Керекше достық - ерекше достық.

Иә, «ат айналып қазығын табар» демекші, бұл керекинфоның қайта оралу әңгімесі қызық болды ғой… Керекинфоның алғашқы тәй-тәй басқан кездерінде, интернет технологияларында қазіргідей мүмкіндік жоқтың қасы еді… Тіпті қазақша мәтінді мониторға шығарудың өзі қаншалықты қиын іс еді десеңші..Қазір, алыс емес, сонау 2000 жылдары интернетте қазақ әріптері оқылмайтын, жазылмайтын десең, ел бетіңе бажырайып қарайтын шығар… Бірақ, сондай кезеңдер бастан өтті..Қолда 1,3 Мб дискетаға көшірілген сайттың «хтмл» беттері, интернет кабинеттерін жағаланып жүрілді ғой талай…
Сол керекте, ерекше жандар жиналды..Қаймақтар… Виртуалды әлемде басталған достықтар, интернетке сыймай, шынайы өмірге созыла басталды… Дәстүрлі кездесулер басталды… Ол кездегі керекшілердің көпшілігі Атырау мен Алматы қаласында шоғырланған… Сан алуан кездесулер сол қалаларда өтіп, ертесі күні суреттерімен бірге репортаж шығады форумда… Суреттегі детальдер талқыға салынып, біраз әңгіме өрбиді… Оффтоп үшін бір-бірімізбен қырылып жүретін кездер… Бәрі тарих қойнауында қалды ғой…

Қазіргі керек, ерекше… Алғашқы блоггерлер сол керектен енші алып шыққан еді, енді міне қазіргі блогтардың басын қосқан бір тұғырдың атауы болып қайта оралып отыр… Сәйкестік пе, әлде заңдылық па…

Сол кездері алғашқы қазақша сайттардың қателік кемшіліктеріне қарап, көш жұре түзеледі деуші едік… Сол көшіміз міне, түзеліп келеді… Жолың болсын, КерекИнфо! Әманда, көтерген туың желбіреп көк жүзінен көріне берсін…