Рингтегі ММА туралы

Төбелес клубы
28 қазан 2012, 02:16

Astana TV арнасынан мына жерде жазылған аралас жекпе-жектен жарысты жаңа көріп тастадым. Расын айту керек, мақалада соншама ауыздарының суы құрып жазғандай, «правильные бои без правил» деген нәрселерді көре алмадым. Төбелестері — сол баяғы деңгейдегі төбелес. Жалғыз ерекшелігі — раундтардың нөмірі бар тақташаны рингке көтеріп шығатын қыздар ғана жалаңаштанған (бұрынғыларда қазақша көйлек киіп шығатын).
Бір байқағаным — бокс, кикбоксинг, муай тай немесе сават сияқты қақиып тұрып төбелесетін жекпе-жек түрлерінде болмаса, күресуге рұқсат етілетін жекпе-жектерді рингте өткізіп қажет емес сияқты. Күресуге кірісіп кеткенде, қарсыластардың бір дене мүшесі арқанның сыртына шығып кетсе, төреші төбелесті тоқтатып, рингтің ортасында жекпе-жек тоқтаған сәттегі қалыптарында қайтадан жалғастырғызады. Сондай сәтте астында қалып кеткен төбелесші рингтің ортасына келіп, өз еркімен алдыңғы бейшара қалпымен қайтадан жатуға мәжбүр. Таза жығып берудің иісі мүңкиді нақ. Қайдағы бір сондай қойнялар үшін төбелестің қызығы кетіп қалады екен. Аралас жекпе-жек өтуге тиіс бірден-бір жер сегізбұрыш екен деп түйдім — ешкім арқанның сыртына шығып кетпейді. сол үшін жекпе-жек тоқтатылмайды да: не шабуылдағаны ісін соңына дейін жеткізеді, не астында қалып кеткені бір амалын тауып сытылып шығып кетеді.

П.С.: «Боевое самбо» дегенді бір жерлерде «жауынгерлік самбо» деп жатады, мына эфирде "әскери самбо" деп ұрып жатыр. Одан гөрі «самбо жекпе-жегі» деген ұтымдылау ма деймін. «Боевое» дегені — самбоның әскер, жауынгер немесе сарбаздарға қатысы барын емес, бұл спорт түрінде жай самбодағыдай, яғни «самбо күресіндегідей» күресу, ауырту, буындырумен қатар ұрып-тебуге де рұқсат етілетінін білдіретін болса керек.

Сонымен сұрақ: жалпы аралас жекпе-жекті рингте өткізудің қажеті бар ма?

Суреттің алынған жері

аралас жекпе-жек, ережесіз емес төбелес, микс файт, ринг, сегізбұрыш

9 пікір

Төбелес самбо

Жасыру

Ұрда-жық төбелес. негізі сегіз бұрыштағы ережесіз жекпе-жек дұрыс. мына ринг ережесіз төбелеске қолайсыз, Бойканың төбелесін сала алмайды, ол тек кинода Вандам ғана жасай алады. ал, сегіз бұрышта қазақтың арландары шашып тастайды кез-келгенін Құдай қаласа.
Қазақтар алға, Қазақстан алға!!!

Рингте тек К-1 чемпионатын өткізбесе, мыналарға жарамайды екен. Мына аталған жарыс Финкельштейн-Емельяненколарға қарасты М-1 Микс Файт аясында өтіп жатыр ма, бірдеңесі бар.

Шынымды айтсам, осындай төбелестерді пәшти қарамаймын. Бокста, күресте «ақсүйектік» бар, көріп ләззат алуға болады. Ал мына жатып алып, қызыл-қан қылып төбелесу дегенді ұнатпай-ақ қойдым. Ауылда да көрдік қой талай)

Жарақатсыз спорт түрі болмайды ғой. Қабақ жарылып, көз көгеру боксқа да жат емес. Күресте де құлақ тістеу сияқты қитұрқылықтар кездесетінін жазда байқап қалдық

Ережесіз жекпе-жек-сегізбұрыш.
ортаға әкеліп жығып беруді мен де қолдамаймын.

2015 жыл 3 қазанда каз спорт алматы телеканалынан ережесіз төбелес жекпе-жегін тамашалап, сонда біз тыржаланаш қазақ қыздарын көріп жағамызды ұстадық, жеңңске жеткен өзбек пен тәжік жігіттеріне кеудесін басқада жыныс мүшесін тақап өздерінің анайы бетпердесін көрсетті, рухани ұлттық дәстүрімізді таптап қазақ деген атымызға кір келтірді, Ал Шымкентте өткен сайыста қыздарымыз үлттық нақышта қазақша көйлек киіп шықты қандай жарасымды. Осыған спорт министрі қалайша көзін жума қарап отыр неге ешқандай шара қолданбаймыз!

Достар! Қазір Казспорт телеарнасын қараңыздаршы. Қазақ спорт телекомментаторларына көңілдерің тола ма? Катар қаласында бокстан әлем чемпионаты өтіп жатыр. Біздің қазақ телекомментаторларының тікелей эфирден сөйлеу және жүргізу мәнерін байқап көріңіздерші. Не деген сұмдық? Біздің қазақ спортшыларын мақтап, оларға дух берудің орнына қайдағыны айтып оттап кетеді. Өзге елдің спортшыларының не керегі бар бізге. Осы бір дүмше комментаторларды оқытатын, сауатын ашатын арнайы курстар бар ма екен Қазақстанда? Қай бетімен сөйлеп отыр эфирден сонау шетелден? Спортсүйер қауым менің пікіріме пікір қосар деген үміттемін.