Жүректің күйі табылып

Концертте, стадионда, ұшақта, бассейнде, «Star Wars» фанаттарының кездесуінде, қой қырқып жүргенде танысып, отбасы құрып, бүгінде тату-тәтті ғұмыр кешіп жатқандар туралы талай әңгіме естіген шығарсыз. Қызық қой, иә. Құдай айдап бір жерге барасың да, ойламаған жерден бақытыңды кезіктіресің. Біреу тағдыр дер, біреу жаратқанның жазғаны дер, мейлі, қайсысы екені маңызды емес. Бастысы жүректердің тұрақтайтын айлағы табылды.

Дегенмен, бұл айтылғанның бәрі қанша кездейсоқтық болса да, қазіргі уақытта таңқаларлықтай оқиға емес. Дәл осылай миллиондар танысқан шығар. Ал, сіз Домбыра Party-де танысып, жұп құрғандар жайлы естідіңіз бе? Жауабыңыз «жоқ» болса, таныса отырыңыз – Жасұлан мен Тоғжан.


Жасұлан Екібастұз қаласындағы Домбыра Party-лердің басы-қасында жүрген жігіттердің бірі. Сол патилердің екіншісіне күйші қыз Тоғжан да келеді. Содан бері екі жас бірге. Бұйырса көктемде той.

Домбыра Partyді біз мақтамаймыз, Домбыра Partyмен мақтанатынбыз. Енді мақтайтын да реті келіп тұрған сияқты. Домбыра Party жастардың әдейі іздейтін, бас қосатын, жүректерін біріктіретін күшке айналып үлгерді. Сіздерді қайдам, жоғарыдағы жаңалықты білген кезде, ішім жылып сала берді. Бұл жұпқа өмір бойы бақыт тілеп өтетінім анық. Домбыра Partyге қатысқан мыңдаған адамнан да сондай ізет күтем. Көптің тілегі өтімдірек болатын шығар. Бақытты болыңдар Жасұлан мен Тоғжан!