17 жасар қазақ баласы Gillette-тің арнайы сыйлығына ие болды

Политехникалық колледж студенті, 17 жасар атыраулық Исламбек Абдужаппаров Gillette фирмасының сыйлығын ұтып алды. Күнде 5 уақыт қырынуды өзіне парыз санайтын жас өрен өзі күнделікті қолданып жүрген Gillette өнімдерінің қабықтарын лақтырмай, ұқыпты жинап жүріп, компанияның акцияларына белсенді қатысқан. 2 жылдық еңбек босқа кетпей нәтижесінде Gillette фирмасынан арнайы қырыну құралдары жиынтығын ұтып алған Исламбек қуанышты хабарын тілшілерімізбен бөлісті.

«2 жыл бойы үздіксіз қырынып келемін. Күнде 5 рет деп өтірік айтпай-ақ қояйын, кей күндері 2-3 рет қана қырынамын. 2 жылдан бері фирманың түрлі акцияларына қатысып келемін. Ең көп купон жіберуші ретінде маған „Ең белсенді тұтынушы“ атағы беріліп, арнайы сыйлыққа лайық деп танылдым», — дейді Исламбек.

Gillette фирмасының өкілдерінің айтуы бойынша Исламбекті тіпті болашақта өздерінің жарнамаларына да түсірулері мүмкін екен.

«Жас досымыз Исламбекті құттықтаймыз. Жасы әлі кіші болса да ойы үлкен екені көрініп тұр. Біздің өнімдердің арқасында 1 жыл ішінде иектеріне 1,2 см сақал шыққан. Байқасаңыз жақтарында да көгеру бар, ол жерде де сақал менмұндалап тұр. Айтайын дегеніміз біздің өнімдерді тек сақал-мұрттан арылу үшін ғана емес керісінше оларды шығару мақсатында да қолдануға болады. Іс жүзінде оны өздеріңіз де көріп отырсыз», — дейді Gillette Қазақстан өкілі Джанфранко Виалли.