"Жауапты хатшылар клубы" 2012 жылдың басты тақырыптарын жариялады

Кеше Алматыда «Жауапты хатшылар клубының» кезекті отырысы өтті. Еліміздің маңдайалды газеттерінің жауапты хатшылары жиналып, 2012 жылы жазылатын басты тақырыптарды анықтады. Клуб төрағасы Эдуард Алдоңғардың мәлімдеуінше өткен жылғы тақырыптармен салыстыратын болсақ, пәлендей өзгеріс жоқ. Тек аз-кем қосымшалар енгізілген. Сонымен қатар күтпеген, аяқасты оқиғаларға да дайын отыратындарын мәлімдеді.



Сонымен биылғы тақырыптар тізбегі:

— Қаңтар, ақпан айлары жалпы сайлау тақырыптарымен өтеді, айтарлықтай оқиғаларға жабық айлар бұл. Тек ақпанның алғашқы апталарында «Валентин қазақтың атасы ма еді?» сарынында шағын мақалалар беріліп отырылуы тиіс. Ақпанның соңына таман «23 ақпанды» әлі де тойлаушылар бар екені туралы сын-мақала берілген дұрыс.

— Көктемнің алғашқы күндерінде әрине Халықаралық әйелдер күніне арналған көлемді мақалалар берілген жөн. Одан кейін "Қош келдің Әз Наурыз" мақалалары.

— Одан кейінгі айларда аймақтардан су тасқынына байланысты репортаждар жасалады. Күннің жылынуына байланысты салауатты өмір тұрғысынан алдын ала "Қысқа етек қазақ қызына жараса ма?", «Атадан қалған ас па еді» сынды ескертпе мақалалар жариялануы тиіс.

— Алдағы жаздың басты оқиғалары футболдан Европа чемпионаты және Лондон Олимпиадасы болғандықтан "Әттеген, ай", «Бап шаппады, бақ шапты», «Алтын бізге бұйырмады» сынды мақалалар берілгені дұрыс. Олимпиада қортындыларын жасаған кезде "әттең өзіміздің қаракөздер саны көп болғанда ғой" тәріздес эпитеттер қосылса нұр үстіне нұр болады.

— Жаздың соңғы күндерін БҰТ қортындылары, өзін өзі өлтірушілер туралы жазып аяқтаймыз.

— Жазда міндетті түрде бір режиссерларымыз әлемнің бір жерінен бір орын алып келетін болғандықтан, күздің алғашқы айларында "Қазақ киносын әлем мойындады" мақалалары жариялануы тиіс. Сәйкесінше бір фестивальдардан орын алып келген әншілерді де ұмытпай, "Қазақ әні әлем сахнасында" типтес тақырыптармен берілген дұрыс.

— Күз және жылдың соңғы айларын жалпы қортындылармен толтырған дұрыс. Мысалы: «Ел экономикасы тұрақты даму үстінде», «Пәленше жерде мұнай табылды», «Түгенше өндіруден әлемде алғашқы алтылықтамыз». Жыл соңын әдеттегідей Тәуелсіздік құттықтауларымен және Жаңа жылға қатысты негатив және позитив жазулармен аяқтаймыз.