Әрі тәтті, әрі тиімді

Кокос жапсырылған, глазурьленген, қызыл, жасыл, сары түсті, не дәмі керемет емес, не сыртқы түрі онша емес пешенейлер болады ғой. Шамамен, мынадай:

Дастарханда көп адам қол созбағасын, тұрып-тұрып көнеріп кететін де осылар. Бұларды не істейміз, тастаймыз ба?

Біздің бөлмеде кокос жапсырылған печенье көөөп екен, оны ешкім жемейді. Тастауға обал деп ойланып тұрғанымда, есіме кішкентай кезімде анам жасап беретін тағам түсті. Ол өте жеңіл жасалады. Құрамына желінбей тұрған шоколадты кәмпитті де, әлгіндегідей ешкім жемейтін печеньені де қосуға болады. Сонымен, құрамы:
— cүт;
— печенье үгіндісі,
— жаңғақ үгіндісі,
— тақта шоколад немесе оралған шоколадты кәмпиттер.

Әуелі кокос қосылған печеньені кокостан тазартып, үгіп алдым.

Одан кейін грек жаңғағын целлофан қалтаға салып, үстінен оқтаумен басып, майдаладым.

Сосын, жай отта пісіп тұрған сүтке «Рахат» тақта шоколадын бірнеше бөлікке бөліп, салдым.

Сүттің түсі мынадай болды.

Одан соң, печенье үгіндісін қостым.

Енді жаңғақ үгіндісін саламыз.

Нәтижесінде, тағам қойылып, мынадай болды.

Сосын, мен ерігіп жүріп, оны босаған кәмпит қорапшасына салдым да, тоңазытқышқа қойдым. (Тоңазытқышқа қойған пайдалы дейді).

Былай қарасаңыз, қойыртпақ тағам. Десе де, ысырап қылмау үшін және қолдағы бармен жасай салуға жақсы нәрсе. Ас болсын!