Балықты балықпен аулау

… Содан біз, елді аралап жүріп кісі өлтіретіндерді елді аралап жүріп өлтіреміз деп шештік. Яғни, қаныпезерлерге маманданған қаныпезерлер болғымыз келді...

© «Жеті психопат» (Seven Psychopaths) фильмінен. satibaldi аударған нұсқа


Әкем балықшы (болған). Әкем, құдайға шүкір, тірі. Неге өткен шақпен сөйлегім келді? Қазір балық аулауға құқық қорғаушылар тарапынан бақылау күшейген заманда, оның үстіне осы бір керемет су жәндіктер популяциясының азаюына орай, балықшылық — жеке тұлғалар үшін рентабельді емес кәсіп көздерінің біріне айналды. Бұрын ең қол жетімді тірліктердің бірі еді ғой. Заман-ай, десейші. Бірақ, әңгіме ол туралы емес.

Балықшының баласымын. Көзімді тырнап ашқаннан мектеп бітіргенге дейін балық көріп өстім. Кәнігі балықшы болмасам да, біраз нәрседен хабарым бар (деп есептеймін). Бірақ ешқашан, ешқашан балықты балықпен аулайтындарды түсінген емеспін.

Әңгіме қармаққа салынатын жемтік туралы. Әдетте нан, жүгері дәнін саламыз (сазан, құты үшін), жауынқұрт немесе қоңыздардың дәрнәсілдерін саламыз (табан, қаракөз, қызылқанат үшін), түрлі жылтырақтар ілеміз (жыртқыш балықтар үшін). Бірақ кейде қармаққа шабақ салады. Өзінің кіші қандастарын аулап жейтін шортан, көксерке, алабұға үшін шабақтарды жемтік ретінде пайдаланады.

Құрт керек болса жер қазамыз, күбір қопарамыз, жылтырақ қармақтар керек болса тот баспайтын металл іздеп кетеміз. Бірақ балық аулау үшін балық аулау дегенді әлі түсінбей келемін. Ірілеу балықты ұстау үшін басқа да тәсілдер жетеді емес пе?

Әлде мен нағыз балықшы емеспін бе?

Фотосурет: angling.ru