Вааааааааллллииии!!!

Осынау қоқыс престеуші роботтың қылықтарына таң қаласың. Ешкімге де керегі жоқ жұмысын мүлтіксіз орындап жүр. Адам секілді. Тек көп сөйлеп білмейді. Асыранды қоңызы бар.

Фильм сюжеті бойынша жерде қоқыс-қалдықтардың көбеюіне байланысты, ауасы улы газға толып, тіршілік жойылып кеткен. Ал Жер өмір сүруге жарамсыз болғаннан кейін адамдар алып кемеге отырып, ғарышқа ұшып кеткен. Валли есімді робот қана өмір сүреді планетамызда. Күнде таңертең тұрып, жұмыс орнына барады да, қоқыс жинайды. Оларды престеп, үйеді. Қоқыс арасынан тауып алған кейбір ескі заттарды үйіне тасиды. Ал кешке теледидар қосып, романтикалық кино көреді. Өмір осылай жалғаса берер ме еді, егер…

Егер ғарыштан Ева есімді барлаушы-робот келмегенде. Осыдан кейін екі роботтың бастарынан өткен қызыққа толы оқиғалар басталады. Ақырында, ескі құлтемір Валлидің арқасында адамдар Жерге оралып, тіршілікті қайта жандандыруға кіріседі.

Валлидің қылықтарына таң қаласың. Қулық-сұмдықты білмейтін роботтың әрекеттері еріксіз жүректі елжіретеді. Әлемді өзгертуге болмашы бір нәрсенің де хәлі жететінін түсінгендей боласың. «Көбелектің әсері» дейтін бе еді?..

«Валли» шынымен де отбасы болып көруге тұрарлық мультфильм. Түсіру тобының аз күш жұмсамағаны көрініп тұр.

10/10!

Дереккөзі