"Ақтөбе" фанаты Малика: Стадионда бір рет қараған футбол, теледидардан қараған футболдан 10 есе артық

Соңғы жылдары трибуналарда қыздар саны көбейіп келе жатыр. Футболға қыздар да қызыға бастады. Тіпті ультрас бағытын ұстанатын фанат қыздар да бар. Солардың бірі Малика — «Ақтөбе» клубының фанаты, «13-сектор» фанаттар бірлігінің мүшесі. Бұл сұхбатта ультрас қыздар қандай болады, жалпы қыздардың футбол махаббаты туралы сұрақтарға жауап іздеп көрдік.

Малика:

Жасы: 25
Қызметі: Жылжымайтын мүліктер орталығының маманы
Сүйікті фильмі: Унесенные ветром, Қыз Жібек, Приключения Шурика. Қанша рет көрсетсе, сонша рет қарай береді
Сүйікті музыкасы: Аралас, көбінесе RAP
Сүйікті тамағы: Еті бар тамақ
Ұнайтын командалар: (Ақтөбеден басқа) Спартак Москва, Барселона
Сүйікті киім бренды: Бренд талғамайды, ұнатқан киімді кие береді
Ақтөбедегі ең ұнайтын жер: Қобыланды батыр атындағы орталық стадион. Негізі Ақтөбенің барлық жері ұнайды

— Футболға қызығушылық қашан басталды?
— Футболды 2002 жылы Корея мен Жапонияда өткен Футболдан Әлем Чемпионатын қарап ұнаттым. Сол кезден бастап Испания құрамасына жанкүйер болып келемін. Биыл футболды сүйсіне қарап жүргеніме 10 жыл. Қазақстан футболына қызығушылық 2005 жылы басталды.

— Ата-анаң, айналаңдағылар не дейді сенің футбол ауруың туралы?
— Ата-анам футболдың өзіне қарсы емес, тек ультрас дегенді ұнатпайды. Теледидардан қарағым келсе қараймын, стадионда қарауға да қарсы емес, тек сыртқы ойындарға жібермейді. Ағаларым кейде телефон шалып, қашан қандай ойын болатынын немесе қандай нәтиже болғанын сұрайды. Құрбы-достарымның көбісі футболды ұнатады. Жұмыста да футбол ауруына шалдыққан адамдар жоқ емес.

— Секторларда қыздардың көбеюі туралы не дейсің? Жалпы қыздар футболға не үшін келеді?
— Қыздар футболды жақсы көріп, стадионға футбол қарауға, сүйікті командасын қолдауға келсе керемет қой. Негізі байқауым бойынша футболды жақсы көретін қыздардың саны артып отыр, ал жігіттердің саны азаюда. Кейде қыздар болып футбол қарауға біреудің үйінде немесе Спорт-барда жиналамыз. Футбол қарап қызыққа ставка қойып журген қызды да білемін. Жалпы қыздар футболға не үшін келеді деген сұраққа нақты жауап бере алмаймын, өз басым футбол қарауға, командамды қолдауға барамын. Стадионда бір рет қараған футбол, теледидардан қараған футболдан 10 есе артық. Стадионда матчты қарауға келетін әжелерді де көрдім. Мода деп келетіндер де бар. Бірақ соның өзінде футбол мүлдем ұнамаса қаншалықты мода болса да келмес еді. Тек айта кететінім стадионға келетін қыздар өздерінің киімдеріне, жүріс-тұрыстарына қараса екен, сонда «қыздар футбол қарауға келе ма әлде..?» сияқты сұрақтар туындамас еді.

— Футбол тек визуал түрде қызық па? Футбол тактикаларын, есептерін, ережелерін жақсы түсінесің бе?
— Футбол барлық жағынан қызық, егер ол нағыз футбол болса. Визуалды дегеніңді түсінбедім. Футбол жалпы 90+ минут өтетін сценарийсіз шоу ғой. Әр клубтың, бапкердің, футболшының өзіндік техникасы бар, ал ойында қай команданың техникасы жеңетінін тек ойынның соңында білеміз. Әр матч өзіндік тарихына ие, әр сәт жақсы болсын, жаман болсын есте сақталады. Футбол тактикаларын, есептерін, ережелерін жақсы білемін деп айта алмайм. Бірақ сауатым жоқ деп те айта алмаймын. Түсінбеген жағдайлар болса білетін адамдардан сұраймын, жауабын іздестіремін.

— Ультрас сен үшін өмірлік стиль ме?
— Ультрасты өмірлік стиль деп атау дұрыс емес меніңше. Және ол стильді қалай анықтайды? Киім бойынша ма, музыка бойынша ма? Ультрас деген ультрас. Маған тек футбол қарау ғана емес оған қатысу ұнайды. Алаңға шыға алмаймын, ал трибунада қолымнан келгеннің бәрін істеймін. Жігіттерге перформанс дайындау кезінде көмектескен ұнайды. Дауыстық суппорт туралы айтпасақ та болады, фан-секторда тұрып үндемей тұру — бұл мен туралы емес. Егер бір рет ультрас болсаң, бұл мәңгілік солай қалу деген сөз. Айналаңдағы барлық нәрсе — талғам, мекенжай, жұмыс, ортаң немесе т.б. Бәрібір кейін отбасы құрып, бизнес бастап, есейгеннен кейін де футболға барған кезде фан-сектор жаққа тартып тұрады. Эмоцияңды шығармай футбол қарау қиын болады. ТВден футбол қарағанда да комментатор дауысын емес әр жағындағы стадион дауысын тыңдауға тырысасың, фанаттар перформансын бағалайсың.

— Қандай «выездарға» бардың?
— Менде тек 3 «выезд»: Қостанай, Қызылорда, Орал. Болашақта саны көбейетініне үміттенемін. 2008 жылы Алматыда өткен матчтарға да бардым. Бірақ оларды «выезд» деп санамаймын, өйткені сол кезде Алматыда оқып жүрген студент едім.

— Еркектер компаниясында жүру қиын емес пе? Олардың өз әңгімелері, тілі, әзілдері болады дегендей.
— Еркектер компаниясы болғанда, бізді қосқан футбол мен сектор ғой, әңгімеміз бір және секторға келетін жалғыз қыз емеспін ғой. Сыйлаушылық бар болғасын мүлдем қиын емес, керісінше оңай десем де болады.

— Жігітің бар ма? болса ол не дейді сенің футболға баруың туралы?
— Жігітім бар, ол да мен сияқты фанат. Бірақ басқа команданың фанаты. Онымен өткен жылы біздің қаламызға «выездға» келген кезде таныстық. Биыл «алтын маусым» жасады, яғни өз командасының сырталаңдағы барлық ойындарына барды. Менің футболыма қарсы емес.

— Мен танитын фанат қыздардың көбі тұрмыс құрғаннан кейін футболды қойып кетті. Қалай ойлайсың, футбол қыздар үшін уақытша нәрсе ме?
— Уақытша емес, мүмкіндік болса қарайды ғой футболды. Тұрмыс құрғаннан, балалы болғаннан кейін шаруа көбейіп кетеді, сосын футболға баратын уақыт табылмайды. Үйдегі еркелікті тастап күйеу жұрттың үйінде келін болып жүргенде футбол қарау қиындау шығар. Өзім тұрмысқа шыққанда білермін ол жағын, қазір нақты жауап бере алмаймын.

— Футбол тек еркектердікі деген оймен келіспейсің яғни?
— Футбол тек еркектікі дегенде, футболды тек еркектер ойнау керек, ал қыздар ойнаған футбол ұнамайды. Ойнағаннан көрі футбол жанкүйері болуға, стадионға немесе сыртқы ойындарға барып дауысыңды аямай сүйікті командасына қолдау көрсеткені меніңше дұрыс болады.





Қыздар баннер т.б жасау істеріне де қатысады.







Мұндай фанат қыздары бар командаға жеңілу ұят



Қыздар сырт алаңдағы ойындарға да барады.



Маусымның алғашқы «выезды» — Қызылорда.



Қыздар фанаттардың әуежайдан команданы күтіп алу дәстүрін де ұстанады



Футболдан тыс өмірде ол да қарапайым қыз.



Маликалар осындай отбасы армандайды.