Andy Lau - Wu (OST Shaolin)

Бұрын қытайдың киноларындағы төбелестері ұнаушы еді. Кейін қыздары ұнай бастады. Енді өлеңдеріне отыра бастаған сияқтымын :)))
Төменде — барлығымызға демей-ақ қояйын, көпшілігімізге «Дом летающих кинжалов» фильмі арқылы аты болмаса да түрі таныс Энди Лаудың орындауындағы «Шаолинь» фильмінің саундтрегі.

Ән «Wu» (ағылшынша «Enlightenment»)) деп аталады екен. Қазақшасы «Ақиқатқа көзді ашу» сияқты бірнәрсе («Нирвана», опшым). Фильмге келер болсақ, асып бара жатқан ештеңесі жоқ, кәдімгі қытайдың фильмі. Кунгфуынан сымфуы* басымдау. Бұл фильмді негізі Джеки Чан ойнағаны үшін көрген едім.

Фильмнің сюжеті шамамен мынадай: Қытай Республикасы құрылған алғашқы жылдары елде нақты бір билік жоқ. Қолбасшылар өзара қырылысып жүреді. Сонда өз мақсатына жету үшін ғибадатханада адам өлтіруден тайынбай, керек десе серттескен бауырын өлімге қия салуды да сөлекет санамайтын Хоу Цзи деген бір генерал өзі сатқындықтың құрбанына айналады. «Күшік асырап ит еттім — балтырымды қанатты, кісіге мылтық үйреттім — ол мерген боп мені аттының» кері, опшым. Содан, әскерінен, байлығынан, отбасынан айырылып, сол өзі адам қанын төккен Шаолинь ғибадатханасында манақ болып, сол жерді паналауға мәжбүр болады.
Фильмді көру барысында "Жұбайы сол кездерді былай еске алады: «Лібә, қатты өзгеріп келді»." деген сөз есіме түсіп кетті :)))
Басты рольде — осы әнді айтатын Энди Лау. Джеки Чан қосалқы рольде ойнайды.
Фильмдегі төбелес көріністері «Ип Манға» жетпейді. Дегенмен, маған фильмнің финалындағы көріністер мен дәл осы саундтрек ұнап қалғанын мойындауым керек.

Мына өлең фильмнің өзі сияқты на любителя болуы мүмкін. Ұнату үшін фильмнің өзін көру керек шығар.

***

*Сымфу (ағылшынша: «wire-fu») — кинода сымдардың көмегімен адамның физикалық қабілеттері жете бермейтін трюктерді қоюдың түрі. Мысал ретінде Джет Ли ойнайтын және қытайдың ұшып жүріп төбелесетін барлық фильмдерін келтіруге болады. «Матрицадағы» төбелестер де сымфуға жатады, айтпақшы.