"І" әрпінің хикаясы

Өрімтал: І әрпінің хикаясы

Өткен жылы да сөйткен. Зейнетақы қорыма ақша аударылмай қойғаны бар. Банктердегі компьютерлер "і" әрпіне жарымай қойды ғой.
Желтоқсаннан бері карточкама ақша түспей жүрген. Бар сабырымды жиып, мәсәленің мәнісін білеуге барсам, менің фамилиямдағы "і" әрпін, «и» әрпіне ауыстырып, орысша жазыпты. Осы уақытқа дейін дін аман қызмет көрсетіп келе жатқан оларды қандай түлен түрткенін жөнді түсіне алмадым.

Ата-тегім тұтастай қазақша жазылып келген еді. Еш қиындықсыз ақша да түсіп тұрған. Енді міне, сол "і" әрпін сылтауратып, ақша түспепті.

Онысын хабарлап, себебін түсіндіріп айтса бір сәрі ғой…

Өткенде ғана: «Халық банкіндегілерге» құжаттарыңның қазақшасын беріңдер дегенде, «комптағы бағдарлама орысша, сондықтан бәрі орысша шығады» деп ақталған. Енді комптағы бағдарлама орысша екен деп, менің де орыс болуым керек болғаны ма?

Себебіне сәл үңіліп көрсем, мәселенің мәнісі мынада екен. Жоғары оқу орындарына қатысы бар, сол жақта ақша аударылатын жандарға арнап банк жаңа бір бағдарлама түзіпті. Сол бағдарлама қазақ қаріптерін танымайды-мыс. Сөйтіп, барлығын орысша аударған. Кімнің аты-жөні қазақша жазылған болса, оған ақша түспеген. Өз тілдерінде оны пингования ма, соған ұқсас бірнәрсе деп атайды екен.

Мен тәрізді оқиға басқа да біреудің басынан өткен болар. Бөлісе отырсаңыздар. Әлде "і" әрпінің хикаясы тек менің басымнан өтіп отыр ма?

Жазбаның түпнұсқасы neweurasia.net сайтында жарияланды
Бөлісу:
, ,

14 пікір

asaubota
балдызым да көп әуреге түскені бар, фамилиясын жаңа төлқұжат алған кезде Елеусінов деп жазғызып, бұрын Елеусинов болған екен. қайтадан СИК алып жүрген әйтеуір.
urimtal
Ата-тегін қазақшалағысы келетіндерге осындай кедергілер жасайтыны ұнамайды. «Осындай әрекеттер қасақана жасала ма» деген күдікті ойлар түртпектейтіні жаман…

Иә, куәлігіңді өзгертсең басқа құжаттарыңды да жаңалайтының анық қой. Осы ортақ бір құжат шығады, СИК, РНН керек болмай қалады деп дүрліктіріп жатыр еді. Не болды екен?
asaubota
негізі менің ойымша қазақша әріптер оқылмайды деу — өтірік. Юникод деген кодировка не үшін шығарылған? бұрын біз енді бастап жүргенде қазақша әріптер шықпайды деген мәселе болды, бірақ соған амал таптық, шығардық қой. қазір еш жерде ондай мәселе жоқ. банктегілердікі де өтірік сылтау, программаларының кодировкасын өзгерту қиын ба екен не? просто істегілері келмейді.
urimtal
әбден мүмкін!!! Бірақ банктегі таныстарымнан сұрасам, біздің банктегі компьютерлік бағдарламалар (тіпті, 1C-те!) Ресейден алынады екен ғой. Қазақстандық компаниялар банк саласының есеп-қисабына арнап бағдарлама түзбеген боп отыр ма сонда? Қыжық!
asaubota
иә, Ресейден алады да оны біздің елдің тіліне локализациялауға ерінеді. айналып келіп бәрі тіл мәселесіне тіреледі.
Nurgisa
Неге екенін қайдам, мейл ру ұрпағы және айналдырған тоғыз қаріпке зәру мәселесі ойға түсіп отыр. АйТи тұрғысынан қаншалықты күрделі екенін қайдам, локализациялауда қосымша бір модуль сынды қосалқы базис енгізсе кілтипанға сол медеу болар ма еді…

Ал қаріп зардабын тартушылардың қатарында мен де бармын, Асхатжан. О баста куәліктегі ныспымды Нұрғиса деп қазақша жаздыртып едім, кейініректе СТТН және ӘИК-те Нургиса боп кетіпті. Осы былтыр бір шұғыл тірлікте кәдімгідей қырсық шалғандай аяққа оралды сол "қателік". Мүмкін, осындай базбір жайға бас қатырмау үшін ата-аналар сәбиіне ат таңдарда қазақ қаріпсізіне бүйрек бұрғызатын шығар, білмеймін…
urimtal
Сол ғой! Сол!!!
baltakol
Шрифтта тұрған ештеңе жоқ!!! Ол жәй ақталу ғана.
sammita
бізде жиі кездесетің жалғау бар ғой "-баев" деген, уот осыны дұрыс жаза алмапты кезінде туу куәлігін бергенде, өзгерту қиын болды ма, әлде көңіл бөлмеді ме білмеймін, әйтеуір інімнің құжатында ол "-баЙев" деп жазулы. Қанша әуреге түсті сол үшін. Енді мамам зейнет жасына жетіп, неше түрлі құжаттарды жинап «уф» деп тапсыруға барса мына қырсық тағы алдынан шығады. «барлығымыздың тегіміз дұрыс, ана баланікі қате (яғни бөтен бала болуы ықтимал дейтін шығар;) жөндеп әкелсін деген. Әуреленіп оны апарса, тағы проблема. Мамамның жеке куәлігіндегі аты мен еңбек кітапшасындағы атында 1 әріп қатесі бар. Қысқасы 2 ай болды, архив ақтарып іздестіріп жатыр. Зейнетке шықты деген аты ғана, 3 айғы зейнетақыдан әлі бір тиын алған жоқ(((
urimtal
сұмдық қой!!! әлгі паспортискалардың қате толтырғанын дәлелдеу керек болып тұр екен ғой.
sammita
иә, сосын еңбек кітапша мен жеке куәліктегі әріп қатесі бар. Оған дейін ешбір жұмыс берушінің қадағалап талап етпеуі қызық екен.
urimtal
кеше басқа бір банкке барып едім. Ол жақтағы фамилиям өзгеріссіз, қаз-қалпында тұр. Есеп-қисап еш кедергісіз жүріп жатыр. Сонда бар кінә компьютерде емес, банк қызметкерлерінде ме деп қалдым.
ErNur
Әрине солай банк қызметкерлері кінәлі. Жаймен айтсаң мойындағысы келмейді. Менде де болған сол жағдай. Қазақша сөйлей алмайтын бір қыз қақшаңдап өзімді кемсіткісі келгеніне жыным келіп басшыларына доклад жазып едім, жаңағы қақшақайдың жылмыңдап кетті
alisha
Өткенде көршім ұлды болып, атын Алмат қойды. «Кім қойды, неге Алмат?» деп қызығушылық танытқанымда: «Ой, құжат толтырғанда проблема болмасын деп, өзгеріссіз жазылатын есімді таңдағанымыз» деп еді.