әкімшілік кедергілер болмайды. Бұл прокуратура қызметкерлерінің халықпен жұмыс жасаудың сапасын жақсартудағы маңызды қадамдарының бірі. Бұрынғы кездердегідей келушілер прокуратура алдындаңы ескте күтіп тұрмайды, себебі Тұрғындарға ыңғайлы болу үшін орталықта барлық жағдай жасалған. Сонымен қатар, кезектің электронды түрде жүруі де іске асырылған. Бұл екі жаққа да уақыт үнемдеу үшін тиімді», — деді Алматы облысының прокуроры Жылқыбаев Азамат.

Жыл соңына дейін Алматы облысында 35 мектеп, ал оның 24-і Білім күні пайдалануға беріледі. Бұл туралы бүгін облыс әкімі Амандық Баталов Талдықорғанда өткен ұстаздардың тамыз конференциясында хабарлады, — деп Алматы облысы әкімінің баспасөз қызметі ақпарат таратуда.
Қалыптасқан үрдіске сай жаңа оқу жылы қарсаңында өткізілген кеңес жұмысына облыс әкімі Амандық Баталов, Қазақстан Республикасының Білім және ғылым министрлігінің Ғылым комитетінің төрағасы Еркін Садықов және облыстың барлық аудан-қаласынан білім беру саласының қызметкерлері қатысты.
Облыс әкімінің орынбасары Жақсылық Омар конференцияны ресми түрде ашып, жүргізіп отырды.
Негізгі баяндаманы оқыған Алматы облыстық білім басқармасының басшысы Ләззат Базарқұлова, конференцияға қатысушыларға өткен оқу жылының, ҰБТ-ның қорытындысын баяндап, жаңа оқу жылында жүктелетін негізгі мәселелерге тоқталды.
Білім басқармасы басшысының сөзіне сүйенер болсақ, жаңа оқу жылына қойылар талаптардың негізгісі — білім деңгейін көтеру, педагогикалық ұжымның арасындағы тәртіп пен ұйымшылдықты арттыру, әрбір ұстаз бен мектеп әкімшілігінің жұмыс нәтижелілігіне қойылар талапты күшейту болып табылады. Баяндамада Мемлекет басшысы мен ҚР Білім және ғылым министрлігінің жаңадан енгізген талаптарын ұстаздар қауымының бұлжытпай орындауы қажеттігі жайында айтылды. Атап айтқанда, үш тұғырлы тіл саясаты, «Рухани жаңғыру» бағдарламасын жүзеге асыру, педагогтардың біліктілігін арттыру және өзге де маңызды тапсырмалар жүктелді.
Өткен жылдың жетістіктеріне тоқталған облыстың бас ұстазы проблемалық мәселелерге де көңіл аударды. Олардың ішінде ҰБТ-ның нәтижесікөңіл көншітпеді. Л. Базарқұлова осы іске жауапты тұлғаларға, соның ішінде облыстық білім басқармасына да кемшіліктерді алдағы оқу жылында қайталамаудың қам-қарекетін ойластыруға бүгіннен бастап кірісуді талап етті.
Конференеция барысында сөз сөйлеген Қазақстан Республикасының Білім және ғылым министрлігінің Ғылым комитетінің төрағасы Еркін Садықов, білім мен ғылымды дамытудың жаңа мемлекеттік бағдарламасы мен білімді дамытудың жаңартылған мазмұны туралы толықтай түсіндіріп берді.
Жарыссөзге қатысқан ұстаздар күн тәртібінде бүгінгі күннің өзекті мәселелеріне тоқталды. Олардың ішінде педагогтардың бәсекеге қабілеттілігі, жаңаша білім беру мазмұны, патриоттық тәрбие, дуалды оқыту, техникалық және кәсіби білім беруде еңбек нарығының сұранысына сай келетін білікті кадрлар дайындау мәселелері айтылды.
Педагогтардың тамыз конференциясын өңір басшысы Амандық Баталов қорытындылады.
Ұстаздар қауымын жаңа оқу жылының басталуымен құттықтап, жұмыстарына табыс тілей келе, жаңа оқу жылына қойылған тапсырмалардың басым бағыттарын айқындап өтті.
— Құрметті жиынға қатысушылар, құрметті ұстаздар! Келер оқу жылында педагогтарымызға үлкен міндеттер артылады. Елбасының «Болашаққа бағдар: рухани жаңғыру» атты бағдарламалық мақаласында ұсынған қоғамдық сананы жаңғырту жоспарын іске асыру бойынша өскелең ұрпақпен түсіндірме жұмыстарын бірлесіп жүргізуіміз қажет.
Мемлекет басшысы Нұрсұлтан Әбішұлы Назарбаевтың қолдауының арқасында білім берудің қазақстандық үлгісі дамудың жаңа сатысына көтерілуде, белсенді түрде заманауи инфрақұрылым қалыптасуда. Сол себепті, күш-жігерімізді бір арнаға бұрып, барлық бағыттар бойынша бірлесе жұмыс жасаумыз қажет. Біздің мақсатымыз ортақ, ол еліміздің өскелең ұрпағына сапалы білім беру, ұлт жанды, еліміздің мақтан тұтар азаматтарын тәрбиелеп шығу, — деді А. Баталов.
Өз сөзін жалғасытар келе өңір басшысы білім саласының ақсап тұрған күн тәртібіндегі мәселелеріне ерекше көңіл бөлу қажеттігін ескертті. Солардың ішінде ҰБТ-ның нәтижесі, балаларды қосымша біліммен қамтудың аз үлесі, мектеп директорларының атымен байланысты орын алған келеңсіз оқиғалар, кадрларды жұмысқа қабылдау кезіндегі өз ісіне жауапсыздық мәселелері бар. Сондай-ақ облыс әкімі тәрбиелеу ісінің босаңсып кетуінің салдарынан уақытынан ерте жүкті болу, жасөспірімдер арасындағы қылмыстың арту деректерінің көбейіп бара жатқандығына да назар аударды.
Осы аталған мәселелерге байланысты Амандық Баталов аудан-қала әкімдеріне, облыстық білім басқармасының басшысына жұмыстарын қайта қарап, айтылған әрбір бағыт бойынша тиісті шара қолдануды жүктеді. Сонымен қатар облыс әкімі аудан-қала әкімдеріне физика пәнінің мұғалімдерін оқушыларымен бірге «Астана ЭКСПО-2017» халықаралық мамандандырылған көрмесіне барып қайтуын, оларды жатын орынмен және тамақтануын қамтамасыз етуді тапсырды.
Өңір басшысы үш тілде оқытуды жетілдіру, «Рухани жаңғыру» бағдарламасын жүзеге асыру, мектепке дейінгі, техникалық және кәсіптік білім беру мәселесімен қатар ата-ана қамқорлығынсыз қалған балаларды баспанамен қамту мәселесі ерекше бақылауда тұрғандығын ескертті.
Осыдан кейін өзінің кәсіби шеберлігін шыңдауға үлкен көңіл бөліп, ұстаздық етудің жаңа әдістерін тұрақты енгізіп жүрген бірнеше ұстаздардың есімін атап, өткен жылдың қорытындысы бойынша үздік деп танылған ұстаздарды марпаттау рәсімін өткізді. Олардың ішінде «Қазақстан Республикасының білім беру ісінің құрметті қызметкері» және «Ы.Алтынсарин» атындағы төсбелгілермен марапатталғандары да болды. Сондай-ақ ұстаздарға облыс әкімінің Құрмет грамоталары мен Алғыс хаттары берілді.
Естеріңізге салар болсақ, І.Жансүгіров атындағы Мәдениет сарайының фойесінде облыстың білім беру мекемелерінің атқарып жатқан жұмыстарының басым бағыттарын көрсететін көрме ұйымдастырылды.
Ағымдағы жылы Алматы облысының білім беру саласының бюджеті 153,7 млрд. теңгені құрады. Оның ішінде білім беру нысандарының құрылысына 27 млрд. теңгеден астам қаражат қарастырылған. Өңірде 48 білім беру нысанының құрылысы мен қалпына келтіру жұмыстары жүргізілуде. Жыл соңына дейін 44 мектептің 35-і пайдалануға беріледі. Білім күнінде 24 жаңа мектеп өзінің алғашқы оқушыларына есігін ашпақ. Осы мектептердің 23-і үш ауысымда оқыту мәселесін шешетін болады. Ал 2018 жылы тағы 10 мектеп салу арқылы үш ауысымда оқыту мәселесі толықтай шешілмек. Сонымен қатар, биылғы жылы 24 мектепте күрделі жөндеу жұмыстары жүргізілгендігін атап өткен жөн.

Алматы облысы әкімінің баспасөз қызметі.

Бүгін Талдықорған қаласында тұрғын үй кезегінде тұрғандар мен «Тұрғынүйжинақбанкі» АҚ-ның салымшыларына жаңа көпқабатты үйлердің 168 пәтері берілді. Мемлекеттік «Нұрлы жол» бағдарламасымен салынған несиелік тұрғын үйлердің кілтін облыс әкімі Амандық Баталов пен «Қазақстанның Тұрғынүйжинақбанкі» АҚ Басқарма төрайымы Ләззат Ибрагимова табыстады.
Қоныс иелерін құттықтаған облыс әкімі А. Баталов Талдықорған қаласын дамытудың жоспарына, соның ішінде 7-шағын ауданда салынатын құрылыс нысандарына қысқаша тоқталып, жаңа баспаналарына құтты болсын айтты.
— Халықты тұрғын үймен қамтамасыз ету туралы Елбасының тапсырмасына сәйкес облыста ауқымды жұмыстар атқарылып жатыр. Талдықорған қаласы да күннен күнге көркейіп келеді. Соның бір айғағы – бүгін жаңа пәтерлерге қол жеткізіп отырсыздар. Облыс орталығындағы жаңа баспаналарыңыз құтты болсын. Шаңырақтарыңыз шаттық пен қуанышқа, отбасыларыңыз бақыт пен ырысқа толсын! – деді А. Баталов. «Қазақстанның Тұрғынүйжинақбанкі» АҚ Басқарма төрайымы Ләззат Ибрагимова да көпшілікке ізгі тілегін жеткізіп, қуаныштарына ортақтасты. Жаңа қоныс иелері де оңды мемлекеттік саясаттың нәтижесінде баспаналы болу бақытына ие болып отырғандарын айтып, Президенттің атына ризашылықтарын жеткізді.
Кілт тапсыру салтанатының алдында облыс әкімі А. Баталов пен «Қазақстанның Тұрғынүйжинақбанкі» АҚ Басқарма төрайымы Ләззат Ибрагимова жеке тұрғын үй құрылысын дамыту туралы өзара ынтымақтастық меморандумына қол қойды.
Л. Ибрагимованың айтуынша, «Нұрлы жер» бағдарламасы шеңберінде қос тарап келісімі бойынша жыл соңына дейін Талдықорғанда банктің қатысуымен коттеджді қалашықта 48 жер үй салынып, пайдалануға беріледі деп жоспарланып отыр. Ал мұнан кейінгі екі жыл ішінде осындай жеке тұрғын үйлер санын 600-ге жеткізу межеленген.
«Нұрлы жер» бағдарламасы негізінде жеке тұрғын үйлер салынатын жер алаңдарының инженерлік инфрақұрылымын жасауға толық қолдау көрсетеміз. Ең бастысы оның нәтижесін халық көреді», — деді Амандық Ғаббасұлы.
Аталмыш банктің Алматы облысында 43 мыңнан астам салымшысы бар, яғни облыс республика көлемінде салымшыларының саны жағынан алдыңғы қатарда. Бұл — Алматы облысының орталық қаласында ғана емес, Қаскелең, Талғар сияқты шағын қалаларында да инфрақұрылымның жақсы дамығанының нәтижесі. «Тұрғынүйжинақбанкі» АҚ Өңірлерді дамытудың 2020 жылға дейінгі бағдарламасы шеңберінде облыста 74,1 мың шаршы метр тұрғын үй салған. Соның ішінде «Тұрғындардың барлық санатына арналған тұрғын үй» бағыты бойынша 41,1 мың шаршы метрлік 12 үй немесе 609 пәтер салынса, «Жас отбасыларға арналған тұрғын үй» бағыты бойынша 33 мың шаршы метрлік 7 үй немесе 593 пәтерді пайдалануға берілген. Жалпы 2017 жылы 6 үй салу жоспарланса, соның 4-еуі Талдықорғанда болмақ.

Мемлекет басшысы Н.Назарбаевтың «Болашаққа бағдар: рухани жаңғыру» атты мақаласының бағыттарын талқылау мақсатында Талдықорған қаласында дөңгелек үстел өтті. Оған Алматы облысының ішкі саясат басқарма басшысының орынбасары Сапарғалиев Ж., «Жетісу» газетінің бас редакторы Әміре Әрін, «Огни Алатау» газетінің бас редакторы Идигов Атсалим және саяси партиялар, Үкіметтік емес ұйымдар мен тәуелсіз БАҚ өкілдері қатысты.
Елбасымыздың мақаласында ұлттық сананы жаңарту арқылы рухани жаңғырудың қыр-сыры тізбектеліп көрсетілген. Рухани жаңғыру – кезең-кезеңімен атқарылып жатқан елдегі реформалардың жалғасы. Технологиялық жаңарумен шектеліп қоймай, адамның сана-сезімін қатар жетілдіруге мемлекет баса мән берген. Елбасы ұлттық сана мен ұшқыр ой, білім мен бәсеке, прагматизм мен ұлттық бірегейлікті сақтау қағидаттарын мақаласында тізіп берді.
«Бұрын техника мен экономика бәрін шешеді деп ойлаушы едік. Қазір бәрі өзгеріп жатқан заманда ұлттық сана бірінші орында. Егер халық өте білімді болса, ол кез келген нәрсеге аз уақытта бейімделіп, өнеркәсіп, экономика, саясат жөнінен сауатты болмақ. Сондықтан бірінші жетістікке тез жететін экономика емес, ұлттық сана болады. Сонымен қатар, таяудағы он жылда өмір салты түбегейлі өзгереді. Елбасы бұған дайын болу керектігін айтып, жаңа тұрпатты жаңғыртудың ең басты шарты – сол ұлттық кодты сақтай білу керектігін баяндаған», — деді Әміре Әрін.
Жиын соңында қатысушылар өзара пікір алмасып, жобаларға бастау болатын жаңа идеяларымен бөлісті